Կան պաշտոնյաներ, որոնց անվտանգության լրացուցիչ պահպանման խնդիր գոյություն ունի․ Անդրանիկ Քոչարյան

«Կան պաշտոնյաներ, որոնց անվտանգության լրացուցիչ պահպանման խնդիր գոյություն ունի»․ անդրադառնալով ԱԱԾ նախկին տնօրեն Գեորգի Կուտոյանի մահվան հանգամանքներին եւ այդ համատեքստում այլ ներկա ու նախկին պաշտոնյաների անվտանգությանը՝ այսօր մեր զրույցում այդպիսի տեսակետ հայտնեց Ազգային ժողովի պաշտպանության եւ անվտանգության հարցերի մշտական հանձնաժողովի նախագահ, «Իմ քայլը» խմբակցության պատգամավոր Անդրանիկ Քոչարյանը։

Այսօր տեղի ունեցավ ԱԱԾ նախկին տնօրեն Գեորգի Կուտոյանի հուղարկավորությունը: Զուգահեռաբար 38-ամյա Արդարադատության առաջին դասի պետական խորհրդականի մահվան դեպքն ուսումնասիրող նախաքննական մարմինը տեղեկացրեց, որ Կուտոյանի մարմնի վրա բռնության հետքեր չեն հայտնաբերվել։ Միեւնույն ժամանակ համացանցում շարունակվում են քննարկումները, թե ինչու նման պաշտոնյաների անվտանգությունը չի ապահովվում։ Ստորեւ մեր զրույցը Քոչարյանի հետ․

- Պարո՛ն Քոչարյան, շաբաթ օրը Քննչական կոմիտեն նոր մանրամասներ հայտնեց Կուտոյանի մահվան դեպքի վերաբերյալ: Մասնավորապես, որ դեկտեմբերի վերջերին Կուտոյանը միայնակ այցելել է Պարույր Սեւակ փողոցի վրա գտնվող իր բնակարան, որտեղ ալկոհոլ օգտագործելուց հետո Glock 34 տեսակի ատրճանակից 35 անկանոն կրակոց է արձակել հյուրասենյակի եւ խոհանոցի բաժանարար պատին: Այնուհետեւ, ըստ կոմիտեի, 2020 թ․ հունվարի 16-ին հայրական տան մոտակայքից վարձակալած տաքսիով ուղևորվել է իր բնակարան՝ նախապես ընտանիքի անդամներին տեղեկացնելով հիշյալ բնակարանում երկու-երեք օր հանգստանալու իր մտադրության մասին: Այս եւ նման փաստերը, որոնք արդեն հայտնի են, արդյոք վկայո՞ւմ են ինքնասպանության մասին, թե՞ դեռ վաղ է նման եզրակացություն անելու համար:

- Իմ կարծիքով՝ դեռ վաղ է որեւէ բանի մասին խոսել, եզրահանգումներ անել, առանց փորձաքննությունների ավարտական պատկերն ունենալու։ Պետք է սպասել, թե նշանակված փորձաքննությունները, ինչ արդյունքներ կտան․ առանց դրանց որեւէ եզրահանգում անելը շատ անշնորհակալ գործ է: Այսօր պետք է պարզապես ցավակցել նրա ընտանիքի անդամներին, հարազատներին եւ ամեն ինչ անել, որպեսզի շահարկումների տեղ չլինի, այսինքն՝ հասնել մահվան հանգամանքների լիարժեք բացահայտման:

- Այս դեպքից հետո շատ է խոսվում այն մասին, որ բարձրաստիճան պաշտոնյաների անվտանգությունն ապահովելու կարիք կա, ի՞նչ կարծիք ունենք նման հնարավորության մասին:

- Ես կարծում եմ, որ կան պաշտոնյաներ, որոնց անվտանգության լրացուցիչ պահպանման խնդիր գոյություն ունի, որովհետեւ վերջին հաշվով հիմա բաներ են կատարվում, որ հասարակության մեջ լարվածության եւ հարցականների տեղիք են տալիս։ Կարծում եմ, որ արժե այդ մասին համապատասխան մարմինները մտածեն եւ առաջարկություններ ներկայացնեն, թե ինչ ձեւաչափով պետք է այդ խնդիրը լուծվի:

- Ո՞ր պաշտոնյաներն ունեն անվտանգության խնդիր։

- Բնականաբար, առաջին հերթին դա վերաբերում է ուժային կառույցների եւ կարեւոր, հնչողություն ունեցող քրեական գործերի շրջանակում շատ կարեւոր վկաների անվտանգությունն ապահովելու խնդրին: Այսինքն՝ պետական պահպանության կառույցը, նախաքննական մարմնի առաջարկից ելնելով, պետք է որոշում կայացնի եւ այդ խնդրի հետ առնչվող լուծումներ գտնի:

- Դուք, լինելով Ազգային ժողովի պատգամավոր, հնարավո՞ր է՝ նման պաշտոնյաների անվտանգությունն ապահովելու օրենսդրական նախաձեռնությամբ հանդես գաք:

- Ես կարծում եմ՝ հիմա պետք է մոտենալ անհատական լուծումներով, հետո նոր գտնվի ամբողջական լուծում, եթե անհրաժեշտ լինի՝ նաեւ օրենսդրական: Այս պահին մենք ունենք որոշակի օրենքներ, որոնք կարգավորում են կոնկրետ պաշտոնյաների անվտանգության խնդիրը: Եթե ցանկը մեծացնելու խնդիր պետք է առաջանա, բնականաբար, պետք է ուսումնասիրությունների արդյունքում գալ ինչ-որ եզրահանգումների:

- Եթե հիշում եք, հեղափոխությունից հետո վարչապետ Նիկոլ Փաշինյանը հայտարարեց, որ նախկին իշխանությունների հեռանալուց առաջ ԱԱԾ-ից նյութեր են ոչնչացվել: Հետո հայտարարվեց, որ այդ փաստաթղթերի մեծ մասը վերականգնվել եւ միացվել էին Մարտի 1-ի գործի քննությանը: Ըստ ձեզ՝ հնարավո՞ր է, որ Կուտոյանն առնչություն ունեցած լինի այդ փաստաթղթերի ոչնչացմանը։

- Հիմա բոլորը քննարկում են բազմապիսի վարկածներ: Վարկածների քննարկումը պետք է իրականացնի այն մարմինը, որն իրականացնում է նախաքննությունը: Եվ այդ վարկածների շրջանակում քննության լրիվությունից ելնելով՝ պետք է ուսումնասիրել ամեն ինչ, որովհետեւ այս պահի դրությամբ դեռ պարզ չէ՝ տեղի է ունեցել սպանությո՞ւն, թե՞ ինքնասպանություն: Փորձաքննության եզրակացություններից հետո, երբ որ մահվան հանգամանքները պարզ կդառնան, դրանից հետո կնախանշվի, թե ինչ գործողություններ պետք է իրականացվեն, եւ այդ գործողությունները պետք է վերաբերեն նրա պրոֆեսիոնա՞լ գործունեությանը, թե՞ այլ։ Կառավարությունը հայտարարեց, որ ամեն ինչ անելու է, որպեսզի մահվան հանգամանքներն ամբողջությամբ ուսումնասիրվեն․ դա ամենակարեւոր գործը պետք է լինի նախաքննական մարմնի համար: Բոլոր այսօր քննարկում են, սոցիալական տիրույթն իր վրա է վերցրել նախաքննական մարմնի ֆունկցիաները, բայց պետք է թողել, որպեսզի համապատասխան մարմիններն իրենց պրոֆեսիոնալ ունակությունների եւ հմտությունների շրջանակում կարողանան հասնել լիարժեք բացահայտման:

- Պարո՛ն Քոչարյան, ես նկատի ունեի՝ դուք արդյոք տեղեկություն ունե՞ք, թե նա որքանով կապ ուներ հեղափոխությունից առաջ ԱԱԾ արխիվից փաստաթղթերի անհետանալու հետ:

- Ո՛չ, ես չունեմ այդպիսի տեղեկություն:

Հիշեցնենք, որ հունվարի 17-ին Պարույր Սեւակ փողոցի բնակարաններից մեկում հայտնաբերվել էր ԱԱԾ նախկին տնօրեն Գեորգի Կուտոյանի դին՝ հրազենային վիրավորումով:

Տպել
1901 դիտում

Նոր Նորքում գտնվող 4000 տարեկան ժայռապատկերները վտանգված են. քաղաքագետը ահազանգում է, քաղաքապետի խոսնակը՝ արձագանքում

Շուտով կբեմադրվի փաստավավերագրական ներկայացում՝ նվիրված Մոնթե Մելքոնյանին. նախագիծն իրականացվում է Մոնթեի կնոջ հետ

«Հայի բախտ ասվածն այլևս չար բախտը չէ»

Ակունք համայնքում անցկացվել է «Գեղարքունյաց Ձմեռ -2020» մարզամշակութային միջոցառումը

Արմավիրի ոստիկաններն ապօրինի թմրաշրջանառության դեպք են բացահայտել (տեսանյութ)

Արմավիրի մարզպետը շնորհավորել է եզդիական համայնքին Սուրբ Խըդըր Նաբիի տոնի առթիվ

Իրանի խորհրդարանական ընտրությունները նշմարում են Ռոհանիի իշխանության ավարտը. իշխող ուժի շանսերը փոքր են

Վթար Կապանում. «Հունդայի Սանտաֆե»-ի 46-ամյա ուղևորը մահացել է

Արարատի ծննդօգնության ծառայություններ մատուցող բժշկական հաստատություններում հունվար ամսին ծնվել է 53 տղա եւ 71 աղջիկ

Քաղաքապետարանում տեղյակ չեն, թե Երեւանին նվիրաբերված սեքվոյա հսկա ծառի սերմերը որտեղ են պահվում

Նախագահական նստավայրում կայացել է ռուսական ռոմանսի երեկո՝ նվիրված Մեծ հաղթանակի 75-ամյակին

Նախ ասել են՝ երեխաս աղիքային խնդիր ունի, հետո՝ իբր մահացել է. տարիներ առաջ ծննդաբերած կինը փնտրում է իր աղջկան

Երևան-Սևան ավտոճանապարհին մեքենան բախվել է երկաթե արգելապատնեշներին. 37-ամյա վարորդը մահացել է

Դիլիջանի «Շլորկուտ» հանդամասում 5000 քմ խոտածածկույթ է այրվել. ԱԻՆ

Նոր Նորք վարչական շրջանում ոստիկանության ուժեղացված ծառայություն է իրականացվել

Ոստիկանությունը իդեալականին մոտ ցուցակներ է խոստանում. այս անգամ կհամագործակցեն նաեւ թաղման բյուրոների հետ

Ամփոփվել են Երեւանի 2019թ. բյուջեի եւ զարգացման ծրագրի հաշվետվությունների վերաբերյալ առաջարկներն ու դիտողությունները

Իրանում կորոնավիրուսը հասել է արդեն մայրաքաղաք Թեհրան. երկրում 18 հաստատված դեպք կա

Սահմանադրական փոփոխությունների հանրաքվեի քարոզարշավը Շիրակի մարզ դեռ չի հասել. Արամ Անտոնյան

Հայկ Մարությանն ընդունել է Հայաստանում Վրաստանի դեսպան Գիորգի Սագանելիձեին