Մենք պատրաստ ենք խաղաղ բանակցային գործընթացի, սակայն պատրաստ ենք նաեւ պատերազմի. վարչապետ (տեսանյութ)

«Մեզ ոչ մի բան չի կարող կանգնեցնել, մենք քայլ առ քայլ գնում ենք դեպի Երեւանի բարեկարգումը: Մեր թիմում մարդիկ են, ովքեր իրենց գործի գիտակ են, ովքեր սրտացավ են Երեւանի համար: Եթե վստահեք մեզ, եթե ձեր քվեն մեզ տաք, այս մարդիկ այն մարդիկ են, ովքեր ամեն ժամ, ամեն վայրկյան անելու են ամեն ինչ, որպեսզի մեր Երեւանը դառնա մեր երեւանցիներինը, այն դառնա մեզ համար հարմարվետ ու դառնա մեր այն քաղաքը, որը սիրել ենք, սիրելու ենք եւ պիտի սիրենք, որվհետեւ այստեղ երջանիկ են լինելու մեր երեխաները»,- այսօր հայտարարեց Իմ Քայլը դաշինքի Երեւանի քաղաքապետի թեկնածու Հայկ Մարությանը՝ ծրագրային դրույթները ներկայացնելուց հետո:

Քանի որ ՀՀ վարչապետ Նիկոլ Փաշինյանը վերադառնում էր Արցախից ու դեռեւս չէր հասել Աջափնյակ, որտեղ ընթանում էր այսօրվա քարոզարշավը, նրա հետ ուղիղ կապ հաստատվեց՝ վարչպետի ողջույնի խոսքը լսելու համար:

Վարչապետը նշեց. «Այսօր ես Արցախի նախագահ Բակո Սահակյանի հետ եւ ՊՆ նախարարի, ՊԲ հրամանատարի ուղեկցությամբ հանդիպումներ ունեցա Արցախում, ծրագրված էր այնպես, որ ես պետք է վերադառնայի ու հասնեի Աջափնյակ՝ մասնակցելու քարոզարշավին, սակայն քանի որ եղանակային շատ վատ պայմաններ էին, իմ գալը մի փոքր հետաձգվեց:

Այսօր շատ հետաքրքիր հանդիպումներ ունեցա, հավատացեք, մեր սահմաններն անառիկ են պահպանվում, զինվորականներից մեկը, ունենալով 7 երեխա, ծովի մակերեւույթից շուրջ 3000 մետր բարձրության վրա ծառայություն էր իրականացնում, ինչպես նաեւ 6 երեխա ունեցող զինծառայողը, սա բացառիկ հավատ է սահմանային ծառայության եւ երկրի անվտանգության նկատմամբ:

Չկա որեւէ կասկած, որ մեր Զինված ուժերը վերահսկում են իրավիճակը, համարժեք պատասխան են տալիս սադրանքներին, սակայն սա չի նշանակում, որ մենք պատերազմ ենք հրահրում: Արցախի նախագահը պատրաստ է բանակցությունների, ես նույնպես պատրաստ եմ, մենք պատրաստ ենք խաղաղ բանակցային փուլի, սակայն մենք պատրաստ ենք նաեւ պատերազմի, սա հիմնված է մեր զինված ուժերի ու մեր ժողովրդի բացառիկ միասնականության վրա ունեցած մեր վստահությամբ:

Ես Երեւան վերադարձի ճանապարհին եմ:

Ուզում եմ մի բանից էլ խոսել, ասել, որ անհատ տաքսու վարորդներին մենք որոշել ենք ազատել հարկատվությունից, կարծում եմ, սա կարեւոր որոշում է, որովհետեւ հասարակ մարդիկ են իրենց ընտանիքների հոգսերը հոգում տաքսի վարելով: Կարծում եմ, մարդիկ, ովքեր անհատ տաքսիներ են վարում, ավելի լիարժեք կկատարեն իրենց աշխատանքը այսուհետ:

Նաեւ աշխատանքներ կտանենք, որ երթեւեկությունն ավելի անվտանգ դառա, կբարձրանա տեխզննման որակն ու ապահովագրական ծառայությունը: Անհատ տաքսու վարորդները կազատվեն հարկային որեւէ պարտավորությունից, սա կարող է նաեւ դրական նպաստել քաղաքային տրանսպորտի խնդրի լուծմանը, քանի որ հույս ունենք, որ հարկերից ազատվելու դեպքում այդ վարորդները կիջեցնեն սակագները:

Ես ուզում եմ ողջունել Հայկ Մարությանին, Իմ Քայլը դաշինքի բոլոր գործընկերներին, համոզված եմ, որ շատ լավ թիմ է ձեւավորված: Հավատացեք, մեր թիմի համար ձեզնից յուրաքանչյուրի ձայնը կարեւոր է եւ հույս ունենք ձեր ձայնը կտաք մեր դաշինքին, Հայկ Մարությանին ու Հայաստանում տեղի ունեցած հեղափոխությանը:

ՀՀ քաղաքացին պետք է իմանա, որ այսուհետ կարող է կարեւորագույն հարցեր լուծել 1 քվեաթերթիկի միջոցով: Համայնքային, պետական ու քաղաքային նշանակության տարբեր հարցեր են լինում, որոնք կարող է լուծել քաղաքացին իր ձայնով, քվեով:

Այս ընտրություններում քաղաքացին պետք է իր ընտրությունն արձանագրի, դա պետք է նշանավորվի հեղափոխությունը խորհրդանշող ուժի օգտին քվեարկելով: Սեպտեմբերի 23-ին հորդորում եմ, կոչ եմ անում, խնդրում եմ անպայման մասնակցել ընտրություններին:

Կարեւոր է ամեն ձայնը, մեր բոլորինը: Ես մի գաղտնիք բացեմ, ես մեկնելու եմ Նյու-Յորք՝ ՄԱԿ-ի գլխավոր ասամբլեայի նիստին մաասնակցելու համար: Պետք է սեպտեմբերի 21-ին կամ 22-ին մեկնեի, սակայն ամեն ինչ հետաձգել եմ, որպեսզի քվեարկեմ ու նոր մեկնեմ, 23-ի առավոտյան ես քվեարկելու եմ ու անմիջապես մեկնեմ ԱՄՆ: Ուզում եմ նշել, թե որքան կարեւոր է մեզանից յուրաքանչյուրի ձայնը, քվեն»,-եզրափակեց վարչապետը:

Այնուհետ տեսակապն ավարտվեց, քաղաքապետի թեկնածու Հայկ Մարությանը շարունակեց շփումը Աջափնյակ վարչական շրջանի բնակիչների հետ, որից քիչ անց միացավ վարչապետն ու անձամբ ողջունեց բոլոր աջափնյակցիներին: