Խոսվում է «Գազպրոմ»-ում շուրջ 500-ից մինչեւ 1000 աշխատակիցների կրճատման մասին. ՀԾԿՀ նախագահ

Էներգետիկ շուկայի ազատականացումը սպառողների, մատակարարի ու էլեկտրականություն արտադրողների փոխադարձ պատասխանատվությունների սահմանում է ենթադրում։ Այս մասին այսօր ԱԺ-ում լրագրողների հետ զրույցում ասաց Հանրային ծառայությունները կարգավորող հանձնաժողովի նորընտիր նախագահ Գարեգին Բաղրամյանը:

«Ամբողջ պատասխանատվությունն այսօր կրում է «Էլցանցերը», նախատեսվում է, որ բոլոր այն խոշոր սպառողները, որոնք կանխատեսում են անում եւ որոշակի շեղում են անում կանխատեսումից, որը բերում է ֆինանսական հետեւանքների, պետք է պատասխանատվություն կրեն»,- նշեց Բաղրամյանը:

ՀԾԿՀ նախագահի խոսքով՝ շուկայի ազատականացումը նաեւ կզարգացնի միջսահմանային առեւտուրը։ Բաղրամյանը նշեց, որ արդեն սկսվել է ենթակառուցվածքների զարգացման գործընթացը, ավելին՝ Հայաստան-Իրան բարձրավոլտ էլեկտրակայանի շինարարությունն առաջիկա տարիներին կավարտվի:

Ինչ վերաբերում է ԵԱՏՄ միասնական էներգետիկ շուկայի ձեւավորմանը, Բաղրամյանը նշեց, որ իր գնահատմամբ՝ էլեկտրաէներգետիկական միասնական շուկայի լիարժեք գործելու դեպքում ՀՀ-ից էլէներգիայի արտահանման ծավալները կարող են մեծանալ:

«Ինչպես նաեւ որոշ առումով սեզոնային ավելի էժան էլէներգիայի ներկրման հնարավորություն կստեղծի։ Շուկաների միավորումը բերում է նրան, որ ընդհանուր շուկայի շրջանակներում ավելի շատ սպառողներ են լինում, այսինքն՝ պահանջարկը մեծանում է, արտադրության ծավալները մեծանում են, ընդհանուր շուկայի շրջանակում ավելի շատ սպառողներ են լինում։ Այսինքն՝ պահանջարկը մեծանում է, արտադրության ծավալները մեծանում են, հետեւաբար, կարող է լինել էժան էլէներգիայի հոսք։

Եթե, օրինակ, Ղազախստանում ինչ-որ սեզոնային էլէներգիա կա, էժան կարող է վաճառվել ՀՀ-ում՝ դուրս մղելով մեզ մոտ ստիպված աշխատող ջերմակայանին։ Կարող է լինել նաեւ հակառակը՝ ՀՀ-ն էժան վաճառի ԵԱՏՄ անդամ երկրներին»,- ասաց ՀԾԿՀ նախագահը:

Բաղրամյանի գնահատմամբ՝ ծավալների, փոխհոսքերի մեծության աճը կբերի էժան էլեկտրաէներգիայի։ Բաղրամյանը նշեց, որ մինչեւ 2020 թվականի փետրվարի 1-ը հոսանքի գնի փոփոխություն չի սպասվում:

Անդրադառնալով «Գազպրոմ Արմենիա»-ի ուռճացված ծախսերին, Բաղրամյանն ասաց. ««Գազպրոմ»-ի մասով խնդիրն ուրիշ է: Քանի որ կային միջպետական պայմանագրեր, որոնք ԱԺ-ն վավերացրալ է եւ ստացել է օրենքի ուժ, իրենք ուղղակի պարտադրել են որոշ գների ձեւավորում եւ որոշ գործողություններ: Մասնավորապես 2017 թվականին կա միջպետական համաձայնագիր, որն իրենից ենթադրում է օրենքի ուժ եւ փաստորեն ՀԾԿՀ-ն անկախ նրանից, եթե տեսնի որոշակի խնդիրներ՝ ծախսերի առումով չի կարող միջամտել եւ փոփոխության ենթարկել, որովհետեւ կոնկրետ կա պահանջ, որ 2018 թվականին սպառողների համար գները չպետք է փոխվեն:

Այսինքն, այդ գործողությամբ սահմանափակվել է ՀԾԿՀ-ի գործառույթը: Նմանատիպ որոշում կա նաեւ 2016 թվականին: 2013 թվականից հետո որեւիցե ծախսերի վերանայում տեղի չի ունեցել: Մենք հիմա մանրամասն ծախսերն ենք նայում: Կա օրինակ աշխատակիցների օպտիմալացման խնդիր, կա որոշակի նյութածախսային խնդիր, օրինակ՝ ավտոմեքենաների կրճատման խնդիր ենք դրել: Աշխատավարձերն են իրենց մոտ բարձր, կազմում է իրենց ծախսերի մոտ 70 տոկոսը»:

Հարցին, թե ինչքա՞ն աշխատող է կրճատվելու, Բաղրամյանը պատասխանեց. «Այս պահին չեմ հիշում հստակ, բայց խոսվում է շուրջ 500-ից մինչեւ 1000 աշխատակիցների կրճատման մասին՝ առաջիկա ժամանակահատվածում, որը կֆիքսվի»:

Հարցին, թե այդ կրճատումներն անելուց հետո սակագինը թույլ կտա նվազեցնե՞լ, թե կբարձրանա, Բաղրամյանը պատասխանեց. «Դա կլինի վերջնական վերլուծությունների արդյունքում: Հիմա, որ ես ասեմ 1000 հոգի կրճատումը ինչ կբերի՝ կարելի է ուղղակի բազմապատկել միջին աշխատավարձով ու ասել՝ այսքան ծախսերի կրճատում կբերի»:

Դիտարկմանը, թե սա նշանակում է, որ այս ընթացքում այդ հաստիքները կարող էին եւ չլինե՞լ, Բաղրամյանն արձագանքեց. «Օպտիմալացման ամբողջ տրամաբանությունը հենց դա է, որ կրճատում ենք այն աշխատողներին, որոնք այսօր խոշոր հաշվով ամբողջությամբ ծանրաբեռնված չեն եւ արդյունք չեն ստեղծում: 13 թվականին կնքված միջպետական համաձայնագրերով, որը վավերացրել է ԱԺ-ն, ՀԾԿՀ-ի գործառույթները սահմանափակվել են: 13 թվականից սկսած, եթե նույնիսկ դուք այնտեղ տեսնեիք 10 ավել աշխատող, ոչինչ չէիք կարող անել: 2019 թվականի հունվարից այդ դրույթներն այլեւս չկան, որովհետեւ այդ պայմանագիրը մինչեւ այդ ժամկետն է եղել»: