Քաղաքական պարկեշտությունից որեւէ մեկը դեռ չի մեռել. Նաիրա Զոհրաբյանը՝ Էդուարդ Շարմազանովին

«Բարգավաճ Հայաստան» կուսակցությունում նախընտրական ցուցակի ձեւավորման թեժ աշխատանքներ են ընթանում: Աշխատանքները գլխավորում է Գագիկ Ծառուկյանը: ԲՀԿ քաղխորհրդի գլխավոր քարտուղար Նաիրա Զոհրաբյանի փոխանցմամբ՝ առաջիկա օրերին պարզ կլինի, թե ցուցակում ովքեր են ներգրավված լինելու:

- Տիկին Զոհրաբյան, ԲՀԿ-ում արդեն որոշում կա՞, թե ընտրություններին ինչ ձեւաչափով եք մասնակցելու: Թեկնածուներն արդեն հստակեցվա՞ծ են:

- Քննարկումները շարունակվում են եւ առաջիկայում պարզ կլինի բոլոր հարցերի պատասխանը: Առաջիկա օրերին պատրաստ կլինի ԲՀԿ-ի համամասնական ցուցակը եւ բոլորս առաջադրվելու ենք ռեյտինգային ընտրակարգով, բացի պարոն Ծառուկյանից: Ես ինքս առաջադրվելու եմ Սյունիքի ու Վայոց Ձորի մարզերում: Առաջադրվում եմ այստեղից, որովհետեւ իմ ծնողներն այստեղից են: Ես հիմա երկու խոշոր ծրագրի վրա եմ աշխատում, որ վերականգնվի Քարահունջի հուշակոթողը, իսկ մյուսը Խնձորեսկի քարանձավների մասին է: Մարոկկոյից խոշոր ներդրողներ են գալու: Ես ունեմ սյունեցիներին առաջարկելու այս ծրագրերը, որոնք ստեղծելու են աշխատատեղեր:

- ԲՀԿ-ն հիմնական մրցակից ու՞մ է տեսնում այս ընտրապայքարում:

- Բավականին հատուկ ներքաղաքական իրավիճակ է Հայաստանում: Նախկին ընտրություններում պարզ էր, որ իշխանական կուսակցությունն ամեն ինչ անելու է՝ ընտրողի քվեն կեղծելու համար, օգտագործելու է վարչական  ռեսուրսներ: Հիմա մենք գնալու ենք իրական ընտրությունների, որտեղ չեն լինելու վարչական ռեսուրսի կիրառում եւ խեղված քվե: Մենք բոլորս պետք է մեկ օրակարգ ունենանք՝ ներկայացնել մեր ծրագրերը: ԲՀԿ-ն ունի շատ հետաքրքիր ծրագիր, որի հիմքում դրված է քաղաքական հեղափոխությունից հետո տնտեսական հեղափոխության մեր պատկերացրած մոդելը, որը բերելու է լրջագույն ներդրումներ Հայաստան: Մենք ներկայացնելու ենք մեր ծրագիրը՝ ինչպես բացել տնտեսության թոքերը:

- Օրինակ, ՀՀԿ-ից Էդուարդ Շարմազանովն ասում է, որ իրենք պայքարում են 2-րդ տեղի համար: ԲՀԿ-ում արդեն քննարկե՞լ են, թե որերորդ ուժն են ուզում լինել խորհրդարանում:

- Ռեալ քաղաքականությունը չի որոշվում այս կամ այն ուժի ցանկություններով: Ամեն ինչ կախված է ընտրողներից: Ես ՀՀԿ-ի փոխարեն այդքան լավատես չէի լինի, բայց կապրենք՝ կտեսնենք:

- Հանրապետականում արդեն որոշել ու հայտարարել են, որ իրենք են միակ ընդդիմությունը: Մասնավորապես, ԲՀԿ եւ ՀՅԴ խորհրդարանական ուժերի մասին էլ ասում են, որ օրվա մի մասը իշխանություն եմ, մյուսն՝ ընդդիմություն: Համամի՞տ եք այս տեսակետի հետ:

- Նախընտրական շրջանը բերում է քաղաքական գործիչներին էկզոտիկ հայտարարություններ անելու ցանկության, բայց ես իմ բոլոր գործընկերներին հորդորում եմ, որ ընդունեն խաղի նոր կանոնները: Խաղի նոր կանոններն այն են, որ այլեւս չպետք է կեղծվի ընտրողի քվեն: Չկեղծված ընտրություններից հետո մենք կարող ենք տալ յուրաքանչյուրի կանխակալ արված հայտարարության գնահատականը:

- Էդուարդ Շարմազանովը, օրինակ, կարծում է, որ ընտրողը իրենց կվստահի, որովհետեւ այս վեց ամիսների ընթացքում գնաճ է տեղի ունեցել, Բոլթոնն է եկել վերջնագրերով խոսել ու գնացել:

- Ես ուզում եմ հասկանալ, որտեղ է Շարմազանովը տեսել Բոլթոնի վերջնագրերով խոսելը: Ես հետեւել եմ Բոլթոնի հայտարարություններին եւ վարչապետի պարզաբանումներին ու չեմ տեսնում վերջնագրերով խոսել: Ինչ վերաբերվում է գնաճին, ապա ես խորհուրդ եմ տալիս ՀՀԿ-ի իմ հարգարժան գործընկերներին՝ հետ նայել իրենց կառավարման անփառունակ տարիներին եւ զուսպ լինել իրենց գնահատականներում: Քաղաքական պարկեշտությունից որեւէ մեկը դեռ չի մեռել:

- Մտավախություն ունե՞ք, որ իշխանությունը նախընտրական շրջանում ուժերին կբաժանի սեւերի ու սպիտակների:

- Հույս ունեմ, որ այդպես չի լինի: Վարչապետի գնահատականները տալիս են ինձ այդպիսի հիմք՝ ենթադրելու, որ չի լինելու նոր արհեստական բարիկադներ, չի լինելու սեւ եւ սպիտակ: Դրա քաղաքական մոտիվացիան չկա: Մենք ասում ենք, որ հեղափոխության կապիտալիզացիայի համար ամենակարեւոր քայլը լինելու է արդար խորհրդարանական ընտրությունները: Եթե բոլորը հավատում են դրան, ապա բարիկադներ կառուցելու քաղաքական մոտիվացիա որեւէ ուժ չպետք է ունենա:

- ՔՊ-ի պատգամավորներից Ալեն Սիմոնյանն «Ազատության» հետ զրույցում ասել էր, որ ընտրությունները վերածելու են վարչապետի ընտրության: Օրինակ, ընտրողներին ասվելու է՝ եթե ուզում եք, որ Նիկոլ Փաշինյանն ընտրվի վարչապետ, ապա քվեարկեք այս կամ այն թեկնածուի օգտին: Սա Ձեզ համար խաղի արդա՞ր կանոն է:

- Ցանկացած քաղաքական ուժ ինքն է ընտրում իր մարտավարությունը: Մեր նախընտրական ծրագիրը լինելու է տնտեսական, մենք գնալու ենք մեր ծրագրով, որի հիմքը երկրում տնտեսական հեղափոխություն անելն է: Թե՝ ով ինչ մարտավարությամբ կգնա, դա էլ իրենց իրավունքն է: Ես կարծում եմ, որ յուրաքանչյուր քաղաքական ուժ պետք է կարողանա կենսունակ ներկայացնի իր ծրագիրը, որպեսզի ընտրողը հասկանա, թե ինչու պետք է քվե տա այս կամ այն քաղաքական ուժի: Եթե Ալեն Սիմոնյանը կարծում է, որ «Իմ քայլ»-ին պետք է քվե տալ, որ Նիկոլ Փաշինյանը դառնա վարչապետ, դա էլ է օրակարգ:

- Իսկ ինչո՞ւ պետք է ԲՀԿ-ին քվե տա ընտրողը:

- Որովհետեւ դուք տեսնում եք, թե ինչ ներդրումներ է բերում Հայաստան Գագիկ Ծառուկյանը: Տեսնում եք այն վստահությունը, որ նա ունի աշխարհի խոշոր ներդրողների հետ, իսկ ներդրումը սիրում է քաղաքական կայունություն: Մեր ծրագրում կտեսնենք տնտեսական հեղափոխության պարզ մեթոդները եւ պարզ կլինի, թե ինչու ընտրողը իր վստահության քվեն պետք է տա մեզ:

- Բացառո՞ւմ եք, որ իշխանության հետ կոալիցիա չեք կազմի:

