Նավթ, գազ, հարստություն. այս ամենը կունենանք, եթե իշխանափոխություն չլինի

Տպագրվել է «Հայկական Ժամանակ» օրաթերթի՝ 2004 թվականի ապրիլի 22-ի համարում

Իշխանության կատարած դրական աշխատանքների ներկայացման պրիմիտիվ եւ արդեն ձանձրալի դարձած քարոզչական արշավը շարունակվում է: Երեկ հերթը հասավ էներգետիկայի նախարար Արմեն Մովսիսյանին, որը մամուլի ասուլիս էր հրավիրել: Վերջինս, ըստ ավանդույթի, նախ պետք է նկարագրեր, թե այս իշխանությունների օրոք կյանքը որքան է լավացել Հայաստանում, մասնավորապես՝ էներգետիկայի բնագավառում, ապա քլնգեր ընդդիմությանը: Դժվար է ասել, թե այս երկու առաքելություններից հատկապես որն է ավելի կարեւորվում այս քարոզչական արշավում: Մի խոսքով, էներգետիկայի նախարարը այդ երկու առաքելությունն էլ իրականացրեց: «Բացասական եմ գնահատում ընդդիմության գործողությունները:

Անընդունելի եմ համարում ցանկացած քայլ, որը կբերի երկրի կենսունակության վատացմանը, որը կբերի միջազգային ատյաններում երկրի վարկանիշի իջեցմանը: Երկրի տնտեսության աճը, վերելքը, սոցիալական վիճակի բարելավումը առաջին հերթին պայմանավորվում է ներքին քաղաքական կայունությամբ»,- ասաց Ա.Մովսիսյանը: Վերջինս նաեւ նկատեց, որ եթե ընդդիմության գործողությունները շարունակական բնույթ կրեն, ապա տնտեսությունը կխաթարվի, գործարանները չեն աշխատի, եւ ներդրումները կպակասեն: Նախարարի, որպես պետական ֆունկցիոների, նման պահվածքը կարելի համարել բնական: Բայց տվյալ դեպքում Ա.Մովսիսյանը նաեւ քաղաքական՝ կուսակցական գործիչ է բառիս բուն իմաստով:

Նա հանրապետական կուսակցության անդամ է եւ 2003թ. խորհրդարանական ընտրությունների ժամանակ հանրապետականների ընտրական ցուցակում զբաղեցնում էր 17-րդ հորիզոնականը: Ուստի նրան հարց ուղղեցինք, թե ինչպես է նա վերաբերվում իրավապահ մարմինների ապօրինի գործողություններին, երբ նրանք ի հեճուկս Սահմանադրության փակում են մայրաքաղաք բերող ճանապարհները, կուսակցությունների գրասենյակներ են մտնում, հափշտակում ու փչացնում գույքը եւ այլն: Այս հարցին քաղաքական-կուսակցական գործիչ Ա.Մովսիսյանը, ըստ էության, պատասխան չուներ: «Այն գործողությունները, որոնք կատարվում են օրենքի սահմաններում՝ ես լրիվ ընդունում եմ: Ես չեմ կարող ասել՝ օրենքի սահմաններում է դա կատարվել, թե ոչ»,- ասաց երկրի վարկանիշով այդքան մտահոգ նախարարը:

Մի պահ թվաց, թե իրեն ժողովրդավարության ջատագով համարող հանրապետական կուսակցության անդամ Արմեն Մովսիսյանը դատապարտեց ճանապարհներ փակելը: «Համենայն դեպս, ճանապարհներ փակելը օրենքի սահմաններում չէ»,-ասաց նա, բայց շատ շուտով ճշգրտեց, որ խոսքը Բաղրամյանի պողոտայի մասին է, որը, հասկանալի է, փակել են ընդդիմության ներկայացուցիչները: Ինչ վերաբերում է մայրաքաղաք բերող ճանապարհները ոստիկանության կողմից փակելուն, ապա այդ մասին նախարարը չգիտեր: «Ես չունեմ նման փաստ»,-մեր հարցին ի պատասխան ասաց նա: Հարց է ծագում, թե քաղաքական կուսակցական գործիչը ինչու է այդքան քիչ տեղեկատվության տիրապետում, եւ այդ պայմաններում ինչու է պատասխանատու հայտարարություններ անում ներքաղաքական իրավիճակի մասին:

Ինչ վերաբերում է գործող իշխանությունների օրոք ժողովրդի կյանքի բարելավման մասին ցուցանիշներին, ապա մեր ամբողջ հեռուստաեթերը դրանցով լեցուն է: Բայց փորձը ցույց է տալիս՝ դա էլ է իր ռեսուրսը վաղուց սպառել, եւ երեկ նախարարը, այդ ցուցանիշները ներկայացնելուց զատ, ստիպված էր գնալ ավելի հեռուն: Նա հնչեցրեց մեզ այդքան ծանոթ գաղափարներ. Հայաստանում նավթի ու գազի պաշարների փնտրտուք, հողմային, արեւային եւ գեոթերմալ էներգիայի օգտագործում, ոլորտի զարգացում: Մի խոսքով՝ բաներ, որոնք հնչում էին դեռ 10 տարի առաջ: Երեւի մեր պոլիտտեխնոլոգները գտել են, որ նավթի մասին շուխուրները լավատեսական տրամադրություններ են ստեղծում: Պետք է սպասել, որ որեւէ այլ նախարար շուտով կխոսի «Ջերմուկի», պեռլիտի եւ տոմատի հյութի մասին:

Համենայն դեպս, 10 տարի առաջ այդպես եղել է, եւ արդյունք գրանցվել է: Ինչեւէ, նախարարը տեղեկացրեց, որ կանադական մի ընկերություն 10 մլն դոլար է ներդնելու Արմավիրի մարզում նավթ եւ գազ որոնելու համար, Իրանը 2,5 մլն դոլար դրամաշնորհ է տալիս Պուշկինի լեռնանցքում երեք հատ հողմաէլեկտրակայան տեղադրելու համար, իսկ արեւային եւ գեոթերմալ էներգիայի օգտագործման առումով՝ դեռ որոշակի բաներ չկան: Մի խոսքով, երեկ էներգետիկայի նախարար Արմեն Մովսիսյանը լավագույնս կատարեց իր վրա դրված պարտականությունը: Կարծում ենք, Ռոբերտ Քոչարյանը բարձր կգնահատի այս ծառայությունը եւ չի փոշմանի, որ անցած տարի Արմեն Մովսիսյանին պարգեւատրել է «Անանիա Շիրակացի» մեդալով:

Հայկ Գեւորգյան