ԵՊՀ ուսանող Արմեն Խաչատրյանի բաց նամակը՝ վարչապետ Նիկոլ Փաշինյանին

Երեւանի պետական համալսարանի փիլիսոփայության ֆակուլտետի ուսանող Արմեն Խաչատրյանը հանդես է եկել ՀՀ վարչապետին ուղղված բաց նամակով, որտեղ խոսում է վերջին շրջանում Հայաստանի տարբեր մասերում տեղի ունեցող քաղաքացիական անհնազանդությունների եւ դրանց վերաբերյալ վարչապետ Փաշինյանի արձագանքի մասին: Խաչատրյանի բաց նամակը ամբողջությամբ ներկայացնում ենք ստորեւ.

«Մեծարգո՛ պարոն վարչապետ, հետեւեցի հունիսի 25-ին ֆեյսբուքյան տեսաուղերձով հանրության հարցերի Ձեր պատասխաններին։ Մտահոգված լինելով Հայաստանի Հանրապետության ցավով, ինչպես յուրաքանչյուր հպարտ քաղաքացի, պարտավորվում եմ գրելու Ձեզ այս նամակը՝ անդրադառնալով Ձեր որոշ դիտարկումներին։ Խոսքը մասնավորապես վերաբերում է Ամուլսարի ոսկու հանքի եւ Երեւանի քաղաքապետ Տ․Մարգարյանի հրաժարականի շուրջ ծավալված պատասխաններին. դրանց վերաբերյալ քաղաքացիների մտահոգություններին Դուք պատասխանում եք, թե չեք հասկանում քաղաքացիական անհնազանդության գործողությունների շարունակության տրամաբանությունը եւ իմաստն այն պայմաններում, երբ գոյություն ունի ժողովրդի վստահությունը վայելող կառավարություն։ Եվ նույնիսկ Ձեր խոսքում նշում եք, որ տարակուսանքի մեջ եք ընկնում, երբ տեղեկություն եք ստանում նմանօրինակ ակցիաների մասին։
Չցանկանալով խորամուխ լինել ՀՀ Սահմանադրության ու Հավաքների ազատության մասին ՀՀ օրենքից բխած քաղաքացիական ակցիաներ կազմակերպող քաղաքացիների իրավունքների մեջ՝ հարկ եմ համարում խնդրելու Ձեզ վերանայել քաղաքացիների գործողությունները բնորոշող Ձեր ձեւակերպումը՝ իրենց բողոքի արտահայտությունը չսահմանելով իբրեւ սաբոտաժ, քանի որ Դուք չեք խոսում նախորդ իշխանությունից մնացած ինչ-որ օդիոզ (կոռուպցիայի մեջ ներծծված) պետական պաշտոնյաների մասին, Դուք գործ ունեք հայրենիքի ցավով մտահոգ ակտիվ քաղաքացիների հետ, ում ընդամենը ապրիլ ամսին, երբ դեռ չունեիք ներկայիս իշխանությունը, համարում էիք Ձեր «շեֆը», իսկ Ձեզ՝ ազնիվ գործերում նրանց ծառան։ 

Հարգելի՛ պարոն վարչապետ, ի պատասխան Ձեր տարակուսանքին՝ ուզում եմ հիշեցնել մայիսի 29-ին ԵՊՀ-ում մի քանի տասնյակ ուսանողների բողոքի ակցիան, որն ուղեկցվեց համալսարանի ռեկտորի առջեւ դռներ փակելով։ Հատկանշական է, որ այդ ցուցարարների շարքում էին ՀՀ առաջին փոխվարչապետի գրասենյակի ղեկավար Վահան Կոստանյանը, մամուլի խոսնակ Կարպիս Փաշոյանը։ Ավելացնեմ նաեւ, որ այդ քաղաքացիական անհնազանդության ակցիան շարունակվեց ԿԳ նախարար Արայիկ Հարությունյանի՝ իբրեւ չեզոք, անկախ արբիտրի դերակատարություն ստանձնողի այսպիսի մի հայտարարությամբ․ «Ուսանողների գործողություններն են, որեւէ կերպ չենք միջամտում. իրենց պահանջներն են․․․ իրավական առումով կան լուծումներ, բայց դրանք ավելի երկար ժամանակ են պահանջելու․․․ » (հղումը այստեղ՝  ): 

Հավելեմ նաեւ, որ բողոքի ակցիա իրականացնող ցուցարարներին եւ ԵՊՀ գիտխորհրդի դահլիճում գիշերելու պատրաստակամություն հայտնած ուսանողական խմբի նախաձեռնության հիմնադիր անդամներին այցելած ԿԳ նախարար Արայիկ Հարությունյանին եւ Սփյուռքի նախարար Մխիթար Հայրապետյանին հայտնել եմ իմ մտահոգությունը (քաղաքացիական անհնազանդության ակցիաներ իրականացնելու գործելաոճով հարցեր կարգավորելու կապակցությամբ), եւ ստացել եմ «ոչինչ չասող» պատասխան։ Սակայն մինչ այդ Դուք արդեն Սասնա Ծռերի գործով քաղաքացիական անհնազանդություն իրականացնող քաղաքացիներին կոչ էիք արել դադարեցնելու իրենց գործողությունները եւ բոլոր խնդիրները դիտարկելու կառվարության հետ համագործակցության շրջանակում։ Ահա Ձեր ֆեյբուքյան էջի հայտարարությունից մի հատվածի մեջբերում. «Ինձ համար անհասկանալի է, որ կան քաղաքացիներ, ովքեր պատշաճ ձեւով չեն արձագանքում քաղաքացիական անհնազանդության բոլոր ակցիաները դադարեցնելու եւ առկա խնդիրների շուրջ կառավարության հետ աշխատելու իմ կոչին․․․»: /Նիկոլ Փաշինյան, 23.05.2018թ./։ 

Մեծահա՛րգ պարոն վարչապետ, եթե դեպի Ամուլսար տանող ճամփան փակող ազնիվ քաղաքացիների քաղաքացիական բողոքի արտահայտությունը Ձեզ տարակուսանքի առիթ է տալիս, ապա ինձ համար առնվազն տարակուսանքի եւ հիասթափության առիթ են Կառավարության կազմի որոշ ներկայացուցիչների՝ Ձեր իսկ կողմից հայտարարված կոչին հակառակ գործողությունները։ Ի դեպ, հարկ եմ համարում նշելու, որ Ամուլսարի ոսկու հանքի շահագործումով մտահոգ քաղաքացիները, անսալով Ձեր կոչին, բազմիցս դադարեցրել եւ վերսկսել են ակցիաները, քանի որ տեւական ժամանակ իրենց հարցադրումներին սպառիչ պատասխաններ չեն տրվել։

Հարգարժա՛ն պարոն վարչապետ, ինքս ողջունում եմ խնդիրների լուծման Ձեր պատրաստակամությունն ու հետեւողականությունը։ Կարծում եմ, որ այդ գործընթացը պահանջում է մանրակրկիտ ուսումնասիրություն, քննություն՝ զերծ կանխավարկածային մոտեցումներից եւ ոչ հավաստի փաստարկումներից։ Մեծ հարգանք ու պատկառանք տածելով Ձեր անցած քաղաքական ուղու նկատմամբ՝ վստահեցնում եմ Ձեզ, որ ես՝ որպես ակտիվ քաղաքացի, ըստ կարելվույն կշարունակեմ սատարել Ձեզ Հայաստանի Հանրապետության շենացմանն ուղղված Ձեր սրբազան գործում։ 

Ընդունեք իմ խորին հարգանքի հավաստիքը՝ 
ՀՀ քաղաքացի Արմեն Գեւորգի Խաչատրյան»,- գրել է ԵՊՀ ուսանող Արմեն Խաչատրյանը: