ՀՅԴ-ի ապագան անորոշ է. այս ուժը դեռ հակահեղափոխականների ցանկում է

Խորհրդարանական քաղաքական ուժերի տարբեր ներկայացուցիչներ հոկտեմբերի 8-ից սկսած «դարձի» են գալիս: Մասնավորապես, «Հանրապետական» խմբակցության ներկայացուցիչների հայտարարությունների շքերթը եզրափակվեց խմբակցության հայտարարությամբ, որտեղ ՀՀԿ-ն նշում է. «Չընդունելով հանդերձ դեկտեմբերին արտահերթ խորհրդարանական ընտրություններ անցկացնելու վերաբերյալ կառավարության հիմնավորումները՝ Ազգային ժողովի Հանրապետական խմբակցությունը չուներ եւ չունի մտադրություն առաջադրելու վարչապետի իր թեկնածուն»: 

Մինչ այս էլ ՀՀԿ-ական 16 պատգամավոր էր հայտարարել, որ կիսում է վարչապետի այն տեսակետը, որ ընտրությունները պետք է անցկացնել 2018 թվականի դեկտեմբերին: Իհարկե, խորհրդարանում ՀՀԿ-ի քաղաքական թեւը կշարունակի պնդել, որ դեկտեմբերին ընտրությունների անցկացման համար չկա որեւէ պատճառ, կարգավորված չեն տեխնիկական որոշ հարցեր, բայց, թերեւս բոլորին է արդեն ակնհայտ, որ այս ուժն այլեւս գործոն չէ: ՀՀԿ-ին մնում է ընդդիմանալ միայն քաղաքական հայտարարությունների մակարդակով: Մասնավորապես, Արմեն Աշոտյանը հայտարարում է, որ ՀՀԿ-ական որոշ պատգամավորներ ճնշումների պատճառով են ստորագրել հայտարարություն, որով կողմ են դեկտեմբերին արտահերթ ընտրությունների անցկացմանը:

«Դեկտեմբերին արտահերթ ընտրություններ անցկացնելու ստորագրահավաքին միացած ՀՀԿ խմբակցության պատգամավորների նկատմամբ ճնշումներ են եղել: Ոչ մի հայտարարություն մերկապարանոց չէ, թող այդ մարդիկ իրենք խոսեն ճնշումների մասին: Ակնհայտ է, որ նման ճնշումներ եղել են եւ առաջին անգամ, երբ 58 հոգանոց  խմբակցությունը լքեցին մի շարք պատգամավորներ, եւ մենք դարձանք 50 հոգի, այս ընթացքում եւս ճնշումներ եղել են»,- ասաց Աշոտյանը:

Արմեն Աշոտյանի ճնշումների մասին պնդումների հետ համամիտ չէ փաստաթղթի ներքո ստորագրած Շիրակ Թորոսյանը: Նա նշեց, որ ավելի շուտ ճնշում է, բայց չի ճնշվում: «Ես մայիսի 8-ից սկսած Նիկոլ Փաշինյանի գործողությունների գաղափարակիցն եմ եղել եւ իմանալով այդ մասին՝ գնացել ու ստորագրել եմ»,- մասնավորապես, ասաց նա: Ցանկի պատգամավորներից Տաճատ Վարդապետյանն էլ իր քայլը հիմնավորելիս ընդգծեց, որ կատարել են ժողովրդի պահանջը: Նա չի բացառում, որ առաջիկայում դուրս կգա ՀՀԿ խմբակցությունից: Վարդապետյանը եւս ճնշումների մասին տեղեկություններ չուներ: Կնյազ Հասանովն էլ նշեց, որ ամբողջ  հայ ժողովուրդն այս իշխանության կողքին է, ուստի աջակցել են իշխանությանը: «Ժողովուրդը կանգնած է այս ճանապարհի վրա: Մենք էլ հարգում ենք հայ ժողովրդին, հարգում ենք մեր ժողովրդին եւ գտնում ենք, որ մենք կանգնում ենք մեր ժողովրդի բռնած ճանապարհի վրա»:

Չի բացառվում, որ ՀՀԿ-ն արտահերթ ընտրություններին չմասնակցի, քանի որ այս մասով ներկուսակցական անհամաձայնություններ կան: Մի մասն առաջարկում է գնալ ընտրությունների՝ թեկուզ անգամ չհաղթահարել անցողիկ շեմը, իսկ մյուս մասը կտրականապես դեմ է նման քայլի:

Ամեն դեպքում՝ ՀՀԿ-ն եւս ընտրություններից առաջ հստակեցրեց իր կարգավիճակը եւ, ըստ էության, այս քաղաքական ուժի հետ փաստաթղթային որեւէ համաձայնություն ձեռք բերելու անհրաժեշտություն չկա:

«Հանրապետականից» առաջ քաղաքական գործընթացներում իր անելիքներն էր հստակեցրել նաեւ «Բարգավաճ Հայաստան« կուսակցությունը: Գագիկ Ծառուկյանը եւ Նիկոլ Փաշինյանը հուշագիր ստորագրեցին, որի համաձայն ԲՀԿ-ն վարչապետի հրաժարականի դեպքում վարչապետի թեկնածու չի առաջադրելու եւ չի սատարելու մեկ այլ թեկնածուի:

Այս իրավիճակում անորոշ է Դաշնակցության կարգավիճակը: Քաղաքական գործիչների լեզվով ասած՝ նրանք դեռ գտնվում են հակահեղափոխականների ճամբարում, թեեւ հոկտեմբերի 8-ից բանակցություններ են ընթանում ՀՅԴ ԳՄ-ի եւ փոխվարչապետ Տիգրան Ավինյանի միջեւ: Այնուհանդերձ, Նիկոլ Փաշինյան-ՀՅԴ ֆորմատով որեւէ պայմանավորվածություն դեռ ձեռք չի բերվել: Ավելին, ՀՅԴ ԳՄ ներկայացուցիչ Արսեն Համբարձումյանը ասաց, որ իրենց օրակարգում Նիկոլ Փաշինյանի հետ հուշագիր ստորագրելու հարց չկա: «Կարծում ենք, որ քաղաքական ուժերի միջեւ փոխվստահությունը շատ ավելի կարեւոր է, քան ցանկացած ստորագրված փաստաթուղթ։ Եթե հետագա քննարկումների ընթացքում դրա անհրաժեշտությունը կառաջանա, պատրաստ ենք նաեւ քննարկել այդ տարբերակը, բայց այսօր մեր օրակարգում նման հարց չունենք։ Մենք բազմիցս ասել ենք, որ արտահերթ խորհրդարանական ընտրությունների անցկացման անհրաժեշտությունը կասկածի տակ չի կարող դրվել»: