Քննությանը ներգրավվել է նաեւ ԱԱԾ-ն. վարկածներ են առաջ քաշվում

Տպագրվել է «Հայկական Ժամանակ» օրաթերթի՝ 2006 թվականի սեպտեմբերի 8-ի համարում

Հարկային պետական ծառայության օպերատիվ-հետախուզական վարչության պետ Շահեն Հովասափյանի սպանության փաստի առիթով հարուցված քրեական գործի օպերատիվ-հետախուզական գործառույթները հանձնարարված են ՀՀ ազգային անվտանգության ծառայությանը: Հովասափյանի սպանության գործի քննության ընթացքի վերաբերյալ այս եւ մի քանի այլ հանգամանքներ մեզ հայտնի դարձան իրավապահ մարմիններին մոտ կանգնած մեր աղբյուրներից: Այսօրինակ քրեական գործերով օպերատիվ-հետախուզական գործառույթները, որպես կանոն, իրականացնում է ոստիկանությունը: Իսկ ԱԱԾ-ին քննությանը ներգրավում են միայն այն դեպքում, երբ քրեական գործում առկա են ազգային անվտանգությանն առնչվող խնդիրներ:

Այսինքն, ԱԱԾ-ի ներգրավվումը Հովասափյանի գործին չի կարող որպես սովորական երեւույթ ընկալվել: Ավելին, ըստ մեր ունեցած տեղեկությունների, անձամբ Ռոբերտ Քոչարյանն է հանձնարարել, որ Հովասափյանի սպանության գործի քննության օպերատիվ-հետախուզական մասն իրականացնի հենց ԱԱԾ-ն: Այս մոտեցումը իրավապահ համակարգում ընկալվել է որպես Ռոբերտ Քոչարյանի կողմից ոստիկանությանը չվստահելու անմիջական դրսեւորում: Իհարկե, ոստիկանությունը պաշտոնապես շարունակում է մասնակցել քննությանը, սակայն այդ ամենն ավելի շատ ձեւական բնույթ է կրում: Այն վարկածը, որ Հովասափյանի սպանությունը կարող է ներիշխանական, ավելի ճիշտ` ներկլանային բախումների արդյունք լինել, թերեւս ամենաիրատեսականն է:

Հովասափյանի սպանությունից հետո բոլորը սկսեցին խոսել այն մասին, որ հատկապես նա է եղել ՀՊԾ-ի ստվերային ղեկավարը, եւ այդ կառույցի գործունեության հարցում նրա խոսքը եղել է որոշիչ: Իսկ նրա միջոցով Հայաստանում իրականացվել է խոշոր բիզնեսի «քվոտավորումը»: Միամտություն կլիներ կարծել, թե իրավապահները սպանության բացահայտմանն ուղղված իրենց քայլերը կիրականացնեն հենց այս վարկածը «մշակելով»: Վերջիններս այժմ ուսումնասիրում են Շ. Հովասափյանի գործունեության կոնրետ դրվագներ: Իրավապահ մարմիններին մոտ կանգնած մեր աղբյուրները նույնիսկ ինչ-որ կոնկրետ հակասության պատմություն են մատնանշում: Շուրջ մեկ տարի առաջ Հովասափյանի եւ Հարկային պետական ծառայության մեկ այլ ղեկավար անձի միջեւ հակասություններ են ծագել, սակայն մեր աղբյուրները չեն հստակեցնում, թե հատկապես ում հետ:

Փոխարենը նշում են, որ Հովասափյանը պնդել է, որպեսզի իր «հակառակորդը» պաշտոնանկ արվի: Հովասափյանի հետ հակասությունների մեջ մտած ՀՊԾ պաշտոնյային հաջողվել է պահպանել իր պաշտոնը` շնորհիվ կառավարությունում ունեցած իր հովանավորների: Չնայած արտաքուստ կոնֆլիկտը համարվել է փակված, բայց գործնականում հակասությունները չեն վերացել եւ պարբերաբար զգացնել են տվել: Ավելին, այն վարկածը, որ Հովասափյանի սպանությունը կարող է պայմանավորված լինել նրա` անձնական բիզնեսն ընդլայնելու ցանկությամբ, նույնպես իրատեսական է եւ կրկին կապվում է այս պատմության հետ: Այլ կերպ ասած, Հովասափյանների ընտանեկան բիզնեսը սկսել է ընդլայնվել, եւ, բնականաբար, այդ ընդլայնումը տեղի է ունեցել մեկ ուրիշի հաշվին:

Հենց այս ամենի արդյունքում էլ ծագել են վերը նշված հակասությունները: Ինչպես արդեն նշեցինք, կառավարության ազդեցիկ դեմքերից մեկի միջամտությամբ հակասությունը սառեցվել է: Սակայն այստեղ ամենակարեւոր գործոնը եղել է այն, որ այդ «բանակցությունների» արդյունքում, փաստորեն, Հովասափյանի բիզնեսի ընդլայնումը «հաստատվել» է: Այսինքն, Հովասափյանից այլեւս հետ չեն պահանջել վերցվածը, իսկ վերջինս համաձայնել է այլեւս չպահանջել հակառակ կողմի պաշտոնանկությունը: Այս ամենը, կրկնում ենք, եղել է մոտ մեկ տարի առաջ: Բայց քննչական խումբը կարծում է, որ հատկապես վերջին երկու ամիսների ներքաղաքական զարգացումներին զուգընթաց, վերը նշված սառեցված կոնֆլիկտը կարող էր նորովի թարմանալ:

Մեր տեղեկություններով, Հովասափյանի սպանությունը քննող քննչական խումբը նաեւ սկսել է ուսումնասիրել ՀՊԾ-ի օպերատիվ-հետախուզական վարչության վերջին ամիսների գործունեության արդյունքները: Հովասափյանի ղեկավարած վարչությունը այս տարվա առաջին կիսամյակում ստուգումներ է անցկացրած եղել մի քանի խոշոր ձեռնարկություններում: Կան նաեւ ձեռնարկություններ, որոնցում ստուգումները նոր են սկսվել եւ ընթանում են: Մեր աղբյուրը ձեռնպահ մնաց կոնկրետ ընկերությունների անուններ տալուց` նկատելով, որ գրեթե բոլոր խոշոր ձեռնարկություններում ՀՊԾ-ի ստորաբաժիններից մշտապես հենց օպերատիվ-հետախուզական վարչությունն է ստուգումներ անցկացնում:

Ամեն դեպքում, հիմա արդեն ակնհայտ է, որ քննչական մարմինները ստուգում են քիչ հավանական վարկածները: Սա, թերեւս, հասկանալի է, քանի որ խիստ հավանական վարկածներ քննելու հնարավորություն նրանք չունեն: Սա էլ իր հերթին նշանակում է, որ մեծ հավանականությամբ Հովասափյանի սպանությունը կմնա չբացահայտված:

Վահագն Հովակիմյան