Չեմ մեկնաբանել Բոլթոնի հայտարարությունը տրիվիալ պատճառով՝ ոչ մեկը չի հարցրել. Փաշինյանը՝ Կյուրեղյանին

ԱԺ-ում վարչապետի ընտրության հարցի քննարկման հատուկ նիստի ժամանակ ՀՅԴ խմբակցության քարտուղար Արմենուհի Կյուրեղյանը հարց ուղղեց վարչապետի թեկնածու Նիկոլ Փաշինյանին.

«Ձեր ելույթներում կարեւորել եք Հայաստան-Իրան հարաբերությունների այնպիսի զարգացմանը, որոնք հնարավորինս զերծ կլինեն այլ աշխարհաքաղաքական ազդեցություններից: ԵԱՏՄ Բարձրագույն խորհրդի նիստում կարեւորվել են Իրան-ԵԱՏՄ հարաբերություններում Հայաստանի դերակատարությունը, եւ այս համատեքստում ուզում եմ մեջբերել ԱՄՆ նախագահի ազգային անվտանգության հարցերով օգնական Ջոն Բոլթոնի հայտարարություններից մի քանի միտք. «Մենք մտադիր ենք սեղմել Իրանի շուրջ օղակը, որովհետեւ կարծում ենք, որ Մերձավոր Արեւելքում եւ ողջ աշխարհով մեկ նրանց վարքագիծը չարամիտ է եւ պետք է փոխվի: Մենք մտադիր ենք ողջ ուժով կիրառել պատժամիջոցներ, եւ ակնհայտ է, որ մենք չենք ուզում վնաս հասցնել մեր բարեկամներին այս գործընթացում: Ուստի, կարծում եմ, որ ՀՀ եւ ԱՄՆ կառավարությունների միջեւ զրույցը շատ կարեւոր կլինի»: Իսկ ամերիկյան վերլուծաբան Սթիվեն Բլանքը, մեկնաբանելով այս խոսքերը, ասում է. «Հայաստանը միշտ կհամագործակցի Իրանի հետ, որովհետեւ նրանք հարեւաններ են, սակայն Հայաստանը չափազանց եռանդով էր աջակցում Իրանին դիվանագիտական եւ տնտեսական ոլորտներում: Կարծում եմ՝ Հայաստանում Բոլթոնն ասել է՝ եթե ցանկանում եք, որ ԱՄՆ-ը մնա ձեզ բարեկամ, պետք է սահմանափակենք հարաբերություններն Իրանի հետ»,- ասաց Կյուրեղյանը եւ հարցրեց, թե ինչու կառավարությունը որեւէ կերպ գնահատական չտվեց Բոլթոնի եւ ԱՄՆ հեռացող դեսպան Միլսի հայտարարություններին.

«Արդյո՞ք Բոլթոնի հետ առանձնազրույցի ժամանակ քննարկվել է Հայաստան-Իրան հարաբերությունների մակարդակի փոփոխության հարցը, եւ դա որեւէ կերպ կապ կունենա՞ Հայաստանում ԱՄՆ-ի ներդրումների ավելացման հեռանկարի հետ եւ ինչպիսի՞ կապ կունենա»,- հարցրեց Արմենուհի Կյուրեղյանը:

«Կոնկրետ ես չեմ մեկնաբանել մի տրիվիալ պատճառով. ոչ մեկը չի հարցրել: Որովհետեւ այնպիսի տպավորություն է, որ երբ մի օտարերկրյա պաշտոնյա մի հայտարարություն է անում, բոլորն այդ հայտարարությունը սկսում են քննարկել և հետևություններ անել, եւ Հայաստանի կառավարությանը վերագրել դիրքորոշումներ, որոշումներ, խոստումներ: Ինչքան հիշում եմ՝ նույնիսկ մամուլի քարտուղարից ոչ ոք չի հարցել` այս հայտարարությունների մասին ի՞նչ եք մտածում: Որովհետեւ բոլորն ամեն ինչ որոշել են, բոլորի համար ամեն ինչ պարզ է»,-ասաց Փաշինյանը՝ հավելելով, որ Հայաստանը հարգանքով է վերաբերում յուրաքանչյուր երկրի հայտարարություններին և յուրաքանչյուր երկրի ազգային ու պետական շահերին, բայց ՀՀ-ն ունի իր ազգային և պետական շահերը, որոնք միշտ չէ, որ կարող են համընկնել այլ երկրների շահերի եւ պատկերացումների հետ.

«Հայաստանի կառավարությունը հենվել, հենվում և շարունակելու է հենվել Հայաստանի ազգային շահերի վրա: Որևէ մեկը չկասկածի, որ մենք հարյուր տոկոսով մեր գործողությունները կառուցում ենք Հայաստանի ազգային շահերի հենքի վրա՝ թե' ԱՄՆ-ի, թե' Իրանի, թե' ՌԴ-ի հետ հարաբերություններում: Այնպես որ` ես բոլորին կոչ եմ անում որևէ հայտարարություն չվերագրել ՀՀ կառավարությանը, եթե այդ հայտարարության հեղինակը կառավարությունը չէ»,-ասաց Փաշինյանը եւ հավելեց.

«Եւ այն հայտարարությունը, որ Դուք արեցիք, որ մենք պետք է առանձնահատուկ հարաբերություններ ունենանք Իրանի եւ Վրաստանի հետ, որոնք հնարավորինս դուրս կլինեն աշխարհաքաղաքական ազդեցություններից, ես վերահաստատում եմ այդ դիրքորոշումը, եւ այդ դիրքորոշումը շատ հստակ ձևակերպվել եմ պարոն Բոլթոնի հետ հանդիպման ժամանակ, եւ կարծում եմ՝ Հայաստանի դիրքորոշումը ԱՄՆ պատվիրակության համար եղել է պարզ, ընկալելի եւ նույնիսկ ընդունելի»:

Կյուրեղյանն արձագանքեց՝ ողջունում է, որ Փաշինյանը կրկնում ու հաստատում է իր դիրքորոշումը՝ հավելելով.

«Հոկտեմբերի 30-ին Իրանի արտաքին գործերի նախարարը միացել է Թուրքիայի և Ադրբեջանի ԱԳ նախարարների հայտարարությանը, որտեղ ընդգծվում էր իրենց հանձնառությունը միջազգային իրավունքի սկզբունքներին, այդ թվում՝ աջակցությունը ինքնիշխանությանը, տարածքային ամբողջականությանը միջազգայնորեն ճանաչված սահմանների նկատմամբ, բոլոր հակամարտությունները խաղաղ լուծելու, ինչպես նաեւ ներքին գործերին չմիջամտելու սկզբունքներին, ոչ մի կերպ չանդրադարձավ ազգերի ինքնորոշման սկզբունքին: Հիմա, Իրանի ԱԳ նախարարի` այս հայտարարությանը միանալը արդյո՞ք չեք դիտում յուրահատուկ պատասխան Ջոն Բոլթոնի ելույթին ՀՀ կառավարության կողմից ոչ մի կերպ չարձագանքելուն, այդ հայտարարությունների նկատմամբ մեր կառավարության լռությանը»,-հարցրեց Կյուրեղյանը:

Փաշինյանը պատասխանեց, որ այսպես մեկնաբանելն առնվազն լուրջ չի լինի: «Կան պրոցեսներ, որոնք ո'չ այսօր են սկսվել, ո'չ` երեկ, ո'չ` երեկ չէ առաջին օրը: Ես դա ասում եմ որպես մարդ, որը նախորդ տարվա դեկտեմբերին խորհրդարանական պատվիրակության կազմում եղել է Իրանում և քննարկումներ ունեցել տարբեր մակարդակներում: Այստեղ էլ պատասխանը նույնն է, որ մենք, այո՛, հարգանքով ենք վերաբերվում մեր միջազգային գործընկերների պատկերացնումներին, շահերին և հույս ունենք, որ նրանք նույնքան հարգանքով կվերաբերվեն մեր պատկերացումներին ու շահերին: Եվ այն պարագայում, երբ պարզվի, որ այդպես չէ, մենք բոլոր իրավիճակներում կլինենք համարժեք»,- եզրափակեց նա: