Ճգնաժամ համալսարանում եւ ի՞նչ գործ ունի օմբուդսմենը ԵՊՀ-ում

Տպագրվել է «Հայկական Ժամանակ» օրաթերթի՝ 2006 թվականի ապրիլի 11-ի համարում

Այն, որ պաշտպանության նախարար Սերժ Սարգսյանի ղեկավարած Երեւանի պետական համալսարանի կառավարման խորհուրդը ոչ լեգիտիմ է, մենք արդեն տեղեկացրել ենք: Հիշեցնենք, որ պատճառը ԵՊՀ խորհրդի անդամ ԱԺ պատգամավորներն են: Ըստ նոր Սահմանադրության՝ պատգամավորը պետական պաշտոնյա չէ, իսկ բուհի խորհրդի կազմի այն մասը, որն առաջադրվում է վարչապետի կողմից, պետք է բաղկացած լինի բացառապես պետական պաշտոնյաներից: Այնինչ, միայն ԵՊՀ խորհրդում կան 5 պատգամավորներ: Պարզվում է, սակայն, որ սա դեռ բոլորը չէ: ԵՊՀ որոշակի շրջանակներ կարծում են, որ ՀՀ մարդու իրավունքների պաշտպան Արմեն Հարությունյանը նույնպես չպետք է ԵՊՀ խորհրդի անդամ լիներ:

Բանն այն է, որ «Մարդու իրավունքների պաշտպանի մասին» ՀՀ օրենքի 4-րդ հոդվածում հստակ գրված է. «Պաշտպանը չի կարող զբաղեցնել պետական կամ այլ պաշտոն կամ կատարել վճարովի այլ աշխատանք, բացի գիտական, մանկավարժական եւ ստեղծագործական աշխատանքից»: Իսկ ԵՊՀ խորհուրդը համալսարանի կառավարման բարձրագույն մարմին է, որն ընդունում է բուհի կենսագործունեությանը վերաբերող կարեւորագույն որոշումներ, որոնք պարտադիր են կատարման համար: Այսինքն, առկա են բոլոր նախադրյալները` խորհրդի անդամին պաշտոնյա համարելու: Երեկ, երբ մենք այս կապակցությամբ մեկնաբանություն խնդրեցինք Արմեն Հարությունյանից, նա ասաց. «Եթե համարում են, որ իրենց ուզած մարդուն ձայն չեմ տվել...

Այդ խորհուրդն աշխատում է հասարակական կարգով, եւ դրա անդամը պետական պաշտոնյա չէ: Եթե այդպես մեկնաբանենք, նախարարն էլ իրավունք չունի այլ պաշտոն զբաղեցնելու: Ուրեմն, բոլորն էլ պետք է դուրս գան խորհրդից: Ես էլ դուրս կգամ, բայց դա սխալ մեկնաբանություն է: Եւ թող մի 20-30 հոգու մեջ էլ մի հատ օմբուդսմեն լինի»: Համալսարանում, սակայն, որոշ ազդեցիկ դեմքեր բոլորովին այլ կարծիքի են եւ օմբուդսմենի ներկայությունը համալսարանի կառավարման խորհրդում համարում են անօրինական: Իսկ ընդհանրապես, ԵՊՀ-ում շարունակվում են ռեկտորի ընտրության շուրջ խմորումներ տեղի ունենալ:

Մենք արդեն տեղեկացրել ենք նաեւ, որ ճնշումների արդյունքում Երեւանի պետական համալսարանի պրոռեկտոր Էդվարդ Չուբարյանն ուրբաթ օրը հրաժարականի դիմում է ներկայացրել կրթության եւ գիտության նախարար Սերգո Երիցյանին` խնդրելով ազատել իրեն ԵՊՀ ժամանակավոր ռեկտորի պարտականություններից: Չուբարյանի փոխարեն ԵՊՀ ռեկտորի պաշտոնակատար է նշանակվել Հանրապետական կուսակցության անդամ, ԵՊՀ ուսումնական գծով պրոռեկտոր Արամ Սիմոնյանը: Հանրապետական կուսակցությունը, որի հիմնական թեկնածուն՝ մաթեմատիկայի ֆակուլտետի դեկան Գեղամ Գեւորգյանը, շատ անսպասելիորեն պարտվեց ԵՊՀ ռեկտորի ընտրությունների առաջին փուլում, փորձում է ամեն ինչ անել, որպեսզի համալսարանի ռեկտոր դառնա իր կուսակցության մյուս անդամը` Արամ Սիմոնյանը:

Դառնալով ռեկտորի պաշտոնակատար ու հետեւաբար` ստանալով նոր լծակներ` պարոն Սիմոնյանը պետք է փորձի ԵՊՀ պրոֆեսորադասախոսական կազմից իր օգտին ձայներ ապահովել: Համալսարանում, սակայն, այս նշանակումը բավական բացասական է ընդունվել, եւ անգամ ԵՊՀ պրոֆեսորադասախոսական կազմի այն մասը, որը լոյալ էր տրամադրված Արամ Սիմոնյանի հանդեպ, փոխել է իր տրամադրությունը եւ աբսուրդ է համարում ռեկտորի թեկնածուի նշանակումը ռեկտորի պաշտոնակատարի պաշտոնում: Մի խոսքով, այս ամենով լիովին հասկանալի է դառնում, թե ինչու ԵՊՀ կառավարման խորհուրդն ընդունեց ռեկտորի ընտրության մի կանոնակարգ, որը հնարավորություն է տալիս անվերջ ձգձգել ռեկտորի ընտրությունները:

Դեռ կանոնակարգի ընդունման ժամանակ շատերը ԵՊՀ-ում կանխատեսեցին, որ այդ կանոնակարգն այն բանի համար էր, որ ռեկտորի թույլ թեկնածուին հնարավորություն տրվի ռեկտոր դառնալու: Եւ այսօր այս ամենի արդյունքում, համալսարանականներից շատերի կարծիքով, ԵՊՀ-ն իսկապես ճգնաժամի մեջ է: Բուհը, փաստորեն, 4 ամիս ռեկտոր չի ունենա, եւ ոչ մի երաշխիք չկա, որ մայիսի 15-ին նշանակված ռեկտորի ընտրությունների ժամանակ ԵՊՀ-ն նոր ռեկտոր կընտրի:

Ի դեպ, այս պահին մայր բուհի ռեկտորի ընտրությունների համար հայտարարված մրցույթում պաշտոնապես դեռ ոչ մի հայտ չի ներկայացվել: Ըստ որոշ տեղեկությունների, բացի նախորդ ընտրությունների ժամանակ 2-րդ փուլ դուրս եկած 2 թեկնածուներից` Գագիկ Ղազինյանից, որը հավաքել էր 36 ձայն եւ Արամ Սիմոնյանից` 20 ձայն, իր թեկնածությունը կրկին առաջադրելու ցանկություն ունի նաեւ մաթեմատիկայի ֆակուլտետի դեկան, հանրապետական Գեղամ Գեւորգյանը: Իսկ ֆիզիկայի ֆակուլտետի դեկան Սամվել Հարությունյանը, որն առաջին փուլից հետո դուրս էր մնացել 4 ձայնով, մեզ փոխանցեց, որ դեռ չի որոշել` առաջադրվելու է, թե` ոչ: 

Լուսինե Բարսեղյան