Ովքեր եւ ինչ նպատակով են Վանաձորի փողոցներում տեսախցիկներ տեղադրում

Վանաձոր քաղաքի փողոցներում ու խաչմերուկներում տեւական ժամանակ է՝ տեսախցիկներ են տեղադրվում: Քաղաքացիները հստակ չգիտեն, թե ովքեր եւ ինչ նպատակով են դրանք տեղադրում: Մի մասն ասում է, որ դրանք ՃԵԿ-ի կանոնները խախտած վարորդներին են տուգանելու, մյուս մասի կարծիքով՝ քաղաքում տիրող իրավիճակն է ֆիքսվելու՝ չնախատեսված վայրերում աղբ թափելուց մինչեւ գողությունների ու հանցագործությունների նախականխում: Առաջին հայացքից տեսախցիկների տեղադրումը անհրաժեշտ է, սակայն հարցեր կան, որոնց պատասխանները վանաձորցիները դեռեւս չունեն:

«Վանաձորցի վարորդների ակումբ»-ի հիմնադիր Անդրանիկ Հովհաննիսյանի խոսքով՝ մարդկանց վերահսկողություն մասնավոր ընկերությունը չի կարող ունենալ, իսկ քաղաքապետարանն էլ պետք է տվյալները հավաքի բացառապես մի նպատակով և այլ նպատակներով չօգտագործի. «Իմ կարծիքով՝ դա պիտի աներ ոստիկանությունը, ոչ թե քաղաքապետարանը, կամ համատեղ կազմակերպեին, իսկ տեսանյութերին թույլտվություն լիներ միայն բացառիկ մարդկանց մոտ, ովքեր պետք է գաղտնիության համաձայնագիր ստորագրեն և քրեորեն պատժվեն խախտելու համար»:

Հովհաննիսյանը չի բացառում, որ որոշ ժամանակ անց տեսախցիկները կօգտագործվեն նաեւ ՃՈ-ի կողմից, ինքն անձամբ դեմ չէ դրան. «Թող հսկեն ու երթևեկը կանոնակարգվի, բայց նախ և առաջ պետք է նկարահանելուց առաց մարդկանց տեղեկացնեն, որ տեսանկարահանվում է, քաղաքացիները պետք է իրազեկվեն, որ անվտանգության նպատակով այսպիսի բան է կազմակերպվում»:

ՀԺ-ի հետ զրույցում Վանաձորի քաղաքապետ Մամիկոն Ասլանյանն ասաց, որ Վանաձոր համայնքի 2018թ-ի բյուջեից տեսախցիկների տրամադրման համար հատկացվել է 6.700 հազար դրամ գումար: Աշխատանքներն իրականացնում է այդ ոլորտում մասնագիտացված «ՍԻ Ընդ ՓԻ Էս» կազմակերպությունը: Տեխնիկական սպասարկման համար նոր մրցույթ է հայտարարվելու այս տարի. «Տեսախցիկները տեղադրվել են համայնքի միջոցներով, անվտանգության նկատառումներից ելնելով: Վերջին տարիներին Վանաձորում ավելացել են բնակարանային գողությունները, բազմաթիվ չբացահայտված վթարները, ինչպես նաեւ՝ չնախատեսված վայրերում աղբ թափողներին հայտնաբերելու եւ վերահսկելու համար է: Ի սկզբանե դա էր մեր նպատակը, բայց հետագայում ոստիկանության եւ դատախազության հետ համատեղ քննարկումների ընթացքում բարձրացվեց հանցավորության դեմ պայքարը, եւ համայնքը իր միջոցներով մի շարք վայրերում տեղադրեց տեսախցիկներ, որոնք երթեւեկության հետ բացարձակ կապ չունեն, վարորդները չեն տուգանվելու, նպատակը քաղաքում հսկողություն սահմանելն է»,-ասաց քաղաքապետը՝ նշելով, որ ներկայումս տվյալները կոդավորված են, այս պահին միայն ինքը կարող է օն-լայն դիտել, հետագայում որոշված է, որ նաեւ աշխարհի տարբեր վայրերից կարողանան դիտել Վանաձորը: Ասլանյանը բացառում է, թե տեսախցիկները հետագայում կհանձնվեն ՃՈ-ին. «Չկա նման բան, դա մեր սեփականությունն է, մեր քաղաքի անցուդարձը տեսնելու համար է, ծաղիկները գողացողներին ու համայնքի գույքը փչացնողներին հայտնաբերելու եւ պատասխանատվության ենթարկելու համար է»:

Անդրադառնալով այն դիտարկմանը, որ տեսագրությունները կարող են հայտնվել 3-րդ անձի ձեռքում, ինչն էլ կարող է բերել անձնական կյանքի գաղտնիության խախտման, համայնքի ղեկավարն ասաց. «Նախ այդտեղ անձնական տվյալների խնդիր չկա, որովհետեւ մեքենաների ներսը չի երեւում, տեսախցիկները տեղադրված են շատ բարձր, իսկ 3-րդ անձի մոտ հայտնվելու հավանականությունը զրո է, որովհետեւ դա պաշտպանված համակարգ է: Տվյալները հավաքվելու են քաղաքապետարանի համակարգչում»:

Նկատենք, որ ներկայումս, ըստ համայնքի ղեկավարի, արդեն իսկ տեղադրվել է թվով 32 տեսախցիկ: Մնում է հուսալ, որ գոնե տեսախցիկների առկայությունը կնվազեցնի Վանաձորում օր օրի ավելացող գողությունների թիվն ու կավելացնի բացահայտման ցուցանիշը: Իսկ մեքենաներից աղբ թափողներն ու համայնքային նստարանները ջարդողները վերջապես «կհայտնաբերվեն» ու պատասխանատվության կենթարկվեն: