Զինվորին ուղղված նամակները փակված են եղել արկղերի հետ, Մանվել Գրիգորյանը դրա հետ որեւէ կապ չունի. պաշտպան

Ամիսներ առաջ մեր սիրելի վարչապետի կողմից այս քրեական գործի մասին հանրությանն այնպես տեղեկացվեց, որ տպավորություն էր, թե կատարվել եւ բացահայտվել է մի զազրելի հանցագործություն, որը լսելիս բավական բացասական տպավորություն էր ստեղծում Մանվել Գրիգորյանի մասին:

Այս մասին այսօր լրագրողների հետ զրույցում հայտարարեց Գրիգորյանի պաշտպան Լեւոն Բաղդասարյանը՝ հավելելով, որ այդ ընթացքում ոչ միայն Գրիգորյանի մտերիմները ուրացան, այլ նաեւ նրա մտերիմներից մեկի շունը տանից փախավ:

«Անցան ամիսներ եւ փոխաբերական իմաստով դրեցին մի մեծ կաթսա եւ մեջը փորձեցին լցնել Մանվել Գրիգորյանի անձի, հարազատների հետ կապված բազմաթիվ քրեական գործեր: Ընդհուպ զավեշտը հասավ նրան, որ մերձավորներից մեկի նկատմամբ, որը 5 տարեկան հասակում ներխուժել է հարեւանի հողամաս, քրեական գործ հարուցվեց եւ մեղադրանք առաջադրվեց: Քրեական գործը հարուցել են հիմա, երբ չափահաս է, բայց փաստեցին, որ 5 տարեկանից սկսած ինքը սիստեմատիկ ներխուժել է հարեւանի բնակարան»,- նշեց նա: Բաղդասարյանը, սակայն չհայտնեց այդ մերձավորի անունը՝ ասելով, թե նախաքննական գաղտնիք է:

Խոսելով Մանվել Գրիգորյանին կալանքի տակ պահելու եւ նրա առողջական խնդիրների մասին, պաշտպանն ընդգծեց, որ պաշտպանական կողմն անգամ հղում է արել քաղաքացիական հիվանդանոցի բժիշկների կարծիքին, որի համաձայն՝ ոչ միայն Գրիգորյանի կյանքին է վտանգ սպառնում, այլ հակացուցված է մեկուսացած պայմաններում կալանքը շարունակելը:

«Բայց արդյունքում նախաքննության մարմինը գտավ, որ նրա կյանքին վտանգ չի սպառնում եւ նրա հիվանդությունները, ըստ էության բավարար են, որպեսզի նա շարունակի կալանքը կրել: Ես պաշտոնապես հայտարարում եմ՝ հարգելի մեծարգո պարոն վարչապետ, ձեզ ճիշտ չեն զեկուցում, դուք չեք տիրապետում իրավիճակին: Խնդրում եմ հանձնարարեք կոմպետենտ անձի, որպեսզի ստուգի եւ ձեզ զեկուցի, թե կալանքի պահին Մանվել Գրիգորյանն ինչպիսի հիվանդություններով էր տառապում, եւ կալանքը կրելուց հետո նրա հիվանդություններն ավելացե՞լ են, թե՞ ոչ, նա տառապո՞ւմ է այնպիսի հիվանդություններով, որ կյանքին վտանգ է սպառնում, թե՝ ոչ: Եթե պարզվի, որ ես ճիշտ չեմ ասում, ես ստախոս եմ, եթե պարզվի, որ պետական լիազոր մարմինները ինչ-ինչ բաներից ելնելով, միգուցե ձեր ցուցումից կամ ոչ ձեր ցուցումից ելնելով, նման տեղեկություններ են ձեզ իրազեկում, որը իրականությանը չի համապատասխանում, ուրեմն մեր երկում արդարադատությունն այդ դրվագով կաղում է»,- հայտարարեց Գրիգորյանի պաշտպանը: Դիմելով վարչապետին՝ նա կոչ արեց, որպեսզի հանձնարարի կոմպետենտ անձի՝ ստուգի եւ զեկուցի, թե արդյո՞ք հիմքեր կան Մանվել Գրիգորյանին կալանքի տակ պահելու, թե՞ ոչ, եթե հիմքերը չկան, ապա Մանվել Գրիգորյանի հանդեպ տեղի է ունենում դասական խոշտանգում եւ նա գտնվում է պատանդի կարգավիճակում:

Բաղդասարյանը նաեւ տեղեկացրեց, որ օրեր առաջ նաեւ գրավի դիմաց Մանվել Գրիգորյանին ազատ արձակելու միջնորդություն է ներկայացվել, բայց դատարանն առանց հիմնավորումների՝ պաշտպանական կողմի միջնորդությունը մերժվել է:

Նա նաեւ հայտարարեց, որ Մանվել Գրիգորյանին պատկանող տարածքում գտնված զինվորի սնունդը, հագուստը եւ մնացած այլ իրերն ապրիլյան պատերազմից հետո եւս մեկ տարի մնացել են Արցախի համապատասխան տեղերում:

«Վայրը, որտեղից առգրավեցին այդ սնունդը, դա եղել է ԵԿՄ պահեստը: Այնտեղ եղել է ոչ միայն այդ սնունդը, այլեւ` բազմաթիվ տասնյակներով մեքենաներ, ԵԿՄ մեքենաներ: Այնտեղ այլ կառույցներին պատկանող գույք էլ է եղել: Այո, սեփականության իրավունքով տարածքը պատկանել է իմ պաշտպանյալին, բայց այստեղ եղել են տարբեր կազմակերպություններ եւ ավելի քան լիահույս եմ, որ նախաքննության ավարտին այդ հարցի վերջնական պատասխանը կտրվի»:

Դիտարկմանը, թե ծանրոցներում նաեւ գտնվել են զինվորին ուղղված նամակներ, պաշտպանն ասաց, որ նամակներն արկղերի մեջ փակված են եղել ու իր պաշտպանյալը չի ունեցել դրա հետ որեւէ կապ: Բաղդասարյանը ընդգծեց, որ Գրիգորյանը չի ընդունում իրեն առաջադրված մեղադրանքը եւ հակված է, որպեսզի մեկ ժամ շուտ օբյեկտիվ գնահատական տրվի եւ բացահայտվի:

Բաղդասարյանը մեջբերեց ներպետական օրենսդրությունից այն հատվածը, համաձայն որի՝ անձը պետք է գտնվի կալանքի տակ, եթե նա կխուսափի նախաքննությունից, եթե դուրս գալուց նոր հանցագործություն կկատարի, կամ կխոչընդոտի քննությանը: «Երեք դրվագներն էլ ուղղակի բացառվում են»,- հավելեց Բաղդասարյանը:

Նշենք, սակայն, որ ՀՀ գլխավոր դատախազ Արթուր Դավթյանը ԱԺ-ում Մանվել Գրիգորյանին կալանավորելու միջնորդություն ներկայացնելիս նշել էր, որ Գրիգորյանը խոչընդոտել է քննությանը: «Քրեական գործի նախաքննությամբ հիմնավորվել է նաեւ, որ սույն գործով քննչական գործողությունների ընթացքում Մանվել Գրիգորյանը քննությանը խոչընդոտելու, սպասվող պատասխանատվությունից խուսափելու նպատակով, կապ հաստատելով խուզարկության վայրում գտնվող որդու հետ, վերջինիս հրահանգել է փոխանցել Արմեն Հակոբյանին, որ նա ներկայանա խուզարկության վայր եւ, բառացի մեջբերմամբ, ամեն ինչ իր վրա վերցնի: Բնականաբար՝ Գրիգորյանի հրահանգը կատարվել է, շուրջ 30 րոպե անց խուզարկության վայր է ներկայացել Արմեն Հակոբյանը եւ հայտնել, որ պահվող ողջ ռազմամթերքը պատկանում է միայն իրեն»: