ՀՀԿ-ի ցուցակում ինձ համար տեղ չկար, դրա համար էլ Ծառուկյան դաշինքին միացա

Հանրապետական կուսակցության նախկին պատգամավոր, գործարար Խաչիկ Մանուկյանը կուսակցությունից դուրս գալու դիմում է ներկայացրել եւ միացել Ծառուկյան դաշինքին:

Նա ռեյտինգային ընտրակարգով պետք է առաջադրվի Արագածոտնի մարզի թիվ 7 ընտրատածքում: Մանուկյանը, սակայն, Ծառուկյանի ղեկավարած «Բարգավաճ Հայաստան» կուսակցությանը չի անդամակցի, նա ընտրություններին կմասնակցի որպես անկուսակցական թեկնածու:

- Պարոն Մանուկյան, ինչո՞ւ ՀՀԿ-ից դուրս գալու եւ Ծառուկյան դաշինքին միանալու որոշում կայացրիք:

- Այս խորհրդարանական ընտրություններին մասնակցելու ցանկություն ունեի, եւ սկսել էի նախապատրաստվել: Մասնակցելու համար անհրաժեշտ էր, որ որեւէ դաշինքի կամ կուսակցության ցուցակում ընդգրկված լինեի: ՀՀԿ-ն մեր մարզում իր բոլոր ռեյտինգային թեկնածուներին առաջադրել էր, ինձ համար տեղ չկար, դրա համար էլ Ծառուկյան դաշինքով եմ մասնակցելու:

- Դո՞ւք եք դիմել, ՀՀԿ-ն ձեզ մերժե՞լ է:

- Չմերժեց, պարզապես նրանց ցուցակի մեջ իմ անունը չգրվեց: Ես չէի դիմել, ես սպասում էի: Կուսակցությունն է որոշում, թե ում առաջադրի: Հավանաբար ստուգել-տեսել են, որ իմ վարկանիշը մի փոքր ցածր է եղել, դրա համար էլ ինձ չեն ընդգրկել եւ ավելի բարձր վարկանիշ ունեցող թեկնածուների են ընդգրկել:

- Այս դեպքում դո՞ւք եք դիմել Գագիկ Ծառուկյանին, թե՞ ինքն է առաջարկել իր դաշինքով առաջադրվել:

- Ես դիմել եմ, նա էլ ընդունել է:

- Իսկ Ծառուկյանին չի՞ հուզել ձեր ցածր վարկանիշը:

- Ինձ ասել են, որ իմ վարկանիշը ցածր է, բայց ես այդպես չեմ կարծում: Համամիտ չեմ նրանց ներկայացրած վարկանիշի հետ:

- ԲՀԿ պատգամավոր Լովա Խաչատրյանը ձեր ընկերն է, նրա միջոցո՞վ եք ապահովել Ծառուկյանի համաձայնությունն ու նրա հետ կապը:

- Ոչ: Ես այդ հնարավորությունը չունե՞մ, որ նրա միջոցով ապահովեմ: Ես բոլորին ճանաչում եմ, բոլորի ծրագրերին էլ ծանոթ եմ:

- Հե՞շտ էր ՀՀԿ-ից Ծառուկյան դաշինք տեղափոխվելը: Չէ՞ որ գաղափարախոսությունների, սկզբունքների տարբերություն կա:

- Իմ գաղափարախոսությունը հիմնականում տնտեսական ոլորտում է: Ես տնտեսական ծրագրերին եմ ուշադրություն դարձնում, որտեղ ես ինձ իրազեկ եմ համարում, տիրապետում եմ առկա բոլոր խնդիրներին: Իմ ցանկությունն է՝ տնտեսական խնդիրներին լուծում տալը:

- Դուք իշխանական ճամբարից տեղափոխվում եք ընդդիմադիր ճամբար: Այդ փոփոխությունը հոգեբանորեն դժվար չէ՞:

- Ոչ: Ի՞նչ տարբերություն՝ իշխանության մեջ ես տնտեսությունն ուժեղացնում, թե ընդդիմության դաշտից:

- Սկսելու եք քննադատե՞լ իշխանություններին:

- Քննադատելու խնդիր չկա: Որ լավ լիներ, հիմա այսպես չէինք լինի: Տնտեսությունն անկում է ապրում, աշխատատեղերի խնդիր կա, նոր աշխատատեղեր չեն առաջանում: Պետք է տնտեսություն զարգացնենք: Իսկ դա ընդդիմության, թե իշխանության հետ կանենք՝ կարեւոր չէ: Կարեւորն անելն է: Ում մոտ դա հաջողվի, թող նա էլ անի:

- Եթե մի գործարար իշխանական թեւից ընդդիմության կողմն է անցնում, նրա մոտ հարկային ու այլ ստուգումներ են անցկացվում: Մտահոգություն չունե՞ք, որ իշխանությունները ձեզ նման եւ այլ լծակներով կճնշեն:

- Ես նման խնդիր չունեմ, մաքուր աշխատում եմ: Եթե պիտի այդ պատճառով ստուգեն, թող մի անգամ էլ ավել ստուգեն:

- Պարոն Մանուկյան, մտավախություն չունե՞ք, որ ընտրություններին մասնակցեք, ձայներ բերեք ձեզ ու դաշինքին, բայց Ծառուկյանը որոշի, որ դուք չեք դառնա պատգամավոր:

- Բոլոր թեկնածուներն էլ ներքուստ համոզված են, որ իրենք հաղթելու են ու դառնալու են պատգամավոր: Իսկ ով ի սկզբանե զգում է, որ չի հաղթելու, նա չի մասնակցելու: Այլ խնդիր է ընտրությունների ընդհանուր արդյունքը:

- Արագածոտնում Ծառուկյան դաշինքից առաջադրվելու եք դուք, Լյովա Խաչատրյանը, ՀՀԿ-ն մեկ տասնյակ թեկնածուներ կառաջադրի,  թեկնածուներ կառաջադրեն նաեւ այլ կուսակցություններ, այսինքն սուր մրցապայքար է լինելու: Ինչպե՞ս եք պայքարելու, որ հաղթեք, հատկապես որ վերջին հինգ տարիներին պատգամավոր չեք եղել:

- Կպայքարենք՝ կտեսնեք:

- Կարո՞ղ է, նախորդ ընտրությունների նման ընտրակաշառք բաժանեք:

- Որ փող լինի՝ կբաժանենք (ծիծաղում է), փող չկա... Կատակ եմ անում: Մենք իրականում տնտեսական-գաղափարախոսական պայքար ենք մղելու, փող բաժանելու իմաստը ո՞րն է: Ես դա ճիշտ չեմ համարում:

- Հիմա ժողովուրդը սպասում է, որ Ծառուկյանը փող է բաժանելու, ՀՀԿ-ն փող է բաժանելու:

- Ընտրություններից առաջ բոլորն էլ ինչ-որ ակնկալիք ունեն, բայց պետք է հասկանանք, որ սա այլ տիպի ընտրություններ են, կարելի է ասել՝ նոր պետության հիմք է դրվում: Պետք է հասկանանք, որ փողով, ընտրակաշառքով ընտրությունների արդյունքում ենք այսպիսի վիճակ ունեցել: Հիմա ընտրություններին էլ պետք է սրտացավորեն մոտենալ, չէ՞ որ այստեղ մենք եւ մեր երեխաներն են ապրում: Գաղափարախոսության հիմքում սա պետք է դրվի:

- Իշխանությունը դա չէ՞ր ապահովում:

- Ամեն ինչ իր ժամանակին եղել է այնպիսին, ինչպիսին մենք ենք եղել, մեր իշխանությունն ու մեր ժողովուրդն է եղել: Հիմա ժամանակներն ու մարտահրավերներն այլ են:

- Դրա համար էլ իշխանությունները կառավարություն են փոխում:

- Դե լավ է: Կառավարությունը որ շուտ-շուտ փոխվի, ավելի լավ կլինի: Եթե լավ չի աշխատում, մնա ի՞նչ անի: Ով լավ չի աշխատում, ով իր ասածը չի կատարում, պիտի գնա: Վերջ: Ուրիշ մարդ պիտի գա ու կատարի: