Տնտեսական հեղափոխության մեր մեթոդը չի տարբերվում քաղաքական հեղափոխության մեր մեթոդաբանությունից․ Նիկոլ Փաշինյան

Տնտեսական հեղափոխության մեր մեթոդը չի տարբերվում քաղաքական հեղափոխության մեր մեթոդաբանությունից, պայմանականորեն ասած՝ քաղաքական հեղափոխությունը տեղի ունեցավ այն ժամանակ, երբ ՀՀ յուրաքանչյուր քաղաքացի ինքն իրենով փակեց այն փողոցներն ու նրբանցնքները, որոնցով հոսում էին կոռուպցիան ու ապօրինությունը։ Տնտեսական հեղափոխության գաղափարախոսությունը հետեւյալն է․ ՀՀ յուրաքանչյուր քաղաքացի պետք է ինքն իր գործունեությամբ փակի այն փողոցները, որտեղով հոսում են աղքատությունը, խեղճությունը, ավերը։ Այս մասին այսօր Վանաձորի տեխնոլոգիական կենտրոնում մեկնարկած «Իմ քայլը հանուն Լոռու մարզի» ներդրումային բիզնես ծրագրի ժամանակ իր ելույթում հայտարարեց ՀՀ վարչապետ Նիկոլ Փաշինայնը։

Ավելի վաղ տեղեկացրել էինք, որ այսօր՝ փետրվարի 23-ին Վանաձորի տեխնոլոգիական կենտրոնում մեկնարկել է ՀՀ Տարածքային կառավարման եւ զարգացման նախարարության նախաձեռնությամբ եւ Լոռու մարզպետարանի կողմից կազմակերպված «Իմ քայլը հանուն Լոռու մարզի» ներդրումային բիզնես ծրագրիրը: Ֆորումին ներկա են ՀՀ վարչապետ Նիկոլ Փաշինյանն ու կառավարության անդամները, ինչպես նաեւ բիզնեսմեններ ու ներդրողներ՝ Հայաստանից ու այլ երկրներից։

Ֆորումի աշխատանքային խմբի ղեկավարը Լոռու մարզպետ Անդրեյ Ղուկասյանն է: Բացման խոսքը տրվեց հենց վերջինիս, որն էլ հյուրերին ներկայացրեց մարզի ներուժը, վիճակագրական տվյալներ մարզի 2018 թվականի տնտեսական աճի վերաբերյալ՝ նշելով, որ կառավարությունն իր ուշադրության կենտրոնում է պահում խնդիրներն ու դրանց լուծման հնարավորությունները։

Այնուհետեւ վարչապետն իր ելույթում անդրադարձավ տնտեսական հեղափոխության իրականացման ճանապարհային քարտեզին ու մեթոդիկային․

«Հիմնական հարցը, որ այսօր օդում կախված է, հետեւյալն է․ կարող է՞ արդյոք Հայաստանի Հանրապետությունում տեղի ունենալ տնտեսական հեղափոխություն, եւ կարո՞ղ են արդյոք ՀՀ կառավարությունն ու ժողովուրդը հասնել մի էֆեկտի, որը միջազգայնորեն ընդունված է համարել տնտեսական հրաշք։

Այս հարցի պատասխանը ակնհայտ է․ այն ժողովուրդը, որն ի վիճակի է եղել իրականացնել եւ հասնել մի էֆեկտի, որը լիարժեք կարող ենք անվանել քաղաքական հրաշք, ուրեմն տնտեսական հրաշքը նույնպես մեր հասանելիության տիրույթում է։ Տնտեսական հեղափոխությունն, ըստ այդմ, մեր կարեւորագույն առաջնահերթությունն է, բայց մենք պետք է հասկանանք՝ որոնք են այդ հեղափոխության պարամետրերը, եւ ինչպես են դրանք ստեղծվում»,-ասաց վարչապետը՝ նշելով, որ տնտեսական հեղափոության պարամետրերը աշխատատեղերն են, եկամուտների նոր մակարդակը, բարեկեցոււթյան նոր մակարդակը, այսինքն՝ տնտեսական հեղափոխության արգասիքը բարեկեցության նոր եւ բարձր մարակարդակն է, բայց, ինչպես հարց հնչեցրեց Փաշինյանը, ո՞վ է տնտեսության մեջ ստեղծվող որեւէ արդյունքի հեղինակը․

«Այդ արդյունքի հեղինակը մարդն է բացառապես։ Մենք ուզոմ ենք մարդուն աջակցել եւ խրախուսել՝ ստեղծել այն, ինչը ստեղծելն իր հնարավորությունների տիրույթում է։

Ինչպե՞ս ենք մենք պատրաստվում քաջալերել․ խոսքո՞վ, այո՛, նաեւ խոսքով, որովհետեւ, ցավոք սրտի, մեր իրականության մեջ ընդունված է թերագնահատել խոսքը եւ խոսքի արժեքը, բայց, որպես քրիստոնեությունը առաջինը ընդունած ժողովուրդ, մենք պետք է առաջինը արձանագրենք աստվածաշնչյան ճշմարտությունը՝ ի սկզբանե բանն էր, եւ բանը Աստծո մոտ էր․ այսինքն՝ բանը խոսքն է, ամեն ինչ սկսվում է մտքից։ Բայց արդյո՞ք միայն խոսքով․ իհարկե՛ ոչ։ Հաջորդ ամենակարեւոր ուղղությունը մեզ համար իրական տնտեսական գործունեության հնարավորություններ ստեղծելն է՝ կարգավորումների մեղմացման ճանապարհով, տնտեսական գործունեության մեջ մենաշնորհների բացառման ճանապարհով, կոռուպցիայի բացառման ճանապարհով եւ օրենսդրության բարեփոխումների ու կատարելագործման ճանապարհով»,-ասաց ՀՀ վարչապետը։