- Քաղաքականությունը սուրճի բաժակ չէ, որ ես նայեմ ու ասեմ՝ տեսեք, ճանապարհը բացառում է համագործակցության կամ սուրճի հետագիծը, բացառում է որեւէ քննարկում: Ամեն ինչ ցույց կտա ընտրությունների արդյունքները:

- Տիկին Զոհրաբյան, կարո՞ղ ենք փաստել, որ Փաշինյան-Ծառուկյան հուշագիրն արդեն իրեն սպառել է եւ դա որեւէ հիմք չէ հետագա համագործակցության համար, քանի որ փաստաթղթում նշված էր, որ ԲՀԿ-ն վարչապետի թեկնածու չի առաջադրում ու չի քվեարկում այլ թեկնածուի օգտին:

- Հուշագրում նաեւ նշված է խաղի կանոններն առաջիկա ընտրությունների հետ կապված, որ պետք է լինեն արդար ու ազնիվ, չեն լինելու բարիկադներ: Ցանկացած տարբերակ, որն այս պահին ասվի, կլինի միայն հայտարարություն, քանի որ ընտրությունների արդյունքները դեռ պարզ չեն:

Տպել
1596 դիտում

Հայաստանը 9 ծանրորդով կմասնակցի Թայլանդում կայանալիք աշխարհի առաջնությանը

89 մարտական հաշվարկ եւ 2 օպերատիվ խումբ պայքարել են 76 խոտածածկ տարածքի հրդեհ մարելու համար

Թաթուլ համայնքի ղեկավարը մի քանի միլիոնի հասնող չարաշահումներ է թույլ տվել (տեսանյութ)

Կոտայքում Opel-ը վրաերթի է ենթարկել հետիոտնին. վերջինը շպրտվել է հանդիպակաց երթևեկելի գոտի և տեղում մահացել

Ողջունելի է, որ Կարմիր Խաչի ՄԿ ներկայացուցիչներն այցելել են Ադրբեջանում գտնվող հայ ռազմագերուն

Ավիապատահար Գյումրիում. «Պոբեդայի» ինքնաթիռը վայրէջք կատարելիս ետնամասով հպվել է վազքուղուն

Սիրիայում թուրքական զինուժը կրակ է բացել քուրդ զինյալների դեմ

Թոշակառուն գերեզմանատան տարածքից 4 սոճի է հատել. վնասի չափը պարզվում է

Մարտական հերթափոխի նախապատրաստում զորամասերից մեկում

«Ձյունիկ սառնարան» ՍՊԸ-ի պահեստներից ծուխ է նկատվել (տեսանյութ)

Ոստիկանները ակցիայի մասնակիցներին բերման ենթարկելիս կիրառել են օրենքը խախտող անհամաչափ ֆիզիկական ուժ. ՄԻՊ

Վարչապետի աշխատակազմը ներկայացրել է այսօր կառավարությունում Ամուլսարի հանքի վերաբերյալ խորհրդակցության սղագրությունը

Ամուլսարի հանքի շահագործումը ոչ Սեւանին, ոչ Ջերմուկի ջրերին ոչ մի վնաս չի հասցնելու. վարչապետ

Ո՞ւմ է պետք Սերժ Սարգսյանի ձերբակալությունը. ՀՀԿ-ի՞ն, թե՞ ինշխանությանը

Ստեփանավանի անտառներում 3 տարում ապօրինի հատվել է 1462 ծառ. մեղադրանք է առաջադրվել 16 անձի

Նովոսիբիրսկ քաղաքում վթարի հետեւանքով ՀՀ քաղաքացի է զոհվել, 9 մարդ՝ վնասվածքներ ստացել

Քրեակատարողական հիմնարկներում նշեցին Սուրբ Աստվածածնի Վերափոխման տոնը

«Լիդիանը» կառավարություն է ներկայացրել ոչ հավաստի, ոչ լիարժեք տվյալներ. ՀԲՃ-ն հաղորդում է տվել հանցագործության մասին

Ավարտվեց «Իմ քայլը» խմբակցության հանդիպումը վարչապետի հետ Ամուլսարի հարցով. Նազարյանը մանրամասներ է հայտնում

Վարչապետի որոշմամբ էկոնոմիկայի նախարարի նոր տեղակալ է նշանակվել