Բացահայտումներին կարող է միանալ նաեւ ՀՀ Կենտրոնական բանկը

Նորանոր բացահայտումների սպասող հայ հանրությունը կարծես չի հիասթափվեց: «ՋԼՋ Պրոյեկտ Քոմփանի» ՍՊԸ բաժնետեր Նարեկ Սարգսյանի բնակության վայրում հայտնաբերվել եւ առգրավվել են շուրջ 6 միլիոն 800 հազար ԱՄՆ դոլար գումարով ավանդի պայմանագրեր: Այս մասին հունիսի 29-ին հայտնեցին Պետական եկամուտների կոմիտեի տեղեկատվության եւ հասարակայնության հետ կապերի բաժնից: Նարեկ Սարգսյանը ՀՀ երրորդ նախագահ Սերժ Սարգսյանի եղբոր՝ Լեւոն Սարգսյանի որդին է:

«Հայտարարագրման ենթակա գույքը թաքցնելու եւ ապօրինի հարստանալու դեպքերի առթիվ  նոր քրեական  գործ հարուցելու մասին որոշում է կայացվել: «ՋԼՋ Պրոյեկտ Քոմփանի» ՍՊ ընկերության վերաբերյալ ՊԵԿ քննչական վարչությունում ՀՀ քր. օր. 193-րդ  205-րդ հոդվածի 2-րդ մասի հատկանիշներով քննվող քրգործի նախաքննության ընթացքում պետբյուջե է վերականգնվել 800 միլիոն ՀՀ դրամ:

Նախաքննության անհրաժեշտությամբ պայմանավորված՝ քրեական գործով խուզարկություն է կատարվել «ՋԼՋ Պրոյեկտ Քոմփանի» ՍՊԸ բաժնետեր Նարեկ Սարգսյանի բնակության վայրում, որի ընթացքում հայտնաբերվել եւ առգրավվել են  նրա, իր հետ համատեղ բնակվող  հոր՝ Լյովա Ազատի Սարգսյանի եւ քրոջ՝ Անի Լյովայի Սարգսյանի անվամբ 2017թ. 2-րդ կիսամյակի ընթացքում  որպես ավանդ ՀՀ-ում գործող բանկերից մեկում ներդրված շուրջ 6 մլն 800 հազար ԱՄՆ դոլար ավանդի պայմանագրեր:

Նախաքննության ընթացքում պարզվել է նաեւ, որ Նարեկ Լյովայի Սարգսյանի հայրը` Լյովա Ազատի Սարգսյանը, 2017թ. ընթացքում հանդիսացել է ՀՀ հատուկ հանձնարարություններով դեսպան եւ «Հանրային ծառայությունների մասին» ՀՀ օրենքով սահմանված կարգով հանդիսացել է հայտարարատու պաշտոնատար անձ:

Լյովա Ազատի Սարգսյանը եւ վերջինիս դուստրը՝ Անի Ազատի Սարգսյանը, «Հանրային ծառայությունների մասին» ՀՀ օրենքի համաձայն, 2017թ. հաշվետու ժամանակաշրջանի համար հայտարարատու պաշտոնատար անձի համար սահմանված դեպքերում եւ կարգով Բարձրաստիճան պաշտոնատար անձանց էթիկայի հանձնաժողով են ներկայացրել  իրենց գույքի եւ եկամուտների հայտարարագրեր, որտեղ չեն հայտարարագրել իրենց կողմից որպես ավանդ ներդրված գումարները: Արդյունքում՝ ՀՀ օրենքով սահմանված հայտարարագրերում հայտարարագրման ենթակա տվյալները թաքցրել են, ինչը հանգեցրել է Լյովա Սարգսյանի եւ Անի Սարգսյանի  մասով առանձնապես խոշոր չափերով գույքի չհայտարարագրմանը, ինչպես նաեւ հաշվետու ժամանակահատվածում նրանց գույքերի ավելացումն էականորեն գերազանցել է նրանց օրինական եկամուտները, ինչը ողջամտորեն չի հիմնավորվում հայտարարագրերով, այսինքն` վերջիններս ապօրինի հարստացել են:

Բացի այդ, Նարեկ Սարգսյանը նույնպես նույն օրենքով սահմանված կարգով հայտարարատու պաշտոնատար անձի համար սահմանված դեպքերում եւ կարգով պարտավոր է եղել Բարձրաստիճան պաշտոնատար անձանց էթիկայի հանձնաժողով ներկայացնել իր գույքի եւ եկամուտների հայտարարագիր, որը սակայն չի կատարել: 2017թ. հաշվետու ժամանակահատվածում նրա գույքի ավելացումն էականորեն գերազանցել է նրա օրինական եկամուտները, ինչը ողջամտորեն չի հիմնավորվում հայտարարագրերով, այսինքն` վերջինս նույնպես ապօրինի հարստացել է:

ՊԵԿ քննչական վարչությունում քննվող քրեական գործի նյութերով որոշում է կայացվել ՀՀ քրեական օրենսգրքի 314.3-րդ հոդվածի 2-րդ մասով եւ 310.1-ին հոդվածի 1-ին հատկանիշներով  նոր քրեական  գործ հարուցելու մասին: Ընթանում է նախաքննություն»,- ասված է ՊԵԿ-ի տրամադրած տեղեկատվության մեջ:

Այս բացահայտումը ուշագրավ մի քանի մանրամասներ ունի: Նախ սա երկրորդ դեպքն է երբ կիրառվում է ՀՀ քր. օր. 310.1 հոդվածը («Ապօրինի հարստացումը»): Այս հոդվածը առաջին անգամ կիրառվել է կրկին Սերժ Սարգսյանի հետ կապված մեկ այլ անձի՝ նրա թիկնազորի վաղեմի պետ Վաչագան Ղազարյանի պարագայում եւ հիմա նա անազատության մեջ է: 

Հաջորդ դետալը, որ ուշադրություն է գրավում, ՊԵԿ-ի մասնակցությունն է: Փաստորեն ԱԱԾ-ի ու ոստիկանության ակտիվ գործողություններից բացի նման գործելաոճ է դրսեւորել նաեւ ՊԵԿ-ը, որը նույնպես ունի համապատասխան ստորաբաժանումներ եւ լիազորություններ: Սա, նկատենք, բարձրացնում է կոռուպցիայի դեմ պայքարի որակը: Այլ բան է, երբ ԱԱԾ-ն դիմակավորված ներխուժում է որեւէ անձի պատկանող տարածք եւ այնտեղ հայտնաբերում կոռուպցիայի ապացույցներ, եւ այլ բան է երբ ՊԵԿ-ը ուսումնասիրություններով հայտնաբերում է կոռուպցիոն դրսեւորումների հավանականություն եւ փնտրում ու գտնում է ապացույցներ:

Հաջորդը, ինչը ուշագրավ է այս դեպքում, այն է, որ եթե խուզարկությամբ բնակարանից չհայտնաբերվեին ավանդային պայմանագրերը, ապա հնարավոր չէր լինելու ապացուցել, որ Նարեկ Սարգսյանը ՀՀ որեւէ բանկում ունի այդքան գումար, եւ ապօրինի հարստացման մեղադրանքը հնարավոր չէր լինի ապացուցել, քանի որ ավանդների մասին տեղեկությունը համարվում են բանկային գաղտնիք: Իրավապահներին բանկային գաղտնիք պարունակող այդպիսի տեղեկությունները կարող են տրամադրվել միայն դատարանի որոշմամբ: Իսկ դատարանի որոշման համար անհրաժեշտ է, որ հարուցված լինի քրեական գործ, որում տվյալ անձը ներգրավված կլինի որպես կասկածյալ: Ստացվում է մի տեսակ փակ շրջան: Նույնիսկ եթե իրավապահները համոզված են, որ տվյալ անձը մի քանի միլիոն դոլար ունի բանկերում, չեն կարող նման տեղեկություն պաշտոնապես ստանալ, քանի որ չեն կարող քրեական գործ հարուցել եւ տվյալ անձին չեն կարող ներգրավել որպես կասկածյալ եւ ստանալ դատարանի որոշում:

Բայց մեր օրենսդրությունը բավականին ճկուն է: «Բանկային գաղտնիքի մասին» օրենքի 13.1 հոդվածի համաձայն, Կենտրոնական բանկը կարող է վերլուծել բանկային գաղտնիք պարունակող տեղեկությունները, եւ եթե հիմնավոր կասկածներ ունենա, որ գործ ունի փողերի լվացման հետ, ապա կարող է այդ տեղեկությունները տրամադրել քրեական հետապնդում իրականացնող մարմիններին, առանց դատարանի որոշման: Այնպես որ, կան բոլոր հնարավորությունները Հայաստանում կոռուպցիան որպես երեւույթ արմատախիլ անելու համար: Այլ խնդիր է օտարերկրյա բանկերում պահ տված գումարների հայտնաբերումը: Այս մասին՝ առաջիկայում: