Իսպանացի հայտնի մասնագետը խոսել է ՀՖՖ-ի հետ տեխնիկական տնօրենի պաշտոնը զբաղեցնելու մասին

Իսպանացի հանրահայտ մասնագետ Խինես Մելենդեսը հայկական ֆուտբոլի զարգացման հեռանկարներ է տեսնում: Նա Երեւան է ժամանել՝ Հայաստանի ֆուտբոլի ֆեդերացիայի հրավերով, որպեսզի վերլուծի՝ ինչ վիճակում է մարզաձեւը, ինչ հնարավորություններ կան եւ ինչպես պետք է առաջ շարժվել: Մելենդեսը, որն իսպանական ֆուտբոլի վերջին 20 տարիների զարգացման ծրագրի հեղինակներից է, գլխավորել է Իսպանիայի տարբեր տարիքային հավաքականներ՝ հասնելով բացառիկ հաջողությունների, եղել է Իսպանիայի ֆեդերացիայի տեխնիկական տնօրենը եւ ազգային հավաքականների համակարգողը, ՀՀ-ում պոտենցիալ տեսնում է: «Հայկական ժամանակ»-ի հետ զրույցում նա խոսեց զարգացման ճանապարհի մասին: Անդրադարձավ նաեւ ՀՖՖ տեխնիկական տնօրենի պաշտոնը զբաղեցնելու հնարավորությանը, որի մասին ավելի վաղ ՀԺ-ի հետ զրույցում ասել էր ՀՖՖ փոխնախագահ Արմեն Նիկողոսյանը:

-Ո՞րն է Հայաստան ժամանելու Ձեր հիմնական նպատակը:

-Հիմնական նպատակը եղել է հայկական ֆուտբոլն ուսումնասիրելը, վերլուծություններ անելը: Այստեղ 2 ընկեր ունեմ, նրանցից մեկն Արմենն է՝ ՀՀ հավաքականի գլխավոր մարզիչը (խմբ. Արմեն Գյուլբուդաղյանց): Իմ երկար տարիների ընկերն է, նաեւ մրցակիցներ ենք եղել խաղադաշտում, շատ մտերիմ ընկերներ ենք: Մյուսը ՀՖՖ գլխավոր քարտուղար Արմենն է (խմբ. Արմեն Մելիքբեկյան), նույնպես իմ ընկերն է, որովհետեւ ՈՒԵՖԱ-ում է աշխատում՝ երիտասարդների մրցաշարերի հետ կապված, երկար տարիներ է՝ ինչ ճանաչում ենք իրար՝ դեռ այն ժամանակվանից, երբ ազգային հավաքականի մարզիչ էի: Եվ ինձ հնարավորություն ընձեռեցին գալու, ուսումնասիրելու հայկական ֆուտբոլը եւ գնահատելու այն, ինչ կա, ասելու՝ ինչ է անհրաժեշտ զարգացնելու համար:

-ՀՀՖ-ի փոխնագահներից մեկը ՀԺ-ի հետ զրույցում ասել է, որ Ձեզ հետ բանակցություններ են ընթանում, որպեսզի զբաղեցնեք տեխնիկական տնօրենի պաշտոնը:

-Խոսակցություն ենք ունեցել, սակայն դա եղել է խոսակցություն ընկերների միջեւ, նախագահի հետ, եւ ճիշտ է, որ նման հավանականություն կա, բայց դեռեւս ոչ իրական:

-Ասացիք, որ ուսումնասիրել եք հայկական ֆուտբոլը: Ի՞նչ եզրակացության եք եկել:

-Դեռ բավական ժամանակ է պետք: Կարծում եմ, որ լավ խաղացողներ ունեք, հրաշալի մարզաբազա: Այցելել եմ «Բանանցի» մարզադպրոց եւ տեսել եմ այս մեկը (խմբ. նկատի ունի Երեւանի ֆուտբոլի ակադեմիան) եւ կարծում եմ՝ հսկայական պոտենցիալ կա, որով կարելի է զարգացնել ֆուտբոլը, տաղանդը, որը Հայաստանում կա: Կարծում եմ՝ այստեղ մեծ տաղանդ կա, պարզապես ճանապարհը չկա, որով պետք է զարգացնել այդ տաղանդը:

-Եվ ի՞նչ ճանապարհ պետք է ունենանք դրա համար:

-Կարծում եմ՝ 2 հիմնարար բան կա, որ պետք է անել. առաջինը լավ մարզիչներ պատրաստելն է, 2-րդը՝ ըստ իս՝ մանկապատանեկան ֆուտբոլի մրցաշարերի ձեւափոխումն է, որպեսզի փոքրերն իրենց տաղանդը զարգացնելու ավելի մեծ հնարավորություն ունենան: Անհրաժեշտ է համապատասխան մրցաշարեր ունենալ: Եթե տաղանդավոր ֆուտբոլիստները համապատասխան մրցաշարեր են ունենում, զարգանում են, համապատասխան մրցաշարեր չունենալու դեպքում լճանում են:

-Սեմինարներ անցկացրեցիք հայ մարզիչների հետ: Ի՞նչ կարող եք ասել նրանց մասին:

-Շատ հետաքրքրված էին, շատ հարցեր էին տալիս, մեծ ցանկություն ունեն սովորելու եւ տեղյակ լինելու, թե ինչպիսին է այսօրվա ֆուտբոլը: Ֆուտբոլն անդադար փոփոխվում է, եւ նրանք ցանկանում են ժամանակի հետ քայլել, այդ պատճառով էլ այստեղ եմ:

-Ապագայում տեսնո՞ւմ եք հնարավորություններ, որ ՀՀ հավաքականը երբեւէ հայտնվի Եվրոպայի կամ աշխարհի առաջնությունում: Հայ երկրպագուները շատ են ուզում:

-Նախ պետք է շատ աշխատել: Աշխատանքը սկսել են, այստեղ ֆիզպատրաստության լավ մարզիչ կա, որին ես եմ խորհուրդ տվել (խմբ. նկատի ունի Խավիեր Մինյանոյին): Նա աշխարհի, Եվրոպայի չեմպիոն է եւ շատ կօգնի: Եվ եթե սկսեն ճիշտ ճանապարհով ընթանալ, եղած պոտենցիալը կզարգանա:

-Բայց հայ երկրպագուները չեն ցանկանում սպասել:

-Սկզբում պետք է լավ աշխատանք կատարել: Պետք է կարգի բերել գործերը, եւ դրանից հետո այդ տաղանդով եւ ֆուտբոլի նկատմամբ ունեցած կրքով կստացվի:

-Իսպանիայի հավաքականը երկար տարիներ լավ խաղալով հաջողություններ չէր ունենում: Հաջողությունները եկան 2008 թվականից հետո. Եվրոպայի, աշխարհի չեմպիոն դարձավ: Ի՞նչի շնորհիվ էր:

-Հաջողության բանալին այն է, որ երիտասարդ խաղացողները, որոնք ամեն ինչ հաղթել էին փոքր տարիքում, միավորվեցին մեծահասակների հավաքականում: Փոքր տարիքում նրանք պարտավոր էին հաղթել եւ մեծ տարիքում գիտեին՝ ինչպես հաղթել: Հիմա տրանսֆորմացիայի փուլում ենք եւ մոտ ժամանակներս նորից հաջողություններ կունենանք:

-Հայ մարզիչները հաճախ ասում են, որ փոքրերի դեպքում հաջողությունների կարիք չունենք, պետք է ֆուտբոլիստներ պատրաստենք:

-Ամբողջությամբ համաձայն եմ, որ փոքրերի թիմերում պետք է ֆուտբոլիստներ պատրաստել, որպեսզի հետո հաջողություններ լինեն մեծերի թիմերում, բայց այդ փոքրիկները պետք է սովորեն հաղթել, փոքր տարիքում հաղթել սովորելով հետագայում նրանք հաջողություններ կունենան:

-Ի՞նչ կասեք Եվրո 2020-ի որակավորման փուլի այն խմբի մասին, որում ընդգրկվել է Հայաստանը (Իտալիա, Բոսնիա եւ Հերցեգովինա, Ֆինլանդիա, Հունաստան, ՀՀ, Լիխտենշտեյն):

-Շատ բարդ խումբ է, բայց խումբ է, որը Հայաստանին կարող է հնարավորություններ տալ: Պետք է պայքարել:

-Իսկ Իսպանիայի՞նը (Իսպանիա, Շվեդիա, Նորվեգիա, Ռումինիա, Ֆարերյան Կղզիներ, Մալթա)....

-Կարծում եմ, որ համեմատաբար ավելի հեշտ խումբ է:

-Ֆուտբոլից դուրս ի՞նչ կասեք Հայաստանի, հայերի մասին:

-Քրիստոնեաներ են, ինչպես ես: Մարդիկ շատ լավն են, բարեհամբույր են, հաճելի են: Հիանալի քաղաք է, ես այն նախկինում էլ եմ տեսել: Հավաքականի հետ եկել եմ 2007 թ. մինչեւ 19 տարեկանների Եվրոպայի առաջնության որակավորման փուլի շրջանակներում: Բացի այդ՝ Արմենի հետ (խմբ. Գյուլբուդաղյանց) շատ մտերիմ ընկերներ ենք: Ֆեդերացիայի աշխատակիցները հիանալի են, շատ ուրախ եմ նրանց տեսնելու համար: