ՀՀԿ-ն եւ իր մականունավորները. Ծառուկյանը խնդիրներ է հարուցել

Գագիկ Ծառուկյանը քաղաքականության փակված էջը բացելով՝ կրկին խառնել է Սերժ Սարգսյանի եւ Հանրապետական կուսակցության նախընտրական ծրագրերը:

Բանն այն է, որ 2012թ. խորհրդարանական ընտրությունների նման այս անգամ նույնպես իշխանությունները որոշել էին բավականին սոլիդ ցուցակով ներկայանալ ապրիլյան խորհրդարանական ընտրություններին: Ճիշտ է, նրանք իրենց հատկապես ռեյտինգային ցուցակներում ընդգրկելու են բոլոր այն մարդկանց, ովքեր կարող են ձայն բերել կուսակցությանը, բայց առանձնապես մտադիր էլ չէին նրանց Ազգային ժողով բերել:

Պարզապես ընդգրկում են ցուցակ՝ իրենց օգտին աշխատելու համար: Այս դեպքում խոսքը վերաբերում է հատկապես մեծամասնական ընտրակարգով ընտրված պատգամավորներին, որոնց մի մասը թաղային հեղինակություններ են, քրեական անցյալ ունեն եւ մականունավոր են:

Բայց քանի որ Ծառուկյանը կրկին մտավ քաղաքականություն եւ ոչ միայն իր «Բարգավաճ Հայաստան» կուսակցության հետ, այլեւ լայն դաշինքով պետք է մասնակցի ընտրություններին, իշխանությունները կրկին վտանգ են զգացել: Խնդիրն այն է, որ վերը նշված մարդիկ որոշակի դժգոհություններ ունեն Ս. Սարգսյանից եւ չի բացառվում, որ չցանկանան աշխատել ՀՀԿ-ի օգտին:

Ավելին, բոլորովին չի բացառվում, որ նրանք աշխատեն Ծառուկյանի օգտին, քանի որ նրանց մեծ մասը լավ հարաբերություններ ունի նրա հետ: Քաղաքական շրջանակներում չեն բացառում, որ իշխանությունները կրկին ապավինեն սույն անձանց հնարավորություններին ու նրանց այս անգամ էլ ընդգրկեն ցուցակ, նաեւ խորհրդարան բերեն:

Մհեր Սեդրակյանը, օրինակ, գաղտնիք չէ, որ Էրեբունի համայնքում մեծ ազդեցություն ունի, նա ազդեցություն ունի նաեւ քրեական աշխարհում: 2012թ. խոսվում էր, թե Ս. Սարգսյանը նրան խորհրդարան բերելու մտադրություն չի ունեցել, բայց երբ հասկացել է, որ ՀՀԿ-ի գործերը վատ են, խնդրել է մտնել ցուցակ եւ աշխատել թե՛ իր, թե կուսակցության օգտին: Նույնը կարող ենք ասել նաեւ Գագիկ Բեգլարյանի մասին:

Հիշեցնենք, որ իշխանությունները նրան Երեւանի քաղաքապետի պաշտոնից հեռացրին 2010թ. Պլասիդո Դոմինգոյի հայտնի համերգի ժամանակ կատարված միջադեպի արդյունքում: Իհարկե, այն ժամանակ կարծիք կար, թե դա ընդամենը լավ առիթ էր նրան հեռացնելու համար, բայց արդեն 2012-ին Սերժ Սարգսյանը ստիպված նրան էլ ետ բերեց քաղաքականություն եւ ընդգրկեց ՀՀԿ ցուցակ, որ իրենց համար ձայներ բերի ու հանկարծ այլ ուժի օգտին չաշխատի:

Նման բազմաթիվ մարդկանց կարելի է հիշել՝ Սուրիկ Խաչատրյան, Հովիկ Աբրահամյան, Աշոտ Աղաբաբյան, որոնց բոլորին Սերժ Սարգսյանը հավաքեց ու լցրեց մի կաթսայի մեջ, որ այլ տեղ չփախչեն: Հիմա այդ մարդիկ Սերժ Սարգսյանի հետ կրկին խնդիրներ ունեն: Եվ եթե վերջինս նրանց ամբիցիաները չբավարարի, ապա կարող են հանգրվանել մրցակցի՝ Գագիկ Ծառուկյանի ճամբարում: Եթե անգամ Ծառուկյանը, վերադառնալով՝ իշխանության խաղն է խաղում, միեւնույն է, նա դժվար թե հոգու խորքում հաղթելու հույս չփայփայի: Այնպես որ, իշխանությունները չեն կարող վերը նշված մարդկանց թողնել իրենցից հեռու:

Սերժ Սարգսյանը հիմա ոչ Գագիկ Ծառուկյանի, ոչ էլ հիշատակված մարդկանց դեմ չի կարող ինչ-որ գործեր սկսել: Նախընտրական շրջան է, եւ եթե իշխանություններն իրենց ուժային, հարկային կամ այլ լծակներով փորձեն ճնշել նման մարդկանց, դա հանրությունը կընկալի որպես քաղաքական հետապնդում եւ ավելի շատ ի վնաս իշխանության կաշխատի:

Եթե 2015 թվականի փետրվարին Սերժ Սարգսյանը Ծառուկյանին կարողացավ հեռացնել քաղաքականությունից եւ դրանից որոշակի դիվիդենտներ ստացավ, ապա հիմա նման քայլի գնալու դեպքում հակառակ էֆեկտը կստանա եւ կավելացնի Ծառուկյանի համախոհներին: Չէ որ վերջինս ընդամենը ընտրություններին մասնակցելու հայտ է ներկայացրել: Ահա թե ինչու է վտանգավոր իրավիճակ առաջացել ՀՀԿ-ի նախընտրական մտադրությունների համար: Իշխանություններն այս անգամ նորից կանգնած են իրենց նախընտրական ցուցակն ու այլ մտադրություններն արմատական փոփոխության ենթարկելու խնդրի առաջ:

Երեկ մենք փորձեցինք ՀՀԿ-ից ճշտել, թե իրենց մականունավոր եւ հեղինակավոր կուսակիցներին կրկի՞ն ցուցակում են ընդգրկելու: ՀՀԿ կազմակերպչական հանձնաժողովի նախագահ Ռուբեն Թադեւոսյանը նախ չհամաձայնեց մեր այդ ձեւակերպման հետ, այնուհետեւ հավելեց, թե ցուցակին վերաբերող հարցեր դեռ չեն քննարկել:

«Ճիշտ է, գործընթացներն ընթանում են, բայց պաշտոնական դիրքորոշման տեսանկյունից, դեռ հստակեցում չկա: Աշխատանքները շարունակվում են, մենք մինչեւ փետրվարի 16-ը ժամանակ ունենք»,- ասաց նա:

Իսկ Գագիկ Ծառուկյանի վերադարձը կրկին մեծ ազդեցություն չի՞ ունենա ՀՀԿ-ի ցուցակի կամ նախընտրական ծրագրերի վրա:

«Որեւէ մեկի մուտքն ու ելքը մեր հաշվարկները չի կարող խանգարել»,- չհամաձայնեց Թադեւոսյանը:

«Այո, Ծառուկյանի վերադարձի արդյունքում Սերժ Սարգսյանը կրկին ապավինելու է իր հայտնի հենարաններին: Խաղը գնում է այսպես ասած՝ օրենքի շրջանակներում: Այս դեպքում Սերժ Սարգսյանը ոչինչ չի կարող անել, քանի որ Գագիկ Ծառուկյանն ընդամենը ընտրական գործընթացներին մասնակցելու հայտ է ներկայացրել: Այս փուլում էլ կարող են Ծառուկյանին ճնշել, բայց այս փուլում Սերժ Սարգսյանը շահած դուրս չի գա, եթե կոշտ միջամտության գնա այնպես, ինչպես դա արեց 2015 թվականի փետրվարին»,- հակադարձեց քաղաքագետ Ստեփան Սաֆարյանը: