ՎԵՐՋԻՆ ԹԱՐՄԱՑՈՒՄՆԵՐ
Բաժնում առկա է 61 հրապարակում

ՓՈԽԱՐԻՆՈՒՄՆԵՐ ԱՌԱՆՑ ՓՈՓՈԽՈՒԹՅՈՒՆՆԵՐԻ

Երեկ Սերժ Սարգսյանը մի քանի հրամանագրեր է ստորագրել կադրային փոփոխությունների վերաբերյալ, որոնցից ուշագրավ է հատկապես ՀՀ գլխավոր դատախազի տեղակալի նշանակումը: Այդ պաշտոնում նշանակվել է Էմիլ Բաբայանը, որը մինչ այդ , բարձրաստիճան պաշտոնատար անձանց էթիկայի հանձնաժողովի (ԲՊԱԷՀ) նախագահն էր: Նա այդ պաշտոնում փոխարինեց Արմեն Դանիելյանին: Էմիլ Բաբայանը հանրությանը հայտնի դարձավ այն բանից հետո, երբ ԲՊԱԷՀ նախագահի պաշտոնում, ուսումնասիրելով ՀՀ պետեկամուտների նախագահ Գագիկ Խաչատրյանի գործունեությունը, պաշտոնապես եզրակացրեց, որ նա ընդհանրապես բիզնեսով չի զբաղվում: Մինչդեռ իրականում Գագիկ Խաչատրյանը Հայաստանի խոշորագույն գործարարներից մեկն է, եթե ոչ խոշորագույնը: Այս նշանակումից պարզ է դառնում, որ ՀՀ դատախազությունում բովանդակային ոչինչ չի փոխվելու: Սերժ Սարգսյանի այլ հրամանագրերով զբաղեցրած պաշտոններից ազատվել են ՀՀ ոստիկանություն պետի տեղակալներ Ալեքսանդր Աֆյանը եւ Հովհաննես Հունանյանը: Հիշեցնենք` վերջիններս դեռ երկու օր առաջ հրաժարականի դիմումներ էին գրել, բայց ոստիկանությունն այդպես էլ պաշտոնապես չէր հաստատում սույն տեղեկությունը: Սերժ Սարգսյանի հրամանագրերով ոստիկանության պետի տեղակալներ են նշանակվել Սամվել Հովհաննիսյանը եւ Անուբախ Համբարյանը: Վերջինս ոստիկանության Լոռու մարզային վարչության պետն էր: Նրա այդ պաշտոնը, ամենայն հավանականությամբ, զբաղեցնելու է ԱԺ փոխնախագահ, ՀՀԿ խոսնակ Էդուարդ Շարմազանովի եղբայրը` Էրիկ Շարմազանովը, ով Վանաձորի ոստիկանության Տարոնի բաժնի պետն է:

Ով կդառնա վարչապետ

Այսինքն, ապրիլի 9-ին, երբ տեղի կունենա նոր նախագահի երդմնակալության արարողությունը, գործող կառավարությունն իր ողջ կազմով հրաժարական կտա: Նախօրեին Աջափնյակում նախընտրական քարոզչության շրջանակներում հանդիպման ժամանակ, քաղաքացիներից մեկը Սերժ Սարգսյանին հարց ուղղեց` արդյո՞ք ձեր ընտրվելուց հետո նախատեսվում են կադրային փոփոխություններ: «Իհարկե, ընտրվելուց հետո որոշակի փոփոխություններ կլինեն, բայց առաջին հերթին` քաղաքական պաշտոններ զբաղեցնողների շրջանում»,- ասաց Սարգսյանը: Անուններ, բնականաբար, չտրվեցին: Կադրային փոփոխությունների մասին բարձրաձայն խոսել հրաժարվում են նաեւ բարձր պաշտոններ զբաղեցնող անձինք, այդ թվում նրանք, ում անունները սույն թեմայի շրջանակներում շոշափվում են իշխանական կուլիսներում: Իսկ կուլիսներում արդեն տեւական ժամանակ է, մի քանի դասավորություն է շրջանառվում: Դրանցից մեկի համաձայն, գործող վարչապետ Տիգրան Սարգսյանը նախագահական ընտրություններից հետո իր պաշտոնը չի պահպանելու, նրան այդ պոստում փոխարինելու է ԱԺ գործող նախագահ Հովիկ Աբրահամյանը, իսկ խորհրդարանի նախագահ է դառնալու Սերժ Սարգսյանի աշխատակազմի նախկին ղեկավար, ԱԺ պատգամավոր Կարեն Կարապետյանը: Ինքը` Աբրահամյանը, մեր վերջին հարցազրույցում կրկնել էր, թե նման ցանկություն չունի, գործող վարչապետը նորմալ աշխատում է, իսկ կադրային նշանակումների մասին գիտի միայն մեկ մարդ` Սերժ Սարգսյանը:

Վարձը տրվեց

ՀՀ գլխավոր դատախազ Աղվան Հովսեփյանի հրամանով` երեկ դատախազության համակարգում տեղի ունեցած փոփոխություններից մեկն առավել քան ուշագրավ է. Հակոբ Մարտիրոսյանը նշանակվել է Արագածոտնի մարզի դատախազի պաշտոնում: Մինչ այդ նա զբաղեցնում էր ՀՀ գլխավոր դատախազության ընդհանուր բնույթի հանցագործությունների գործերով վարչության պետի տեղակալի պաշտոնը: Սա, ըստ էության, Մարտիրոսյանի վարձն է, որը նա ստացավ ընդդիմադիր, երիտասարդ ՀԱԿ ակտիվիստներ Տիգրան Առաքելյանի, Սարգիս Գեւորգյանի, Դավիթ Քիրամիջյանի եւ Արտակ Կարապետյանի շինծու մեղադրանքը դատարանում ներկայացնելու համար: Մինչ այս գործը` դատախազությունում շատերը համոզված էին, որ Հակոբ Մարտիրոսյանը երկար չի ձգի, շուտով դատախազության համակարգից կհեռանա եւ չի հասնի թոշակի տարիքի, քանի որ նրա եւ գլխավոր դատախազի հարաբերությունները լարված են: Իսկ նրանց հարաբերությունների սրման հիմնական պատճառն այն էր, որ Հակոբ Մարտիրոսյանը 2008-ին հաջողել էր խուսափել Մարտի 1-ի գործով կեղծ մեղադրանքներով գործերից մեկնումեկը դատարանում ներկայացնելուց: Սակայն, ըստ որոշ գնահատականների, Մարտիրոսյանը հասցրել է իր խնդիրները լուծել` ստանձնելով վերոնշյալ քաղաքական մեղադրանքը ներկայացնելու գործը: Վերը նշված երիտասարդները դատապարտվել են 2-6 տարվա ազատազրկման: Ներկայում գործը Վճռաբեկ դատարանի տիրույթում է: Երեկ արդարադատության նախարարության քրեակատարողական վարչության պետի մամուլի քարտուղար Արսեն Բաբայանը մեր թղթակցի հարցին ի պատասխան ասաց, որ ընդդիմադիր երիտասարդ ակտիվիստների` Վճռաբեկ դատարանին ուղղված դիմումը ընթացքի մեջ է: Այսինքն, Վճռաբեկ դատարանը դեռեւս որոշում չի կայացրել վարույթ ընդունելու կամ մերժելու մասին:

ԼՐԱՀՈՍ