Այսպիսի ճշմարտություն. ձյաձյա Ստյոպան բարցովկա չունի

Տպագրվել է «Հայկական Ժամանակ» օրաթերթի՝ 2005 թվականի մարտի 18-ի համարում

Խորհրդարանական վերջին երկու նիստերի ընթացքում միայն «Արդարություն» եւ «Ազգային միաբանություն» ընդդիմադիր խմբակցությունները միասին վերցրած մոտ երկու տասնյակի հասնող հայտարարություններ էին հնչեցրել երկրում առկա քրեածին մթնոլորտի, «Տեցի կռուգի» հանրահայտ ռազբորկայի ու բարձրաստիճան օլիգարխների թիկնապահների սանձարձակ պահվածքի  վերաբերյալ: Որպես կանոն, խորհրդարանական սույն աղաղակող հայտարարություններն ավարտվում էին՝ «ո՞ւր են երկրի ոստիկանապետն ու  դատախազը, որոնք պատասխան պետք է տան երկրում առկա այս բեսպրեդելի համար» հարցով:

Իսկ վերջին քառօրյայի հայտարարությունների օրը ընդդիմությանը ձայնակցեց նաեւ իշխանական կոալիցիայի անդամ ՕԵԿ-ը, որի երկու անդամներն այնպիսի խստությամբ դատապարտեցին երկրի քրեածին մթնոլորտն ու իշխանության հետ սերտաճած կրիմինալին, որ համարձակ այդ պատգամավորները մինչ օրս ԱԺ միջանցքներում ման են գալիս որպես մեր ժամանակի հերոսներ: Եւ, թվում էր, թե՛ ընդդիմությունը, որը, վստահ ենք, առաջիկա քառօրյայում կրկին կխոսի «Տեցի կռուգից», թե՛ «Օրինաց երկիրը» պետք է ներկա լինեին երեկ ԱԺ-ում կազմակերպված խորհրդարանական լսումներին, որի թեման էր պայքարը կազմակերպված հանցագործության դեմ ու երկրում առկա քրեածին մթնոլորտը: Ի դեպ, վերջիններս ոչ միայն պետք է մասնակցեին, այլ պետք է, մեղմ ասած, բզկտեին իրավապահ մարմինների ղեկավարներին, որոնք երեկ շատ հանգիստ կանգնած էին ամբիոնում եւ պատրաստ էին պատասխանել ցանկացած պատգամավորի ցանկացած հարցին:

Մինչդեռ, ընդդիմությունն ընդհանրապես չէր բարեհաճել ներկայանալ լսումներին, իսկ ՕԵԿ-ը, որն ընդամենը մեկ շաբաթ առաջ վստահ էր, թե երկրում բեսպրեդելն ու կրիմինալը հասել են վտանգավոր չափերի, պարզվեց, որ ՀՀ Ոստիկանապետ Հայկ Հարությունյանին ընդամենը մեկ հարց ուներ՝  ԵԱՀԿ երեւանյան գրասենյակն այդ ի՞նչ լավ տեխնիկա է նվիրել Ոստիկանության Արաբկիրի բաժանմունքին: Ինչ վերաբերում է բացակա ընդդիմությանը, ապա այդ ճամբարից երեկվա լսումներին ներկա էր ընդամենը երկու պատգամավոր, որոնցից մեկն «Ազգային միաբանության» անդամ Գագիկ Կոստանդյանն էր: Իսկ ի՞նչ էր ասում Կոստանդյանը. նա հայտարարեց, թե թույլ չի տա որեւէ մեկին ոստիկանությանը դարձնել քավության նոխազ: Ընդդիմադիր պատգամավորը խոսեց նաեւ ոստիկանի դաժան կյանքի կարճ տեւողության, նրա անքուն գիշերների, թերսնվածության ու ցածր աշխատավարձի մասին:

Բայց ամենակարեւորը դեռ առջեւում էր. պարզվեց՝ խորհրդային տարիներին ոստիկանին անվճար բարցովկա էին տալիս, որ նա կարողանար վազել, հետապնդել ու բռնել հանցագործին՝ դրանով նպաստելով հանցագործությունների բացահայտմանը: Մինչդեռ այսօր մեր ոստիկանին անգամ այդ ձրի բարցովկան են շատ համարում այս իշխանությունները:  Ուստի, այս չարքաշ պայմաններում Գագիկ Կոստանդյանն արդար չի համարում հայ ոստիկանից հանցագործությունների բացահայտում պահանջելը: Իսկ երբ ընդդիմության ներկայացուցիչը մի քիչ էլ ջղայնացավ ու որոշեց համեմատություն անցկացնել ոստիկանության պետավտոտեսչության եւ կաշառակեր կոալիցիայի միջեւ, նա հանկարծ եզրակացրեց, որ բոլոր ոստիկանները սրբեր են:

Ոստիկանի բարձր ու վեհ կերպարի մասին խոսեց նաեւ «Օգոստոս-23» իրավապաշտպան կազմակերպության նախագահ Պուշկին Սերոբյանը: Անկեղծ լինելու համար նշենք, որ, ի տարբերություն նախորդ բանախոսի, Սերոբյանը մի քանի քննադատական խոսք ուղղեց հայրենի ոստիկանության հասցեին, որ վերջինս անհրաժեշտ մակարդակի վրա չի պահում սեփական PR-ի հարցն, ու մեր ոստիկանները չեն կարողանում իրենց արած լավ գործերը ճիշտ ներկայացնել եւ ժողովրդի մեջ վերակենդանացնել Ձյաձյա Ստյոպայի լուսավոր կերպարը:

Տեսնելով, որ խորհրդարանական լսումների արդյունքում հնարավոր է՝ մեր իրավապահ համակարգի ղեկավարների ուսերին հրեշտակի լուսապսակներ աճեն, իրավիճակը փորձեց փրկել երկրորդ ընդդիմադիր պատգամավորը՝ Հմայակ Հովհաննիսյանը: Երբ իր մեկ ժամանոց ելույթում ՀՀ ոստիկանապետ Հայկ Հարությունյանն ամենայն մանրամասնությամբ պատմեց երիտասարդ սերնդի դաստիարակության, հանցագործությունների կանխարգելման, հունվար-փետրվար ամիսներին առգրավված փամփուշտների եւ մարմնավաճառների դեմ պայքարի մասին, Հմայակ Հովհաննիսյանը չդիմացավ.

«Այս դահլիճում թեւածում է հեղձուցիչ մթնոլորտ: Դո՛ւք, պարո՛ն ոստիկանապետ, թվերով խեղդեցիք ներկաներին, ու հիմա լեզուս պապանձվում է: Մինչդեռ այսօր մեզ ոչ թե մարմնավաճառներն են անհանգստացնում, այլ այն թիկնապահները, որոնք «Տեցի կռուգում» ռազբորկա են կազմակերպում: Մեզ անհանգստացնում է այն «Համմերը», որի տերը վրաերթ կատարեց ու անպատիժ մնաց: Մենք ձեզանից ահա այս հարցերի պատասխանն էինք սպասում»,- բողոքեց պատգամավորը: Ոստիկանապետն անմիջապես վստահեցրեց, որ «Տեցի կռուգի» գործն ամենայն մանրամասնությամբ քննվում է, եւ այդ գործում ոչ մի թիկնապահ չկա: Ինչ վերաբերում է «Համմերին», ապա, ըստ ոստիկանապետի, այն հաստատ չի պատկանում որեւէ բարձրաստիճան պաշտոնյայի: Այլ հարցեր ո՛չ ոստիկանապետին, ո՛չ էլ գլխավոր դատախազի եւ ԱԱԾ պետի տեղակալներին, որոնք եւս մասնակցում էին երեկվա լսումներին, չտրվեցին:

Այսքանով ԱԺ պաշտպանության, ՆԳ եւ ԱԱ հարցերի մշտական հանձնաժողովի կազմակերպած շատ կարեւոր խորհրդարանական լսումներն ավարտվեցին: Ոչ մի րոպե չենք կասկածում, որ եկող քառօրյայի ընթացքում ընդդիմադիր պատգամավորները դարձյալ կփարվեն խորհրդարանի ամբիոնին ու դարձյալ բարձրագոչ հայտարարություններ կանեն երկրի կրիմինոգեն մթնոլորտի վերաբերյալ՝ պահանջելով խորհրդարան հրավիրել ՀՀ ոստիկանապետին ու գլխավոր դատախազին: Իսկ ընդդիմության լիդերները խորհրդարանական շաբաթի իրենց հասանելիք երեք րոպեների ընթացքում դեմքի շատ ջղայն արտահայտությամբ գլխավոր դատախազին կոչ կանեն բաց թողնել Արագածի փեշերն ու զբաղվել հանցագործությունների բացահայտմամբ: 

Նաիրա Զոհրաբյան