Քննացավ. պահանջվում են արդար քննություններ

Տպագրվել է «Հայկական Ժամանակ» օրաթերթի՝ 2004 թվականի հունիսի 24-ի համարում

Ուղիղ քսան օր հետո կավարտվի բուհերի այս տարվա դիմորդների գործերի ընդունումը: Իսկ 25 օրից` հուլիսի 20-ին կսկսվեն բուհական ընդունելության քննությունները: Ու թեեւ քննություններին փաստորեն դեռ մեկ ամիս կա, սակայն դիմորդների ծնողներն արդեն այսօրվանից, կոպիտ ասած, տառապում են քննացավով: Երեկ մեզ հայտնի դարձավ, որ դիմորդների ծնողները դիմել են Ռոբերտ Քոչարյանին՝ առաջարկելով բուհական ընդունելության քննությունների ժամանակ քննասենյակներում պատճենահանման սարքեր տեղադրել, որոնց միջոցով դիմորդները հնարավորություն կունենան պատճենահանելու իրենց աշխատանքներն ու պատճեններն իրենց հետ քննասենյակից դուրս տանել:  Դիմորդների ծնողների կարծիքով՝ դա հնարավորություն կտա ապահովելու քննությունների թափանցիկությունը:

Իհարկե, թափանցիկություն ապահովելու համար պատճենահանման սարքերի հետ հույսեր կապելը միամտություն է, քանի որ, ըստ տարիների ընթացքում ձեւավորված ավանդույթի, սովորաբար կեղծիքները հիմնականում արվում են քննասենյակից դուրս եւ բոլորովին այլ մեխանիզմներով: Բայց սա կարող է գոնե մեղմացնել լարվածությունը: Համենայնդեպս, արդյունքում դիմորդներն իրենց ծնողների ու ռեպետիտորների հետ մեկ օր շուտ կծանոթանան քննական գրավորներին, ու չի բացառվում, որ դրա շնորհիվ պակասեն նաեւ բողոքարկումները: Սակայն երեկ նախագահականի վերահսկողական ծառայությունից մենք տեղեկացանք, որ դա դեռ ընդամենն առաջարկ է եւ բուհական ընդունելության քննությունների թափանցիկությունն ապահովելու համար արված մի քանի այլ տարբերակների հետ կքննարկվի Ռոբերտ Քոչարյանի Հայաստան վերադառնալուց հետո:

Իսկ նախագահի վերահսկողական ծառայությունը, որ այս տարի զարմանալի հետաքրքրություն ցուցաբերեց մեդալի քննությունների ժամանակ, պատրաստվում է նույնկերպ վերահսկել նաեւ ընդունելության քննությունները: Իհարկե, ըստ հավաստի աղբյուրների, մեդալի քննություններին նախագահի վերահսկողականի ցուցաբերած նման հետաքրքրությունն ու այնուհետեւ դրանց արդյունքները կասկածի տակ առնելն ու քննություններից հետո բարձրացրած աղմուկը  պայմանավորված էին միայն կրթության եւ գիտության փոխնախարար Աիդա Թոփուզյանին պաշտոնանկ անելու համար բավարար հիմքերի ձեռքբերման ցանկությամբ: Ու եթե հաշվի առնենք նաեւ մեդալի քննությունների ժամանակ վերահսկողականի աշխատակիցների պահվածքը, ապա խիստ կասկածելի է, որ այդ կառույցը դրական դեր ունենա քննություններն այս անգամ գոնե արդար անցկացնելու փորձի ժամանակ:

Երեկ, երբ մենք փորձեցինք կրթության եւ գիտության նախարար Սերգո Երիցյանից ճշտել, թե նախարարությունն ինչ քայլեր է ձեռնարկում քննությունների թափանցիկությունն ապահովելու եւ դրանք վերահսկելու համար, նախարարը, որն, ի դեպ, առաջին անգամ էր լսում պատճենահանման սարքերի առաջարկի մասին, ասաց. «Վերահսկողության համար կա լիազորների հայտնի ինստիտուտը: Քննություններին ներկա կլինի նաեւ նախագահի վերահսկողական ծառայությունը»: Ըստ նախարարի, սակայն, միայն կրթության եւ գիտության նախարարությունը միայնակ ի վիճակի է վերահսկել քննությունների արդար ընթացքը: «Բայց ովքեր կօգնեն, մենք միայն ուրախ կլինենք»,- ասաց նա:

Մեր այն հարցին, թե ինչով էր պայմանավորված նախագահի վերահսկողականի պահվածքն այս տարվա մեդալի քննությունների ժամանակ, նա պատասխանեց. «Չգիտեմ: Գուցե բարի նպատակ կար, որ քննություններն ավելի կազմակերպված լինեն»: Իսկ երբ մենք խնդրեցինք մեկնաբանել մեդալի քննությունների ժամանակ արձանագրված խախտումներն ու քննությունների վերաբերյալ Ռոբերտ Քոչարյանի արած հայտարարությունը, Սերգո Երիցյանը պատասխանեց. «Մեր հասարակությանը բնորոշ որոշակի թերություններ են արձանագրվել: Որեւէ գնահատական այս պահին տալ չեմ կարող: Պարզապես քննություններ էին՝ իրենց թերություններով»: Ըստ նախարարի՝ ինքն առաջին ջատագովն է, որ բուհական ընդունելության քննություններն անցնեն թափանցիկ, եւ իրենց օգնելու ցանկացած քայլ ինքը կողջունի: Սակայն, եթե անգամ ընդունենք, որ կրթության նախարարն իսկապես թափանցիկ քննությունների ջատագով է եւ ամեն ինչ անելու է արդար քննություններ ապահովելու համար, միեւնույն է, փորձն ու նաեւ նախկին ԿԳ նախարարների ժամանակին արած նմանատիպ հայտարարությունները հուշում են, որ Հայաստանում նման բան, գոնե առաջիկայում, չի կարող լինել:

Հ.Գ. Երեկ մեզ հայտնի դարձավ, որ Սերգո Երիցյանն առայժմ չի հաստատել բուհական ընդունելության քննությունների առարկայական հանձնաժողովների նախագահների ցանկը: Ըստ նախարարի՝ այդ հարցը քննարկման փուլում է, եւ ըստ ամենայնի՝ հանձնաժողովների նախագահների անունները հայտնի կդառնան մինչեւ հուլիսի 7-ը: Այժմ ԿԳՆ-ն զբաղված է տեղական հանձնաժողովների ձեւավորման խնդրով եւ որոշում է, թե որ քննությունը որ բուհում պետք է անցկացվի:

Լուսինե Բարսեղյան