Եվ նրա շուրջ. դավաճանության մեխանիկան

Տպագրվել է «Հայկական Ժամանակ» օրաթերթի՝ 2006 թվականի մայիսի 16-ի համարում

«Ժողովուրդ ջան, նրանք, ովքեր հեռացան, մեր կուսակցությունն ամուր պահող  հանգույցները չէին»,- վերջին իր ասուլիսում ահա այսպես բնութագրեց ԱԺ նախագահ Արթուր Բաղդասարյանն իր կուսակցությունն ու խմբակցությունը լքած 11 պատգամավորին ու երկու նախարարին։ Մինչդեռ այս հայտարարությունն առնվազն տարօրինակ է, քանզի նրանք, ովքեր հեռացան Արթուր Բաղդասարյանից եւ «Օրինաց երկրից», այդ կուսակցության համամասնական ցուցակի առաջին տասնյակում էին։ Սերգո Երիցյանը ՕԵԿ համամասնական ցուցակի երկրորդ համարն էր ու կուսակցության հիմնադիրներից մեկը, որի հրաժարումն իր ստեղծած կուսակցությունից՝ հանուն Ռոբերտ Քոչարյանին գիտության գծով խորհուրդներ տալու մեկամյա հեռանկարի, ՕԵԿ-ում համարում են դարի դավաճանություն։

Իսկ Սայադ Զախարյանը, Արշակ Մխիթարյանը, Ալեքսան Պետրոսյանը, Էդուարդ Գաբրիելյանն ու Արկադի Համբարձումյանը «Օրինաց երկրի» համամասնական ցուցակի առաջին յոթնյակում էին, որոնք չսպասելով Արթուր Բաղդասարյանի հրաժարականին եւ կոալիցիայից դուրս գալուն ՕԵԿ-ի քաղաքական խորհրդի որոշմանը՝ օպերատիվ ռեժիմով լքեցին կուսակցությունն ու Արթուր Վահանիչին։ Իսկ նրանք, ովքեր դեռ մնացել են Արթուր Բաղդասարյանի կողքին՝ Հեղինե Բիշարյանը, Մհեր Շահգելդյանը, Հովհաննես Մարգարյանը, Գագիկ Ավետյանը, նրանք բոլորն էլ եղել են համամասնական ցուցակի երկրորդ տասնյակից այն կողմ։ Ի դեպ, ՕԵԿ-ից թռած գործարարների խումբն այս օրերին պատ է ման գալիս, որ տակը բամբասի, թե ինչքա՞ն գումար են իրենք տվել ՕԵԿ համամասնական ցուցակի առաջին յոթնյակում հայտնվելու համար։

Ավելին, նրանք ու նրանց հետ նաեւ քաղաքաշինության նախարար Արամ Հարությունյանը դժգոհում են, որ անցած երեք տարում հարազատ կուսակցությունն իրենց այնքան է «կթել», որ իրենք հայտնվել են բանկրոտի եզրին։ Իհարկե, այդ գործարարները լրագրողների հետ զրույցում ասում են, թե ՕԵԿ-ից դուրս գալու պատճառը  քաղաքական է, բայց երբ փորձում էինք հստակեցնել իրենց եւ Արթուր Բաղդասարյանի քաղաքական հայացքների միջեւ երեք ու կես օրում ծագած կտրուկ հակասության պատճառը, այն համառորեն չէր գտնվում։ Օրինակ, ՕԵԿ այլեւս նախկին անդամ Մելիք Մանուկյանին հարցրեցինք՝ միգուցե ՕԵԿ-ից դուրս գալու պատճառն այն է, որ ինքը դե՞մ է Արթուր Բաղդասարյանի արտաքին քաղաքական կողմնորոշումներին եւ ինքը, որպես Մելիք Մանուկյան, չի՞ ուզում գնալ ՆԱՏՕ:

«Ուր գնա՞մ։ Չէ, ես հիմա Հայաստանում եմ, պրոստո լավ չի լսվում»,- հարցը, բնականաբար, չհասկացավ օրենսդիրը։ Իսկ մեկ այլ գործարար էլ լրագրողներից էր ճշտում, թե կուսակցությունից դուրս գալու ի՞նչ պատճառ ասի, որ ավելի արժանահավատ ու ծանրակշիռ հնչի։ Եւ ահա այս ամենից հետո տրամաբանական հարց է առաջանում. ստեղծված վիճակի համար արդյո՞ք մեղքը Արթուր Բաղդասարյանին չէ, որ կուսակցության համամասնական ցուցակի top-տասնյակում հայտնվել են այս մարդիկ։ Եւ արդյո՞ք արդարացի չէ, որ այսօր Արթուր Բաղդասարյանը քաղում է իր սխալների արժանի պտուղները։ «Գիտե՞ք ինչ, այդ մարդկանցից ոչ մեկի վրա Արթուր Բաղդասարյանը չէր կարող ինդիկատոր դնել՝ նրանց ազնվության գործակիցը ստուգելու եւ չափելու համար։ Հիմա այդպես է ստացվել։ Կաշխատենք հաջորդ ընտրություններում համամասնական ցուցակն ավելի ճիշտ կազմել ու նման մարդկանցից հեռու մնալ»,- ասում է ՕԵԿ խմբակցության նախագահ Սամվել Բալասանյանը, որն առաջիկա օրերին իր տեղը պատրաստվում է զիջել Արթուր Բաղդասարյանին եւ դառնալ ՕԵԿ շարքային պատգամավոր։ 

«Չկա մի քաղաքական ուժ, որը այդքան ուժ իր մեջ գտներ եւ հրաժարվեր երկրի երկրորդ դեմքը լինելուց։ Արթուր Բաղդասարյանը դա արեց, եւ ՕԵԿ-ը ցույց տվեց, որ մենք մեր աթոռներից ու պաշտոններից կառչած չենք»,- ավելացնում է Բալասանյանը, իսկ խմբակցության քարտուղար Հեղինե Բիշարյանն ասում է. «Միայն երեկ 40 նոր անդամ եմ ընդունել մեր կուսակցության շարքերը։ Ժողովրդի 70 տոկոսը մեզ հետ է, որովհետեւ Արթուր Բաղդասարյանի նման լիդեր ընդդիմության դաշտում չկա ու չի եղել»։

Խմբակցության քարտուղարի հայտարարությունը, իհարկե, կարելի է տպավորիչ համարել, եւ բացի այդ, այս օրերին ՕԵԿ-ը պարբերաբար քաղխորհրդի նիստեր է անում եւ հաղորդագրություններ տարածում, թե իրենց կառույցներն ամուր են, ու իրենք սադրանքների չեն ենթարկվելու, բայց շաբաթ-կիրակի, ինչպես նաեւ երեկ ողջ օրը, պարբերաբար լուրեր էին հասնում, որ ՕԵԿ այս կամ այն տարածքային կառույցն ինքնալուծարվել է, կամ էլ՝ կառույցի ղեկավարը գնացել ու չի վերադարձել։ «Մենք նման տեղեկություն չունենք»,- ասում է Հեղինե Բիշարյանը։ Չնայած, նրա կուսակից Վռամ Գյուլզադյանը չի բացառում, որ կուսակցությունից հեռացածներն իրենց հետ տարած լինեն նաեւ իրենց կուսակից համակիրներին։ Եւ մինչ մենք զրուցում էինք խմբակցության ղեկավար Սամվել Բալասանյանի հետ, ՕԵԿ-ից դուրս գալու իր դիմումը բերեց պատգամավոր Մեխակ Մխիթարյանն ու անձայն հեռացավ։

Ի դեպ, Մեխակ Մխիթարյանը ՕԵԿ-ի «հարձակվողներից» էր, որը ԱԺ նիստերի ու հայտարարությունների ժամանակ իր վրա էր վերցնում ՕԵԿ-ին եւ անձամբ Արթուր Վահանիչին քաղաքական ուժերից եւ կեղտոտ թերթերից կրծքով պաշտպանելու առաքելությունը եւ, ըստ ՕԵԿ-ականների, կուսակցական բոլոր քեֆերի ժամանակ ամեն ջանք գործադրում էր, որ մնացածներից բարձր գոռա՝ «Արթո՛ւր, նախագահ»։ Իսկ Սամվել Բալասանյանը երեկ հերթական դիմումը դրեց իր դարակում, մնացած հեռացածների դիմումների վրա, ու դարակը փակեց։ «Դիմումները դեռ ավելանալո՞ւ են»,- հարցրեցինք խմբակցության ղեկավարին։ «Չգիտեմ, տեսնենք»,- այլեւս ոչինչ չբացառեց 61 հազար 319 անդամ ունեցող կուսակցության խմբակցության ղեկավարը։ Այս պահի դրությամբ ՕԵԿ խմբակցության 20 պատգամավորից մնացել է 9-ը։ Հեռանում են նաեւ նրանք, ովքեր իրենց նորածին որդիներին, վերջին երեք տարիների ավանդույթի համաձայն, անվանում էին Արթուրիկ։    

Նաիրա Զոհրաբյան