Քրեական հեղինակություն Բոգոյին պատկանող ընկերությունը ապօրինի ուղեւորափոխադրումներ է իրականացնում դեպի Թբիլիսի

«Հայկական ժամանակ»-ը նախօրեին գրել էր, որ Տավուշի մարզի Դիլիջան քաղաքում վթարի է ենթարկվել Վրաստան-Երեւան երթուղին սպասարկող «Mercedes Viano» մակնիշի «50 RR 553» համարանիշներով 7 տեղանի ավտոմեքենան: Վթարի հետեւանքով 1 հոգի տեղում մահացել է, 6 հոգի բուժօգնություն է ստացել: Մեր տեղեկություններով՝ վերոնշյալ ավտոմեքենան պատկանում է «Երկու ընկեր» ՍՊԸ-ին, որի հիմնադիրը քրեական հեղինակություն Նորագյուղցի Բոգո մականունով հայտնի Ռուբեն Կոստանյանն է (նախկինում՝ Սիմոնյան):

Նախապատմություն. «Հայկական ժամանակ»-ն ամիսներ առաջ գրել էր, որ Երեւան-Թբիլիսի միջպետական ուղեւորափոխադրումներ է իրականացնում «Երկու ընկեր» ՍՊԸ-ն, որը մենաշնորհային դիրք է ստեղծել եւ մրցութային կարգով կարողացել է թե՛ Կիլիկիա (Կենտրոնական) եւ թե՛ Հյուսիսային ավտոկայաններում միակ ուղեւորափոխադրողը լինել՝ դեպի Թբիլիսի: «ՀԺ»-ն Հյուսիսային ավտոկայանի տեղեկատու բաժնից ճշտել էր նաեւ, որ այնտեղից ուղեւորափոխադրումներ չեն իրականացվում դեպի Թբիլիսի, եւ Թբիլիսի հնարավոր է գնալ միայն Կիլիկիա ավտոկայանից:

ՀՀ տրանսպորտի, կապի եւ տեղեկատվական տեխնոլոգիաների նախկին նախարար Վահան Մարտիրոսյանի 2017 թվականի մարտի 3-ի N 297-Ա հրամանով՝ «Երկու ընկեր» ՍՊԸ-ն մրցույթային կարգով հնարավորություն է ստացել երկու ավտոկայաններում էլ կանոնավոր ուղեւորափոխադրում իրականացնել դեպի Թբիլիսի:

Ստացվում է, որ «Երկու ընկեր» ՍՊԸ-ն հաղթել է երկու տեղից ուղեւորափոխադրում իրականացնելու` տրանսպորտի նախարարության կողմից անցկացված մրցույթները, սակայն ընդամենը մեկ տեղից է իրականացնում այդ ուղեւորափոխադրումը:

Որոշ ժամանակ առաջ մեզ էր դիմել մի քաղաքացի՝ Արմեն Հարությունյան անունով, որը պատմել էր, որ այդ մրցույթները Կոստանյանը հաղթել է միայն իր ունեցած պետական լծակների շնորհիվ: Հարությունյանը նշում էր, որ ցանկացել է գոնե Հյուսիսային ավտոկայանում սպասարկել երթուղին, սակայն այն ժամանակ տրանսպորտի նախարարությունում աշխատող իր մտերիմները խորհուրդ են տվել չմասնակցել մրցույթին, քանի որ արդյունք չէր տալու`ամեն ինչ որոշված էր: Արդյունքում՝ Բոգոն մրցույթով հաղթել է «Սոնա եւ Միքայել» ՍՊԸ-ին, եւ դաշտում իրենից բացի այլ մարդ չի մնացել:

Այս ընթացքում կարծես թե ոչինչ չի փոխվել, ընկերությունը շարունակում է ուղեւորափոխադրումներ իրականացնել Երեւան-Թբիլիսի ուղղությամբ, միայն թե այս դեպքում՝ օրենքի խախտմամբ: ՀՀ տարածքային կառավարման եւ ենթակառուցվածքների նախարարության ավտոմոբիլային տրանսպորտի քաղաքականության վարչության պետի տեղակալ Արման Կարապետյանը «Հայկական ժամանակ»-ի հետ զրույցում ասաց, որ միջպետական ուղեւորափոխադրումներում ներգրավված են 9-ից ավելի նստատեղ ունեցող տրանսպորտային միջոցներ, իսկ վերոնշյալ ավտոմեքենան մինչեւ 8 նստատեղ ունի: Կարապետյանը նշեց, որ ըստ մրցույթի՝ «Երկու ընկեր» ՍՊԸ-ն ուղեւորափոխադրում պետք է իրականացնի «Մերսեդես Սպրինտեր» մակնիշի 17 նստատեղանոց միկրոավտոբուսներով:

Կարապետյանի խոսքով՝ «Mercedes Viano» մակնիշի ավտոմեքենայով հնարավոր չէ իրականացնել միջպետական կանոնավոր ուղեւորափոխադրում. «Գուցե պատվերով փոխադրում են կատարել: Կան հստակ սահմանված ժամեր, կա հստակ սահմանված ուղեգիր, թե որտեղից եւ որ ժամին է իրականացվում կանոնավոր ուղեւորափոխադրում»:

Հարցին՝ վստա՞հ է, որ առավոտյան նախատեսված ժամին «Մերսեդես Սպրինտեր» մակնիշի միկրոավտոբուսներն են գնում, այլ ոչ օրինակ մինչեւ 8 նստատեղ ունեցող ավտոմեքենաները, Կարապետյանը պատասխանեց. «Պարտավոր են գնալ: Դրա նկատմամբ մենք ունենք վերահսկողություն իրականացնող մարմին»:

Դիտարկմանը, որ ընկերությունը 2 ավտոկայաններից ուղեւորափոխադրում իրականացնելու թույլտվություն է ձեռք բերել, սակայն ընդամենը 1 տեղից է իրականացնում, Կարապետյանն արձագանքեց. «Հյուսիսային ավտոկայանում ուղեւորահոսքը շատ թույլ է: Բայց մենք հիմա հայտ ունենք, կազմակերպություն կա, որը ցանկանում է այդ ավտոկայանից ուղեւորափոխադրում իրականացնել դեպի Թբիլիսի եւ շատ հնարավոր է, որ նոր մրցույթ հայտարարենք»:  

Կարապետյանը նշեց, որ հայտը «Սոնա եւ Միքայել» ընկերությունից է ստացվել, որը ժամանակին մասնակցել է այդ մրցույթին եւ պարտվել է:

Հարցին՝ «Երկու ընկեր»-ը կարո՞ղ էր սահմանված չվացուցակից ավելի փոխադրումներ իրականացնել, Կարապետյանը բացասական պատասխան տվեց:

Քաղաքաշինության, տեխնիկական եւ հրդեհային անվտանգության տեսչական մարմնի ղեկավարի տեղակալ Արտյուշ Գրիգորյանը մեր զրույցում ասաց, որ իրենց տեղեկություններով նույնպես «Mercedes Viano»-ն պատկանում է «Երկու ընկեր» ՍՊԸ-ին․

«Ընկերությունը 2 երթուղի ունի դեպի Թբիլիսի՝ Հյուսիսային եւ Կենտրոնական ավտոկայաններից, սակայն Հյուսիսային ավտոկայանից վերջին 2 տարիներին ուղեւորափոխադրում չեն իրականացրել»:

Գրիգորյանի խոսքով՝ «Երկու ընկեր» ՍՊԸ-ի կողմից Կենտրոնական ավտոկայանից Երեւան-Թբիլիսի ուղեւորափոխադրում իրականացնելու թույլտվության ժամկետը մարտի 27-ին լրացել է: «Բայց Հյուսիսային ավտոկայանից իբր շարժվող երթուղու ժամկետը 2020 թվականի մարտի 27-ին է լրանում: Վթարի ենթարկված ավտոմեքենան մինչեւ 8 տեղանոց է: Նրանք իրավունք չունեն կազմակերպության անվան տակ այդպիսի բան անել: Որտեղի՞ց են մարդ հավաքում, ընդհանրապես ավտոկայան չի էլ մտնում: Դաշտը ազատականցված է, կան մարդիկ, ովքեր ոչ կանոնավոր ուղեւորափոխադրում են իրականացնում: Մենք հուլիսի 1-ից սկսած վերահսկողական գործառույթներ ենք իրականացնում շատ խիստ: Որովհետեւ վարչական իրավախախտումների վերաբերյալ նոր է փոփոխություն տեղի ունեցել, որը մեզ հնարավորություն կտա որոշակի միջոցներ կիրառել»:

Գրիգորյանը նշեց, որ այս հարցն իրենց ուշադրության կենտրոնում են պահելու. «Դիմել ենք տարածքային կառավարման նախարարությանը, որպեսզի մեզ տրամադրեն այն երթուղիների ցուցակը, որոնց ժամկետը լրացել է եւ չի երկարաձգվել եւ նրանցը, որոնցը երկարաձգվել է: Պատասխանը ստանալուց հետո մենք խիստ վերահսկողական գործառույթներ ենք իրականացնելու եւ պատասխանատվության միջոցներ ենք կիրառելու՝ այդ թվում եւ այս ընկերության նկատմամբ, եթե իրենք խախտում են մրցույթի արդյունքում ստանձնած պարտավորությունները: Դա վերաբերվում է ե՛ւ սկզբնակետին, ե՛ւ վերջնակետին, ե՛ւ չվացուցակների խախտումներին, ե՛ւ երթուղիների քանակին, ե՛ւ ոչ ճիշտ միկրոավտոբուս կամ ավտոբուս օգտագործելու դեպքում, բացի դրանից հստակ նշված է, թե կոնկրետ որ համարանիշներով պետք է աշխատեն այդ միկրոավտոբուսները: Եթե ցուցակից դուրս միկրոավտոբուս է կազմակերպության անվան տակ ուղեւորափոխադրում իրականացնում դա անթույլատրելի է. «Այս դեպքը կոնկրետ ապօրինի ուղեւորափոխադրում է: «Երկու ընկեր» ՍՊԸ-ում մինչեւ 8 տեղանոց երթուղի գոյություն չունի եւ նրանք օրական ունեն 2 երթ՝ Երեւան-Թբիլիսի ուղղությամբ».- ասաց Գրիգորյանը:

Հարցին՝ նախատեսված «Մերսեդես Սպրինտեր» մակնիշի միկրոավտոբուսներով ուղեւորափոխադրում իրականացնո՞ւմ է ընկերությունը, Գրիգորյանը պատասխանեց. «Իրականացնում են, սակայն ինչպես նշեցի Կենտրոնական ավտոկայանում նրանց ժամկետն արդեն լրացել է: Նրանք հիմա ո՛չ Հյուսիսային ավտոկայանից են շարժվում, ո՛չ էլ Կենտրոնական ավտոկայանից: Մենք մեր վերահսկողության արդյունքում պետք է պարզենք, թե որտեղից է այս կազմակերպությունն իրականացնում իր երթուղիները, հաստատ օրենք են խախտում, իրենք պետք է շարժվեն Հյուսիսային ավտոկայանից, սակայն մենք ճշտել ենք, որ այնտեղից չեն շարժվում: Հիմա պետք է պարզենք, թե արդյունքում այդ կազմակերպությունը, որպես անհա՞տ է ուղեւորափոխադրում իրականացնում, թե կազմակերպության անունից»:

Անդրադառնալով հարցին, թե վերոնշյալ խախտման դեպքում տեսչական մարմինն ի՞նչ կարող է անել, Գրիգորյանն ասաց. «Տեսչական մարմինը յուրաքանչյուր խախտման համար պատասխանատվության միջոցներ է կիրառել՝ տուգանք 10-ից 500 հազար դրամի չափով: Երբ խախտումները դառնում են պարբերաբար տեսչական մարմինը կարող է դիմել լիազոր մարմնին, որպեսզի քննարկեն տվյալ ընկերությանը թույլտվությունից զրկելու հարցը եւ նոր մրցույթ հայտարարեն»:

Դիտարկմանը՝ կարծես թե բարդ է քայլեր ձեռնարկել Նորագյուղցի Բոգոյի դեմ, քանի որ նա շարունակում է ազդել նաեւ այլ երթուղիների վրա, Գրիգորյանն արձագանքեց. «Մենք բոլորի նկատմամբ կարող ենք քայլեր ձեռնարկել, անկախ նրանից թե ում է պատկանում երթուղին: Հավասարապես վերահսկողության գործառույթներ ենք իրականացնելու բոլոր այն ուղեւորափոխադրողների նկատմամբ, ովքեր խախտում են մրցույթի պայմանները: Հիմա սկսվել է շատ խիստ վերահսկողական աշխատանքներ հատկապես Երեւան-Արմավիր երթուղու նկատմամբ, որովհետեւ կարծես թե ամենախնդրահարույց երթուղին էր: Այս պահին կարող ենք ֆիքսել, որ սպիտակ գույնի համարանիշներով մեքենաներ այդ երթուղում բացարձակ գոյություն չունի: Ու ձեր նշած անձին պատկանող կազմակերպությունը հիմա 2 երթուղի ունի, որոնցից մեկի ժամկետն ավարտվել է՝ այլեւս չի շահագործվում, մյուս երթուղին էլ մեր ուշադրության կենտրոնում է: Բոլոր կազմակերպություններիին շատ կարճ ժամանակ է տրվել, որ իրենց երթուղիները համաձայնեցնեն մրցույթի պայմաններին՝ հակառակ դեպքում տուգանք կկիրառվի: Ցավոք սրտի բազմաթիվ են այն դեպքերը, որ միայն տուգանք կիրառելու դեպքում է դրական փոփոխություն տեղի ունենում»:

«Հայավտոկայարան» ՓԲԸ-ի գլխավոր տնօրեն Աշոտ Մնացականյանը «ՀԺ»-ի հետ զրույցում ասաց, որ հնարավոր է՝ «Երկու ընկեր»-ը թաքուն է ուղեւորափոխադրում իրականացնում:

Կենտրոնական ավտոկայանի տնօրեն Ռոման Համբարձումյանն էլ նշեց, որ ավտոկայանի մոտակայքից գուցե գնում են, բայց կոնկրետ ավտոկայանից՝ իր այնտեղ եղած ժամանակ ուղեւորափոխադրում չի իրականացնում «Երկու ընկեր»-ը:

Մենք փորձեցինք կապ հաստատել նաեւ Նորագյուղցի Բոգոյի հետ, սակայն նա մեր զանգերին չպատասխանեց: Նշենք, որ քրեական հեղինակություն Նորագյուղցի Բոգոն գործարար Սամվել Ալեքսանյանի մտերիմներից է եւ գործարար Արկադի Համբարձումյանի (Դերժավայի Արկադի) խնամին: Նա բազմիցս է հայտնվել թե՛ մամուլի, եւ թե՛ իրավապահների ուշադրության կենտրոնում:

Տպել
5331 դիտում

Բեզոարյան այծը հայտնվել է թակարդում եւ ոտքը կոտրել. Տեսչական մարմնի աշխատակիցները չեն կարողացել օգնել

Եթե զգամ, որ խորհրդականի կարիք կա՝ որոշում կկայացնեմ՝ դեռ չեմ կողմնորոշվում. ՀՌՀ խորհրդի նախագահ

Երեկ Շիրակի մարզի Բավրա գյուղից 12 կմ արևելք եւս մեկ երկրաշարժ է գրանցվել

Սեպտեմբերի 16-ին էլեկտրաէներգիայի մինչեւ 6-ժամյա անջատումներ կլինեն Երևանում և 8 մարզում

Մեղրիի բնակարաններից մեկում գազի արտահոսք է եղել՝ հրդեհի բռնկմամբ

Ըմբշամարտի աշխարհի առաջնություն. Արթուր Ալեքսանյանը 5:0 հաշվով հաղթանակ է տարել

«Մաեստրո Մանսուրյան-80». Գյումրիում կայացավ մեծ համերգ՝ կարեւոր առաքելությամբ

Չանկախություն. «Գազպրոմի» ֆորպոստը

Աղմկահարույց սպանության հետքերով. իրավապահները լռում են, որ շատ բան իմանան

«Հայամերիկյան» օպտիկական խաբկանք. անվճար վճարովի ակնոցներ

Արագած լեռան վրա արջի հարձակումից տուժած Լեհաստանի քաղաքացին մահացել է

Վարչապետն ընտանիքի հետ ներկա է գտնվել Սեւանի թերակղզում կազմակերպված ձկան փառատոնի բացմանը (լուսանկարներ)

Փաշինյանն ընդդեմ նախկինների. հաշիվն այսօր 10:3 է՝ հօգուտ Փաշինյանի․ Կարեն Անդրեասյան

ԱԺ նախագահն ընդունել է Ֆրանսիա-Հայաստան բարեկամական խմբի փոխնախագահի գլխավորած պատվիրակությանը

Երեւանում Ջերմուկի բնակիչների հետ համատեղ քայլերթ է իրականացվելու՝ ընդդեմ Ամուլսարի հանքի շահագործման

Թրամփը հայտնել է, որ ամերիկացի ուժայինները ոչնչացրել են «Ալ-Քաիդայի» հիմնադիր Բեն Լադենի որդուն

Սփյուռքի գլխավոր հանձնակատարը հանդիպել է «Էրմիտաժ» թանգարանի տնօրենի հետ

«Սեքյուրիթի դրիմ» ընկերության հիմնադիրը գրավի դիմաց ազատ է արձակվել

Արագած լեռան վրա Լեհաստանի Հանրապետության երկու քաղաքացի ենթարկվել է արջի հարձակման

ՀՀ ԱԳ նախարար Զոհրաբ Մնացականյանն ընդունել է Ֆրանսիայի Ազգային Ժողովի պատգամավորներին