Արծիվներին` մարդու միս. ծեծել են «Սյունյաց երկիր»-ի գլխավոր խմբագրին

Տպագրվել է «Հայկական Ժամանակ» օրաթերթի՝ 2004 թվականի հոկտեմբերի 14-ի համարում

Երեկ, ժամը 11.30-ի սահմաններում, ծեծել են Սյունիքի մարզպետի մամուլի նախկին քարտուղար, «Սյունյաց երկիր» թերթի գլխավոր խմբագիր Սամվել Ալեքսանյանին: Ի դեպ, նա մեկ շաբաթ առաջ մարզպետի հրամանով ազատվել էր աշխատանքից: Ըստ Ս.Ալեքսանյանի՝ առավոտյան նրա աշխատասենյակ է մտել «Սյունյաց արծիվներ» ՀԿ-ի նախագահ, ՀՀԿ անդամ Խաչիկ Ասրյանը` երկու տղաների հետ: «Մտան, ու Խաչիկը հարցրեց գործերից, հետո ասաց՝ առանձին զրուցելու թեմա կա: Դե, քանի որ առանձին զրույց էր, պատասխանատու քարտուղարը դուրս եկավ սենյակից»,- պատմեց Ալեքսանյանը:   Ըստ նրա՝ Ասրյանը հարցրել է, թե ինչու է վերջին համարներում քննադատել ՀՀ վարչապետին ու Սյունիքի մարզպետին: Ալեքսանյանը փորձել է բացատրել, բայց Ասրյանը բռունցքով անսպասելի հարվածել է Ալեքսանյանի դեմքին, հետո մահակով (դուբինկա) հարվածներ տեղացել:

Այնուհետեւ Ասրյանն ու նրա հետ եկած տղաները սենյակում ամեն ինչ խառնել են իրար,  հայհոյել խմբագրին: «Ավելին, այդքանից հետո հայտարարեցին, որ ամենաուշը մեկ ժամ հետո խմբագրությունը փակված լինի, ու աշխատասենյակներում մարդ չլինի, այլապես՝ կվառեն թերթի ողջ ունեցվածքը ու, սեղանից վերցնելով բջջային հեռախոսս, դուրս եկան»,- պատմեց Ս.Ալեքսանյանը: Ըստ նրա՝ ինքը ոչ մի անձնական թշնամանք չունի Խաչիկ Ասրյանի հետ, ընդհակառակը՝ երկուսն էլ գորիսեցի են, նույնիսկ ընտանիքներով մտերիմ են: «Ես չեմ կարող ասել, թե ում  թելադրանքով է Ասրյանը նման քայլի դիմել, գուցե վարչապետն ու Սյունիքի մարզպետը նույնիսկ  տեղյա՞կ չէին: Գուցե Ասրյանը որոշել էր արջի ծառայությու՞ն մատուցել ու հետո շեֆերին զեկուցել»,- ասում է Ալեքսանյանը:

Ի դեպ, մեկ ժամ հետո իրավապահները վերադարձրել են նրա բջջային հեռախոսը: Մեզ հաջողվեց նաեւ հեռախոսազրույց ունենալ Խաչիկ Ասրյանի հետ, որը ժամը 16.00-ի մոտակայքում ոստիկանության Սյունիքի մարզային վարչության քննչական բաժնում էր: Ըստ նրա՝ ինքը  կազմակերպության ակումբների 2 ղեկավարների հետ գնացել էր «Սյունյաց երկիր»՝ պարզելու, թե երբ պիտի ազատեն սենյակները, քանի որ դրանք հատկացված են «Սյունյաց արծիվներ» ԵՀԿ-ին: «Իսկ գլխավոր խմբագիրը, հիստերիայի մեջ ընկնելով, ասաց՝ դուք ովքեր եք, որ ձեզ համար սենյակ ազատեմ, չեք կարդացել, թե ես ում մասին եմ հոդվածներ տպագրում»,-մեզ հետ հեռախոսազրույցում ասաց Խ.Ասրյանը: «Մի խոսքով, ես ինձ հատկացրած սենյակներն էի պահանջում ազատել, ու ընդհանրապես նրան մատով էլ չեմ կպել, պարզապես նյարդայնացա, դուրս գալուց վերցրի բջջային հեռախոսը, որը միացրած էր լարման մարտկոցին»,- ասաց Ասրյանը:

Մեր այն դիտարկմանը, թե Ս.Ալեքսանյանի դեմքին հարվածի հետք կար, նա պատասխանեց. «Ես ինչ իմանամ՝ ում հետ է կռիվ արել կամ ինչ հետք է: Ես մտավորական եմ ու երբեք ինձ թույլ չէի տա մտավորականին խփել»: Մենք փորձեցինք նաեւ կապվել «Լեռնագործ» հյուրանոցի տնօրինության հետ, քանի որ «Սյունյաց երկիրը» տեղավորված է այդ հյուրանոցում: Ժամը 16.11-ին գլխավոր ադմինիստրատորն ասաց, որ ինքը չի կարող մեր հարցերին պատասխանել՝ իրենց մոտ աշխատանքային օրն ավարտվել է, իսկ տնօրենն ու փոխտնօրենը տուն են գնացել, եւ  հնարավոր չէ նրանց հետ կապվել: Այդ իսկ պատճառով կրկին դիմեցի «Սյունյաց երկիր»-ի խմբագրին` տարածքի վերաբերյալ պարզաբանումներ ստանալու նպատակով: Ս.Ալեքսանյանը տեղեկացրեց, որ եթե ինքը չի սխալվում՝  խմբագրությունը տեղավորված է Կապանի լեռնահարստացման կոմբինատին պատկանող 2 սենյակներում, ու կոմբինատի տնօրենի հետ պայմանավորվածություն կա` մոտ մեկ ամիս մնալ այդ սենյակներում, մինչեւ թերթը հարմար տարածք գտնի ու գնի:

Ավելին, հյուրանոցի տնօրինությունը վտարման պահանջ չի դրել: «Նորից ասում եմ՝ Խաչիկ Ասրյանի կռիվը  վարչապետի ու մարզպետի մասին տպագրված հոդվածների համար էր, մենք ոչ մի տարածքային խնդրի մասին չենք զրուցել»,- պնդեց Ալեքսանյանը: Հիշեցնենք, որ  «Սյունյաց երկիրը» տեղավորված էր Սյունիքի մարզպետարանում, իսկ մարզպետի քարտուղարի պաշտոնից Ալեքսանյանի ազատվելուց հետո թերթին պահանջ է ներկայացվել` ազատել զբաղեցրած տարածքը: Ինչեւէ, Ալեքսանյանը դիմել է իրավապահ մարմիններին, ՀՀ գլխավոր դատախազին, հեռագրեր է ուղարկել Ռ.Քոչարրյանին, վարչապետին, ԵԱՀԿ-ի գրասենյակ: Փաստի առնչությամբ ոստիկանության Սյունիքի մարզային վարչության քննչական բաժնում հարուցվել է քրեական գործ:

Հ.Գ. Ուշ երեկոյան հայտնի դարձավ, որ Կապանի «Լեռնագործ» հյուրանոցի տնօրինությունը պայմանագիր է կնքել «Սյունյաց արծիվներ» ԵՀԿ-ի հետ, ըստ որի՝ հյուրանոցի 9-րդ հարկում գտնվող 6 սենյակները 2004-ի հոկտեմբերի 11-ից վարձակալությամբ տրվել է նրանց: Ի դեպ, այդ վեցի մեջ մտնում են նաեւ այն սենյակները, որտեղ «Սյունյաց երկիրն» է: 

Արմեն Մկրտչյան