Արխիվ

Բայց, սրա հետ մեկտեղ, նվազում է այդ նույն «խոշոր գործարարների» կրած հարկային բեռը: Սրա մասին են վկայում ՀՀ պետեկամուտների կոմիտեի օրերս հրապարակած տեղեկանքի տվյալները: ՊԵԿ հրապարակած «2011 թվականի դեկտեմբեր ամսվա խոշոր հարկ վճարողների մոնիտորինգի ամսական ամփոփ ցուցանիշների վերլուծություն» անվանումը կրող տեղեկանքի համաձայն, Հայաստանի 440 խոշոր հարկ վճարողները 2011-ի դեկտեմբերին վճարել են, ընդհանուր առմամբ, 17.9 միլիարդ դրամի հարկեր: Այսինքն, եթե միջինացնենք, ապա նրանցից յուրաքանչյուրը միջինում վճարել է 40 միլիոն 680 հազար դրամի հարկ: Շա՞տ է սա, թե քիչ: Այդ հարցի պատասխանը գտնելու համար նայենք, թե որքան են խոշոր հարկ վճարողները պետբյուջե մուծել 2010 թվականի դեկտեմբերին: Այն ժամանակ խոշոր հարկ վճարողների ցանկում ներառված էին 343 տնտեսվարողներ:

Նախկին ՕԵԿ-ական Գագիկ Բաղդասարյանը երեկ մեզ հայտնեց, որ փետրվարի 28-ին մասնակցելու է ԱԺ քառօրյային եւ նստելու է իր տեղում` ՕԵԿ-ական պատգամավորների կողքին: Բաղդասարյանը փետրվարի 17-ին դիմում է ներկայացրել ԱԺ աշխատակազմի ղեկավարի տեղակալ Թաթուլ Սողոմոնյանին` պատգամավորի իր մանդատից հրաժարվելու մասին դիմումը հետ վերցնելու մասին: Որոշումը Բաղդասարյանը կայացրել է իր ծննդյան օրը: Նա որոշել է հետ վերցնել իր դիմումը, քանի որ ՕԵԿ-ն իրենից ներողություն չի խնդրել: Բաղդասարյանը մնալու է ԱԺ ՕԵ խմբակցության անդամ: Հիշեցնենք, դեռ անցյալ շաբաթ ՕԵ խմբակցության պատգամավոր Հովհաննես Մարգարյանը մեզ հայտնել էր, որ եթե Բաղդասարյանն իր դիմումը հետ վերցնի, այսինքն` չհրաժարվի պատգամավորական իր մանդատից, ՕԵԿ-ը դիմելու է ԿԸՀ, որպեսզի նրա մանդատը հետ վերցնեն: Մարգարյանը հղում էր անում ՍԴ որոշմանը, ըստ որի` եթե պատգամավորը դուրս է գալիս խմբակցությունից, նա պետք է հետ հանձնի մանդատը: Ըստ Մարգարյանի, Բաղդասարյանը հեռացված է խմբակցությունից: Աժ պետաիրավական հանձնաժողովի նախագահ Դավիթ Հարությունյանը, սակայն, մեզ հայտնել էր, որ խմբակցությունից հեռացնելու հասկացություն գոյություն չունի, պատգամավորն ինքը կարող է դիմում գրել եւ դուրս գալ տվյալ խմբակցությունից: Հիմա, փաստորեն, Գագիկ Բաղդասարյանը պատժում է ՕԵԿ-ին, նա մնում է խմբակցության անդամ, որպեսզի կարողանա պահպանել իր մանդատը: «Քանի որ փորձում են ձեռքիցս խլել մանդատը, ես էլ ասում եմ` թե կարող են, խնդրեմ, թող ստիպեն, որ մանդատիցս հրաժարվեմ, այ հիմա կտեսնենք` ոնց են ստիպում, տղամարդ են, թող խլեն»,- երեկ մեզ հետ զրույցում ասաց Գագիկ Բաղդասարյանը:

2008 թվականի նոյեմբերին «Արմէքսպո-2008» ամենամյա ցուցահանդեսի բացման արարողության ժամանակ Սերժ Սարգսյանը, անդրադառնալով արտահանման թեմային, հայտարարեց. «Մենք պետք է կարողանանք նոր բրենդներ ստեղծել: Ողջ աշխարհում ճանաչում են հայկական կոնյակը, ծիրանը, պետք է ճանաչեն նաեւ հայկական թթուն, հայկական բիբարը, այծի եւ ոչխարի հայկական պանիրները»: Այդ հայտարարությունից անցել է ավելի քան 3 տարի, եւ հետաքրքիր է, թե աշխարհը ենթարկվե՞լ է արդյոք Սերժ Սարգսյանի` «պետք է ճանաչեն» հրահանգին: Պարզվում է` ոչ: Այսպես, ՊԵԿ հրապարակած պաշտոնական վիճակագրության համաձայն, 2011 թվականին Հայաստանից պանրի արտահանումը նվազել է մոտ 11.5 տոկոսով: Վիճակագրությունը չի առանձնացնում, թե արտահանված պանրի որ մասն է այծի, որ մասը` ոչխարի, բայց, ընդհանուր առմամբ, պանրի արտահանումը նվազել է: Ինչ վիճակ է թթվի արտահանման ոլորտում` պարզ չէ, քանի որ այդպիսի ապրանքի արտահանման տվյալներն ընդհանրապես բացակայում են: Բայց թթվի հիմնական պարագաների արտահանումը նվազել է հաստատ: Այսպես, կաղամբի արտահանումը նվազել է մոտ երկու անգամ, գազարինը` 30 տոկոսով, վարունգինը` 6 անգամ: Բիբարի արտահանման վերաբերյալ եւս տվյալներ չկան, բայց ՊԵԿ-ը արձանագրել է, որ ասենք` սառեցրած բանջարեղենի արտահանման ծավալները 2011-ին, 2010-ի համեմատ, նվազել են ավելի քան 3.5 անգամ: Մի խոսքով, Սերժ Սարգսյանի կանխատեսումները այս կամ այն սննդամթերքի արտահանման վերաբերյալ կատարվում են լրիվ հակառակ ձեւով: Տեսնենք, թե առաջիկայում նա ինչ կանխատեսումներ կանի:

Կուսակցությունում, սակայն, բոլորը կարծես թե կողմ են, որ առաջիկա խորհրդարանական ընտրություններում հենց Մարգարյանը գլխավորի իրենց ցուցակը: Ու նրան թերեւս այլընտրանք չմնա, քանի որ ՀՅԴ համամասնական ցուցակը որոշելու է կուսակցության ղեկավար մարմինը: Մարգարյանը, ըստ որոշ տեղեկությունների, համարում է, որ իրենց ցուցակը պետք է գլխավորի ՀՅԴ բյուրոյի անդամ, ԱԺ պատգամավոր Վահան Հովհաննիսյանը, քանի որ 2008-ին նա է եղել ՀՅԴ-ի նախագահի թեկնածուն:

Դաշնակցության ցուցակում եւս, նախորդ ընտրությունների համեմատ, հետաքրքիր փոփոխություններ են սպասվում: Մեզ հայտնի դարձավ, որ այս անգամ հայտնի դաշնակցական, Աժ պատգամավոր Ալվարդ Պետրոսյանը, համենայնդեպս, թոփ տասնյակում չի լինելու: Նա նախորդ անգամ զբաղեցնում էր ՀՅԴ համամասնական ցուցակի 4-րդ հորիզոնականը: Բանն այն է, որ Պետրոսյանը առողջական լուրջ խնդիրներ ունի եւ արդեն տեւական ժամանակ խորհրդարան չի կարողանում գնալ: 

Այն, որ Սերժ Սարգսյանը մինչեւ երեկ երեկոյան առաջիկա խորհրդարանական ընտրությունների օրը նշանակելու վերաբերյալ հրամանագիր չէր ստորագրել, նշանակում է, որ ընտրությունները ամենաշուտը կարող են նշանակվել մայիսի 2-ին: ԱԺ ընտրությունները կարող էին տեղի ունենալ ապրիլի 28-ից մայիսի 8-ն ընկած ժամանակահատվածում: Բայց ամեն օրվա հետ այդ ժամկետը սեղմվում է, որովհետեւ ընտրությունների օրը նշանակելու մասին հրամանագիրը պետք է ստորագրվի ոչ ուշ, քան քվեարկությունից 70 օր առաջ: Եթե իշխանությունները վերջնականապես որոշել են ԱԺ ընտրությունները մայիսի 6-ին անցկացնել, ապա համապատասխան հրամանագիրը պետք է ստորագրվի առաջիկա 4 օրերին, փետրվարի 26-ից ոչ ուշ:

ՀՀ զինվորական դատախազ Գեւորգ Կոստանյանը երեկ դուրս է գրվել հիվանդանոցից: Այս մասին տեղեկացանք ՀՀ առողջապահության նախարարությունից: Կոստանյանն, ինչպես հայտնի է, փետրվարի 3-ից գտնվում էր «Նաիրի» բժշկական կենտրոնում` հիպերտոնիկ կրիզ ախտորոշմամբ: ՀՀ գլխավոր դատախազի մամուլի քարտուղար Սոնա Տռուզյանի փոխանցմամբ, ՀՀ զինդատախազն այսօրվանից արդեն մտադիր է ներկայանալ աշխատանքի:

ՀՀ ՊՆ քննչական ծառայության հասարակայնության հետ կապերի ավագ սպա Մերի Սարգսյանը հայտնեց, որ փետրվարի 20-ին` ժամը 09:50-ի սահմաններում, ՀՀ ՊՆ կենտրոնական կլինիկական զինվորական հոսպիտալում իսկապես մահացել է ԼՂՀ զորամասերից մեկի զինծառայող, շարքային Նարեկ Մարտիրոսյանը: Նա հոսպիտալի վերակենդանացման բաժանմունք էր տեղափոխվել փետրվարի 16-ին` երկկողմանի օջախային թոքաբորբ, ձախակողմյան էքսուդատիվ պլեւրիտ, անբավարար շնչառություն ախտորոշմամբ: Մերի Սարգսյանի փոխանցմամբ, փաստի առթիվ ՀՀ ՊՆ քննչական ծառայության 4-րդ կայազորային քննչական բաժնում պատրաստվում են նյութեր, նշանակվել է դատաբժշկական փորձաքննություն: Սարգսյանը ոչ հերքեց, ոչ հաստատեց տեղեկությունները, որ նույն հիվանդությամբ նույն զորամասից հիվանդանոց են տեղափոխվել եւս մի քանի զինծառայողներ, որոնք այժմ շարունակում են բուժում ստանալ: Ասաց, որ ինքը տեղյակ է միայն մահվան դեպքի մասին: Այդ զինծառայողների վերաբերյալ տեղեկություններ ստանալ երեկ չհաջողվեց ոչ ՀՀ ՊՆ-ից, ոչ ԼՂՀ ՊԲ-ից:

Հունվարի 18-ին Երեւանի Տիգրանյան փողոցում գտնվող «Նիկո» կահույքի սրահի մոտ հնչած կրակոցների վերաբերյալ հարուցված քրեական գործի նախաքննությունը շարունակվում է, նոր ձերբակալվածներ, կալանավորվածներ չկան: Այս մասին երեկ մեզ հայտնեցին ՀՀ ոստիկանության հասարակայնության հետ կապի եւ լրատվության վարչությունից: Կրակոցների հետեւանքով ձախ ոտքի ազդրի հատվածում հրազենային վնասվածք էր ստացել միջադեպի մասնակից 23-ամյա Տիգրան Հակոբյանը, վնասվել էին նաեւ խանութի պատուհանի ապակիները: Ավելի վաղ հայտնել էինք, որ հարուցված քրեական գործով որպես կասկածյալներ այժմ անցնում են չորս հոգի, որոնցից երկուսը կալանավորված են, եւս երկուսը ստորագրությամբ ազատ են արձակվել:

ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ` նույն կիսակառույց բնակարանը երեք տարբեր քաղաքացիների վաճառելու դեպքի առթիվ: «Սամոշ» ՍՊ ընկերության սնանկության գործով կառավարչի հաղորդման հիման վրա նախապատրաստված նյութերով տվյալներ են ձեռք բերվել` հիշյալ ընկերության տնօրենի կողմից խաբեության եղանակով առանձնապես խոշոր չափերի գումար հափշտակելու մասին: Մասնավորապես, նախնական տվյալներով, հաստատապես իմանալով, որ ընկերության կողմից կառուցված 51/2 հասցեի բազմաբնակարան բնակելի շենքի թիվ 1 կիսակառույց բնակարանը դեռեւս 2009թ. դեկտեմբերի 29-ի նոտարական վավերացված առուվաճառքի նախնական պայմանագրով վաճառվել է, գնորդներից թաքցնելով առուվաճառքի փաստը, 2010թ. հուլիսի 3-ին եւ 2010թ. օգոստոսի 25-ին ակնհայտ կեղծ առքուվաճառքի նախնական պայմանագրերով ՍՊ ընկերության տնօրենը վերոհիշյալ բնակարանը կրկին վաճառել է երկու տարբեր անձանց: Վաճառքից գոյացած առանձնապես խոշոր չափերի գումարը` ընդհանուր առմամբ 31 միլիոն 774 հազար դրամ, հափշտակվել է: Փաստի առթիվ հարուցվել է քրեական գործ` ՀՀ քրեական օրենսգրքի 178-րդ հոդվածի 3-րդ մասի 1-ին կետով: Քրեական գործն ուղարկվել է ՀՀ ոստիկանության ՔԳՎ վարչություն` նախաքննություն կատարելու համար:

Հայաստանի արտգործնախարար Էդվարդ Նալբանդյանը փետրվարի 22-28-ը մեկնելու է Կորեայի Հանրապետություն, Վիետնամ եւ Սինգապուր: Նախատեսված են Էդվարդ Նալբանդյանի հանդիպումները վերոհիշյալ պետությունների ղեկավարների հետ: Հանդիպումների ընթացքում կքննարկվեն երկկողմ հարաբերությունների զարգացման ուղղությամբ ձեռնարկվելիք քայլերը, ինչպես նաեւ միջազգային եւ տարածաշրջանային խնդիրներ:

Հարց - Պարոն Թոմասսյան, ըստ մամուլի հրապարակումների, դուք «Դեսշին» ընկերության տնօրենին մեղադրում եք ձեզանից մոտ 30 մլն դրամ գողանալու համար. ինչպե՞ս է դա տեղի ունեցել:
Սամվել Ջաղինյան - 2010 թվականին, իր ծանոթներից մեկի միջոցով, Ժորժ Թոմասսյանը ծանոթացել է «Դեսշին» ՍՊԸ տնօրեն Դերենիկ Ստեփանյանի հետ: Նա ասել է, որ «Վահագնի» թաղամասում ինքը հողատարածք ունի` 1520 քառակուսի մետր մակերեսով, եւ դրա վրա կարող է տուն կառուցել Թոմասսյանի համար: Պետք է կառուցվեր երեքհարկանի տուն` ամեն հարկը 220 քառակուսի մետր մակերեսով եւ երկհարկանի մարզասրահ` ամեն հարկը 170 քառակուսի մետր: Դերենիկ Ստեփանյանի հետ պայմանավորվել են շինարարության շուրջ, եւ մայիսին արդեն Թոմասսյանն առաջին վճարումը կատարել է: Դրանից հետո Դերենիկ Ստեփանյանը սկսել է շինարարությունը: Վճարումների բոլոր ստացականները կան: Հետագայում  ինչ-որ հիմնարկներ վազվզելու հարցեր են առաջացել, իսկ Ժորժ Թոմասսյանը տարիքով մեծ է, եւ Դերենիկ Ստեփանյանն առաջարկել է իր որդու` Էդիկ Ստեփանյանի անունով լիազորագիր տալ, որպեսզի երբ ինչ-որ տեղ գնալու անհրաժեշտություն լինի, նա Թոմասսյանի փոխարեն գնա` այդ խնդիրները լուծի: Թոմասսյանը Էդիկ Ստեփանյանին լիազորագիր է տալիս, որից հետո գումարները միշտ նա է ստանում եւ տալիս իր հորը: Այդպես շինարարությունն ընթանում է: Թոմասսյանը պարբերաբար պահանջել է գումարների ծախսման վերաբերյալ հաշվետվություն ներկայացնել, եւ Դերենիկ Ստեփանյանն անընդհատ ասել է` կտամ-կտամ: Այդպես շինարարությունն ընթացել է, հետո եկել է տան տանիքը կապելու ժամանակը:

Առատ ձյան տեղումների պատճառով, երեկ երեկոյից Վրաստանի Մցխեթա-Ստեփանծմինդա-Լարս ճանապարհի Մլեթա-Գուդաուրի- Լարս հատվածում երթեւեկությունը արգելվել է կցորդների եւ 30-ից ավելի նստատեղ ունեցող ավտոբուսների համար: Տրանսպորտի եւ կապի նախարարության փոխանցմամբ, կիսակցորդների եւ այլ մեքենաների համար Մլեթա-Գուդաուրի հատվածում երթեւեկությունը բաց է: Կիսակցորդների եւ այլ մեքենաների համար Գուդաուրի-Լարսի հատվածում երթեւեկությունը թույլ է տրվում հակատեղապտտման շղթաներ օգտագործելու պարագայում: Երկու տանող կամրջակներով մեքենաների համար երթեւեկությունը բաց է:

Ժամը 16-ին ազատ լրագրող Բայանդուր Պողոսյանը հացադուլ հայտարարեց` նախքան խնդրի իրավական լուծումը ապօրինի շինարարությունը կասեցնելու պահանջով: Ինչպես հայտնի է, բնապահպանները պնդում են, որ հանրային այգու զավթումն անօրինական է, քաղաքապետարանն էլ պնդում է իրավական հիմքերի առկայության մասին եւ միաժամանակ խոստանում քննարկել ցուցարարների ներկայացրած հիմնավորումները: 25-ամյա Բայանդուրը մտադիր է հացադուլ անել 8 օր` այդ ողջ ընթացքում այգուց չհեռանալով. «Ես համարում եմ, որ 8 օր հացադուլը իմ առողջությանն անդառնալի վնաս չի հասցնի` միաժամանակ լուրջ բողոքի ակցիա լինելով: Իսկ 8 օր անց, եթե առողջական խնդիրները թույլ չտան շարունակել հացադուլը, շինարարությունն էլ դադարեցված չլինի, այդուհանդերձ չի ստացվի, որ 8 օրը զուր անցավ, քանի որ այդ 8 օրը գոնե մարդկանց կհասկացնի, որ մենք լուրջ ենք տրամադրված: Մենք խաղաղ ենք, բայց լուրջ ենք տրամադրված»:

Համառոտ հիշեցնեմ այս մենամարտի հետ կապված իրադարձությունների ընթացքը: 40-ամյա Կլիչկոն ու 28-ամյա Չիսորան պայքարում էին WBC վարկածով աշխարհի չեմպիոնի կոչման համար: Դեռ մենամարտի նախօրյակին` մարզիկների կշռման արարողության ժամանակ Չիսորան ապտակեց Կլիչկոյին (նկարում): Մենամարտը մեկնարկեց մոտ կես ժամ ուշացումով. Չիսորան մարզապալատ մտավ նախապես բինտով փաթաթած ձեռքերով, ինչը կանոնների կոպիտ խախտում է, ու Կլիչկոյի թիմը պահանջեց իր ներկայացուցչի ներկայությամբ նորից կատարել այդ նախապատրաստական աշխատանքը: Արդեն ռինգում, պետական հիմների կատարման ժամանակ, Չիսորան թքեց Վիտալի Կլիչկոյի կրտսեր եղբայր ու մարտավկա Վլադիմիրի դեմքին:

Թուրքիայի Էրզրում քաղաքում մեկնարկել են դահուկավազքի աշխարհի երիտասարդական եւ պատանեկան առաջնությունները: Մինչեւ 20 տարեկանների արագավազքի մրցաշարում Հայաստանը ներկայացնող Աննա Մխիթարյանը որակավորման փուլում զբաղեցրել է 64-րդ, իսկ Կատյա Գալստյանը վերջին` 71-րդ տեղը: Նույն մրցաշարի տղամարդկանց պայքարում 92 դահուկորդների մեջ մեր մարզիկներից Սերգեյ Միքայելյանը զբաղեցրել է 42-րդ, իսկ Թադեւոս Պողոսյանը` 78-րդ տեղը: Այսպիսով, մեր բոլոր մարզիկներն էլ դուրս են մնացել հետագա պայքարից:

Բաքվում երեկ տեղի է ունեցել «Հանուն ժողովրդավարական հասարակության դիմադրության շարժման» համաժողովը , որի ժամանակ բավական ուշագրավ որոշում են ընդունել: Շարժման մեջ մտնող «Ադրբեջանի լիբերալ-դեմոկրատական կուսակցության» նախագահի առաջարկով որոշվել է դիմել Վրաստանի ադրբեջանական ազգաբնակչությանը` կոչ անելով Վրաստանի կազմում ինքնավար հանրապետություն հռչակել: Միաժամանակ, կոչ է արվել Վրաստանի ադրբեջանաբնակ շրջաններում բացատրական աշխատանքներ սկսել տվյալ հարցի շուրջ: Նշենք, որ դիմադրության շարժման կազմում ընդգրկվել են 12 կուսակցություններ ու հասարակական կազմակերպություններ: