Զարգացման շոկային տեմպեր. ՀՀ և Չինաստանի վարչապետերը մեծամասշտաբ համագործակցության պայմանավորվածությունների են հասել

Հայաստանցի լրագրողներին Չինաստան ճանապարհելուց առաջ, երբ ՀՀ-ում Չինաստանի դեսպանատան ներկայացուցիչը մի փոքրիկ անկետա էր ներկայացնում իր երկրի մասին, հայտարարեց, թե Չինաստանում փոփոխություններն այնքան արագ են տեղի ունենում, որ երբ իրենք` դիվանագիտական կորպուսի ներկայացուցիչները, մի երկու տարով բացակայում են երկրից, վերադառնալուց հետո տեւական ժամանակ փորձում են ադապտացվել այդ փոփոխություններին: Չինաստանն իսկապես զարգանում է ապշեցուցիչ արագ տեմպերով:

Պեկին. 3 օրում` երկնաքերի մի հարկ

20 միլիոն բնակչությամբ Չինաստանի մայրաքաղաք Պեկինը մի մեծ մրջնանոցի է նման, որտեղ շարժը կարծես չի դադարում: Թվում էր, թե այսքան բնակչություն ունեցող քաղաքն անհնար է միշտ մաքուր պահել: Որեւէ թաղամասում, սակայն, լիքը աղբարկղ կամ աղբակույտ, չմաքրված փողոց չհանդիպեց: Բայց պարզվում է` Չինաստանի իշխանություններն այս ուղղությամբ նոր ծրագիր ունեն, որից, ի դեպ, քաղաքացիները, ըստ էության, խուճապի էին մատնվել: Այս աշնանից երկրի բոլոր բնակավայրերի աղբամանների վրա տեղադրվելու են տեսախցիկներ, իսկ քաղաքաքցիները աղբամանները բացելու էլեկտրոնային քարտ պիտի ունենան: Որոշվել է, որ աղբը պիտի տեսակավորվի համապատասխան աղբամանների մեջ ու եթե հանկարծ որեւէ քաղաքացի սխալվի ու համապատասխան աղբը այլ աղբաման գցի` խոշոր տուգանքների է ենթարկվելու սխալ տեսակավորման համար:  

Պեկինը ու ընդհանրապես ողջ Չինաստանը, աչքի է ընկնում նաեւ իր կանաչով: Այս երկրում ամեն հնարավոր վայրում ծառ ու ծաղիկ է տնկվում: Ընդ որում, ծառերը տնկարաններում հնարավորինս երկար են աճեցնում ու վերատնկելիս դրանք արդեն բավական մեծ են լինում: Այդ կերպ Չինաստանը փորձում է լուծել օդի աղտոտվածության հարցը:

Պեկինում կան ե՛ւ խրյուշչովյան ժամանակների շենքեր ե՛ւ ստալինյան ե՛ւ ժամանակակից ամերիկյան ոճի երկնաքերներ, իսկ պատմական կենտրոնը մի այլ հմայք ունի: Շինարարությունն այստեղ բում է ապրում: Էքսպրես գնացքներով ճամփորդելիս յուրաքանյուր մի քանի կիլոմետրը մեկ կարելի է տեսնել, թե ինչպես են ամբողջական քաղաքներ բարձրանում: Բարձրահարկերի մի հարկը կառուցվում է ընդամենը երեք օրում: Ամբողջական գյուղեր հողին են հավասարեցվում, բնակիչներին տեղափոխում են այդ բարձրահարկերը, իսկ հողերն օգտագործում բացառապես գյուղատնտեական նպատակներով: Այս տեմպերով այդ երկրում գյուղ հասկացությունն առաջիկայում թերեւս կվերանա:

Չինացիները լիարժեք կառավարում են նաեւ իրենց ջրային ռեսուրսները: Մեծ պուրակներում, որոնք մի քանի հարյուր կամ հազար հեկտար տարածք են զբաղեցնում, ասֆալտի կամ սալիկի փոխարեն ամուր սպունգ է` հատուկ տեխնոլոգիաներով: Անձրեւների ժամանակ սպունգը իր մեջ է ներծծում ամբողջ ջուրը ու կենտրոնացնում ջրավազաններում, իսկ արդեն չորային եղանակներին այդ պաշարած ջուրն է օգտագործվում:

Սիան. հանրային տրանսպորտը` բացառապես էլեկտրաավտոբուսներով

Սիանը` Չինաստանի հին մայրաքաղաքը, աչքի է ընկնում ոչ միայն իր մշակութային ժառանգությամբ. այն, ըստ էության, երկրի սիրտն է: Նախ, Սիանի մոտակայքում է գտնվում համաշխարհային ճանաչում ունեցող էլեկտրոմոբիլների գործարանը` BYD-ն, որի կարգախոսն է «Ստեղծիր քո երազանքը»: Այս ընկերությունը գործունեություն է ծավալում աշխարհի 300 քաղաքներում, տարեկան արտադրում է 500 հազար ավտոմեքենա, էլեկտրական ավտոբուսների գործարաններ ունի աշխարհի մի քանի զարգացած երկրներում, այդ թվում` ԱՄՆ-ում, Ֆրանսիայում, արտադրում է նաեւ շտապօգնության եւ աղբատար մեքենաներ: Էլեկտրոմոբիլների ամենաէժան մոդելը 3000 դոլար է: Այս գործարանի միջոցով, որի տարածքը մի քանի հազար հեկտար է ու որտեղ գրեթե ամեն ինչ ավտոմատացված է, Չինաստանը կարողացել է երկրի հանրային տրանսպորտում լիարժեք անցում կատարել էլեկտրական ավտոբուսների` օդը չաղտոտելու համար: 

Սիանից է սկսվել նաեւ Մետաքսի ճանապարհը: Չինական արագընթաց գնացքները Սիանից հասնում են մինչեւ Եվրոպա` Համբուրգ, Վարշավա, Բուդապեշտ, Միլան, իսկ դեպքի Արեւելք` մի քանի ուղղություններով դեպի Խաղաղ օվկիանոս: Ի դեպ, երկրի ներսում ավելի շատ ճամփորդում են ոչ թե օդային ճանապարհով, այլ երկաթուղային, որը մեծ ու տպավորիչ զարգացած ցանց է:

Երբեմնի աղքատ Չինաստանում այդ հասկացության հետքը գոնե առաջին հայացքից չի երեւում: Պաշտոնական տվյալներով` Չինաստանում աղքատությունը կազմում է 3 տոկոս: Ամենուր համաշխարհային թանկարժեք բրենդային խանութներ են ու հայտնի ապրանքանիշների արտադրության մասնաճյուղեր: Չաշխատող մարդ Չինաստանում հնարավոր չէ գտնել, այստեղ չաշխատելը մեծ խայտառակություն է համարվում:

Չինական «գաղտնիքը»

Չինական «գաղտնիքը» հայ լրագրողներին ներկայացրեց Չինաստանի արտաքին գործերի նախարարության Արեւելյան Եվրոպայի եւ Կենտրոնական Ասիայի երկրների դեպարտամենտի խորհրդական պարոն Չժիցզուն:

«Այս տարի տոնում են նոր Չինաստանի 70-ամյակը: Մինչ այդ Չինաստանը շատ աղքատ երկիր էր: 1949 թվականին մեր բնակչությանը կերակրելը խնդիր էր: 70 տարի անց տպավորիչ արդյունքներ ենք ցույց տալիս եւ աշխարհում առեւտրով երկրորդ երկիրն ենք դարձել: Հիմա Չինաստանը դարձել է աշխարհի տնտեսության լոկոմոտիվը: Ինչով է այդ պրոգրեսը բացատրվում:

  1. ԽՍՀՄ-ի ժամանակաշրջանն անցել է չինական սպեցիֆիկայով:
  2. Շատ կարեւոր պատճառ է բաց քաղաքականությունն եւ ռեֆորմները: 1998-ից Չինաստանը սկսել է բաց քաղաքականություն վարել: Մեծ ուժ է բաց քաղաքականությունը մեր տնտեսության համար:
  3. Անդադար համագործակցություն աշխարհի բոլոր երկրների հետ: Չինաստանը միշտ բարեկամական հարաբերություններ է պահում բոլոր երկրների հետ` փոխադարձ շահերի հիման վրա: Փակ դռների դեպքում զարգացման հասնել հնարավոր չէ: Այդպես են ասում:
  4. Բացի այդ չին ազգը շատ աշխատասեր է, եւ դա շատ կարեւոր գործոն է Չինաստանի զարգացման համար:

Իհարկե, ոչ բոլոր երկրներն են ցանկանում Չինաստանի դինամիկ զարգացումը: Մասնավորապես, ԱՄՆ-Չինաստան առեւտրային պատերազմը դրա վառ ապացույցն է:  Կարծում եմ, ԱՄՆ-ը չի ցանկանում, որ Չինաստանն առաջ անցնի իրենից: Պատճառները մի քանիսն են` չնայած հիմա Չինաստանը աշխարհի երկրորդ տնտեսությունն ունի, բայց մնում է զարգացող երկիր: Մի քանի չլուծված խնդիրներ կան, օրինակ, չին ժողովրդի ձգտումը հրաշալի կյանքի: Արեւմտյան Չինաստանի կյանքի մակարդակն այնպիսին չէ, ինչպես Պեկինում: Մեր առջեւ դեռ սոցիալական հարցեր կան»:

ԱԳՆ ներկայացուցիչը հայտարարեց, որ իրենց զարգացման համար երբեք սպառնալիք չենք լինի այլ երկրների համար:

«Բայց եթե ԱՄՆ-ի հետ պատերազմը չհարթվի` դա շատ վատ կարող է ազդել աշխարհի տնտեսության վրա: Մենք չենք վախենում առեւտրային պատերազմից»,- ասաց պարոն Չժիցզուն:

Նա հայտարարեց նաեւ, որ Չինաստանը շատ կարեւոր գործընկեր է դիտարկում Հայաստանին «Մեկ գոտի, մեկ ճանապարհ» ծրագրի շրջանակներում, որին միացել են արդեն 40 երկրներ:

«Չինաստանի եւ Հայաստանի կապերը դինամիկ զարգացում են ապրում: Քաղաքական փոխհարաբերությունները մեր երկու երկրների միջեւ շատ կարեւոր են եւ շարունակում են խորանալ: Բազմապլան համագործակցությունը նույնպես ընդլայնվում է ավելի լայն բովանդակությամբ: Դատելով այս տարվա 1-ին կիսամյակի տվյալներից` մեր երկկողմ հարաբերությունների մեծ բերքահավաք կլինի:

Հայաստանի վարչապետ Նիկոլ Փաշինյանն եւ մեր վարչապետը մեծամասշտաբ համագործակցության պայմանավորվածությունների են հասել: 3 կարեւոր փաստ` վիզաների ազատականացում, տրանզիտ եւ էքստրադիցիա:

Մենք շատ լայն փոխադարձ հետաքրքրություններ ունենք եւ այդ համագործակցությունն արդեն արդյունքներ է տալիս: Չինաստանում հայկական կոնյակն արդեն այցեքարտ է դարձել: Հույս ունենք, որ ձեր հայկական կոնյակը Չինաստանում մեծ իրացում կգտնի:

Այս տարի նոյեմբերին 2-րդ միջազգային տնտեսական էքսպոն կլինի եւ կարծում եմ` մեր հայ ընկերները այդ առիթը լավ կօգտագործեն:

Կարծում եմ, որ արհեստական ինտելեկտի եւ ՏՏ ոլորտի մեծ համագործակցություն կլինի»,- ասաց Չինաստանի ԱԳՆ ներկայացուցիչը:

Տպել
5163 դիտում

Եվրախորհրդարանը դատապարտել է Թուրքիայում հիմնարար իրավունքների ու ազատությունների ոտնահարումը

Աղավնատուն գյուղում սպանության փորձի մասնակիցների ինքնությունը հայտնի է․ նոր մանրամասներ

Փոխվարչապետ Գրիգորյանն ընդունել է ԵՀ Հարևանության հարցերով գլխավոր տնօրենի տեղակալին

Սևանի ոստիկանները ապօրինի թմրաշրջանառության դեպք են բացահայտել (տեսանյութ)

Ոստիկանները բացահայտել են Վահագնի գյուղի հարակից անտառում երկու ծառի անօրինական հատման դեպք

Վթար Երևանի Շիրակի փողոցում. վարորդներից մեկը տեղափոխվել է հիվանդանոց

Ով է հերոս եւ ով՝ հակահերոս. Կառավարությունն արձագանքում է հանրային պահանջին

ՀՀ ԱԽ քարտուղարը նշանակման առթիվ շնորհավորել է ԱՄՆ նախագահի ազգային անվտանգության գծով խորհրդականին

Երեւանի Նոր Արեշ փողոցի բնակարաններից մեկում հայտնաբերվել է դի

ՀՀ կառավարությունը շահագրգռված է «Բոինգ» կորպորացիայի հետ փոխշահավետ համագործակցությամբ. վարչապետ

Ոստիկանապետի ժամանակավոր պաշտոնակատարը հանդիպել է Բելառուսի իրավապահների պատվիրակության հետ

Վարչապետն ընդունել է «HSBC International» Եվրոպայի զարգացման գծով տնօրենին

Եվրոպայի չեմպիոն Հարությունյանն ու Եվրոպայի Մ-23 չեմպիոն Թեւանյանն ըմբշամարտի ԱԱ-ից կգան առանց մեդալի

Գյումրու քաղաքապետ Սամվել Բալասանյանը գնեց մեծ կտավի իր 100 մասնիկը

Վերահսկվում է հակաանասնահամաճարակային միջոցառումների կատարման ընթացքը ողջ հանրապետությունում. ՍԱՏՄ

Նիկոլ Փաշինյանն այցելել է Հանրային հեռուստաընկերություն (տեսանյութ)

«Ազնիվ գողեր» ֆիլմը նկարահանվել է հեղափոխության ժամանակ, ու դժվարություններ են եղել. կայացավ պրեմիերան

Բացառում եմ երբեւիցե ԲՀԿ-ին եւ առհասարակ ցանկացած քաղաքական ուժի անդամակցություն. Արթուր Վանեցյան

Հրայր Թովմասյանի սանիկի ձերբակալումը ԱԺ-ի կողմից ՍԴ դիմելու որոշման հետ կապ չունի. Արարատ Միրզոյան

Հայբիզնեսբանկը «Արմենիա Էքսպո 2019» ցուցահանդեսի մասնակից