Ռադիկ Մատիրոսյանը մրցակից կունենա

ԳԱԱ մեխանիկայի ինստիտուտի բաժնի վարիչ, ակադեմիկոս Լենսեր Աղալովյանը երեկ հաստատեց մեր այն տեղեկությունը, թե հնարավոր է ինքը եւս մասնակցի ԳԱԱ նախագահի ընտրություններին: «Այդպիսի հնարավորություն կա, այո»,- ասաց նա: 5 տարի առաջ նույնպես Լենսեր Աղալովյանը մասնակցել էր այդ ընտրապայքարին, սակայն հաղթանակը բաժին էր հասել Ռադիկ Մարտիրոսյանին: Որ վերջինս այս անգամ էլ փորձելու է վերընտրվել, Ակադեմիայում թերեւս ոչ ոք չի կասկածում: Տարիքային սահամանափակում այդ առումով չկա: Չկա նաեւ առաջադրվելու քանակի սահմանափակում: ԳԱԱ անդամները, սակայն, չեն շտապում կանխատեսել, որ հենց նա է վերընտրվելու այդ պաշտոնում` հայտարարելով, որ ԳԱԱ-ում տեղի ունեցող ընտրությունները շատ հաճախ անկանխատեսելի են: Գնահատելով առաջիկա ընտրություններում հաղթելու իր հնարավորությունները` ակադեմիկոս Լենսեր Աղալովյանը մեզ հետ զրույցում նկատեց. «Գիտե՞ք ինչ, այնտեղ կա ադմինիստրատիվ մեծ ռեսուրս, որը շատ փայլուն հիմա օգտագործվում է ինքնավերարտադրության համար: Բոլորի հետ խոսում են պաշտոնական ձեւով, երբ որ այդ իրավունքը չկա` ըստ էության, որովհետեւ նրանք պետք է կազմակերպեն, ոչ թե տանեն քարոզչություն որեւէ անձի նկատմամբ: Խոսքը ղեկավարության եւ նախագահության մասին է»: Այս անգամ ԳԱԱ նախագահի ընտրության ժամանակ քվեարկելու իրավունք ունենալու են նաեւ Ակադեմիայի 41 ստորաբաժանումների լիազոր ներկայացուցիչները, որոնց ձայներն ստանալու ուղղությամբ էլ, ըստ Աղալովյանի, աշխատանքներ են տարվում: Իսկ ԳԱԱ նախագահի ընտրություններին նա պատրաստվում է մասնակցել մասնավորապես հետեւյալ պատճառով: «Ես գտնում եմ, որ Ակադեմիայում փոփոխությունները խիստ անհրաժեշտ են: Ակադեմիան հեղինակազրկվում է եւ մեր ժողովրդի կողմից ընկալվում է որպես մի ինչ-որ բեռ: Բայց այդպես չէ, Ակադեմիան ունի փայլուն գիտնականներ, փայլուն գիտաշխատողներ, եւ նախ նրանց պետք է ներկայացնել հանրությանը: Կան նաեւ կազմակերպչական բնույթի խնդիրներ: Ինձ, օրինակ, չի բավարարում այսօրվա նախագահության կազմը, որը նախկին բյուրոն է եւ, պատկերացրեք, ԳԱԱ ինստիտուտներից ոչ մեկը նախագահության անդամ չէ: Դա խայտառակություն է: Իսկ Ակադեմիայի հիմքը ինստիտուտներն են»,- հայտարարեց ԳԱԱ նախագահի հնարավոր թեկնածուն: Նշենք, որ Գիտությունների ազգային ակադեմիայի մասին օրենքի ընդունումից հետո ընտրությունների ընթացակարգը համապատասխանեցվել է այդ օրենքին` որոշակի փոփոխությունների ենթարկելով: Այդ կարգը, սակայն, ԳԱԱ-ում գաղտնի են պահում` դա բացատրելով կարգի աշխատանքային փաստաթուղթ լինելով, թեեւ որոշ մանրամասներ ընտրությունների վերաբերյալ մենք այնուամենայնիվ պարզեցինք: Այսպես, եթե նախկինում ԳԱԱ նախագահին Ընդհանուր ժողովում ընտրում էին ակադեմիկոսներն ու թղթակից անդամները, ապա այժմ արդեն, ինչպես նշեցինք, այդ ընտրություններին մասնակցում են նաեւ ԳԱԱ ստորաբաժանումների ներկայացուցիչները: Նախագահի պաշտոնում առաջադրվել, սակայն, կարող են միայն ակադեմիկոսներն ու թղթակից անդամները: Նրանք կարող են ինչպես ինքնաառաջադրվել, այնպես էլ նրանց թեկնածությունը հնարավոր է առաջադրեն Ընդհանուր ժողովին ներկա ակադեմիկոսներն ու թղթակից անդամները: Այս կարգը չի փոխվել, եւ որպես կանոն` ԳԱԱ նախագահի պաշտոնում ընտրվողներին առաջադրում են հենց ուրիշները: Նշենք, որ հունիսի 28-ին ԳԱԱ նախագահի ընտրությունից բացի կազմակերպվելու են նաեւ փոխնախագահի ու ակադեմիկոս-քարտուղարի ընտրություններ: Հաջորդ օրը` հունիսի 29-ին, կընտրվեն ԳԱԱ բոլոր 5 բաժանմունքների ղեկավարները` յուրաքանչյուրն իր բաժանմունքում: Նշենք, որ Ակադեմիայում կարծիք կա, թե հայագիտության եւ հասարակական գիտությունների բաժանմունքի ակադեմիկոս-քարտուղար Վլադիմիր Բարխուդարյանը չի վերընտրվելու եւ իր պաշտոնը զիջելու է մեկ ուրիշին: Մեզ հետ զրույցում այս առթիվ նա ասաց, որ իսկապես ինքը չի առաջադրվելու, ուրիշների առաջադրելու դեպքում էլ հրաժարվելու է: Հոգնա՞ծ եք` հարցրինք նրան: Ծերացած եմ` պատասխանեց Վլադիմիր Բարխուդարյանը: «Թերթերն էլ գրում են, որ ԳԱԱ նախագահությունը ծերակույտ է»,- հավելեց ԳԱԱ նախագահության անդամ, 84-ամյա ակադեմիկոսը: Վստահեցրեց, որ ճնշումների ինքը չի ենթարկվել: Ավելին, իր բաժանմունքում ու նաեւ ԳԱԱ ղեկավարը հորդորել, խնդրել են մնալ, բայց ինքը դա բարոյական չի համարում, հատկապես այն դեպքում, երբ ԳԱԱ ինստիտուտների տնօրենները թողնում են իրենց պաշտոնը 65 տարին լրանալուց հետո, ինչպես պահանջում է օրենքը: Բարխուդարյանն ասում էր, թե ինքը տարիներ առաջ եւս փորձել է իր տեղը զիջել երիտասարդներին: Այն ժամանակ էլ, սակայն, խնդրել են մնալ, ու մնացել է: Նշենք, որ ըստ խոսակցությունների` Վլադիմիր Բարխուդարյանին փոխարինելու է Հայաստանի պետական տնտեսագիտական համալսարանի նախկին ռեկտոր, վերջերս ակադեմիկոս դարձած Յուրի Սուվարյանը: Մեզ հետ զրույցում, արձագանքելով այդ տեղեկություններին, Սուվարյանն ասաց. «Ես էլ եմ լսել, որ բաժանմունքում այդպիսի ցանկություն կա: Բայց դեռ մտածում եմ, չգիտեմ»: