«48 ժամվա մեջ իրատեսակա՞ն է Մոսկվայից հասնել Երեւան». ՀՔԾ պետը՝ Գեւորգ Կոստանյանի մասին

Երեկ տեղեկացրել ենք, որ ԱԺ ՀՀԿ խմբակցության նախկին պատգամավոր, նախկին գլխավոր դատախազ Գեւորգ Կոստանյանին Մարտի 1-ի գործով որպես մեղադրյալ ներգրավելու մասին որոշում է կայացվել: ՀՀ Հատուկ քննչական ծառայությունը, առաջնորդվելով ՀՀ քրեական դատավարության օրենսգրքի 203-րդ հոդվածի 1-ին մասի կարգով, նրան առաջարկել է 48 ժամվա ընթացքում ներկայանալ վարույթն իրականացնող մարմին՝ մեղադրանք առաջադրելու համար:

Ավելի ուշ լրատվամիջոցների հետ զրույցում Կոստանյանը հայտարարել է, թե չգիտի՝ ինչով է պայմանավորված այս արհեստականությունն ու հրատապությունը: Կոստանյանը հայտնել է, որ, եթե այս պահին գա, իրեն թույլ չեն տա հետ գնալ, ուստի ինքը Հայաստան կգա իր դասընթացներն ավարտելուց հետո: Ինչպես հայտնի է, Կոստանյանը դասավանդում է ՌԴ դատախազության ակադեմիայում:

ՄԻՊ ինստիտուտի հիմնադրման 15-ամյակին մասնակցելու նպատակով այսօր Ազգային ժողով եկած ՀՔԾ պետ Սասուն Խաչատրյանին փոխանցելով Կոստանյանի խոսքերը՝ լրագրողները հետաքրքրվեցին, թե այդտեղ խնդիր տեսնո՞ւմ է: «Ի՞նչ արհեստականություն, ես չեմ կարող մեկնաբանել պարոն Կոստանյանի ասածները: Դուք ինձ հարցնում եք՝ 48 ժամվա մեջ իրատեսակա՞ն է Մոսկվայից հասնել Երեւան, ես էլ այդ հարցը ձեզ եմ տալիս»,- ասաց Խաչատրյանը:

Հարցին՝ Կոստանյանի չներկայանալու պարագայում ի՞նչ են անելու, արդյո՞ք հետախուզում են հայտարարելու, ՀՔԾ պետը պատասխանեց, որ գործելու են ըստ օրենքի: Երբ լրագրողները պնդեցին հարցը՝ Խաչատրյանը նկատեց. «Եկեք 48 ժամ սպասենք, լա՞վ»:

Սասուն Խաչատրյանը հաստատեց նաեւ, որ Գեւորգ Կոստանյանին առաջադրվելիք մեղադրանքը կապվում է Ալիկ Սարգսյանին առաջադրված մեղադրանքի նկարագրության հետ, այն մասով, որ 2008 թվականին ՀՀ նախագահի օգնական Կոստանյանը Մարտի 1-ի դեպքերից հետո բազմաթիվ փաստաթղթեր կեղծելու մասին ոստիկանությանը հրահանգներ է տվել: Ինչպես հայտնի է, այդ գործով Կոստանյանը որպես վկա հարցաքննվել էր: Լրագրողների հարցին, թե ի՞նչ փոխվեց, որ որոշվեց վկային որպես մեղադրյալ ներգրավել, Խաչատրյանը պատասխանեց.

«Ես հիմա չեմ ցանկանում հատ-հատ ապացույցներին անդրադառնալ, էլի եմ ասում՝ որպես մեղադրյալ ներգրավելու հիմքն ունեցած ապացույցների համակցությունը բավարար համարելն է: Այս պահին է քննիչը բավարար համարել, որ այդ ապացույցները բավարար են պարոն Կոստանյանին որպես մեղադրյալ ներգրավելու համար»:

Ինչպես հայտնի է, Ալիկ Սարգսյանը լրատվամիջոցների հետ զրույցում հերքել է ՀՔԾ առաջադրած մեղադրանքում ներկայացված տեղեկությունները: Հարցին, թե այդ դեպքում ինչպե՞ս են շարունակելու գործի ընթացքը, ՀՔԾ պետը պատասխանեց. «Այսինքն՝ ձեզ թվում է, որ մարդկանց պատասխանատվության են ենթարկում միայն իրենց ցուցմունքների հիման վրա՞…Մարդը պաշտպանվում է, չպաշտպանվի՞»: 

Մարտի 1-ի գործով նախաքննություն իրականացնող մարմնի ղեկավարից լրագրողները հետաքրքրվեցին նաեւ, թե ինչպե՞ս է ստացվում, որ արդեն որերորդ մարդն է ներգրավվում գործում, որը Հայաստանում չէ:

ՀՔԾ պետն ասաց, որ դա, իրոք, խնդիր է: Իսկ ահա հարցին, թե ում թերացումն է դա, Խաչատրյանը այսպես պատասխանեց. «Նորից կրկնեմ՝ որպես մեղադրյալ ներգրավելու համար միայն բարի ցանկությունները շատ քիչ են, պետք է լինեն բավարար ապացույցներ»:

Նա վստահեցրեց, որ գործը փակուղի չի մտնում: «Մեղադրյալները որպես մեղադրյալ ներգրավված են, որոնք խուսափում են, հետախուզում է հայտարարված: Ի՞նչ անենք, դրանից ավելի ի՞նչ կարող ենք անել»,- հարցրեց ՀՔԾ պետը:

«Կարո՞ղ եք երաշխավորել, որ արդարադատությունը նրանց կհասնի»,- հետաքրքրվեց լրագրողներից մեկը. «Իսկ դուք կարո՞ղ եք երաշխավորել, որ արդարադատությունը նրանց կհասնի: Որեւէ մեկը կարո՞ղ է երաշխավորել, որ նրանք անպայման կհայտնաբերվեն: Ես կարող եմ ընդամենը ասել, որ մենք ամեն ինչ կանենք դրա համար: Վարույթ իրականացնող մարմինը հետախուզում իրականացնող մարմին չէ, հետախուզում իրականացնողը ոստիկանությունն է»,- պատասխանեց Սասուն Խաչատրյանը: 

Հիշեցնենք, որ սեպտեմբերի 25-ին ՀՔԾ-ն հաղորդագրություն էր տարածել՝ տեղեկացնելով, որ Մարտի 1-ին տեղի ունեցած իրադարձությունների վերաբերյալ ՀՔԾ-ում ընթացող նախաքննության շրջանակներում ձեռք բերված բավարար ապացույցների համակցության հիման վրա ՀՀ նախկին ոստիկանապետ Ալիկ Սարգսյանին մեղադրանք է առաջադրվել:

ՀՔԾ-ի կողմից հրապարակված հաղորդագրությունում բազմիցս շոշափվում էր Գեւորգ Կոստանյանի անունը, որն այդ ժամանակ զբաղեցնում էր Սերժ Սարգսյանի օգնականի պաշտոնը:

ՀՔԾ հաղորդագրությունում մասնավորապես նշվում էր, որ 2008 թվականի մայիսի 29-ից հուլիսի 2-ն ընկած ժամանակահատվածում «Գեւորգ Կոստանյանն ու Գեւորգ Մհերյանն այցելել են Ալիկ Սարգսյանի աշխատասենյակ եւ ոստիկանության կողմից 2008 թվականի մարտի 1-ի լուսադեմին «Ազատության» հրապարակից նստացույցի մասնակիցներին բռնությամբ տարհանելուն, ցույցը ցրելուն ուղղված գործողություններին օրինական տեսք տալու նպատակով ոստիկանության մի շարք բարձրաստիճան պաշտոնատար անձանց դրդել են հետին ամսաթվով կազմել «Տեղանքի հետազոտում» օպերատիվ հետախուզական միջոցառում իրականացնելու վերաբերյալ փաստաթղթեր: 

Բացի այդ, ըստ վերը նշված հաղորդագրության՝ հաշվի առնելով այն հանգամանքը, որ դեռևս 2008 թվականի մարտի 1-ի առավոտյան ՀՀ ՊՆ զինված ուժերի զինծառայողներին  Հանրապետության հրապարակ տեղափոխած ՊՆ պետհամարանիշներով տրանսպորտային միջոցների եւ Զինված ուժերի թիվ N զորամասի համահավաք գումարտակի անձնակազմի ներկայությունը հրապարակում տեսանկարահանվել ու հետագայում տարածվել է համացանցում, Գևորգ Կոստանյանի դրդմամբ այս փաստը քողարկելու նպատակով հորինվել և վարույթն իրականացնող մարմնին ու փաստահավաք խմբին է ներկայացվել ՀՀ ոստիկանության պետ Հայկ Հարությունյանի կողմից հետին ամսաթվով՝ 2008 թվականի փետրվարի 22-ի թվագրմամբ ստորագրված կեղծ տեղեկություններ և գրառումներ պարունակող թիվ 313-Ա հրամանը:

Ըստ այդ հրամանի՝ իբրև ՀՀ ոստիկանության զորքերի շտաբի պետի տեղակալ, նույն ինքը օպերատիվ բաժնի պետ Արթուր Դաստակովի գլխավորությամբ ստեղծվել է ոստիկանության 18 ծառայողներից բաղկացած խումբ, որը տեղակայվել է ոստիկանության զորքերի թիվ N զորամասում և հսկողություն է իրականացրել հիշյալ զորամասի զինծառայողների բարոյահոգեբանական վիճակի և ծառայության նկատմամբ: Դա այն դեպքում, երբ 18 հոգանոց խումբ Արթուր Դաստակովի գլխավորությամբ իրականում գոյություն չի ունեցել:

ՊՆ պետհամարանիշներով տրանսպորտային միջոցների՝ 2008 թվականի մարտի 1-ի առավոտյան Հանրապետության հրապարակում գտնվելու փաստը քողարկելու նպատակով հորինվել և վարույթն իրականացնող մարմնին ու փաստահավաք խմբին է ներկայացվել կեղծ վարկած, թե իբր ՊՆ պետհամարանիշներով ավտոմեքենաները ոստիկանության զորքերի թիվ N զորամասի անձնակազմին են տեղափոխել ծառայության ընթացքում: 

Բացի այդ, 2008 թվականի հուլիսի 2-ից հետո ընկած ժամանակահատվածում ՀՀ նախագահի օգնական Գևորգ Կոստանյանը և ՀՀ ոստիկանության պետի տեղակալ Գևորգ Մհերյանը մարտի 1-ին և 2-ին Երևան քաղաքում տեղի ունեցած իրադարձությունների ժամանակ զինված ուժերի ապօրինի մասնակցության, նրանց կողմից հրազենի կիրառման նախապես չխոստացված պարտակումը կազմակերպելու դիտավորությամբ ոստիկանության զորքերի շտաբի պետ Գեղամ Պետրոսյանին հանձնարարություն են տվել զինված ուժերի ներգրավվածությունը հերքելու, նրանց կողմից կատարված գործողությունները ոստիկանության զորքերին վերագրելու նպատակով զրուցել ենթակա անձնակազմի հետ՝ հրահանգավորելով նրանց ապագայում քրեական գործով տալ այնպիսի ցուցմունքներ, որոնցով հնարավոր լինի հերքել զինված ուժերի ներգրավվածությունը հիշյալ դեպքերին:

Հետագայում արդեն՝ նշված հանգամանքների շուրջ գործուն միջոցներ ձեռնարկելու, կատարվելիք գործողությունները պլանավորելու համար Գեղամ Պետրոսյանը ՀՀ ոստիկանության վարչական շենքում և ՀՀ նախագահի նստավայրում Գևորգ Կոստանյանի ու Գևորգ Մհերյանի հետ բազմիցս հանդիպումներ է ունեցել, որոնց ընթացքում պարբերաբար ստացել է հանձնարարություններ ու ցուցումներ: 

Գևորգ Կոստանյանի և Գևորգ Մհերյանի կողմից տրված ցուցումները կատարելու ընթացքում Գեղամ Պետրոսյանը ՀՀ հատուկ քննչական ծառայությունում հաճախակի հանդիպել է Վահագն Հարությունյանի հետ և նրանցից ստացել հանձնարարություններ:

Արդյունքում, սույն քրեական գործով 2008 թվականի մարտի 5-ի որոշմամբ նշանակված դատաձգաբանական փորձաքննության կատարման ընթացքում Վահագն Հարությունյանը և քննչական խմբի քննիչ Արմեն Հակոբյանը ՀՀ հատուկ քննչական ծառայություն են հրավիրել ՀՀ ոստիկանության զորքերի հրամանատարի տեղակալ, նույն ինքը՝ շտաբի պետ Գեղամ Պետրոսյանին և հայտնել, որ ՀՀ զինված ուժերի մասնակցության ու վերջիններիս կողմից հրազենի ապօրինի գործադրման իրական հանգամանքները թաքցնելու նպատակով անհրաժեշտ է դեպքի վայրի տարբեր տեղամասերից զննությամբ հայտնաբերված տարբեր տեսակի հրազեններից կրակված, իրեղեն ապացույց հանդիսացող շուրջ 1000 պարկուճները փոխարինել ՀՀ ոստիկանության զորքերի սպառազինության մեջ մտնող նույն տրամաչափի այլ հրազեններից կրակված պարկուճներով: 

Տպել
2503 դիտում

Նիկոլ Փաշինյանի գլխավորությամբ տեղի է ունեցել ՔՊ նախաձեռնող խմբի նիստ․ հայտնի է՝ ինչ է քննարկվել

ՀՀ-ն որևիցե բան չի պատրաստվում զիջել, ստոր շահարկումներ են․ Ալեն Սիմոնյանը՝ Տավուշի շուրջ պտտվող լուրերի մասին

Սուրեն Պապիկյանը մասնակցել է ռազմական տեխնիկայի ցուցադրությանը և հետևել մարտական հրաձգությանը (լուսանկարներ)

Ինչպես կասեր դասականը՝ «յա՜, իրո՞ք». Արշակ Կարապետյանը «գողացել» է ՀՀԿ-ի ծրագիրը

ՌԴ դեսպանը սիրում էր Ջերմուկում հանգստանալ, լուսանկար էր հրապարակել, բա թող գա ասի, որ դա ՀԱՊԿ-ի տարածք է․ Սիմոնյան

Երբ կկայանա Ալեն Սիմոնյանի և Սահիբա Գաֆարովայի հաջորդ հանդիպումը․ ԱԺ նախագահը մանրամասնել է՝ ինչ է քննարկվել մարտի 22-ին

Վիճաբանություն և ծեծկռտուք «Ռիո Մոլլ»-ի հարևանությամբ. կռվի մասնակիցների մեծ մասը անչափահասներ են, կա վիրավոր

Ռուսաստանը նպատակ է դրել հեղաշրջում իրականացնել Հայաստանում, առաջիկայում քայլերը կսրվեն. Առաքելյան

Դասարաններում կկրճատվի աշակերտների թիվը․ իրականացվել են գնահատման համակարգի փոփոխություններ

Բախվել են «Նիսսան»-ն ու «Ֆորդ տրանզիտ»-ը․ վերջինս նաև երկաթե արգելապատնեշներին է հարվածել, տուժածները հիվանդանոցում են

ԱՄՆ-ը Ռուսաստանի Դաշնությանը մանրամասն տեղեկատվություն է տրամադրել ահաբեկչության սպառնալիքի մասին․ Սպիտակ տուն

Երևանի գլխավոր հատակագիծը կլինի թվայնացված փաստաթուղթ․ Տիգրան Ավինյանը տեսակապով հարցեր է քննարկել Քրիս Չոայի հետ

Շահրամանյանը շարժվում է Բակո Սահակյանի ու Սերժ Սարգսյանի պահվածքով, պետք է ուշադրության կենտրոնում լինի. Իոաննիսյան

96 խնամատար ընտանիքում դաստիարակություն է ստանում 152 երեխա․ այս ինստիտուտի զարգացման աշխատանքները շարունակվում են

Հայ-ռուսական հարաբերություններում առկա վիճակը լավատեսություն չի ներշնչում․ ինչում է մեղադրել Լավրովը ՀՀ ղեկավարությանը

Մինչև ապրիլի 5-ը կատարված իրավախախտման տուգանքի 50 տոկոսը վճարելու դեպքում պարտավորությունը կհամարվի կատարված

Չստացված չեկիստ, հանգիստ վեր ընկիր տեղդ ու ջանդ յուղիր. Մեհրաբյանը՝ Շահրամանյանին

200 հոգու հրկիզման սահմռկեցուցիչ դրվագն ունենալով իր անցյալում՝ խորհուրդ է տալիս Հայաստանի անվտանգության մասին. Սաֆարյան

Հավերժ ճակատներին Եվլախ դաջածներն էլի ակտիվացան. Հարություն Մկրտչյանը՝ Սամվել Շահրամանյանի մասին

Բախվել են շտապօգնության ավտոմեքենան և «Մերսեդես»-ը

Աֆղանստանում 5․7 մագնիտուդ ուժգնությամբ երկրաշարժ է տեղի ունեցել

Խմբի կազմում ապօրինի կերպով զենք-զինամթերք են ձեռք բերել և իրացրել․ խուզարկություններ Երևանում և Գողթանիկում (լուսանկար)

Մեկնարկել է բարձրագույն կրթություն չունեցող մասնագետների արտահերթ կամավոր ատեստավորումը

Եվրոպական խորհրդի քաղաքական և անվտանգության հարցերով կոմիտեի անդամները կայցելեն Հայաստան

Նոր Հաճնի կամրջի վրա փոսային նորոգման աշխատանքներ են իրականացվում․ երբ կավարտվեն

Հայտնի են Արթուր Աբրահամի հոր՝ Գրիգոր Աբրահամյանի հոգեհանգստի և հուղարկավորության վայրն ու օրերը

Վարդենյաց լեռնանցքը դժվարանցանելի է կցորդիչով բեռնատարների համար

Վարչապետի գլխավորությամբ քննարկվել է «Հայփոստ»-ի զարգացման ռազմավարության նախագիծը․ ինչ է հանձնարարվել

29.94 տոննա մարդասիրական օգնություն՝ 1․5 մլն անձի․ ինչ է ուղարկել Հայաստանի կառավարությունը Գազա

Իրականացվել է ոչ պատշաճ հետազոտություն․ պարզվել է 20-ամյա հղի կնոջ մահվան պատճառը, մեղադրանք է ներկայացվել ԲԿ-ի 3 բժշկի

Ճամբարակի սննդի օբյեկտի գործունեության կասեցումը վերացվել է

Երևանի ավագանու ընտրություններից հետո ԿԸՀ վարկանիշն աճել է․ ներկայացվել են ՄՀԻ-ի հետազոտության արդյունքները

Հայաստանի և Վրաստանի խորհրդարանների գիտության ու կրթության հարցերով հանձնաժողովները համատեղ հայտարարություն են ստորագրել

Արարատի կոնյակի գործարանում վերահսկողություն կիրականացվի․ ՍԱՏՄ-ն ստացել է Բելառուսի առողջապահության նախարարության նամակը

Հայ-վրացական հարաբերությունները ռազմավարական մակարդակի են․ Ռուբինյանն ընդունել է Վրաստանի խորհրդարանի պատվիրակությանը

Ինչ փոփոխություններ է արձանագրել տարադրամի շուկան մարտի 28-ին

Սերգեյ Նարիշկինը այց է կատարել Հյուսիսային Կորեա

Անցած մեկ օրում ՀՀ ավտոճանապարհներին վթարների հետևանքով 3 մարդ զոհվել է, 29-ը՝ վիրավորում ստացել

«Միր» քարտերն արգելելը հավասարակշռված որոշում է, չպետք է շրջանցենք սանկցիաները. Թունյան

Հայկ Մարությանը նոր կուսակցություն է հիմնում