Ալավերդու ԲԿ տնօրենի պաշտոնի շուրջ աղմուկը կարող է հասնել դատարան. հավակնորդը մրցութային կարգի իր մեկնաբանությունն ունի

Վերջին օրերին Լոռու մարզի «Ալավերդու բժշկական կենտրոն»-ի տնօրենի ընտրության շուրջ խոսակցությունները չեն դադարում: Մրցույթի մասնակից վիրաբույժը համարում է, որ իր նկատմամբ անարդար են վարվել եւ պատրաստվում է դիմել դատարան, իսկ նրա նախկին գործընկերները չեն պատկերացնում նրան իրենց կենտրոնի տնօրենի պաշտոնում:

Հոկտեմբերի 8-ին Լոռու մարզպետարանում տեղի է ունեցել «Ալավերդու բժշկական կենտրոն»-ի տնօրենի թափուր պաշտոնի մրցույթ: 3-րդ եւ վերջին փուլում հայտնված Ստեփանավանի բժշկական կենտրոնի վիրաբուժական բաժնի վարիչ, Վանաձորի բժշկական կենտրոնի վիրաբույժ Գեւորգ Ազարյանը այդ փուլում չի ստացել հանձնաժողովի անդամների բավարար ձայները, եւ հաղթող չի ճանաչվել, մրցույթը չեղյալ է համարվել: 3-րդ փուլ հասած միակ մասնակիցը պատրաստվում է դատարան դիմել: Մինչ այդ, հանձնաժողովի որոշումը բողոքարկելու մասին դիմում է գրել Լոռու մարզպետին: Այսօր լրացել է պատասխանի համար սահմանված վերջնաժամկետը: Ըստ Ազարյանի, իրեն զանգահարելու փոխարեն՝ Լոռու մարզեպատարանի կայքում հրապարակվել է մարզպետի հրամանը՝ հանձնաժողովի որոշումը թողնել անփոփոխ եւ մրցույթը չեղյալ համարել:

«Վաղը կամ մյուս օրը կդիմեմ Վարչական դատարան, նաեւ պատրաստվում եմ հաղորդում տալ դատախազություն՝ մարզպետի կողմից պաշտոնական դիրքի չարաշահման կապակցությամբ»,- մեզ հետ զրույցում նշեց Գեւորգ Ազարյանը՝ ավելացնելով, որ փաստաթղթերը գրեթե պատրաստ են, վաղը նաեւ կվերցնի հանձնաժողովի եւ մարզպետի որոշումները:

Բժշկական կենտրոնի թափուր պաշտոնի մրցույթին մասնակցելու հայտ ներկայացրածները 4-ն էին՝ գործող տնօրեն Ստեփան Մոսինյանը, Ստեփանավանի բժշկական կենտրոնի վիրաբուժական բաժնի վարիչ Գեւորգ Ազարյանը, Վանաձորի թիվ 5 պոլիկլինիկայի քիթ-կոկորդ-ականջաբան Անուշ Իսպիրյանը եւ «Ալավերդու բժշկական կենտրոն»-ի փոխտնօրեն Հովիկ Ավետիսյանը: 3-րդ փուլ է անցել մասնակիցներից միայն Գեւորգ Ազարյանը, որի խոսքով, ինքն իրականում հաղթել է, պարզապես մարզպետը միտումնավոր չի ցանկանում նշանակել: 

Գեւորգ Ազարյանը 2011-2016 թթ. աշխատել է «Ալավերդու բժշկական կենտրոն»-ում՝ որպես վիրաբույժ, այնուհետեւ՝ բաժանմունքի վարիչ, սակայն տնօրենի հետ հայացքների ու աշխատաոճի խնդիրներ են ունեցել, աշխատանքից դուրս է եկել: Կենտրոնի հիվանդանոցային գծով փոխտնօրեն, մրցույթի մասնակից Հովիկ Ավետիսյանի կարծիքով՝ տվյալ վիրաբույժը չունի այն հատկանիշները, որոնք անհրաժեշտ են՝ իրենց հիմնարկը տնօրինելու համար: Այդ հատկանիշներից ամենակարեւորը, ըստ նրա, զարգացման ծրագրեր կազմելու եւ ֆինանսական գործունեություն ծավալելու հմտություններն են:

«Մենք քաջ ծանոթ ենք իր տնտեսական գործունեություն ծավալելու հնարավորություններին, վերջինս իր անձնական կյանքում ֆինանսական խնդիրներ է ունեցել: Մտավախություն ունենք, որ չի կարողանա մեր տնտեսությունը կառավարել»,- նշեց Ավետիսյանը: «Ճիշտ չէ ինչ-որ ձեւերով հարցերին պատասխանելը եւ դառնալ տնօրեն մի կազմակերպությունում, որտեղ 250 մարդ է աշխատում»,- հավելեց նա: Ալավերդու բժշկական կենտրոնի Մանկաբարձագինեկոլոգիական բաժանմունքի վարիչ Լյուդա Մկրտումյանը նույնպես նախկին գործընկերոջը չի պատկերացնում նման պաշտոնում: Վերջինիս հետ աշխատել է, մի շարք վիրահատությունների մասնակցել: «Սովորաբար լավ բժիշկները լավ կազմակերպիչ չեն լինում»,- իր վերաբերմունքն այսպես է ներկայացնում Լյուդա Մկրտումյանն՝ ավելացնելով, որ որպես ընկերոջ, բժշկի նրան ընդունում է, սակայն որպես տնօրենի՝ ոչ:

Խոսակցությունների կիզակետում հայտնված Գեւորգ Ազարյանն էլ շարունակում է պնդել. մրցույթի 3-րդ փուլն ընդհանրապես կարեւոր չէ, 2 փուլերը միայն ինքն է անցել, այսինքն՝ հաղթել է: Ազարյանի պնդմամբ՝ 3-րդ փուլը նախատեսել են նրա համար, որ նախորդ փուլերում մի քանի հոգի անցնելու դեպքում այդկերպ լավագույնին ընտրեն: Քանի որ մենակ է անցել, պարարտ հող է ստեղծվել՝ խախտումների, կողմնապահության համար:

Մամուլում շրջանառվող այն տեղեկություններին էլ, թե մրցույթում հաղթած անձին Լոռու մարզպետը փորձում է չնշանակել, քանի որ այդ պաշտոնը նախատեսված է Առողջապահության նախարարի մտերիմի համար, Ազարյանը պատասխանեց, որ ինքը նման բան չի ասել, պարզապես նշել է, որ անարդար որոշում է կայացվել: «Միտումնավոր ինձ մերժել են, քանի որ իրենց մարդը չէի»,- ասաց նա: Իսկ թե ով էր «իրենց մարդը», պատասխանում է կարճ. խոսակցությունների մակարդակին իջնել չի ցանկանում:

Ինչպես պատմեց մրցույթի մասնակից վիրաբույժը, հանձնաժողովի անդամները պարզաբանել են, որ ծրագիրն իրենց դուր չի գալիս, մանրամասն թվեր չեն ներկայացվում, մինչդեռ վերջինիս կարծիքով՝ դրանց տիրապետել չէր կարող, եթե դեռ տնօրեն չի, այդ ինֆորմացիան որտեղից: Հետո էլ ինքը ոչ մի տեղ չի կարդացել, թե ծրագիրն ինչ մեխանիզմով պետք է գրվեր:

«Ծրագրի հիմնական մեխն այդ հիմնարկում կոռուպցիայի բացահայտման եւ վերացմանն էր ուղղված, որն ամբողջությամբ թաթախված է կոռուպցիայի մեջ»,- նշեց Գեւորգ Ազարյանը:  

Նկատենք, որ ՀՀ կառավարության 992-Ն որոշումը, որով սահմանված կարգով էլ անցկացվում է բուժհաստատության տնօրենի թափուր պաշտոնի մրցույթը, չի նախատեսում դեպք, երբ մրցույթի երրորդ փուլը կարող է լինել ոչ պարտադիր, ինչը պնդում է պաշտոնի հավակնորդներից Գեւորգ Ազարյանը ու այդ փուլի անցկացումը այլ կերպ մեկնաբանում: Կարգում նշվում է, որ մրցույթն անցկացվում է երեք փուլով: Մասնակիցները նախ անցնում են թեստավորման փուլը: Առաջադրանքները կատարելուց հետո մասնակիցը հաջորդ` հարցազրույցի փուլ է անցնում՝ առաջադրանքների առնվազն 90 տոկոսին ճիշտ պատասխանելու դեպքում: 2-րդ փուլում յուրաքանչյուր մասնակցի հետ հարցազրույցն արձանագրվում եւ ձայնագրառվում է: Այնուհետեւ հարցատոմսերի առնվազն 4 հարցերի պատասխանները ճիշտ գնահատվելու դեպքում՝ մասնակիցն անցնում է մրցույթի երրորդ փուլ, որտեղ նրա կողմից բանավոր կարգով ներկայացվում է կազմակերպության զարգացման նախնական ծրագիրը: Վերջում անցկացվում է փակ գաղտնի քվեարկություն: Հանձնաժողովի յուրաքանչյուր անդամ քվեարկում է «կողմ» կամ «դեմ»:

Անի Ավագյան

Տպել
2316 դիտում

Փոխվարչապետ Մհեր Գրիգորյանն ընդունել է Միջազգային ֆինանսական կորպորացիայի տարածաշրջանային ղեկավարին

Հայաստանի և Ռուսաստանի քննչական կոմիտեների նախագահների հանդիպման ընթացքում ստորագրվել է 2 փաստաթուղթ

Արայիկ Հարությունյանը կմասնակցի ՅՈՒՆԵՍԿՕ-ի գլխավոր համաժողովի 40-րդ նստաշրջանին

16 տարում Եվրադատարանը Թուրքիային պարտավորեցրել է 51․2 մլն դոլար փոխհատուցում վճարել

Նորավան գյուղում այրվել են մոտ 20 հա խոտածածկույթ և պտղատու ծառեր

Խաշմանյանի օգնականներն ազգային թիմում հայտնի են

Գողացել էին Եղվարդում գտնվող, վարելահողով անցնող մի քանի հարյուր մետրանոց խողովակաշարը

Փարիզյան սելֆի. վարչապետը, Ֆրանսիայի նախագահն ու Ֆրանկոֆոնիայի ՄԿ գլխավոր քարտուղարը

Վարչապետի հերթական սելֆին՝ Ֆրանսիայից. այս անգամ՝ ՄԱԿ-ի գլխավոր քարտուղարի հետ

Նիդերլանդների Թագավորության նորանշանակ դեսպանն իր հավատարմագրերի պատճենը հանձնեց ԱԳ նախարարի տեղակալին

Հրշեջ-փրկարարները մարել են խոտածածկ տարածքներում բռնկված հրդեհները՝ ընդհանուր ընդգրկելով մոտ 32 հա տարածք

Վրաստանը կստանձնի Եվրոպայի խորհրդի նախագահությունը

Վարչապետ Նիկոլ Փաշինյանը մասնակցել է Էմանուել Մակրոնի անունից տրված պաշտոնական ընդունելությանը (լուսանկարներ)

Վարչապետի որոշմամբ Աննա Վարդապետյանն ազատվել է փոխնախարարի պաշտոնից

Անձրեւի ժամանակ ասֆալտապատված ճանապարհի վրա արդեն փոսեր են առաջացել

Ըմբիշ, չեմպիոն եւ ԱԺ պատգամավոր Արսեն Ջուլֆալակյանը 4 գոտեմարտում 4 հաղթանակ է տարել

Արվեստի ու երաժշտական դպրոցների, ինչպես նաեւ մարզադպրոցների աշխատողների աշխատավարձը կբարձրանա. Երեւանի բյուջե-2020

Վանաձոր քաղաքի 37-ամյա մի բնակչի տանը ոստիկանները 4 կգ մարիխուանա են հայտաբերել (տեսանյութ)

Բարձր մակարդակով ընդգծվել է՝  ԱՄՆ-ն շահագրգռված է հայկական սահմանների անվտանգությամբ. Մանվել Սարգսյան

15-ամյա Էրիկ Սահակյանը որոնվում է որպես անհետ կորած