Ինչով է գրավիչ Վրաստանը. ռեկորդային թվով զբոսաշրջիկներ

Զբոսաշրջությունը երկրի բարեկեցությունը բարձրացնող կարեւոր գործոն է: Այն կարելի է դիտարկել որպես համակարգ, որն առաջարկում է բոլոր հնարավորությունները` ծանոթանալու տվյալ երկրի բնակչությանը, պատմությանը, մշակույթին, սովորույթներին եւ այլն:

ՄԱԿ-ի սահմանման համաձայն՝ զբոսաշրջությունը մարդկանց գործունեություն է, ովքեր որոշակի նպատակներով ճանապարհորդում են եւ տեղափոխվում են իրենց սովորական միջավայրի սահմաններից դուրս որոշակի ժամանակահատվածում, որը համարվում է 1 օրից մինչեւ մեկ տարի: Վրաստանը զբոսաշրջիկների թվով առաջատարն է Այսրկովկասյան տարածաշրջանում:

2017 թվականի հունվարի 4-ին Վրաստանի զբոսաշրջության ազգային գործակալությունը հրապարակեց Վրաստան այցելած զբոսաշրջիկների վերաբերյալ վիճակագրություն, համաձայն որի, 2016 թվականի ընթացքում Վրաստան է այցելել 2 միլիոն 714 հազար 773 զբոսաշրջիկ, ինչը 19 տոկոսով գերազանցում է նախորդ տարվա միեւնույն ժամանակահատվածի ցուցանիշը: Այս թվում միայն այն զբոսաշրջիկներն են, ովքեր երկրի տարածքում գտնվել են 24 ժամից ոչ պակաս եւ օգտվել ծառայության ոլորտից (ռեստորաններ, հյուրանոցներ եւ այլն): Ընդհանուր այցելուների թիվը կազմել է ավելի քան  6.35 միլիոն օտարերկրացի, ինչը 7.6 տոկոսով ավելի է նախորդ տարվա ցուցանիշից:

Այցելուների թվաքանակով աչքի են ընկնում հիմնականում տարածաշրջանի երկրները: Առաջին եռյակում են Ադրբեջանը (1.52մլն), Հայաստանը (1.49 մլն) եւ Թուրքիան (1.25 մլն):  Հատկանշական է, որ Ռուսաստանից այցելուների թիվը առաջին անգամ գերազանցել է 1 միլիոնը: Որոշ փորձագետներ այցելուների թվի աճը կապում են Ռուսաստան-Թուրքիա հարաբերությունների հետ (երբ ռուսական ռազմական ինքնաթիռի ոչնչացման հետեւանքով Ռուսաստանը պատժամիջոցներ կիրառեց Թուրքիայի դեմ):

Նախորդ տարի այցելուների աճ է գրանցվել հատկապես Իրանից: Փորձագետներն իրանցի զբոսաշրջիկների աճը կապում են Վրաստանի եւ Իրանի միջեւ վիզայի ազատականացման կանոնակարգերի հետ: Վրաստանը 2013  թվականին Իրանի քաղաքացիների համար վերացրեց վիզայի ռեժիմը 45 օրով, ինչը նշանակում է, որ Իրանի քաղաքացիները Վրաստան կարող են այցելել եւ երկրի տարածքում մնալ 45 օր, առանց մուտքի արտոնագրի: Այս ամենից հետո, սակայն Իրանից Վրաստան այցելուների թիվը կրճատվում էր: Եթե 2012 թվականին Վրաստան էր այցելել 89 000 իրանցի, ապա 2014 թվականին այդ թիվը կազմել էր 47,900 իսկ 2015-ին՝  25,200: 2016 թվականին Իրանից Վրաստան այցելուների թիվը կազմել է 147 հազար:

Դրական միտում է նկատվում նաեւ Եվրամիության անդամ երկրներից: Վրաստան այցելուների թվաքանակով աչքի են ընկնում Լատվիան՝ +24%, Լիտվան՝ +16%, Բուլղարիան՝ +12% եւ Գերմանիան՝ +11%:

Այցելուների թվով աչքի է ընկնում նաեւ Հնդկաստանը: Եթե նախորդ տարիներին այս երկրից այցելուների թիվը չնչին էր, ապա 2016 թվականին այն կազմել է 36 հազար, գրանցելով 198 % աճ:

Վրաստանի կենտրոնական բանկի տվյալների համաձայն, 2016 թվականի առաջին 3 եռամսյակում, զբոսաշրջիկները Վրաստան են ներմուծել 1.68 միլիարդ ԱՄՆ դոլար, նախորդ տարվա համեմատ գրանցելով 11 տոկոսանոց աճ: 2016 թվականին զբոսաշրջության ոլորտից ստացած գումարները կազմել են Վրաստանի ՀՆԱ-ի 7.2%-ը:

Վրաստանի իշխանություններն ամեն կերպ աջակցում են զբոսաշրջության զարգացմանը, ինչի համար միլիոնավոր դոլարներ են ծախսվում: Բոլորովին վերջերս՝ նախորդ տարվա դեկտեմբերի 23-ին Գուդաուրիի լեռնադահուկային հանգստավայրում նոր ճոպանուղի բացվեց: Միջոցառմանը մասնակցեցին նաեւ երկրի վարչապետ Գեորգի Կվիրիկաշվիլին եւ կառավարության անդամներ: Շինարարության արժեքը կազմել է 20 միլիոն ԱՄՆ դոլար: Իսկ դեկտեմբերի 29-ի կառավարության նիստի ժամանակ Կվիրիկաշվիլին հայտարարել է. «Կառավարության մշակած ծրագրի համաձայն՝ քաղաքների եւ գյուղերի զարգացումը քաոտիկ չի լինի, այն որոշակի օրինաչափություն կունենա: Նման մոտեցման արդյունքում շուտով Վրաստանը պատրաստ կլինի ընդունել զբոոսաշրջիկներ կլոր տարի»:

Կվիրիկաշվիլին նաեւ հիշեցրել է, որ ծրագրի շրջանակներում սկսվել է նոր օդանավակայանի՝ «Ամբրոլաուրի աէրո»-ի շինարարությունը: Նախատեսվում է, որ 2017 թվականի հունվարից կանոնավոր թռիչքներ կսկսվեն Թբիլիսիի եւ Ամբրոլաուրիի (Ռաճա-Լեչխումի շրջան) միջեւ: Թռիչքներն իրականացնելու են վրացական մասնավոր «Service Air» ավիաընկերությանը պատկանող 17 տեղանոց ինքնաթիռները: Վրաստանի կառավարությունը հույս ունի, որ ներքին այս թռիչքը կարեւոր խթան կհանդիսանա մայրաքաղաք Թբիլիսիից 257 կմ հեռավորության վրա գտնվող Ռաճա-Լեչխումի շրջանի տուրիզմի զարգացման համար:

2016 թ. Վրաստանի մշակույթի եւ հուշարձանների պահպանության նախարարության նախաձեռնությամբ մեկնարկեց «Check in Georgia» նախագիծը, որի շրջանակներում համերգային ծրագրով Վրաստան այցելեցին աշխարհահռչակ երգիչներ Էրոս Ռամազոտին եւ Ռոբի Վիլիամսը: Երկրի կառավարությունը վստահ էր, որ շարունակաբար նման միջոցառումներ կազմակերպելը կնպաստի այցելուների թվի աճին:

Այս ամենից բացի, նախորդ տարի «Վրաստանի Համաներդրումային հիմնադրամը» հիմնել է զբոսաշրջության զարգացման հիմնադրամ, որը Թբիլիսիում, Գուրիայում, Աջարիայում եւ Սամեգրելոյում 680 մլն ԱՄՆ դոլար ընդհանուր արժողությամբ 8 մասշտաբային նախագիծ կիրականացնի: Վարչապետ Կվիրիկաշվիլիի խոսքերով, հիմնադրամն ուշադրություն կդարձնի հատկապես երկրի զբոսաշրջության առումով չզարգացած շրջաններին: Հիմնադրամի նպատակը տուրիզմի զարգացմանը նպաստելն ու կոնկրետ ծրագրերի իրականացումն է: Նրա նպատակների մեջ է մտնում նաեւ զբոսաշրջիկների համար գրավիչ նոր տարածքների ստեղծումը:

Նորայր Գասպարյան
Թբիլիսի