Մանկուց լսել եմ՝ «женщина в 45, ягодка опять». Ալիկը զգացմունքով ամուսնության ազդի մասին

Համացանցում տարածվել է ամուսնության առաջարկի մասին մի հայտարարություն, որտեղ 52-ամյա տղամարդը գրում է, որ նախկինում ամուսնացած չէ, 35 տարեկանի տեսք ունի եւ զգացմունքով կամուսնանա 18-45 տարեկան հարսնացուի հետ: Աչքերը շագանակագույն են, բայց քամելիոնի պես փոփոխվող: Հասակը 179 սմ է: Ցանկանում է, որ ապագա կինն էլ բարձրահասակ լինի, նույնիսկ իրենից ավելի: Ներկայացվող պահանջն է` 175-195 սմ:

Այսօր հեռախոսով զրուցեցինք նրա հետ: Լոռու մարզի Բազում գյուղում ապրող Ալիկ Գրիգորյանն ընդհուպ պատրաստ է հեքիաթային կյանք ապահովել իր կնոջ համար:   

- Ալիկ, ձեր հայտարարությանն արձագանքողներ արդեն եղե՞լ են:

- Եղել են, բայց ոչ մեկից հետո էլ լուրջ զգացմունք չի եղել: Անցած տարվանից ես հայտարարություն եմ տալիս: Սա իմ վերջին հայտարարությունն է, էլ չեմ դիմելու հայտարարության օգնությանը: Անցած տարվանից զանգեր ստացել եմ, բոլորին չեմ հանդիպել, մենակ մի աղջկա եմ հանդիպել, էն էլ բարձրահասակ էլ չի եղել:

- Հասակը խանգարե՞ց, որ հարաբերությունները լրջանան: Այդքան խի՞ստ են ձեր պահանջները:

- Հասակն էլ խանգարեց, մի քիչ էլ շատ էր ջահել: Ինձ համապատասխան է պետք` լուրջ զգացմունքի համար: Բայց ես իրեն հարգում եմ քրոջ նման: Ինչպես քրոջ, ես իրեն մեր տուն էլ եմ հրավիրել, եկել է:

- Հայտարարությունը վանաձորյան թերթում եք տվել, դա նշանակում է` ուզում եք ձեր ընտրյա՞լն էլ անպայման Վանաձորից լինի:

- Չէ, էդ թերթը տարբեր տեղեր են կարդում: Ամենակարեւորը` բարձրահասակ լինի, հետո կանացի լինի ու մեկ էլ մեր կյանքից լինի, էլի, մեր այս սովորական կյանքից: Հեքիաթային կյանքերից չլինի:

- Ուզում եք` շատ ռոմանտիկ չլինի, ձեզնից էլ հեքիաթ չսպասի՞:

- Ռոմանտիկը չի խանգարում մեր իրական կյանքը հասկանալու համար: Հեքիաթ սպասելն էլ վնաս չի, մարդիկ կան կարողանում են իրագործել: Ես էլ չեմ ասում` չի ստացվի հեքիաթային կյանք: Ավելի հավանական է` կստացվի շատ ուզենալու դեպքում: Քո հեքիաթային կյանքն էլ պետք է կարողանաս պաշտպանել. նախանձ ես առաջացնում, հարձակվում են, խանգարում են: Մենք ապրել ենք հեքիաթային կյանքով հորս պապի, դեռ նույնիսկ հորս ժամանակ: Ես կողքից էլ լսել եմ` ապրում է ինչպես հեքիաթում: Ես ապրել եմ ինչպես հեքիաթում, բայց դա դժկամություն է առաջանում այն մարդկանց մոտ, ում մոտ դա չի ստացվում: Պետք է մարդը միշտ պայքարի ամեն դեպքում: Ես հիմա էլ կարող եմ ասել հեքիաթային կյանքով եմ ապրում: Դրա համար էլ ուզում եմ զգացմունքով ամուսնանամ: Դա էլ է նպաստում, որ հեքիաթը մնա:

- Հայտարարության մեջ տարիքային սահմանափակում եք նշել, ասում եք` 18-45 տարեկան լինի: Այսինքն` բացառո՞ւմ եք, որ...

- Դա հումորով է, բայց ճիշտ էլ է: Մարդ կա շուտ է հասունանում, մարդ էլ կա ուշ է հասունանում: Հետո դեռ փոքր ժամանակ լսել եմ, որ կինը 45 տարեկանում դառնում է նորից 18 տարեկան: Երկրորդ ջահելություն է: Ռուսների մոտ էլ եմ լսել. «женщина в 45 ягодка опять»: Դա էլ հիշեցի, էդպես նշեցի, բայց ինձ համար կարեւորը զգացմունքն է: Եթե մանկատան աղջիկ լինի, զգացմունք ունեցա, ես իրեն եմ ընտրելու, միլիարդատեր աղջիկ եղավ, զգացմունք չունեցա, ես հեռու եմ մնալու ամեն կերպ:

-Իսկ ձե՞ր զգացմունքն է կարեւոր, թե՞ անպայման դա պետք է փոխադարձ լինի:

- Ինձ համար կարեւորը իմ զգացմունքն է: Իհարկե, ինձ եթե սառը աչքերով է նայում, դա էլ նշանակություն ունի: Եթե գայլի աչքերով նայեց, ինձ ուտող գայլը ինձ պետք չի:

Ես ընդհանրապես նկատում եմ բարձրահասակ, ընդգծված կանացի աղջիկներին, ուզում եմ էդպես լինի: Կողքիդ եթե հաճելի մարդ է լինում, լավ ես զգում: Ես ուզում եմ իր միայն տեսքից, ձայնից հաճույք ստանամ: Դե, ես կանանց հանրագիտարան կարդացած եմ, ես գիտեմ` ինչ դժվարություններ կան կանանց համար: Չեխական հրատարակություն էր, ռուսերեն թարգմանություն: Եվ տղամարդկանց մասին եմ կարդացել անգլո-ամերիկական հրատարակություն` հայերեն թարգմանությամբ: Այս երկրորդը իմ կյանքում կարդացած ամենակարեւոր, ամենախելացի գիրքն էր: Դրանից հետո կանանց նկատմամբ իմ վարքում վստահություն առաջացավ: Մինչեւ հիմա չեմ ամուսնացել, որովհետեւ հիմնականը զգացմունք չեմ ունեցել, հաջորդը` զգացմունք ունենալու համար ես ուղեղով հասուն չեմ եղել: 

Հ.Գ. Ալիկ Գրիգորյանն ասաց, որ սովորել է Կիրովի անվան անտառտնտեսության ակադեմիայում: Անտառտնտեսության մասնագետ է: