Որեւէ հանդուրժողականություն չի կարելի ցուցաբերել. վարչապետը խիստ հանձնարարական տվեց Օսիպյանին

Այն վարորդները, որոնք պարբերաբար եւ չարամիտ խախտումներ են թույլ տալիս, պետք է երթեւեկությունից ընդհանրապես հեռացվեն: Այսօր կառավարության նիստի ժամանակ  նման հայտարարություն արեց ՀՀ վարչապետ Նիկոլ Փաշինյանը՝ անդրադառնալով վերջին օրերին տեղի ունեցած ողբերգական ավտովթարներին:  

«Բոլորդ գիտեք, որ ոստիկանությունում օրենքի նոր նախագիծ է մշակվել, որի հիմնական նպատակը կարգազանց վարորդներին ընդհանրապես երթեւեկությունից հեռացնելն է: Այսինքն՝ այն վարորդները, որոնք պարբերաբար եւ չարամիտ խախտումներ են թույլ տալիս, պետք է երթեւեկությունից ընդհանրապես հեռացվեն: Նախագիծն Ազգային ժողովում է եւ կարծում եմ՝ մենք ԱԺ-ի հետ պետք է քննարկենք, թե ինչ ժամկետներում կարող ենք հնարավորինս շուտ այդ նախագիծն ընդունել: Այս հարցով, կարծում եմ, որ կառավարությունն ու ոստիկանությունը պետք է սերտորեն համագործակցեն հասարակական կազմակերպությունների հետ: Հիշում եք, մի անգամ այդ թեմայով խոսել եմ ֆեյսբուքյան իմ եթերներից մեկի ժամանակ, երբ որ հնարավորություն պետք է ընձեռեինք համապատասխան ծրագրային ապահովմանը, որպեսզի քաղաքացիները նույնպես երթեւեկության կոպիտ խախտումներն արձանագրելու եւ դա ոստիկանությանն ուղարկելու հնարավորություն ունենան: Ես տեղյակ եմ, որ ԱԺ «Իմ քայլը» խմբակցության ներկայացուցիչները ՀԿ-ների ներկայացուցիչների հետ արդեն սկսել են այդ աշխատանքը եւ ոստիկանությունն էլ տեղյակ է դրանից: Այստեղ խնդիրը պետք է հստակ արձանագրել, որ քաղաքական կամքը եւ որոշումը կա, որոշման տեխնիկական կամքը պետք է ապահովել: Իհարկե, հասկանալի է, որ այսօր ՀՀ-ում ավտոմեքենաների քանակի աննախադեպ աճ է գրանցվել: Մեծ ծավալով ներկրումները շարունակվում են, եւ դա իր հերթին բերում է մարտահրավերներ: Ոստիկանությունն ամենակոշտ միջոցները պետք է ձեռնարկի կարգազանց վարորդների նկատմամբ: Պետք է հաշվի առնենք, որ վերջին դեպքերը ցույց տվեցին, որ այդտեղ որեւէ հանդուրժողականություն չի կարելի ցուցաբերել, որովհետեւ խոսքը մարդկանց, մեր երեխաների, մեր հայրենակիցների կյանքի, անվտանգության եւ առողջության մասին է»,- ասաց վարչապետը, ապա դիմելով ՀՀ ոստիկանապետ Վալերի Օսիպյանին՝ հետաքրքրվեց, թե ի՞նչ միջոցներ են ձեռնարկել այս հարցում մինչեւ օրենքի նախագծի ուժի մեջ մտնելը:

Օսիպյանը պատասխանեց, որ ոստիկանության ողջ անձնակազմը ցավում է այդ դեպքով. «Ձեր մտահոգությունը տեղին է, պարոն վարչապետ: Վերջին տարիներին նմանատիպ դեպքեր եղել են: Օրինակ 2011 թվականին Արցախի փողոցի վրա մենք 4 զոհ ունեցանք՝ էլի վթարի հետեւանքով հրդեհ էր բռնկվել: 2014 թվականին Երեւան-Գյումրի՝ Հոռոմի խաչմերուկի վրա ունեցանք 7 զոհ՝ նույնատիպ վթարով: Եւ Երեւան-Երասխ՝ Զոդի կամրջի վրա եղավ: Վստահեցնում եմ ձեզ, պարոն վարչապետ, որ յուրաքանչյուր դեպքով՝ անգամ հանցագործության դեպքով՝ այդ թվում ճանապարհային երթեւեկության խախտմամբ եւ վթարներով, հատկապես այն վթարները, որոնց հետեւանքով զոհ է լինում, ոստիկանությունն ուսումնասիրություն է իրականացնում: Մենք ֆիզիկապես չենք կարող այն հատվածներում, որտեղ զոհեր ենք ունենում, վերակարգեր ունենալ: Այս դեպքը տեղի է ունեցել կամրջի վրա, անթույլատրելի է այդտեղ վազանց անցել, կայանել: Անգամ, եթե վնասված մեքենա է լինում պետք է վարորդը միջոցներ ձեռնարկի, որ կամրջից հանի այն: Ուզում եմ վստահեցնել, որ մենք ամեն ինչ անում ենք, բայց չեմ բացառում, որ մեր գործառույթների մեջ կան թերացումներ: Ճանապարհատրանսպորտային պատահարները վերջին 10 տարիներին միտում ունեն աճելու, դրա հետ մեկտեղ՝ զուգահեռ աճում են զոհերն ու վիրավորները»,- ասաց ոստիկանապետը:

Օսիպյանը նշեց, որ 2018 թվականի ապրիլի 10-ի դրությամբ գրանցվել է 1861 ՃՏՊ, 150 զոհ, 2736 վիրավոր: 2019 թվականի նույն ժամանակահատվածում գրանցվել է 2203 ՃՏՊ եւ 169 զոհ եւ 3312 վիրավոր:

«Դուք ճիշտ նկատեցիք, որ մեքենաների աննախադեպ հոսք ունենք հանրապետությունում: 2017 թվականին ներկրվել է 38 հազար տրանսպորտային միջոց, 2018 թվականին ներկրվել է 73 հազար 562: 2018 թվականի առաջին 6 ամիսներին ներկրվել է 28 հազար 954, իսկ 2019 թվականի առաջին 6 ամիսներին ներկրվել է 54 հազար 200 տրանսպորտային միջոց: Տրանսպորտային միջոցների տեխզննում չի իրականացվում: Ինձ ամեն օր ամփոփագրեր են զեկուցում, որ տրանսպորտային միջոցը ուղիղ ճանապարհին կորցրել է ճանապարհն ու ընկել է ձորը: Օրինակ Դուբայում նայում են, տեսնում են՝ անվադողերն իդեալական վիճակում են, բայց քանի որ ժամկետն անց է, չեն թույլատրում վարել»,- ասաց Օսիպյանը:

Առողջապահության նախարար Արսեն Թորոսյանն էլ առաջարկեց Վրաստան մեկնող բոլոր ավտոմեքենաները գերբեռնվածության համար ստուգել:

Փոխվարչապետ Մհեր Գրիգորյանն էլ ասաց, որ ժամանակն է, որ մենք տեխնիկական զննման եւ ԱՊՊԱ-ի գործընթացը սինխրոնիզացնենք: Գրիգորյանի խոսքով ապահովագրական համակարգի միջոցով հնարավոր է վերահսկել մեքենաների տեխնիկական զննումը։

«Սա ամենաարդյունավետ լուծումը կլինի։ Այն մեքենան, որը չունի նորմալ տեխնիկական վիճակ, պետք է ապահովագրություն չստանա, իսկ այդ ԱՊՊԱ ստանալու կամ չստանալու եւ դա վերահսկելու գործիքակազմը մենք ունենք։ Այս իմաստով ռացիոնալ տարբերակը դա է։ Կոչ եմ անում, որ մոդել մշակենք ու փորձենք խնդիրը լուծել»,- նշեց փոխվարչապետը։

Տպել
2067 դիտում

Նիկոլ Փաշինյանը՝ մեծ կտավի մեկ մասնիկի առաջին գնորդն ու կտավն ամբողջացնող վերջին այցելուն Գյումրիում

Աննա Հակոբյանը մասնակցել է Ararat challange փառատոնի բացման արարողությանը

Բաքվում չարտոնված ցույցի պատճառով փակել են մետրոյի երեք կայարան

Աննա Հակոբյանը մասնակցել է «Առողջ ապրելակերպը՝ բոլորի համար» խորագրով սպորտային տոնին

Ուկրաինայի խորհրդարանում Հայաստանի հետ միջխորհրդարանական կապերի պատգամավորական խումբ է ստեղծվել

Հյուսիսային մաքսատունը Գյումրիում կբացվի այս տարի. հստակ ժամկետ, սակայն, չկա

«Էրեբունի-Երեւան» միջոցառումների շրջանակներում սպասվում է անակնկալ. Հայկ Մարության

Ապօրինի գույքի «քաղհալածյալ» սեփականատերերը․ նախկին իշխանություններին խիստ մտահոգել է օրենքի նախագիծը

Վարչապետը ծանոթացել է Արտաքին տնտեսական գործունեության սպասարկման կենտրոնի շինաշխատանքներին

Այս տարվա առաջին 9 ամիսներին արձանագրվել է 3444 ճանապարհատրանսպորտային պատահար

Ոստիկանությունում տեղի ունեցած նիստից հետո մարզային պետեր են ազատվել

Հայկ Մարությանը Երվանդ Մանարյանին հանձնեց Երեւանի պատվավոր քաղաքացու կոչումը

Երկիր մոլորակին կմոտենա մեկ կիլոմետր տրամագծով երկնաքար

Արմեն Կարապետյանն ազատվել է էկոնոմիկայի նախարարության գլխավոր քարտուղարի պաշտոնից

Հերքվել է Սամվել Ֆարմանյանի հայտնած այն տեղեկությունը, թե շոգեբաղնիքում իրեն ՀՔԾ քննիչ է մոտեցել․ ոստիկանություն

Դատախազները քննարկումներ են անցկացրել հանրակրթական եւ հատուկ դպրոցների աշակերտների հետ

Մեր տարածաշրջանը վառոդի տակառ է, մեր անվտանգության երաշխիքները՝ երկուսը

Նիկոլ Փաշինյանի ելույթը՝ Պետական եկամուտների կոմիտեի Գյումրիում կազմակերպած ռազմավարական պլանավորման աշխատաժողովին

Գեղարքունիքի մարզում մեքենան բախվել է բետոնե պատնեշին․ 18-ամյա վարորդն ու նույն տարիքի ուղեւորը մահացել են

Երեւանցին նա է, ով սիրում է Երեւանը, սիրում է՝ հոգատար ծնողի ու պատասխանատու ընկերոջ նման․ Հայկ Մարության