Իրականում լարված մթնոլորտ էր. արտահերթ ընտրություններից հետո, կարծում եմ, այս հարցը կլուծվի. Ղազարյան

Արմավիրի մարզի Արշալույս համայնքում կրքերը չեն հանդարտվում: Վերջին օրերին բողոքի ակցիաներ են տեղի ունենում՝ համայնքապետ Զարզանդ Գրիգորյանի հրաժարականի պահանջով: Այսօրվա ակցիայի ժամանակ խաղաղ բողոքը վերածվել է քաշքշուկի` ցուցարարների եւ ոստիկանների միջեւ:

Խնդրին ծանոթանալու համար այնտեղ էր գնացել ԱԺ «Իմ քայլը» խմբակցության պատգամավոր Թագուհի Ղազարյանը, ով նաեւ արմատներով այդ գյուղից է եւ վերջին խորհրդարանական ընտրություններին հենց Արմավիրի մարզից էր առաջադրվել ռեյտինգային ընտրակարգով: Նա հանդիպել է ցուցարարների եւ գյուղապետի հետ:

«Հոկտեմբեր ամսին համայնքում արտահերթ ընտրություններ են տեղի ունենալու, որի ընթացքում, կարծում եմ, այս հարցը վերջնականապես կլուծվի»,- այս մասին ՀԺ-ի հետ զրույցում ասաց Թագուհի Ղազարյանը:

- Տիկին Ղազարյան, այսօր Արշալույսում բախումներ են տեղի ունեցել: Ինչ-որ բան կարողացա՞ք անել:

- Ասել, որ խնդիրը սպառիչ լուծում է ստացել` սուտ կլինի: Որովհետեւ արդեն մի քանի ամիս է՝ գյուղացիների մի մասը պահանջում է գյուղապետի հրաժարականը, իսկ գյուղապետը պատրաստ չէ հրաժարական տալ: Նա նշում է, որ ինքն ընտրված գյուղապետ է եւ կսպասի մինչեւ իր ժամկետը լրանա: Այդ իսկ պատճառով անվերջ խնդիրներ են առաջանում: Հարցն այն է, որ վերջին 3-4 աշխատանքային օրերին գյուղացիներն արդեն արգելափակել էին գյուղապետարանի մուտքը: Ու փաստորեն գյուղի բնականոն աշխատանքն էր խաթարվել: Մի այլ խումբ գյուղացիներ էլ օրինակ` տեղեկանք պետք է վերցնեն կամ այլ հարցով պիտի մտնեն գյուղապետարան, բայց չեն կարողանում:

Այսօր արդեն ոստիկանությունն էր մոտեցել եւ ազատել այդ տարածքը` ցուցարարներին տեղափոխելով ողջամիտ հեռավորության վրա: Բայց դրանից նաեւ գյուղացիներն էին վրդովվել, շատ տաքացած էին, երբ ես առավոտյան 10:30 գնացի այնտեղ: Ոստիկանության պատասխանատուի հետ խոսեցի, նա ասաց, որ ամեն կերպ կաջակցեն հավաքի խաղաղ անցկացման համար, հավելեց, որ ոչ մի կերպ չեն պատրաստվում անհամաչափ ուժ կիրառել: Չնայած գյուղացիների պնդմամբ իրենց հեռացնելուց բավականին կոպիտ են եղել ոստիկանները, սակայն նրանք էլ հակառակն են պնդում՝ ասելով, որ համաչափ ուժ է կիրառվել:

Գյուղացիները նաեւ ստորագրահավաք են կազմակերպել`գյուղապետի հրաժարականի պահանջով: Նշում էին, որ այդ ստորագրահավաքից հետո իրենց նկատմամբ խտրական` որոշակիորեն օրինականության շրջանակում, բայց ճնշումներ է գործադրում գյուղապետը` հարկման հետ կապված:

- Բայց կայի՞ն նման ճնշումներ, դուք նկատե՞լ եք:

- Գյուղացիներն էին այդպես ասում: Ես առաջարկեցի նաեւ, որ զրուցենք գյուղապետի հետ, հասկանանք՝ ինչ է տեղի ունենում: Գյուղապետին հրավիրեցի հավաքի վայր, նա չցանկացավ գալ, ասելով, որ իրեն այդտեղ վիրավորում են, հայհոյում են: Դա արդեն լուրջ խնդիր է, որ համայնքապետը չի կարողանում համայնքի բնակիչների հետ խոսել: Հավաքի վայրից փոքր ինչ հեռու գտնվող չեզոք վայրում հանդիպեցինք գյուղապետի հետ: Ցուցարարներից երկուսը ինձ հետ եկան, որպեսզի իրենց խնդիրները ներկայացնեն:

Գյուղապետը պնդում է, որ այն ամենն, ինչը որպես ճնշում է ներկայացվում գյուղացիների կողմից, ինքն անում է օրինականության շրջանակում: Իսկ գյուղացիները նշում են, որ այդ նույն օրենքը գյուղապետը չի կիրառում իր կողմնակիցների նկատմամբ:

Իրականում լարված մթնոլորտ էր: Ես խնդրեցի գյուղապետին այդ լարվածության մթնոլորտը թոթափելու համար որեւէ կերպ այդ խտրական մոտեցումը ցույց չտալ եւ ավելի մեղմ լինել մարդկանց նկատմամբ: Նաեւ այդ հարկահավաքության մասով ասացի: Գյուղապետը ասաց, որ մինչեւ ապրիլի վերջ կսպասի եւ համատարած հարկերը կսկսի հավաքել, երբ որ արդեն բերք կլինի: Ես կարծում եմ, որ գոնե այս մասով սա միջանկյալ լուծում էր:

Համայնքի բնակիչները ասացին, որ շարունակելու են բողոքի ակցիաները: Ես խնդրեցի ակցիաների կազմակերպիչներին գոնե գյուղապետարանի աշխատանքը չարգելափակել: Նրանք ըմբռնումով մոտեցան իմ այդ խնդրանքին: Ես խնդրել եմ, որ եթե այս պայմանավորվածությունը ինչ-որ մեկը խախտի, ապա կապ հաստատեն ինձ հետ:

Այս տարի` հոկտեմբեր ամսին, համայնքում արտահերթ ընտրություններ են տեղի ունենալու, որոնց ընթացքում, կարծում եմ, այս հարցը վերջնականապես կլուծվի եւ պարզ կդառնա՝ արդյո՞ք այն մարդիկ, ովքեր Գրիգորյանին չեն ցանկանում տեսնել, մեծամասնություն են, թե՝ ոչ: Ուղղակի հույս ունեմ, որ հնարավորինս կամարտահայտումը ազատ կլինի այս ընտրություններին:

- Մի քանի օր առաջ մենք զրուցել էինք նաեւ Արշալույսի համայնքապետ Զարզանդ Գրիգորյանի հետ: Նա բավական վստահ էր, որ գալիք ընտրություններում էլ կկարողանա հաղթել: Արդյո՞ք նրա աջակիցների թիվը այդքան մեծ է:

- Անկեղծ ասած, չեմ կարող ասել՝ իր աջակիցների թիվը որքան է: Բայց այս դժգոհողների թիվը զգալի քանակի է: