Մինչհանրահավաքային. ընդդիմությունը խեղճանում է փողից

Տպագրվել է «Հայկական Ժամանակ» օրաթերթի՝ 2004 թվականի մայիսի 23-ի համարում

Ապրիլի 12-ի լույս 13-ի գիշերվա իրադարձություններից հետո «Արդարություն» դաշինքի եւ «Ազգային միաբանություն» կուսակցության հրավիրած հանրահավաքների մասնակիցների թիվը չի մոտենում այն կրիտիկական զանգվածին, որպեսզի այս կուսակցությունները կարողանան դիմել նոր վճռական գործողությունների: Եւ սա է այն հիմնական պատճառը, որ յուրաքանչյուր հանրահավաքի ժամանակ ընդդիմությունը հայտարարում է, որ վճռականը լինելու է հաջորդը: Մայիսի 21-ին հրավիրված հանրահավաքի ժամանակ հայտարարվեց, որ հաջորդ հանրահավաքը կկայանա հունիսի 4-ին, որին կհետեւեն բողոքի անժամկետ գործողություններ: Իսկ որո՞նք են այն պատճառները, որ հասարակության ավելի լայն զանգվածներ չեն մասնակցում ընդդիմության հանրահավաքներին, եւ ի՞նչ է պատրաստվում առաջիկա երկու շաբաթների ընթացքում անել ընդդիմությունը կրիտիկական զանգվածն ապահովելու համար:

Կոմունիստական կուսակցության քարտուղար Խորեն Սարգսյանն ասում է, որ ժողովուրդն այսօր էլ է ոտքի կանգնած, սակայն ընդդիմությունը միջոցներ չունի այդ մարդկանց Երեւան հասցնելու համար: «Եթե կարողանանք մարդկանց գոնե տրանսպորտի գումար տալ, ապա հանրահավաքներին մի քանի անգամ ավելի շատ մարդ կլինի: Պետք չէ ներկա վիճակը համեմատել 88 թվականի հետ: Այն ժամանակ ժողովուրդը կուշտ էր, գրպանում փող ուներ, բենզինն էլ կոպեկներ արժեր՝ իրենք իրենց միջոցներով գալիս էին: Իսկ այժմ արեւը տալիս է սոված մարդու գլխին, նա արդեն չկա»,-ասում է Խորեն Թռչունիչը, որի կարծիքով՝ հանրահավաքների ավելի շատ մարդիկ կգան, եթե վստահ լինեն, որ դրան հետեւելու են վճռական գործողություններ: «Մեզ համար նոր ապրիլի 12 է պետք, բայց այս անգամ ժողովուրդը ավելի պատրաստ կլինի ինքնապաշտպանության, եւ արդյունքը բոլորովին այլ կլինի»,-կարծում է Խորեն Սարգսյանը:

Իսկ «Ազգային միաբանություն» կուսակցության խմբակցության անդամ Աղասի Արշակյանի կարծիքով՝ պետք է ոտքի հանել Երեւանի բնակչությանը: «Երեւանում ապրում է 350 հազար ընտանիք. եթե յուրաքանչյուր երկրորդ ընտանիքից մեկ մարդ էլ գա հանրահավաքի, ապա առնվազն 175 հազար մարդ կլինի, ինչը բավարար է այս իշխանության հարցը լուծելու համար: Իսկ նման թիվ ունենալու համար պետք է, որ ընդդիմության ակտիվիստները հանրահավաքին մասնակցելու թռուցիկ կոչերը հասցնեն յուրաքանչյուր ընտանիք»,-ասում է պարոն Արշակյանը: «ԱՄ» փոխնախագահ Ալեքսան Կարապետյանը եւս վստահեցնում է, որ իրենց ակտիվիստները այս երկու ամիսների ընթացքում ամբողջովին սնանկացել են, եւ իրենք գումարներ չունեն նրանց ճանապարհածախսը հոգալու համար: «Չի կարելի հացի խնդիր ունեցող մարդուց պահանջել, որ երկու-երեք հազար դրամ ծախսի եւ գա հանրահավաքի»,-ասում է պարոն Կարապետյանը:

Իսկ «Հանրապետություն» կուսակցության առաջնորդ Արամ Զավենի Սարգսյանի կարծիքով՝ ավելի մեծ հանրահավաք կազմակերպելու համար ընդդիմությունը պետք է հանրությանը ներկայացնի իր ծրագիրը, գաղափարախոսությունը, գործողությունների հստակ ծրագիրը եւ ավելի հաճախ շփվի հասարակության հետ: Չնայած սրան, պարոն Սարգսյանը եւս կարեւորում է ֆինանսական ռեսուրսի դերը հանրահավաքների կազմակերպման գործում: «Իսկապես հանրահավաքներին մասնակցելու ցանկություն ունեցողների թիվն անհամեմատ մեծ է հանրահավաքների մասնակիցների թվից: Դրա պատճառներից մեկը, իհարկե, սոցիալականն է, երբ մարդիկ հնարավորություն չունեն գալու հանրահավաքի: Սակայն կան այլ պատճառներ եւս՝ ճանապարհների փակ լինելը, ընդդիմության ակտիվիստների նկատմամբ ոստիկանության կողմից իրականացվող պատժամիջոցները»,-ասում է պարոն Սարգսյանը:

Մեր զրուցակիցն ընդունում է, որ ընդդիմությունը եւ մասնավորապես «Հանրապետություն» կուսակցությունը չունեն անհրաժեշտ ֆինանսներ, որ հանրահավաքի մասնակցելու ցանկութուն ունեցողների գոնե 20%-ին կարողանան ապահովել ճանապարհածախսով: «Դրա պատճառն էլ այն է, որ Ռոբերտ Քոչարյանի իշխանության օրոք ոչ մի ընդդիմադիր գործիչ իրավունք չունի սեփական գործ ունենալու եւ գումար վաստակելու»,-ասում է պարոն Սարգսյանը: Իսկ ի՞նչ է անելու ընդդիմությունը հունիսի 4-ի հանրահավաքին ավելի շատ մասնակից հավաքելու համար, որպեսզի ստացվի այն կրիտիկական զանգվածը, որին կարելի է տանել Բաղրամյան պողոտա:

«Բաղրամյան պողոտա գնալը ինքնանպատակ չէ, եւ իշխանափոխությունը միայն Բաղրամյան պողոտա գնալ-չգնալով չէ, որ լուծվում է, մանավանդ որ, Բաղրամյանից բացի, նախագահական նստավայր տանող այլ ճանապարհներ էլ կան»,-ասում է պարոն Սարգսյանը, որը չի ցանկանում մանրամասն պատմել ընդդիմության քայլերի մասին, որպեսզի իշխանությանը հնարավորություն չտա հակաքայլեր ձեռնարկելու: «Եթե մեր մտածած քայլերի 70-80%-ն էլ իրականացնենք, ապա  հունիսի 4-ին հրավիրված հանրահավաքը շատ ավելի բազմամարդ կլինի: Որքանով ներկաների թիվը մոտ կլինի կրիտիկական զանգվածին՝ կախված է իմ եւ ընդդիմության յուրաքանչյուր անդամի աշխատանքից», - ասում է «Հանրապետություն» կուսակցության առաջնորդ Արամ Սարգսյանը:

Ավետիս Բաբաջանյան