Ես ամաչելու բան չունեմ, Մարտի 1-ը ձեր ամոթն է. Նիկոլ Փաշինյանը՝ Գեւորգ Կոստանյանին, ՀՀԿ-ին

ՀՀԿ-ական պատգամավոր, ՀՀ նախկին գլխավոր դատախազ Գեւորգ Կոստանյանը, անդրադառնալով ԵԼՔ-ի հայտարարության 5-րդ կետին, որի հիմքում օրենսդրական փաթեթի մշակումն է, որով արժանապատիվ փոխհատուցում կտրվի Մարտի 1, 2-ի իրադարձությունների զոհերի հարազատներին, հանիրավի դատապարտվածներին, ինչպես նաեւ ոստիկանության կողմից ապօրինի ուժի կիրառման հետեւանքով վնասվածքներ ստացած քաղաքացիներին, հետաքրքրվեց՝ արդյո՞ք փոխհատուցման անհրաժեշտությունը կա, նկատի ունենալով, որ դեռեւս 2014 թվականին ընդունվել է Սահմանադրական դատարանի որոշում եւ այնուհետ օրենք, որով երաշխավորվում էր փոխհատուցման տրամադրումը:

«Այս դեպքում զոհված կամ սպանված տղաների կյանքի իրավունքը խախտվել է, հետեւաբար՝ իրենք արդեն այդ օրենքի ուժի մեջ մտնելու պահից մինչեւ այսօր իրավունք ունեին դիմելու իրենց խախտված իրավունքների համար փոխհատուցում ստանալու համար: Մարտի 1-ի զոհերի հարազատներն արդեն այդ իրավունքն ունեն, ի՞նչ իմաստ ունի հայտարարություն ընդունենք, օրենսդրական փաթեթ ընդունենք»,- ասաց Կոստանյանը:

Նիկոլ Փաշինյանը Կոստանյանի հարցին հարցով պատասխանեց.

«Դուք ասում ենք, որ զոհերի հարազատները կարող են փոխհատուցում ստանալ, իսկ ովքե՞ր են Մարտի 1-ի զոհերն ըստ այս պահին մեր ունեցած քրեադատավարական փաստաթղթերի կամ նախաքննական նյութերի: Մարտի 1-ի զոհերը նախաքննական նյութերում ներկայացվում են՝ զանգվածային անկարգությունների մասնակիցներ, զանգվածային անկարգությունների աջակիցներ, նրանցից ոմանք ներկայացվում են հարբած վիճակում դեպքի վայրում գտնված քաղաքացիներ: Այսօրվա դրությամբ ՀՀ-ի պաշտոնական դիրքորոշումը, որը կարող ենք դուրս բերել իրավապահ մարմինների տարածած հաղորդագրություններից, ապա դատական համակարգը պաշտոնական դիրքորոշում չի ֆիքսել, որ սխալ են արել, այդ մարդկանց սպանել են: Մենք հիմա ունենք ոստիկանության 4 ենթասպայի, որոնք ներգրավվել են որպես մեղադրյալներ: Այս գործը հանգուցալուծում չի ստանում, նրանք տարիներով մեղադրյալներ են»,- ասաց Փաշինյանը՝ նշելով, որ 5-րդ կետի կարիքը կա:

Գեւորգ Կոստանյանը, անդրադառնալով Նիկոլ Փաշինյանի այն հարցադրմանը, որ Սերժ Սարգսյանի թեթեւ ձեռքով Մարտի 1-ի Փաստահավաք խումբը դադարեցրեց իր գործունեությունն ասաց.

«Այն անկախ փորձագիտական խումբ էր, հետեւաբար՝ այն ենթակա էր լուծարման հանձնաժողովի եզրակացության պահից, որովհետեւ այդ նպատակով է ստեղծվել: Հետեւաբար իմաստը ո՞րն է՝ ձեր այդ պնդումը մտցնել հայտարարության տեքստի մեջ»,- ասաց Կոստանյանը, որին հակադարձելով Փաշինյանը նկատեց՝ Սերժ Սարգսյանի հրամանագրում չի եղել հիմնավորում:

«Հասկացան, որ բանը բանից անցնում է, բաներ են բացվում, որ չպետք է բացվի, դա եղել է քաղաքական որոշում: ԱԺ ժամանակավոր հանձնաժողովը ընդհանրապես լեգիտիմություն չի ունեցել, վստահություն չի վայելել, եղել է քաղաքականացված եւ, ըստ էության, փաստահավաք խմբի լուծարումը տեղի է ունեցել քաղաքական որոշմամբ: Պարզվել է, որ Փաստահավաք խումբն իրոք աշխատում է, արվել են լրջագույն բացահայտումներ՝ նույնիսկ ՊՆ-ի, բանակի ներգրավվածության հետ կապված»:

Գեւորգ Կոստանյանն իր խոսքում ասաց, որ Մարտի 1-ը մեր երկրի պատմության ընթացքում ամոթալի հարց է եւ ամոթ է բոլորիս, որին Փաշինյանն արձագանքեց.

«Ես Մարտի 1-ի գործով դատապարտվել եմ 7 տարվա ազատազրկման: Շատ է ասվում այդ շեշտադրմամբ, որ Մարտի 1-ը բոլորիս ամոթն է, ես, որպես այդ գործով դատապարտված անձ, Մարտի 1-ի համար ամաչելու ոչ մի բան չունեմ, Մարտի 1-ը իմ ամոթը չի, ձե՛ր ամոթն է: Չգիտեմ անձնապես ձեր ներգրավվածությունը, բայց ասում եմ՝ որպես խորհրդարանական մեծամասնության ներկայացուցիչ»: 

Երկու ժամ տեւած քննարկումից հետո ՀՀԿ-ն դեմ քվեարկեց ԵԼՔ-ի նախագծին, Ծառուկյան խմբակցությունը՝ ձեռնպահ, կողմ էր միայն ԵԼՔ-ը: