Սպանվածի հայրը պատասխանում է՝ անհրաժեշտ ինքնապաշտպանություն չի եղել, այլ՝ դիտավորյալ սպանություն

2018 թվականի նոյեմբերի 9-ին Արաբկիրում սպանված Սանասար Բարսեղյանի հայրը պատասխանել է 23.03.2019 թ. «Հայկական ժամանակ» օրաթերթում տպագրված «Մի կաթիլ մեղրի պատմություն» հարցազրույցին: Հարցազրույցն արվել էր գործով մեղադրյալ Վարուժան Գյուրջինյանի պաշտպանի հետ:

Տուժողի հոր պատասխանը ներկայացնում ենք ամբողջությամբ.

«Անկեղծորեն անհասկանալի է նման հոդվածի տպագրման նպատակը, այդուհանդերձ փաստաբան Ինեսա Պետրոսյանի կողմից նշված ակնհայտ սուտ ու կեղծված իրողությունները պատասխանի անհրաժեշտություն են առաջացնում:

Նշեմ, որ գործը ծավալուն է եւ կանդրադառնամ միայն հոդվածում նշված կեղծիքներին:

Ինչ վերաբերվում է կոնֆլիկտի առաջացմանն ու անմիջական մասնակիցներ Վահան Խաչատրյանին ու Վարդան Ջուլֆայանին, ապա անշուշտ, «մի կաթիլ մեղրի պատմություն» եւ մեղավոր են երկուսն էլ: Թող որ դատարանը պարզի՝ ով որքանով, ոչ թե ես կամ ինչ-որ փաստաբան: Համենայնդեպս, ստում է փաստաբան Ինեսա Պետրոսյանը, երբ պնդում է, որ դեպքին ներկա են եղել 10-14 հոգի՝ այն էլ ագրեսիվ տրամադված:

Վարդան Ջուլֆայանի հետ հանդիպել են Վահան Խաչատրյանն ու Սանասար Բարսեղյանը: Մնացածը՝ ընդամենը 4 հոգի եղել են հետեւում: Ընդ որում, եթե Վարդանի վրա հարձակվելու մտադրություն ունենային, շատ հարմար պահ էր, բայց Վահանն ու Սանասարը ուղղակի սպասել են Վարդանի ընկերոջ՝ Վարուժան Գյուրջինյանի գալուն:

Շատ արագ բախվել են Վարդանն ու Վահանը, Վարուժանը նետվել է Սանասարի վրա եւ Սանասարը նրան ուղղակի հրել է, ինչը շատ բնական է ու բախումն ավարտվել է, Վարդանն ու Վարուժանը հեռացել են՝ հետագայի հետ կապված սպառնալիքներ հնչեցնելով: Նրանց հեռանալուն ոչ ոք չի խոչընդոտել: Այս ամենը՝ բախումն ու նրանց հեռանալը, տեւել է ընդամենը մեկ րոպե, ինչի հետ կապված առկա է տեսանյութ: Ավելին՝ տեսանյութերում առկա է նաեւ, թե ինչպես են Վահանն ու Սանասարը հանգիստ քայլով գնում դեպի իրենց մեքենաները:

Մեծ հավանականությամբ հենց այս ընթացքում է, որ 1-ին հարկում գտնվող բնակարանից Վարուժանն ու Վարդանը վերցնում են դանակը ու սկսում հետապնդել Վահանին ու Սանասարին:

Նշում եմ՝ մեծ հավանականությամբ, քանի որ «հանձնվելու պատրաստ» Վարուժանը պարզվում է՝ թաքցրել է հանցագործության գործիք դանակը եւ ստում է փաստաբան Ինեսա Պետրոսյանը, երբ պնդում է, որ Սանասարի մոտ առկա դանակով է կատարվել սպանությունը: Փորձաքննությամբ ժխտվել է դանակի առկայությունը Սանասար Բարսեղյանի մոտ:

Ընդհանրապես գործն առատ է փորձաքննություններով, դրանց մի մասը Վարուժանի կեղծ ցուցմունքների արդյունքում են կատարվել եւ բոլոր դեպքերում էլ կեղծիքները ժխտվել են՝ հաստատելով սպանության դիտավորությունը:

Ակնհայտ սուտ է նաեւ փաստաբան Ինեսա Պետրոսյանի նշածը Վարուժանի վնասվածքների վերաբերյալ: Փորձաքննությամբ ժխտվել է Սանասարի կողմից Վարուժանին նույնիսկ առողջությանը նվազագույն վնաս հասցնելու հանգամանքը: Իրականությունն այն է, որ Վարուժանն ու Վարդանը հետապնդել ու անակնկալի են բերել Սանասարին ու Վահանին՝ դուրս գալով նրանց առաջ: Վարդանը սկսել է քաշքշել Վահանին ու մի փոքր հեռացել են, իսկ Վարուժանը միանգամից դանակով հարվածներ է հասցրել Սանասարին:

Ստում է փաստաբան Ինեսա Պետրոսյանը, երբ ասում է, որ Վարուժանը ինքնապաշտպանվել է, տրամաբանությունից ու իրականությունից հեռու պնդում է, թե սպանելու նպատակ չի ունեցել: Այդ դեպքում ինչու էր սպանելու նպատակ չունեցողը հարվածում 4 անգամ, որից երեքը դիպել են ու հանդիսացել կյանքի համար վտանգավոր: Դանակի հարվածներ հասցնելու, ըստ էության, բուն սպանության դրվագի հետ կապված առկա են փորձաքննություն, որոնք ապացուցում են դիտավորությունը եւ ժխտում փաստաբան Ինեսա Պետրոսյանի նկարագրածը: Սա է իրականությունը: Այս ամենը վերցված է միմիայն նախաքննական նյութերից, ինչին տիրապետում է նաեւ փաստաբանը:

Սանասար Բարսեղյանը հանդիսանում է անմեղ զոհ, որ սպանվել է դիտավորությամբ ու դաժանորեն: Փաստաբան Պետրոսյանը իրեն թույլ է տալիս նաեւ անդրադառնալ գործով անցնող անձանց բարոյական նկարագրին եւ ոմանց անցյալին ու արարքներին:

Միգուցե ազնիվ լիներ, նշեր նաեւ, թե ով է իր պաշտպանյալը, ինչ հանցավոր անցյալ է ունեցել, ինչ դատվածություն, ինչ ընտանիքից է, սրտի խնդիրները որտեղից են ու էլի շատ բաներ, ինչն ինքը գիտի ու թաքցնում է, բայց մենք էլ գիտենք:

Այս ամենով հանդերձ, Սանասար Բարսեղյանի կորստի դաժան ու օրեցօր խորացող ցավը տանելով, ե՛ւ ընտանիքը եւ ողջ մեծ հարազատությունն ու շրջապատը իրենց դրսեւորել են շատ կոռեկտ՝ քննչական խմբից եւ հետագայում նաեւ դատավարությունից ունենալով մի ակնկալիք՝ ճշմարտություն եւ արդարադատություն:

Աներկբա է, յուրաքանչյուր ոք իրավունք ունի պաշտպանված լինելու: Եվ դրա միակ հարթակը դատարանն է ուր եւ պիտի ներկայացվեն փաստեր ու հակափաստարկներ եւ պետք է տեղի ունենա արդարադատություն:

Տարակուսելի է փաստաբան Պետրոսյանի անազնիվ քայլն ու փաստերի կեղծումը: Շարժառիթները մեզ անհայտ են, դա իր եւ իրեն վարձածների խնդիրն է:

Ես պնդում եմ, որ հարցազրույցի մեջ  փաստաբանի նշածների մեջ բացահայտ են սուտն ու նախաքննական նյութերի կեղծված ներկայացնելը:

Պնդում եմ եւ հուսով եմ, որ փաստաբանների պալատը կանդրադառնա փաստաբան Ինեսա Պետրոսյանի անազնիվ քայլին ու մասնագիտությունն արատավորող վարվելակերպին: Մենք այս ամենին կանդրադառնանք դատավարությունից հետո, երբ էլ որ լինի:

Հ.Գ. Կառավարության հարգարժան ղեկավարին ուզում եմ տեղեկացնել՝ սույն գործի շրջանակում պատրաստվում եմ դատի տալ ՀՀ կառավարությանը՝ ԱՆԳՈՐԾՈՒԹՅԱՆ համար. Սանասար Բարսեղյանը արնաքամ է եղել: Աներկբա է, որ պատասխանատվություն ունեն շտապ օգնության ծառայությունը եւ առավելապես ՃՈ-ն:  Այս կառույցների կողմից պարտականությունների թերի եւ ոչ պատշաճ կատարումն է Սանասար Բարսեղյանի ստացած հարվածներից արնաքամ լինելու ու մահանալու պատճառը:

Որդեկորույս հայր՝ Հայկազ Սանասարի Բարսեղյան»: