Պատասխան. խնդրանք Ռոբերտ Քոչարյանին

Տպագրվել է «Հայկական Ժամանակ» օրաթերթի՝ 2004 թվականի մարտի 26-ի համարում

«Համաձայնագրի ստորագրումը ոգեւորել է ոչ միայն ինձ, այլ նաեւ, իմ կարծիքով, ողջ հայ ժողովրդին: Այս համաձայնագրի ստորագրումից հետո իշխանափոխություն չանելն ուղղակի անհեթեթություն կլինի»: Երեկ մեզ հետ զրույցում այսպիսի հայտարարություն արեց «Հանրապետություն» կուսակցության քաղխորհրդի անդամ Արամ Սարգսյանը՝ մեկնաբանելով նախորդ օրը «Արդարություն» դաշինքի եւ «Ազգային միաբանություն» կուսակցության լիդերներ Ստեփան Դեմիրճյանի եւ Արտաշես Գեղամյանի միջեւ ստորագրված համաձայնագրի նշանակությունը: Ա. Սարգսյանի դիտարկմամբ, այդ փաստաթուղթը հաստատում է նաեւ այն իրողությունը, որ հանրապետության ներքաղաքական իրավիճակը Ռոբերտ Քոչարյանի եւ նրա իշխանության վերահսկողությունից դուրս է:

«Նա չի կարող վերահսկել ոչ ընդդիմության եւ ոչ էլ իրենց մոտ կանգնած կոալիցիայի անդամ կուսակցություններին: Քոչարյանը չի տիրապետում ներքաղաքական իրավիճակին եւ ընդհանրապես ոչնչի չի տիրապետում»,- նկատեց Արամ Սարգսյանը: Վերջինիս կարծիքով, այսօր բոլորին, նույնիսկ կոալիցիայի կուսակցություններին եւ նախարարներին ակնհայտ է, որ իշխանափոխությունն անխուսափելի է: Արամ Սարգսյանը, մատնանշելով կառավարության անդամների մարզեր կատարած այցելությունները, նկատում է, որ այն, ինչ իրենք՝ ընդդիմադիր քաղաքական գործիչները փորձում էին հասկացնել իշխանական բուրգի պաշտոնյաներին եւ կուսակցություններին, նրանք իրենց իսկ ականջով են ժողովրդից լսել: «Նրանք այդ ամենը լսում են իրենց իսկ ջանքերով ժողովրդի հետ կազմակերպած հանդիպումների ժամանակ, քանի որ մարդիկ միանշանակ իշխանափոխության խնդիր են դրել: Ես շատ շնորհակալ եմ իմ ժողովրդին՝ իր կամքի համար»,- ասում է Արամ Սարգսյանը:

Մեր այն հարցին, թե ինչպես է գնահատում համաձայնագրի կնքումից հետո ստեղծված ներքաղաքական իրավիճակում Ռոբերտ Քոչարյանի իշխանության պահպանման շանսերը, Արամ Սարգսյանը հետեւյալ կերպ պատասխանեց. «Ես Ռոբերտ Քոչարյանին ուղղված մեկ խնդրանք ունեմ, որպեսզի նա մինչեւ համաժողովրդական հանրահավաքը հրաժարական չտա, որ աշխարհը տեսնի մեր ժողովրդի ուժը, որ մեր ժողովուրդն ինքը եւս համոզվի, որ կարող է իշխանություն փոխել եւ նորը ձեւավորել»: Ինչեւէ, նախօրեին Արարատի մարզ կատարած այցելության ժամանակ Ռոբերտ Քոչարյանը մատնանշել էր այն հանգամանքը, որ անցած տարի առաջին անգամ «Արարատ-ցեմենտը» Արարատ քաղաքի բյուջե է փոխանցել 30 մլն դրամ:

Նախկին տարիներին գործարանի կողմից քաղաքի բյուջե հարկեր չվճարելու փաստը մատնանշելով՝ Ռոբերտ Քոչարյանը լրագրողների հետ զրույցի ժամանակ հռետորական հարցադրում էր արել, թե ինչու նախկինում գումարներ չեն վճարվել: «Մտածեք՝ ով էր եւ ինչով էր զբաղված»,- ասել էր Ռոբերտ Քոչարյանը՝ ակնարկելով, որ չվճարումները պայմանավորված են եղել նախկին տնօրենի, տվյալ դեպքում՝ հենց Արամ Սարգսյանի գործունեությամբ: Մեկնաբանելով այս հայտարարությունը՝ Արամ Սարգսյանը ասաց, որ իր համար շատ վիրավորական կլիներ, եթե Ռոբերտ Քոչարյանն այցելեր Արարատի մարզ եւ չփորձեր իրեն «կպնել»:

Սակայն, տվյալ դեպքում, տեղական բյուջե հարկեր չվճարելու պատճառները հասկանալու համար Արամ Սարգսյանն առաջարկեց, որպեսզի Քոչարյանն ավելի ուշադիր լինի օրենքները վավերացնելիս: «Խորհուրդ կտայի, որպեսզի Ռոբերտ Քոչարյանն օրենքները ստորագրելուց առաջ դրանք նաեւ կարդար՝ ամբողջությամբ չթողներ Արմենչիկի հույսին: Եթե կարդար, ապա նման անհեթեթ հայտարարություն չէր անի, քանի որ տեղյակ կլիներ, որ մինչեւ անցած տարի «Արարատ-ցեմենտը» հարկերը վճարել է միայն հանրապետական բյուջե, եւ այնտեղից էր տեղական բյուջեի մասնաբաժինը հատկացվել»,- նկատեց Ա. Սարգսյանը:

Վերջինիս խոսքերով, այդ իսկ պատճառով իր պաշտոնավարման տարիներին «Արարատ-ցեմենտը» Արարատի քաղաքապետարանին գումարները հատկացրել է իր շահույթից՝ որպես օգնություն. մասնավորապես՝ տարեկան 12 մլն դրամ տրվել է քաղաքապետարանին, նույնքան էլ Արարատի հիվանդանոցին՝ այդ կառույցի պահպանման համար: Յուրաքանչյուր ամիս գումար է հատկացվել նաեւ զոհված ազատամարտիկների 100-ից ավել ընտանիքների: Իսկ «Արարատ-ցեմենտի» գործունեության արդյունավետության գնահատման համար Արամ Սարգսյանն առաջարկում է համեմատել ձեռնարկության շահութաբերության ցուցանիշը: «Իմ տնօրինության ընթացքում «Արարատ-ցեմենտ» ՊՓԲԸ-ի շահութաբերությունը կազմել է 22-24 տոկոս: Ես ուրախ կլինեմ, եթե այժմ այդ ցուցանիշն ավելի բարձր լինի, իսկ եթե բարձր չէ, ավելի լավ կլիներ դրա մասին մտածեին»,- ասաց Արամ Սարգսյանը:

Վահագն Հովակիմյան