Բյուջեն, փաստորեն, կոալիցիայինն է. Իրաք մեկնելու են կամավորները

Տպագրվել է «Հայկական Ժամանակ» օրաթերթի՝ 2004 թվականի դեկտեմբերի 9-ի համարում

Հարցազրույց ՀՀ վարչապետ Անդրանիկ Մարգարյանի հետ:

- Պարոն վարչապետ, չնայած ֆինանսների նախարարը բյուջե 2005-ը համարեց հզոր բյուջե, սակայն, հաշվի առնելով խորհրդարանում առկա որոշակի լարվածությունը, վստա՞հ եք, որ բյուջեն անցնելու է միաձայն: 

- Նման գերխնդիր՝ բյուջեն անցկացնել միաձայն, մենք մեր առաջ չենք էլ դրել: Բնականաբար, կարող են լինել պատգամավորներ, ովքեր կքվեարկեն ձեռնպահ կամ դեմ, սակայն չեմ կարծում, որ ընդհանուր առմամբ բյուջեն կարող է վտանգվել:

- Այդուհանդերձ, ՀՅԴ անդամ Վահան Հովհաննիսյանն ասել էր, թե  ԸO շուրջ տարաձայնությունները կարող են էապես ազդել որոշ ուժերի՝ բյուջեի քվեարկության վրա:

- Չեմ ցանկանում մեկնաբանել նման կարգի հայտարարությունները: Սա հանրապետականի անձնական բյուջեն չէ. բյուջեն կոալիցիոն կառավարությանն է, ուստի նման կարեւորագույն փաստաթղթի նկատմամբ նմանատիպ մոտեցումներն ինձ համար անընդունելի են: Բայց կարծում եմ, որ նման հարց այսօր չկա:

- Արդեն չկա, որովհետեւ հանրապետականը արդեն համաձայնե՞լ է Ընտրական օրենսգրքում ընտրատեղերի 70-30 տոկոս համամասնությանը:

- Սկզբունքորեն մենք մեր համաձայնությունը տվել ենք: Իհարկե, դեռ կուսակցության խորհրդի նիստում չենք հաստատել, բայց նման հարաբերակցությունը համարում ենք իրատեսական:

- Սակայն կոնկրետ դուք էիք պնդում, որ պետք է պահպանվի գործող համամասնությունը: Չի՞ ստացվում, որ ՀՀԿ-ն պարզապես զիջել է իր սկզբունքներն ու դիրքերը:

- Մեզ համար ընդունելի էր 40-60 տոկոս համամասնությունը, սակայն կոալիցիոն մեր գործընկերները պնդում էին 100 տոկոս համամասնական տարբերակը: Այնպես որ, եթե մենք 70-30-ի շուրջ համաձայնության ենք գալիս, դա համարում եմ բնական, եւ չեմ կարծում, որ այստեղ որեւէ մեկը տանուլ է տվել: Ընդհանրապես բանակցություններում հաղթող կողմ չի լինում:

 - ՍԴ-ն դրական եզրակացություն է տվել այն միջազգային հուշագրին, համաձայն որի՝ մեր խաղաղապահների Իրաք գործուղելու հարցը պետք է մտնի ԱԺ: ՀՀԿ-ն կո՞ղմ է Իրաք խաղաղապահ զորք ուղարկելուն:

- Հանրապետականն այդ հարցի վերաբերյալ դեռ որոշում չի կայացրել: Երբ հարցը կքննարկվի խորհրդարանում, այդ ժամանակ մենք արդեն կհստակեցնենք մեր դիրքորոշումը: Այդուհանդերձ, ես այն կարծիքին եմ, որ Իրաք զորք ուղարկելը անհրաժեշտությունից բխող քայլ է: Սակայն մենք հայկական կոնտիգենտ Իրաք ուղարկելու ենք ոչ թե զորակոչային սկզբունքով, այլ գործելու է կամավորության սկզբունքը: Ոչ մեկն իր կամքին հակառակ Իրաք չի գործուղվելու:

- Պարոն վարչապետ, դուք  ԵԿՄ վարչության անդամ եք: ԵԿՄ-ի ներսում առկա լուրջ խմորումները կարո՞ղ են այս կառույցը եւս պառակտել, ինչը տեղի է ունենում հայաստանյան բազմաթիվ կուսակցություններում եւ կազմակերպություններում:

- Վստահ եմ, որ ԵԿՄ-ում պառակտում չի լինելու: ԵԿՄ-ն  որոշակի գաղափարներով ու սկզբունքներով ստեղծված միություն է՝ Վազգեն  Սարգսյանի գլխավորությամբ: Ուստի ես վստահ եմ, որ այն մարդիկ, ովքեր եղել են այդ կառույցի հիմնադիրները, երբեք չեն դիմի պառակտման տանող քայլերի:

- Քաղաքական դաշտում նոր ընդդիմադիր ֆորմատի ձեւավորում է նկատվում: Այդ ֆորմատը, ըստ ձեզ, ապագա ունի՞: 

- Այսօր վաղ է որոշակի գնահատականներ տալը: Քաղաքական գործընթացները թող զարգանան, եւ երբ ինչ-որ բան կստացվի՝ այդ ժամանակ արդեն կարելի կլինի ավելի կոնկրետ վերաբերմունք ցուցաբերել եւ գնահատականներ տալ:

- Կոմպլեմենտար արտաքին քաղաքականության արդյունքները առանձնապես տպավորիչ չեն: Չե՞ք կարծում, որ ժամանակն է առավել կողմնորոշվելու դեպի արեւմուտք, ՆԱՏՕ, հատկապես որ՝ մեր ռազմավարական դաշնակից Ռուսաստանը քանիցս ապացուցել է իր անվստահելի գործընկեր լինելը:

- Ինչպես հայտնի է, այսօր մեր եւ ՆԱՏՕ-ի հարաբերությունները հրաշալի են զարգանում. այն բոլոր տարածաշրջանային ծրագրերը, որ ՆԱՏՕ-ն ունի՝ Հայաստանը դրանց մասնակցում է: Այնպես չէ, որ մենք, Հավաքական անվտանգության խորհրդի անդամ լինելով, անտեսում ենք ՆԱՏՕ-ի հետ համագործակցությունը: Մենք ԱՊՀ երկրներից երրորդն ենք, որ  ՆԱՏՕ-ում արդեն ունենք դեսպան, եւ դա նշանակում է, որ մենք շահագրգռված ենք եվրոպական կառույցների, այդ թվում՝ ՆԱՏՕ-ի հետ հարաբերությունների սերտացմանը: Եւ ես համարում եմ, որ գոնե վերջին մեկ տարում Հայաստանի եւ ՆԱՏՕ-ի հետ հարաբերությունները շատ ավելի են խորացել, քան մեր անկախության առաջին տարիներին էին: 

- Դուք ասել եք, որ առաջին նախագահի մասին կխոսեք միայն այն ժամանակ, երբ նա ինչ-որ բան կասի: Լեւոն Տեր-Պետրոսյանի հարցազրույցը ենթադրո՞ւմ է, որ դուք կասեք ձեր կարծիքը տվյալ հարցազրույցի եւ առաջին նախագահի հնարավոր վերադարձի մասին:

- Ցանկացած քաղաքական գործիչ, այդ թվում՝ հանրապետության առաջին նախագահը, խոսելու եւ կարծիք հայտնելու իրավունք ունի, եւ այդ իրավունքը որեւէ մեկը սահմանափակել չի կարող: Սակայն ես չեմ կարծում, որ այդ հարցազրույցը քաղաքական նոր եւ լուրջ հայտ էր. որեւէ նոր գաղափար կամ նոր խնդիրներ Լեւոն Տեր-Պետրոսյանն առաջ չէր քաշել: Ուստի այս պահին հեռուն գնացող քաղաքական եզրահանգումներ անելը, ինչպես որ փորձ է արվում անել, ես ճիշտ չեմ համարում:

Նաիրա Զոհրաբյան