ՄԱՄ, ՆԱՅԻ՝ ՊԱՊԱՅԻՆ ՏԱՆՈՒՄ ԵՆ

Ալբերտ Մարգարյանը ամուսնացած է, ունի երկու անչափահաս դուստր: Արդեն 20 օր կալանքի տակ գտնվող Մարգարյանը Շանթ Հարությունյանի ընկերն է, նա պատերազմի տարիներին Շանթ Հարությունյանի հետ նույն ջոկատում է եղել, միասին են կռվել : Իսկ այդ օրը` նոյեմբերի 5-ին, Ալբերտը կնոջն ասել էր, որ տղաները գնում են խաղաղ երթին մասնակցելու, ինքն էլ գնացել էր տեսներ, թե ինչ երթ է լինելու: Ալբերտ Մարգարյանի կինը` Աննան երեկ մեր զրույցում նշեց, որ ամուսնու բերման ենթարկվելու լուրը իմացել է անչափահաս աղջիկը, նա «Facebook» սոցիալական ցանցում տեսել է, թե ինչպես են Շանթ Հարությունյանին ոստիկանները բերման ենթարկում. «Մամ՝ նայի Շանթին ինչ են անում, պապային էլ են Շանթի հետ տանում, պապան իրանց հետ ա»,- ասել է աղջիկը մորը` տիկին Աննային: Ալբերտի կինը մեր զրույցում նշեց, որ նոյեմբերի 9-ին քննիչը զանգահարել է իրեն եւ ասել, որ իր ամուսնուն տեղափոխել են «Նուբարաշեն» քրեակատարողական հիմնարկ, որից հետո էլ կինը ամուսնուն սնունդ է տարել: ՔԿՀ-ից ասել են, թե 15 օրից կգաք տեսակցության, սակայն երբ 15 օր հետ գնացել են այս անգամ էլ ասել են, թե նախաքննական մարմինը խիստ վերահսկողություն է սահմանել եւ ամուսնուն տեսակցել չի կարող: Տիկին Աննան նշեց նաեւ, որ տեղեկություն չունի իր ամուսինը պաշտպան ունի, թե ոչ: Միայն մի անգամ քննիչն ասել է, որ Ալբերտը հրաժարվել է հանրային պաշտպանից, իսկ հիմա չգիտի ամուսնու գործով պաշտպան կա ներգրավված, թե ոչ, քննիչը դեռ ոչ մի կապ չի հաստատել իր հետ: Ալբերտ Մարգարյանի կինը մեր զրույցում ասաց, որ իրենք բնակվում են Մասիս քաղաքում, վարձով , իսկ վարձն էլ ամուսնու կալանավորվելուց հետո չեն կարողանում վճարել, միայն ընտանեկան նպաստ են ստանում` 25 հազար դրամ: Ալբերտ Մարգարյանը աշխատել է Մասիս քաղաքի քաղաքապետարանում, սակայն ընտրություններից հետո դուրս է մնացել: Կնոջ խոսքով, Ալբերտը մի քանի տարի է աշխատանք չուներ, սակայն մասնավոր աշխատանքներ էր կատարում եւ ըստ տիկին Աննայի, գոնե այդ կերպ կարողանում էին միայն վարձերը վճարել: «Քույրիկներս են կողքից օգնում, ինչքան կարողանում են, երեխեքի ճանապարհածախսն են հոգում, ինչքան կարողանում են, չգիտեմ ինչ կլինի, ոնց կլինի: Սպասում եմ, տեսնեմ ինչ ընթացք ա ստանում էս գործը, չգիտեմ էլ արդեն` ինչ անեմ, ում դիմեմ: Աղջիկներիցս մեկը Մասիսի դպրոցում է սովորում, 9-րդ դասարանում է, իսկ մյուս աղջիկս Մխիթար Սեբաստացի կրթահամալիրի գեղարվեստի դպրոցում, որն էլ վճարովի է, հիմա չգիտեմ ինչ պիտի անենք. նոյեմբեր ամիսը վճարել ենք, բայց դեկտեմբերը դեռ չգիտեմ ինչպես ենք վճարելու: Հիմա տանը խմորեղեն եմ թխում, վաճառում, մի բան գոնե անում ենք, որ գոյատեւենք, իսկ հետոն դեռ պարզ չի, թե ինչքան կշարունակվի այսպես: Աղջիկներս շատ են կարոտում հորը, մեծ աղջիկս շատ կապված է հոր հետ, արդեն մի քանի օր է չի կարողանում դասի գնալ, ուզում էր դուրս գալ դպրոցից վարձի եւ ճանապարհածախսի պատճառով, բայց քույրիկս ասաց, որ ինքը կօգնի: Ես էլ ոտքս վառել եմ, չեմ կարողանում կրկին այցելել Նուբարաշեն ՔԿՀ: Բնակարանը դեռ չենք ջեռուցում, երեխեքը փոքրիկ սենյակում են նստում, մինչեւ տեսնենք ոնց կլինի, եթե հիմա պլիտան վառենք, ո՞նց տակից դուրս կգանք»,- մեր զրույցում հուզված պատմում էր Ալբերտի կինը: Նշենք, որ Ալբերտ Մարգարյանին մեղադրանք է առաջադրվել ՀՀ քրեական օրենսգրքի 316 հոդվածի 2-րդ մասի հատկանիշներով` «Իշխանության ներկայացուցչի նկատմամբ բռնություն գործադրելը. պատժվում է ազատազրկմամբ հինգից տաս տարի ժամկետով»:

Նոյեմբերի 5-ին Մաշտոցի պողոտայից կալանավորված 26-ամյա Ավետիս Ավետիսյանը, ով նույնպես մեղադրվում է իշխանության ներկայացուցչի նկատմամբ բռնություն գործադրելու մեջ, իրենց ընտանիքի միակ աշխատողն էր: Ավետիս Ավետիսյանը սովորել է Ուկրաինայի պետական համալսարանում, ապա աշխատել է ՀՀ Նախագահի աշխատակազմում, այնուհետեւ Կառավարման ակադեմիայում, ներկայում էլ հրավեր էր ստացել Անանիա Շիրակացու ճեմարանից: Այս մասին երեկ մեր զրույցում նշեց կալանավորված Ավետիսյանի մայրը` տիկին Լյուսյան. «Այդ օրը` նոյեմբերի 5-ին իրեն Անանիա Շիրակացուց կանչել էին, որ աշխատեր այնտեղ` որպես շախմատի ուսուցիչ, մենք չգիտեինք, որ պետք է գնար այդ երթին: Մեր տան աշխատողը մենակ նա էր, հիմա չգիտենք` ինչ կլինի, փորձում ենք համակերպվենք, բայց չի ստացվում: Չենք էլ տեսել Ավետիսին, դեռ չեն թողնում: Իսկ Ավետիսի կինն էլ` Արմինեն, երեխային (28 օրական) արհեստական կեր ա տալիս, չի կարողանում կերակրի հոգեկան ապրումներից»,-նշեց Ավետիսի մայրը: Նա նաեւ ասաց, որ չգիտի իր տղան ճանաչում էր Շանթին, թե ոչ, միայն գիտի, որ Ավետիսը հաճախ է մասնակցել խաղաղ երթերին եւ բողոքի ակցիաներին:

Տաթեւ Խաչատրյան