Կիսատ-պռատ. որոշեցի վարույթը կասեցնել

Տպագրվել է «Հայկական Ժամանակ» օրաթերթի՝ 2005 թվականի փետրվարի 24-ի համարում

Մենք արդեն տեղեկացրել էինք, որ 2004 թվականի նոյեմբերի 22-ին մեր թերթի դեմ տեղի ունեցած ահաբեկչության գործը քննող քննիչը գործի վարույթը կասեցնելու որոշում է կայացրել: Ստորեւ ներկայացնում ենք այդ որոշումը:  «Երեւան քաղաքի քննչական բաժնի ավագ քննիչ Ա. Կոստանյանս վերանայելով վարույթիս թիվ 13133004 քրգործի նյութերը.

Պարզեցի

2004թ. նոյեմբերի 22-ին, ժամը 20.40-ի սահմաններում, անհայտ անձը Երեւանի Իսրայելյան փող. թիվ 37 շենքի բակում դիտավորությամբ հրկիզել է «Դարեսկիզբ» ՍՊԸ-ին պատկանող «ՎԱԶ 21214» մակնիշի «544ՍՕ61» պետհամարանիշի ավտոմեքենան` պատճառելով ՍՊԸ-ին 1.625.000 դրամի նյութական վնաս (պայթեցված ավտոմեքենայի համարանիշը, եւ վնասի չափը քննիչը սխալ է գրել-խմբ.): Փաստի առթիվ Կենտրոնի քննչական բաժանմունքի կողմից 02.12.2004թ. ՀՀ քր. օր-ի 185 հոդվածի 2-րդ մասի 1-ին եւ 2-րդ կետերով (Գույքը դիտավորությամբ ոչնչացնելը կամ վնասելը, որ կատարվել է հրկիզման, պայթյունի, կամ հանրավտանգ այլ եղանակով) հարուցվել է թիվ 13133004 քր. գործը, որն էլ 03.12.2004թ. ուղղարկվել է Երեւանի քննչական բաժին` նախաքննությունը շարունակելու:

Համաձայն դատահրդեհատեխնիկական, դատապայթունատեխնիկական եւ դատաքիմիական համալիր փորձաքննության թիվ 35150403 եզրակացության հրդեհի առաջացման պատճառ է հանդիսացել բաց կրակի աղբյուրը (այրվող լուցկի, կրակայրիչ եւ այլն)` հավանաբար դյուրավառ նյութերի (բենզին, կերոսին, դիզվառելանյութ եւ այլն) առկայության պարագայում: Հրդեհի ժամանակ բարձր ջերմության ազդեցության հետեւանքով, ավտոմեքենայի օդով լիցքավորված (ճնշման տակ գտնվող) առջեւի երկու եւ պահեստային անիվների օդազրկումը կարող էր ուղեկցվել նաեւ պայթյունով: Փորձաքննությանը ներկայացված այրված, ածխացած նյութերի մնացորդների եւ ապակու բեկորների վրա նավթամթերքներին բնորոշ հետքեր չեն հայտնաբերվել, ինչը կարող է բացատրվել դրանց լրիվ այրմամբ եւ այրման ժամանակ գոլորշիացմամբ:

Բացի այդ վերը նշված ավտոմեքենայի վրա փորձաքննությամբ պայթուցիկ սարքավորման պայթյունից առաջացած պայթյունաբեկորային վնասվածքներ, ինչպես նաեւ պայթուցիկ նյութերի հետքեր չեն հայտնաբերվել:Նախաքննության ընթացքում «Հայկական ժամանակ» օրաթերթի գլխավոր խմբագիր Ն. Փաշինյանը ցուցմունք է տվել այն մասին, որ դեպքին նախորդող պահին, 30 րոպե առաջ նկատել է խմբագրությունից 12-15 մետր հեռավորության վրա կանգնած արտասահմանյան արտադրության «Ֆորդ Սկարպիո» մակնիշի ավտոմեքենա, որի առջեւի լապտերները եղել են թույլ լուսավորված վիճակում, իսկ գույնն ու պետհամարանիշները մթության պատճառով չի նկատել:

Քրեական գործով հարցաքննվել են «Հայկական ժամանակ» օրաթերթի աշխատակիցներ (թվարկված են անուններ-խմբ.), որոնք ցուցմունքներ են տվել դեպքի կապակցությամբ այն մասին, որ 2004թ. նոյեմբերի 22-ին, ժամը 22.40-ի սահմաններում գտնվելով խմբագրության ընդհանուր աշխատասենյակում, լսել են պայթյունի ձայն եւ նկատել, որ խմբագրությանը պատկանող «Նիվա» մակնիշի ավտոմեքենան այրվում է, որի մասին էլ ահազանգել են ոստիկանություն եւ հրշեջ պահպանություն: Հ. Գեւորգյանը եւ Ա. Օհանյանը ցուցմունքներ են տվել նաեւ, որ մինչ հրշեջ ծառայության կողմից հրդեհի մարումը իրենք հասցրել են խմբագրությունից դուրս գալ բակ եւ նկարահանել բռնկված վիճակում «Նիվա» մակնիշի ավտոմեքենան եւ նկարները ներկայացրել են քննությանը:

Հարցաքննվել են նաեւ Իսրայելյան 37 եւ 21 շենքերի բնակիչներ (թվարկված են 11 անուններ) եւ մի շարք այլ վկաներ, որոնք դեպքի կապակցությամբ հայտնել են, որ 2004թ. նոյեմբերի 22-ին, ժամը 20.30-ից 21.00-ի սահմաններում, երբ գտնվել են տանը, լսել են պայթյունի ձայն եւ նկատել, որ խմբագրության մուտքի մոտ ինչ-որ բան է այրվում, որի հետեւանքով ամբողջությամբ տարածքը ծխապատված է եղել: Դեպքի հաջորդ օրը տեղեկացել են, որ այրվել է խմբագրությանը պատկանող «Նիվա» մակնիշի ավտոմեքենան: Կատարված հանցագործությունը բացահայտելու, ինչպես նաեւ վերը նշված «Ֆորդ Սկարպիո» մակնիշի ավտոմեքենան հայտնաբերելու ուղղությամբ հանձնարարություններ են տրվել ՀՀ Ոստիկանության Քրեական հետախուզության վարչությանը, ոստիկանության Երեւան քաղաքի վարչությանը եւ ոստիկանության Կենտրոնի բաժնին, սակայն ձեռնարկված քննչական օպերատիվ միջոցառումները դրական արդյունքներ չեն տվել, հանցագործությունը չի բացահայտվել:

Նկատի ունենալով, որ քրեական գործի նախաքննության ժամկետը 02.02.2005թ. լրանում է եւ գործով կատարվել են բոլոր հնարավոր անհրաժեշտ դատավարական գործողությունները, սակայն քրեական գործով դեռեւս հայտնի չէ այն անձը, որը պետք է ներգրավվի արպես մեղադրյալ, ուստի ելնելով վերոգրյալից եւ ղեկավարվելով ՀՀ քր. դատ. օր-ի 31 հոդ. 1-ին մասի 1-ին կետի եւ 257 հոդ. պահանջներով.

Որոշեցի

- Վարույթիս տակ գտնվող թիվ 13133004 քր. գործի վարույթը կասեցնել որպես մեղադրյալ ներգրավման ենթակա անձի հայտնի չլինելու պատճառաբանությամբ:

- Որոշման օրինակն ուղարկել ոստիկանության Կենտրոնի բաժին` ձեռնարկելու օպերատիվ հետախուզական միջոցառումներ` հանցագործությունը կատարված անձին հայտնաբերելու ուղղությամբ:

- Որոշման մասին հայտնել «Դարեսկիզբ» ՍՊԸ-ի տուժողի ներկայացուցիչ Հ. Արսենյանին:

- Քրեական գործը եւ որոշման օրինակն ուղարկել Երեւան քաղաքի դատախազին օրինականությունը ստուգելու համար:

Աշոտ Կոստանյան
Երեւան քաղաքի քննչական բաժնի ավագ քննիչ

Խմբ. կողմից - Նշված որոշումը երեկ մենք բողոքարկել ենք, եւ Երեւան քաղաքի դատախազ Հրաչյա Բադալյանին միջնորդել ենք վերացնել Աշոտ Կոստանյանի վերը նշված որոշումը: