Արխիվ

Կառավարությունը որոշել է 120 հազար պետական ծառայողների հատկացնել տարեկան 132 հազարական դրամի սոցփաթեթ, որով այդ մարդիկ կարող են վճարել հիպոթեկային վարկի տոկոսների մի մասը կամ գնալ հանգստանալու ՀՀ եւ ԼՂՀ հանգստյան տներում, կամ` վճարել ուսման վարձ, կամ էլ` վճարել բուժսպասարկման համար: Իհարկե, գումարը մեծ չէ` յուրաքանչյուր պետական ծառայողի հաշվով ամսական ընդամենը 11 հազար դրամ է, այն էլ` ոչ կանխիկ: Այսինքն, այդ փողը պետական ծառայողը չի տեսնելու` ստացած որեւէ ծառայության դիմաց ծառայություն մատուցողը գումարը փոխանցումով ստանալու է հենց բյուջեից: Այս գումարով ուսման վարձը ամբողջությամբ հոգալ հնարավոր չէ: Այդ գումարով հնարավոր է նորմալ հանգստանալ, ասենք, Վրաստանում, բայց ոչ Հայաստանում: Դե, իսկ հիպոթեկային վարկերի տոկոսների մասին էլ չխոսենք` ամսական պահանջվող 200-300 հազար դրամի 5 տոկոսն անգամ հնարավոր չէ փակել այդ գումարով: Մնում է, թերեւս, միայն բուժսպասարկումը:

Այսօր առավոտյան ՀՀ վերաքննիչ քրեական դատարանում տեղի կունենա Ախթալայի լեռնահարստացուցիչ կոմբինատի սեփականատեր Սերոբ Տեր-Պողոսյանի գործով դատավարությունը: Նա բողոքարկել է Լոռու մարզի ընդհանուր իրավասության դատարանի վճիռը, որով դատապարտվել է 15 տարվա ազատազրկման: Տեր-Պողոսյանը ներկայումս «Միքայելյան» վիրաբուժական կենտրոնում է` բուժվում է աղիքային անանցանելիության դեմ: Ինչպես մեզ ավելի վաղ հայտնել էր վիրաբուժական կենտրոնի փոխտնօրեն Օնիկ Մելքոնյանը, Տեր-Պողոսյանը ցանկություն է հայտնել մասնակցել դատին:

ԱԺ աշխատակազմի ղեկավար Գեղամ Ղարիբջանյանը, որը դեռ արձակուրդում է, երեկ մեր թղթակցին ասել է, թե հստակ է, որ իր գործուղման ժամկետը ԱԺ-ում ավարտվում է փետրվարի 10-ին: Այսինքն, ինքն այլեւս ԱԺ չի վերադառնալու: Հիշեցնենք, նրա արձակուրդի ժամկետը լրանում է փետրվարի 10-ին: Ղարիբջանյանը նոր պաշտոնի դեռ չի անցել:

Կառավարությունը երեկվա նիստում ավելացված արժեքի հարկից ժամանակավորապես ազատեց «Հանա-տրանս» ընկերությանը, որը պատրաստվում է 40 բեռնատար ներկրել Հայաստան: Այդ բեռնատարներով ընկերությունը ԼՂՀ-ից Երեւան է տեղափոխելու քարածուխ եւ դրանով «ԵրեւանՀԷԿ»-ում իրականացնելու է էլեկտրաէներգիայի արտադրություն: Կառավարությունը երեկ նաեւ հաստատեց գյուղացիներին հատկացվելիք դիզվառելիքի գների մասամբ սուբսիդավորման ծրագիրը:

Ի՞նչ են քննարկում կոալիցիոն ուժերը եւ ինչի՞ շուրջ են փորձելու համաձայնության գալ այդ հաճախակի հանդիպումների ընթացքում. իշխանական մեր աղբյուրները հայտնում են, որ այս փուլում Սերժ Սարգսյանն ու ՀՀԿ-ն փորձում են կանխել առաջիկա ընտրություններում ԲՀԿ-ի այլ ֆորմատով հանդես գալու որեւէ հնարավորություն: Նույն աղբյուրները նշում են, որ ՀՀԿ-ին խիստ անհանգստացրել է մեծամասնական ընտրակարգը վերացնելու ընդդիմության նախաձեռնությանը ԲՀԿ-ի միանալու հավանականությունը: Եւ եթե կոալիցիայի նախորդ նիստերում քննարկվում էր, թե մեծամասնականով ԲՀԿ-ին քանի տեղ է տրվելու, ՀՀԿ-ին` քանի (խոսվում էր, թե Ծառուկյանը 11 տեղ է ուզել, Սերժ Սարգսյանը 6 տեղ տալու պատրաստակամություն է հայտնել), վերջին նիստերում քննարկման առարկա է դարձել հենց ԲՀԿ-ի վերջին քայլը, երբ նա  ՀՅԴ-ի եւ «Ժառանգության» հետ համատեղ դիմեց ԱԺ նախագահ Սամվել Նիկոյանին` մեծամասնական ընտրակարգը վերացնելու վերաբերյալ խորհրդարանական լսումներ կազմակերպելու համար:

Հանրապետական կուսակցության աղբյուրները հայտնում են, որ ՀՀԿ-ն արդեն որոշել է, թե 41 մեծամասնական ընտրատարածքներից 31-ում ում թեկնածությանն է սատարելու առաջիկա խորհրդարանական ընտրությունների ժամանակ: Առայժմ որոշում չկա մոտ 10 ընտրատարածքների վերաբերյալ: Մասնավորապես, մեր տեղեկություններով, ՀՀԿ-ն դեռ դիրքորոշում չի հստակեցրել թիվ 1 ընտրատարածքի հետ կապված, որտեղ գործող պատգամավորը ՀՖՖ նախագահ Ռուբեն Հայրապետյանն է: Կարծես հստակ է, որ նա չի առաջադրվելու, սակայն պարզ չէ, թե նրա փոխարեն ում է առաջադրելու ՀՀԿ-ն: Թիվ 37-ում գործող պատգամավոր Սաշիկ Սարգսյանն էլ, թերեւս, չառաջադրվի, եւ ՀՀԿ-ն այստեղի համար էլ նոր թեկնածու չի որոշել: Սերժ Սարգսյանի կուսակցությունը դիրքորոշում չի հստակեցրել նաեւ թիվ 7 (գործող պատգամավորը Սամվել Ալեքսանյանն է), թիվ 28 (գործող պատգամավորը Գագիկ Ծառուկյանն է), թիվ 30 (գործող պատգամավորը Վիկտոր Դալլաքյանն է) եւ մի քանի այլ ընտրատարածքներում: ՀՀԿ-ն դեռ պետք է որոշի` արժե՞ թեկնածու առաջադրել Գագիկ Ծառուկյանի դեմ, որը մեծամասնականով առաջադրվելու է նույն տեղում, Սամվել Ալեքսանյանին կրկին առաջադրվելու հնարավորություն տա՞լ, եւ Վիկտոր Դալլաքյանին սատարե՞լ` գաղտնի կամ բացահայտ:

Թեեւ ուղեկցող համապատասխան ծառայությունը Տիգրան Առաքելյանին «Նուբարաշեն» ՔԿՀ-ից տեղափոխել էր դատարան, սակայն դատավոր Գ.Պողոսյանը Տիգրանին թույլ չտվեց ներկա լինել իր իսկ դատավարությանը:

Դա բացատրեց նրանով, որ նախորդ նիստի ժամանակ Տիգրան Առաքելյանի նկատմամբ սանկցիա էր կիրառել, նրան հեռացրել էր նիստերի դահլիճից մինչ այդ նիստի ավարտը, սակայն երբ Վահե Գրիգորյանը լքել էր նիստերի դահլիճը, նիստը հետաձգվել էր, այդ պատճառով էլ երեկվա նիստին եւս Տիգրանի նկատմամբ կիրառված սանկցիան ուժի մեջ է: Ըստ Պողոսյանի, նախորդ նիստին մինչ աշխատանքային օրվա ավարտը դեռեւս երեքուկես ժամ կար, հետեւապես երեկվա նիստի երեքուկես ժամերին Տիգրանը չպետք է մասնակցի: Ահա սա էր բացատրությունը:

Երեկ Արարատի եւ Վայոց Ձորի մարզերի ընդհանուր իրավասության դատարանի Վեդիի նստավայրում պետք է տեղի ունենար անցած տարվա սեպտեմբերի 6-ին իր երկու փոքրիկ երեխաներին` վեցամյա Վարդանին եւ չորսամյա Հայկին խեղդամահ արած Ռոզա Ալոյանի գործով դատավարությունը, որը, սակայն հետաձգվել է: Պատճառն այն է, որ տուժող կողմի իրավահաջորդը չէր ներկայացել նիստին: Այս մասին երեկ մեզ հայտնեց Ռոզա Ալոյանի պաշտպան Լուիզա Հարությունյանը: Ի՞նչ հիմնավորմամբ է անմեղսունակ ճանաչված կնոջ վերաբերյալ գործը ուղարկվել է դատարան: Այս հարցը երեկ ուղղեցինք ՀՀ գլխավոր դատախազի մամուլի քարտուղար Սոնա Տռուզյանին:

Չնայած սխալ բաներ չէր ասում, գիտե՞ք, Գեղամյանը, ընդհանուրի մեջ որ նայում ես. իդեալներ էր փնտրում, որոնք, Աստված չանի (իհարկե` չանի), Ադրբեջանի հարձակման դեպքում կարող են առաջնորդել ազգը, Քոչարյանին զրկեց մեծ քաղաքականություն վերադառնալու բարոյական իրավունքից ու միայն քավություն աղերսելու իրավունքը թողեց նրան, ու այս ամենը` իրեն հատուկ լալահառաչ ձայնով...

Ներկոալիցիոն համերգ
Մինչդեռ թվում էր թե` ի՜նչ լավ էր սկսել ամեն ինչ. ԲՀԿ-ն կատեգորիկ հրաժարվեց ընդհանուր համամասնական ցուցակով ընտրությունների մասնակցելուց ու նույնիսկ հայտարարեց ԱԺ-ում մեծամասնություն ստանալու մասին, եւ ի՜նչ վատ ավարտ ունեցավ. Բոստանջյանը մի տեսակ ափսոսանքով արդարացավ, որ իրենք Սերժ Սարգսյանին չսատարելու առիթ չունեն պարզապես: Չունեն, հասկանո՞ւմ եք, թե չէ ուրախ կլինեին, ուղղակի առիթ են ման գալիս ու չեն գտնում: Բոստանջյանի հայտարարությունից ժամեր անց, իհարկե, ԲՀԿ մամուլի խոսնակը սա անհատ պատգամավորի անհատ կարծիք որակեց` մեղմելով հայտարարությունից առաջացած շոկը: Չնայած շոկ, եսիմ, կա՞ր էլ: Ամիսներ շարունակ շատ բան տեսած մեր լրագրողները (հասարակ քաղաքացին էլ նրանց հետ միասին) սովորել են ԲՀԿ-ից հնչող իրարամերժ հայտարարություններին ու էլ դրանից չեն զարմանում:

Հայտնի է, որ ԱՊՀ երկրների երիտասարդական միությունը փետրվարի 2-ին պետք է «Պուտին» ակումբ բացեր Երեւանի ռուսական գրքի տանը: Երեկ, երբ զանգահարեցի նախաձեռնողներից մեկին` Արարատ Ստեփանյանին, իմանալու այդ արարողության ժամը, պարզվեց, որ ակումբն արդեն բացվել է: Բացվել է սուսուփուս, անաղմուկ, եւ դա տեղի է ունեցել հունվարի 30-ին: Իսկ պուտինասեր երիտասարդների մասնակցությամբ, ըստ նրա, երեկ` ժամը 13-ին, պետք է կլոր սեղան լիներ: Այցելելով մայրաքաղաքի միակ ռուսական գրքի տունը (Մաշտոցի պողոտայում), տեղեկացա, որ «Պուտին» ակումբը բացվել է մեկ այլ հասցեում, եւ կլոր սեղանն էլ այնտեղ է լինելու: Ճամփա ընկա դեպի նորաբաց ակումբ: Տեղ հասնելով` տեսա, որ կլոր սեղանը կա, իսկ քննարկման մասնակիցները` ոչ:

«Պուտին» ակումբում ընդամենը մի քանի երիտասարդի հանդիպեցի, որոնք ասացին, որ լրագրողներ են եւ համակարգիչների մոտ աշխատում էին սենյակի մյուս անկյունում: Պարզվեց` այդ տարածքում, բացի ակումբից, նաեւ մի քանի կայքերի խմբագրություն է գործում: Խոսքը ԱՊՀ երկրների երիտասարդական միության կառավարման խորհրդի նախագահ Անդրանիկ Նիկողոսյանին պատկանող լրատվամիջոցների մասին է: Այստեղ վստահեցրին, որ կլոր սեղանը կլինի ժամը 14-ին: Բայց դրանից րոպեներ անց էլ քննարկման մասնակիցներից ոչ ոք դեռ չէր հայտնվել: Իսկ «Պուտին» ակումբի պատերին կախված էին ՌԴ վարչապետ ու նախագահի թեկնածու Վլադիմիր Պուտինի բազում լուսանկարներ, կային նրա մասին գրքեր, թերթեր: Մի խոսքով, մթնոլորտը պուտինյան շնչով էր հագեցած:

Արագածոտնի մարզի Նոր Եդեսիա գյուղի բնակիչ, 41-ամյա Արփիար Մանուկյանն արդեն յոթ տղաների հայր է: Հունվարի 12-ին նրա ընտանիքում յոթերորդ տղան է ծնվել` Հայկը: Բազմազավակ մայրը` 34-ամյա Նոյեմզարը, մեր թղթակցի հետ զրույցում պատմել է, որ իրենց մեծ որդին` Դավիթը, 11 տարեկան է: Նրանց հայրը գրեթե ամեն օր ուղեւորվում է Երեւան` շինարարությունում աշխատում եւ տուն վերադառնում, որպեսզի կարողանա պահել իր բազմանդամ ընտանիքին: Նրանք նաեւ ընտանեկան նպաստ են ստանում` 58 հազար 500 դրամ: Նոյեմզարի խոսքով, թեեւ իրենց տունը երկհարկանի է, բայց հնարավոր է ապրել միայն առաջին հարկում, որի բնակմակերեսը շուրջ 80 քմ է, եւ որտեղ երկու ննջասենյակ կա: Երկրորդ հարկն, ըստ նրա, անպիտան է բնակության համար, քանի որ տանիքն անսարք է, եւ անձրեւաջրերը ներս են թափանցում: Նրանք տարբեր իշխանավորների են դիմել` տանիքը վերանորոգելու համար օգնություն ստանալու ակնկալիքով, բայց բոլորից մերժում են ստացել:

Նշենք, որ այս տրանսֆերային պատուհանի ընթացքում չեղան հնչեղ տեղափոխություններ, հսկայական գումարների հասնող տրանսֆերներ, ինչը առկա էր վերջին տարիներին: Թվում էր, թե եվրոպական թոփ թիմերը նոր ֆուտբոլիստներ ձեռք բերելու համար սպասում են տրանսֆերային պատուհանի վերջին օրվան, ինչպես եղավ անցյալ հունվարին: Հիշեցնեմ, որ 2011 թվականի հունվարի 31-ին միայն անգլիական 2 թիմեր` «Չելսին» ու «Լիվերպուլը», համատեղ ծախսեցին մոտ 150 միլիոն եվրո: Լոնդոնի «Չելսիի» սեփականատեր Ռոման Աբրամովիչը միայն իսպանացի Ֆերնանդո Տորեսին ձեռք բերելու համար «Լիվերպուլին» վճարեց 57 միլիոն, իսկ «Լիվերպուլը» Էնդի Քերոլի համար «Նյուքասլին» վճարեց 40 միլիոն եվրո: Իսկ ահա 2012 թվականի հունվարի 31-ը անցավ շատ հանգիստ, ու կարելի է արձանագրել` ձմեռային տրանսֆերային պատուհանի ամենաթանկ գործարքը կայացավ Ռուսաստանում, գինն էլ կազմեց ընդամենը 13 միլիոն եվրո: Այսպիսի գին վճարեց Մոսկվայի «Դինամոն» Մախաչկալայի «Անժիին»` հունգարացի Բալաշ Ջուջակի համար:

Արդեն տեղեկացրել էինք, որ շախմատի աշխարհի չեմպիոնի կոչման այս տարվա աշնանը նախատեսված հավակնորդների մրցաշարը կազմակերպելու հայտ էր ներկայացրել Ադրբեջանի շախմատի ֆեդերացիան: ՖԻԴԵ ներկայացրած հայտում ադրբեջանական կողմը հատուկ ընդգծել էր, որ ամենաբարձր մակարդակով կապահովի Լեւոն Արոնյանի անվտանգության խնդիրը: Ադրբեջանի շախմատի ֆեդերացիայի նախագահ Մաիր Մամեդովը տեղի կայքերին տված հարցազրույցում ասել է. «Արոնյանի հարցը քննարկված է առնվազն երկրի սպորտի ղեկավարների մակարդակով, ու նրան կտրամադրվեն ամենաբարձր երաշխիքներ: Լեւոնը կարող է Բաքվի առաջարկած պայմաններին նոր պահանջներ էլ ներկայացնել` իրեն ցանկալի ընդունելություն կազմակերպելու համար: Նրա` Բաքու չգալու համար, իրական պատճառներ չեմ տեսնում»: Երեկ Լեւոն Արոնյանը պաշտոնական նամակ է ուղարկել ՖԻԴԵ-ի նախագահ Կիրսան Իլյումժինովին, ՖԻԴԵ-ի նախագահական խորհրդի անդամներին, որտեղ կտրականապես հրաժարվել է խաղալ Բաքվում: Նամակում մասնավորապես նշվում է. «Ուզում եմ տեղեկացնել ձեզ, որ Ադրբեջանում տիրող ընդհանուր մթնոլորտը եւ մեր երկրների միջեւ գոյություն ունեցող մշտական լարվածությունը անհնար են դարձնում իմ մասնակցությունն Ադրբեջանում անցկացվող որեւէ բարձրակարգ մրցաշարի: ...Տեղեկացնում եմ ձեզ, որ ես հաճույքով կմասնակցեմ աշխարհի չեմպիոնի կոչման հավակնորդների մրցաշարին` աշխարհի ցանկացած այլ երկրում, բայց իմ մասնակցությունը Ադրբեջանում անցկացվող հավակնորդների մրցաշարին` բացառվում է»:

ՄԱԿ-ի անվտանգության խորհրդում այսօր ըստ ամենայնի քվեարկության կդրվի Սիրիային վերաբերող բանաձեւը: Չորեքշաբթի օրվանից ԱԽ-ն քննարկում է հարցը, սակայն առայժմ համաձայնություն չի կայացել: ՌԴ-ն դիմակայում է արեւմտյան եւ արաբական երկրների ճնշմանը, որոնք փորձում են բանաձեւում Սիրիայի նախագահ Բաշար ալ Ասադի հեռացումը պահանջող կետ ներառել: Արեւմտյան պաշտոնյաները նշում են, որ այս հարցում նույնիսկ ՌԴ-ի ձեռնպահ դիրքորոշումը կգոհացնի. եթե Ռուսաստանը վետո չդնի, բանաձեւի նախագիծը կհամարվի ընդունված: Սակայն, ՄԱԿ-ում ՌԴ ներկայացուցիչ Վիտալի Չուրկինը ասել է, որ եթե ՌԴ-ն համարի, որ բանաձեւի տեքստը ավելի կսրի իրավիճակը Սիրիայում, թույլ չի տա դրա ընդունումը: Չնայած ԱՄՆ-ն, Մեծ Բրիտանիան եւ Ֆրանսիան բազմիցս պնդել են, որ բանաձեւը չի օգտագործվի Սիրիայի դեմ ռազմական գործողություն սկսելու համար, իսկ Հիլարի Քլինթոնը կտրուկ մերժել է Սիրիայի եւ Լիբիայի միջեւ զուգահեռներ անցկացնելու փորձերը, այնուհանդերձ ՌԴ-ն վստահ է, որ բանաձեւը միտված է Սիրիայում իշխանափոխության իրականացմանը: «Էմնեսթի Ինթերնեյշնլ» կազմակերպությունը եւս ՌԴ-ին կոչ է արել չխոչընդոտել բանաձեւի ընդունմանը՝ նշելով, որ ՌԴ-ն պատասխանատու է Սիրիայում շարունակվող բռնությունների համար: Այս վերջին բանակցություններին զուգահեռ, ըստ սիրիական ընդդիմության տվյալների, Դամասկոսի շրջանում` 52, Հոմսում` 17 եւ Դերաայում 5 մարդ է զոհվել վերջին բախումների հետեւանքով: Ըստ ԶԼՄ-ների` Սիրիայում ըստ էության քաղաքացիական պատերազմ է ընթանում: