Հայ մարմնամարզիկները Բաքվում կայացող մրցումներին չեն կարող մասնակցել. դա խնդիր է

Հայ մարմնամարզիկների համար լուրջ խնդիր է, որ առաջիկայում Բաքվում անցկացվող միջազգային մրցաշարերի քանակն ավելանալու է: Այս մասին այսօր՝ դեկտեմբերի 25-ին, լրագրողների հետ հանդիպման ժամանակ հերթական անգամ ասաց Հայաստանի մարմնամարզության հավաքականի գլխավոր մարզիչ Հակոբ Սերոբյանը: Մարմնամարզության Եվրոպայի ֆեդերացիայի նորընտիր նախագահն ադրբեջանցի է, եւ ջանք չի խնայում, որ իր երկիրը հնարավորինս շատ մրցումներ հյուրընկալի: Դրանցից շատերը վարկանիշային են, բացի այդ՝ հայ երիտասարդների համար կարեւոր են նաեւ բարձր տեղեր զբաղեցնելու ու պարտադիր զինվորական ծառայությունից տարկետում ստանալու համար:

«Մյուս տարի Եվրոպայի երիտասարդների, մեծահասակների առաջնությանը պետք է թիմով մասնակցենք, որպեսզի 2019 թ. Մինսկում կայանալիք Եվրոպական օլիմպիական խաղերի վարկանիշ ձեռք բերենք: Երիտասարդներն էլ, ճիշտ է բավականին փոքր են, բայց պետք է աշխատեն բարձր տեղեր գրավել, որպեսզի տարկետում ստանան: 2002 թ. ծնված լավ տղաներ ունենք, որոնց համար Եվրոպայի 2020 թ. առաջնությունը բարձր տեղեր զբաղեցնելու ու տարկետում ստանալու վերջին հնարավորությունն է: Այդ մրցաշարը Բաքվում է լինելու, հետեւաբար չենք մասնակցելու, բայց, եթե չմասնակցենք էլ, գնան բանակ, մարմնամարզությանը պետք է հրաժեշտ տան, քանի որ մարմնամարզիկն իրավունք չունի չմարզվելու թեկուզ 1 ամիս»,- ասաց նա՝ ավելացնելով, որ որոշ մրցաշարերի համար կփորձեն սպիտակ քարտեր ստանալ:

Մարմնամարզիկների համար չլուծված է մնում դահլիճի ոչ բարվոք վիճակը: Հավաքականի անդամները մարզվում են Ալբերտ Ազարյանի անվան մարմնամարզության օլիմպիական հերթափոխի մանկապատանեկան մարզադպրոցում, որը լուրջ վերանորոգման կարիք ունի: Այնտեղ կա մարզիկներին անհրաժեշտ փոսը, սակայն սպունգներ չկան, եւ բարդ տարրեր նրանք չեն կարող փորձել, քանի որ լուրջ վնասվածքներ կստանան: Մոտ 7 ամիս առաջ էլ ՀՀ ֆեդերացիան միջազգային ֆեդերացիայից որպես նվեր գործիքներ է ստացել, որոնց մի մասն են միայն մարմնամարզիկներն օգտագործում: Ազատ վարժության հարթակը դեռ տեղադրված չէ, քանի որ հատակը վերանորոգված չէ:

«Նույն վիճակում է մնում: ՀՀ սպորտի եւ երիտասարդության հարցերի նախարար Հրաչյա Ռոստոմյանը խոստացել է, որ դա կլինի: Ուղղակի, եթե հատակը վերանորոգեն, այդ աշխատանքների ընթացքում 20 օրից 1 ամիս մարզվող չպետք է լինի: Փորձում ենք հասկանալ՝ երբ դա հնարավոր կլինի: Հատակը վերանորոգելու հետ կապված միակ խնդիրը դա է»,- ասաց նա:

Սերոբյանը նաեւ ամփոփեց մրցաշրջանը: Այս տարվանից ավելի գոհ է, քան 2016 թվականից, որի ընթացքում ավելի շատ մեդալներ էին նվաճել, քանի որ թե երիտասարդները, եւ թե մեծահասակներ միջազգային մրցաշարերում հիմնականում կարողացել են ցուցադրել այն, ինչի ընդունակ են: 2016 թ. Եվրոպայի չեմպիոն Հարություն Մերդինյանն (նժույգթաթեր) այս տարի նույն մրցաշարում բրոնզ է նվաճել: Աշխարհի առաջնությունում 5-րդն է եղել, սակայն, ըստ Սերոբյանի, նույնիսկ ավելի լավ է հանդես եկել, քանի 2015 թ., երբ բրոնզե մեդալակիր էր դարձել: Արթուր Դավթյանն այս տարի դարձել է անկախ Հայաստանի պատմության առաջին բազմամարտիկն աշխարհի առաջնության եզրափակչում: Մասնագետը շատ գոհ է նաեւ Արթուր Թովմասյանից (օղակներ), որը հաղթեց Քաթարի աշխարհի գավաթի խաղարկությունում, իսկ Թայփեյի համաշխարհային ուսանողական խաղերում 2-րդ անգամ կարիերայում հաղթող դարձավ: Սակայն Սերոբյանի հույսերը չարդարացնողներից մեկը նույնպես Թովմասյանն է եղել:

«Մի բան եմ միայն ափսոսում՝ Արթուր Թովմասյանի Եվրոպայի առաջնությունը: Նա կարող էր 2-րդ մրցանակակիր լինել: Եզրափակիչ էր մտել 2-րդ արդյունքով, ուղղակի եզրափակչում չստացվեց: Միայն դա է ափսոս: Մեր երիտասարդները լավ արդյունքներ ցույց տվեցին: 2 օր առաջ հանդես էինք գալիս Միխայիլ Վորոնինի գավաթի խաղարկությանը: 26 երկիր էր մասնակցում: Բավական լուրջ մրցումներ էին: Մեր հավաքականի տղաները՝ Արթուր Դավթյանը, Վիգեն Խաչատրյանը, թիմային հաշվարկում, կարելի է ասել, 2-րդ տեղը զբաղեցրեցին: Ինչո՞ւ եմ ասում 2-րդ, որովհետեւ Ռուսաստանին 2 թիմով պարգեւատրեցին, ինչի իրավունքը չունեին: Մենք Ռուսաստանից հետո 2-րդն ենք: Ճապոնիայի նման թիմի ենք հաղթել: Ունեցել ենք 7 մեդալ՝ 1 ոսկե, 2 արծաթե եւ 4 բրոնզե: Վերջին մրցումներն էին, լավ ակորդով ավարտեցինք տարին»,- ասաց նա:

Վորոնինի անվան գավաթի խաղարկության թիմային հաշվարկում ՀՀ հավաքականը պաշտոնապես բրոնզե մեդալ է նվաճել: Եվրոպայի 2016 թ. արծաթե մեդալակիր Արթուր Դավթյանը ոսկե մեդալ է նվաճել հենացատկում, արծաթե մեդալ՝ նժույգթափերում եւ օղակներում, բրոնզ՝ բազմամարտում եւ զուգափայտերում: Վիգեն Խաչատրյանը բրոնզ է նվաճել ազատ վարժությունում:

Մարմնամարզիկների՝ հաջորդ տարվա ծրագիրը սովորականից տարբերվելու է, քանի որ ի տարբերություն մյուս տարիների՝ Եվրոպայի առաջնությունը լինելու է ոչ թե ապրիլին, այլ օգոստոսին: Հունվարին թիմն ուսումնամարզական հավաք է անցկացնելու: ՀՀ առաջնությունը մարտի փոխարեն՝ կայանալու է հունիսին: Քաթարի գավաթի խաղարկությանը 2018 թվականին թիմը չի մասնակցի: Այդ գումարով ամռանն ուսումնամարզական հավաք կանցկացնի Թբիլիսիում, որտեղ հիանալի պայմաններ կան, եւ էժան է: Այնուհետեւ կմասնակցեն Եվրոպայի առաջնությանը, աշխարհի առաջնությանը, ապա Գերմանիայում կայանալիք աշխարհի գավաթի խաղարկությանը: Գերմանիայի գավաթի խաղարկությունից սկսած 2 տարի աշխարհի գավաթի խաղարկությունները վարկանիշային են լինելու օլիմպիական խաղերի համար: Յուրաքանչյուր գործիքի վրա առավելագույն միավորներ հավաքած մարզիկն օլիմպիական վարկանիշ է ստանալու: