Արխիվ

Մոտ մեկ տարի առաջ Վերահսկիչ պալատը մեծ աղմուկով բացահայտեց, որ տարիներ շարունակ` մահացած, Հայաստանից հեռացած կամ ընդհանրապես գոյություն չունեցող բազմահազար մարդկանց անուններով կենսաթոշակային վճարումներ են իրականացվել: Այդ աղմուկից հետո աշխատանքից ազատվեց սոցիալական ապահովության պետական ծառայության պետ Վազգեն Խաչիկյանը, հարուցվեց քրեական գործ, եղան ձերբակալություններ... Հանրությունը ամեն րոպե սպասում էր, որ կձերբակալվի նաեւ Վազգեն Խաչիկյանը, ինչը, սակայն, տեղի չունեցավ: Երեկ Արթուր Գրիգորյանը սառը ցնցուղ լցրեց լրագրողների գլխին: Նա նախ հայտարարեց, որ կենսաթոշակառուների վճարման ցուցակում եղել է 520 հազար թոշակառու: Այդ ցուցակները «մաքրելուց հետո» այնտեղ մնացել է 509 հազար: Այսինքն, «ավելորդ» կենսաթոշակառուների թիվը եղել է ընդամենը 11 հազար: Բա՛յց:

«Ես Օսկանյանին վերջին 15 տարվա մեջ առաջին անգամ երկու րոպեով տեսել եմ վերջերս` «Սիվիլիթաս» հիմնադրամի կազմակերպած «100 հարց ու պատասխան» ծրագրից առաջ, որն անցկացվում է «Երեւան» հյուրանոցում: Ընդհանրապես Օսկանյանը ի՞նչ կապ ունի կամ կարող է ունենալ մեզ հետ: Մարտի 1-ի էդ բաներից հետո ինչպե՞ս կարող եք նման բան հարցնել»,- «Ազատ դեմոկրատներ» կուսակցության ներկայացուցիչ Ալեքսանդր Արզումանյանը երեկ այսպես է պատասխանել մեր թղթակցի հարցին, թե արդյոք իրենց համամասնական ցուցակում ընդգրկվելու առաջարկ եղե՞լ Օսկանյանին, կամ հակառակը` Օսկանյանը ցանկություն հայտնե՞լ է լինել այդ ցուցակում: Հիշեցնենք, որ նախօրեին ՀՀ նախկին արտգործնախարար Վարդան Օսկանյանը հանդես էր եկել հայտարարությամբ, որտեղ մասնավորապես ասված էր. «Բարգավաճ Հայաստան» կուսակցությանն իմ ներգրավվածության մասին խոսակցություններն անհիմն չեն: ԲՀԿ-ի հետ նման քննարկումներ ունեցել եմ, բայց այլ քաղաքական ուժերի հետ եւս ունեցել եմ քննարկումներ»:

Իշխանական շրջանակներում կրկին ակտիվացել են կոալիցիոն նոր հուշագիր ստորագրելու մասին խոսակցությունները: Նոր հուշագրի ստորագրման հնարավորության մասին խոսում են մասնավորապես հանրապետականներն ու ՕԵԿ-ականները: ԲՀԿ-ական շրջանակները, սակայն, պնդում են, որ որեւէ հուշագիր իրենք չեն ստորագրելու:

Ինչպեսեւ կանխատեսել էինք, 2011 թվականի բյուջեն թերակատարվել է: Ըստ ՀՀ ֆինանսների նախարարության ներկայացրած նախնական տվյալների, անցած տարվա պետական բյուջեի եկամուտները կազմել են 848 միլիարդ 97 միլիոն դրամ, այնինչ, ըստ 2011 թվականի պետական բյուջեի նախագծի, եկամուտները պետք է կազմեին 852 միլիարդ 440 միլիոն դրամ: Այլ կերպ ասած, բյուջեն թերակատարվել է ավելի քան 4 միլիարդ դրամով: Թերակատարվել է նաեւ բյուջեի ծախսային մասը: Նախատեսված ավելի քան 1 տրիլիոն դրամից ծախսվել է միայն 967 միլիարդ 849 միլիոն դրամը: Այսինքն, ծախսերի մասով թերակատարումը եղել է մոտ 34 միլիարդ դրամ: Նշենք, որ բյուջեի թերակատարված եկամուտներին այս տարի ավելացվելու է եւս 64 միլիարդ դրամ, այսինքն` պետական բյուջեի եկամուտները 2012 թվականին պետք է կազմեն ավելի քան 911 միլիարդ դրամ:

Եթե նախկինում իշխող կուսակցությունում կար միայն երկու թեւ` հին ու նոր հանրապետականներ, ապա հիմա ՀՀԿ-ն ունի վարչապետ Տիգրան Սարգսյանի թեւ, ԱԺ նախկին նախագահ Հովիկ Աբրահամյանի թեւ, հին հանրապետականների թեւ, Սերժ Սարգսյանի փեսա Միքայել Մինասյանի թեւ, Սերժ Սարգսյանի աշխատակազմի նախկին ղեկավար Կարեն Կարապետյանի թեւ եւ այսպես շարունակ: Ու հիմա, ինչպես պնդում են ՀՀԿ մեր աղբյուրները, այս թեւերը, որ ներքին կատաղի պայքար են մղում իրար դեմ, փորձում են հնարավորինս շատ քվոտա ստանալ ՀՀԿ համամասնական ցուցակում: Թեւերի առաջնորդները փորձում են առավելագույն տեղեր ապահովել ՀՀԿ համամասնական ցուցակում` իրենց մարդկանց համար: Այս փուլում, ըստ ՀՀԿ աղբյուրների, որոշվում է, թե Տիգրան Սարգսյանը քանի տեղ է ունենալու, Հովիկ Աբրահամյանը` քանի, Միքայել Մինասյանը` քանի: ՀՀԿ-ում վերջնականապես չի որոշվել անգամ, թե ովքեր են գլխավորելու իրենց համամասնական ցուցակի հնգյակը: Մինչ այժմ խոսվել է Սերժ Սարգսյան, Տիգրան Սարգսյան, Տարոն Մարգարյան տարբերակի մասին: ՀՀԿ շտաբի պետ Հովիկ Աբրահամյանը, սակայն, դեռ անցյալ շաբաթ մեզ հետ զրույցում ասել էր, թե հույս ունի, որ այդպես չի լինի: ՀՀԿ մեր աղբյուրները պնդում են, որ ՀՀԿ-ն իր համամասնական ցուցակի մասին պաշտոնապես որեւէ բան չի ասի մինչեւ համագումարը, որը տեղի է ունենալու մարտի 17-ին: Բանն այն է, որ ՀՀԿ-ն, ըստ նույն աղբյուրների, անհամբեր սպասում է Ռուսաստանում տեղի ունենալիք նախագահական ընտրություններին, եւ հենց այդ պատճառով էլ համագումարը նշանակվել է ՌԴ ընտրություններից հետո: Հենց դրանից հետո էլ կհստակեցվի, թե ով է լինելու ՀՀԿ համամասնական ցուցակի երկրորդ համարը: Հասկանալի է, որ նա էլ լինելու է պոտենցիալ վարչապետացուն: Իսկ Ռուսաստանը, ըստ ՀՀԿ աղբյուրների, Սերժ Սարգսյանին կարող է պարտադրել վարչապետ նշանակել ոչ թե Տիգրան Սարգսյանին, այլ բոլորովին այլ մարդու:

Նախօրեից ՀՀԿ-ի եւ ԲՀԿ-ի միջեւ սկսված փոխհրաձգությունը, որի ընթացքում կոալիցիոն գործընկերները սպառնում էին պայթեցնել մեկը մյուսին, երեկ դադարեց: Իշխանական մեր աղբյուրները պնդում են, որ նախօրեին նախագահական նստավայրում կոալիցիոն ուժերի ղեկավարների հետ հանդիպման ժամանակ լուրջ քննարկման առարկա է դարձել նույն օրվա հեռակա վեճը, երբ ՀՀԿ-ն ԲՀԿ-ին էր «փուչիկ» ասում եւ սպառնում պայթեցնել, ԲՀԿ-ն էլ` ՀՀԿ-ին: ՀՀԿ-ն եւ ԲՀԿ-ն պայմանավորվել են, որ այսուհետ բանավիճելու են կոռեկտության շրջանակներում` առանց փոխադարձ վիրավորանքների: Արդեն երեկ առավոտյան ՀՀԿ խոսնակ Էդուարդ Շարմազանովը հայտարարեց, թե ՀՀԿ-ն իրեն կոռեկտ է պահել, բայց միեւնույն ժամանակ էլ նշեց, թե ՀՀԿ-ին ոչ ոք չի կարող պայթեցնել, որովհետեւ բոլորը հասկանում են, որ ՀՀԿ-ին պայթեցնելը վտանգավոր է: Մեր աղբյուրները նշում են, որ նախօրեի երեկոյան ՀՀԿ-ում եւս լուրջ քննարկում է եղել ԲՀԿ-ի հետ սկսված հեռակա կռվի կապակցությամբ: Հանրապետականները խիստ նեղսրտել են ԲՀԿ խմբակցության պատգամավոր Նաիրա Զոհրաբյանի այն հայտարարությունից, որ ՀՀԿ-ի խոսքի ու գործի անհամապատասխանության վերաբերյալ հատորյակներ կարելի է գրել: Թե որքան կտեւի կոալիցիոն գործընկերների միջեւ հաստատված հարաբերական անդորրը, դժվար է ասել:

Երեկ շարունակվեց կարմիրբերետավոր տուժող Շահեն Հարությունյանի հարցաքննությունը, որը սկսվել էր նախորդ նիստին: Նա դատարանին հայտնել էր, որ օգոստոսի 9-ին իր ծառայակցի հետ ծառայություն էր իրականացնում Կասկադի շրջակայքում, երբ հատուկ կապով իրենց օգնության են կանչել, եւ երբ ինքն ու ծառայակիցը հասել են Խնկո-Ապոր գրադարանի մոտ, քաշքշուկ է տեսել, բարձրացել է մի քարի վրա ու բջջայինով նկարահանել: Հարցին, թե ինչու է ծառայողական պարտականությունները կատարելու փոխարեն նկարահանում արել, կարմիրբերետավորն ասաց` հետաքրքիր էր, ապա հավելեց, որ նկարահանելուց հետո դեպքի վայրում կորցրել է բջջայինը: Գործով ամբաստանյալ, Կոնգրեսի ակտիվիստ Արտակ Կարապետյանը հետաքրքրվեց` հեռախոսի անհետացումից հետո դիմե՞լ է ոստիկանություն:

Թեեւ «Սուրբ Գրիգոր Լուսավորիչ» բժշկական կենտրոնի տնօրեն Արա Մինասյանը (Սերժ Սարգսյանի խնամին) մի քանի օր առաջ մեր թղթակցի հետ զրույցում հերքել էր լուրը, թե կենտրոնի աշխատակիցներին պարտադրաբար ՀՀԿ-ացնում են, սակայն բուժանձնակազմը շարունակում է բողոքել: Երեկ «ՀԺ» խմբագրություն դիմած աշխատակիցներից մեկը կրկին վստահեցրեց, որ տնօրինությունը պարտադրում է իրենց` ՀՀԿ ընդունվելու դիմում գրել: Նման դիմում է գրել արդեն 750 աշխատակից: Բուժաշխատողը նաեւ մի զավեշտալի պատմություն պատմեց: Բանն այն է, որ դիմումների հետ միասին` տնօրինությունը աշխատակիցներից լուսանկար էր պահանջել, եւ այդ հարցը արագ լուծելու համար էլ լուսանկարիչ էր հրավիրել բժշկական կենտրոն, որը հենց աշխատավայրում լուսանկարել էր 750 բուժաշխատողի: Մի քանի օր անց լուսանկարները պատրաստ են եղել, բայց 750-ն էլ նետվել են աղբարկղ: Պարզվել է` այնքան են շտապել «ՀՀԿ-անալ», որ ոչ ոք չի նկատել, որ բոլոր աշխատակիցները լուսանկարվել են բժշկական սպիտակ խալաթներով: Դրանից հետո հիվանդանոցի տնօրինությունը կարգադրել է, որ ամեն աշխատակից իր միջոցներով լուսանկարվի: Ասում են` մինչ օրս լուսանկար է ներկայացրել ընդամենը մի քանի հոգի:

Տրիումֆը եթերում
Օրինագծի ընդունման պրոցեսին ուղիղ եթերում հետեւում էր ամբողջ ազգս: Բա որ ասում եմ` եթե ուզում են, կարողանում են աշխատել, չե՛ք հավատում: «Երկիր Մեդիան», «Արմնյուզը» ուղիղ եթերում ժամեր շարունակ ցուցադրեցին այն բարոյական ու մտավոր տվայտանքները, որոնց իրենք իրենց ենթարկեցին ֆրանսիացի պատգամավորները օրենքն ընդունելուն նախորդող ժամերին:

Պատգամավորները խոսում ու խոսում էին, տանջվում էին իրենք ու մեզ էլ տանջում էին իրենց հետ, քանի որ մեր թարգմանիչների որակն, այնուամենայնիվ, դեռ շատ հեռու է բավարար կոչվելուց: Հաջորդ օրը պարզ դարձավ, որ նույնիսկ միջազգային ալիքներ են «Երկիր Մեդիայի» միջոցով հետեւել օրենքի ընդունման ամբողջ ընթացքին: Օրենքի ընդունումից հետո Հայաստանում մեծ ոգեւորություն տիրեց:

Ըստ վաղօրոք հայտնի տեղեկությունների` «Պուտին» ակումբը բացվելու էր փետրվարի 2-ին` Երեւանի ռուսական գրքի տանը: Մինչ այդ, սակայն, պուտինասեր հասարակության առաջ իր դուռը բացեց այս մեկը` «Քլաբորատորիա» ակադեմիական ակումբում, որտեղ ներս մտնողին դիմավորում էին ուրախ բացականչություններով եւ հայտարարում` ահա Պուտինի եւս մեկ երկրպագու: «Մենք ստեղծել ենք առաջին «Պուտին» ակումբը Հայաստանում` առաջ ընկնելով մյուս պսեւդոակումբներից, որոնց հանդեպ, ի դեպ, մենք վատ տրամադրված չենք: Ընդհակառակը, կոչ ենք անում միավորվել եւ միասին մեծարել Պուտինին: Մեր նպատակն է` ստեղծել մի տեղ, որտեղ մարդիկ կկարողանան հավաքվել եւ քննարկել Պուտինի գաղափարները, ծրագրերը, միջոցառումներ կազմակերպել դրանց շուրջ, իրենց սերն արտահայտել Պուտինի նկատմամբ:

Երեկ հրավիրված ասուլիսի ընթացքում Հայաստանի գրողների միության նախագահ Լեւոն Անանյանը, ի զարմանս շատերի, հայտարարեց, որ բանաստեղծ Հովհաննես Թումանյանի թբիլիսյան տունը գնելու պատրաստակամություն է հայտնել Գյումրիի քաղաքապետ Վարդան Ղուկասյանը: Խոսքը Թումանյանի հարկաբաժնի այն հատվածի մասին է, որը վրացի սեփականատեր ունի: Բանավոր խոստումից բացի, Գյումրիի քաղաքապետը ՀԳՄ նախագահին նաեւ գրավոր պարտավորագիր է տվել` իր ընտանիքի անունից խոստանալով տրամադրել անհրաժեշտ գումարը` նշված տունը ձեռք բերելու համար: Միջին գումարը, որ կպահանջվի դրա համար` 100 հազար դոլար է: Հայաստանի երկրորդ քաղաքում շքեղ հյուրանոց կառուցող Վարդան Ղուկասյանի համար ակնհայտորեն դա մի մեծ գումար չէ:

Միջազգային հայտնի մասնագետների պնդմամբ, այս հանդիպումը կարելի է համարել թենիսի պատմության ամենադիտարժան եզրափակիչներից մեկը, եթե ոչ` լավագույնը: Մրցակիցները խաղացին ուղիղ 5 ժամ 53 րոպե` սա ռեկորդ է «Մեծ սաղավարտի» եզրափակիչների համար, ընդ որում` Ջոկովիչն ու Նադալը ցուցադրեցին ուղղակի ֆանտաստիկ խաղ, աներեւակայելի ֆիզիկական ու տեխնիկական պատրաստվածություն: Աշխարհի առաջին ռակետ, 25-ամյա Ջոկովիչը կիսաեզրափակիչում մոտ 5 ժամանոց հանդիպում էր անցկացրել աշխարհի 4-րդ ռակետ Էնդի Մարեյի (Մեծ Բրիտանիա) հետ, ու շատերը հավատացած էին, որ սերբը Նադալի հետ խաղում կզիջի առաջին հերթին ֆիզիկապես, իսկ ահա իսպանացին եզրափակիչից առաջ հոգեբանական խնդիրներ ուներ. նախորդ վեց հանդիպումներում անընդմեջ 26-ամյա Նադալը զիջել է Նովակին: Արդեն պատմական փաստ է` 3-2 հաշվով հաղթեց Ջոկովիչը ու դարձավ Ավստրալիայի բաց առաջնության եռակի հաղթող:

ՖԻԴԵ-ի կանոնակարգի համաձայն, երեկ` հունվարի 31-ին ավարտվել է աշխարհի չեմպիոնի կոչման 2012 թվականի աշնանը կայանալիք հավակնորդների մրցաշարը կազմակերպելու հայտերի ընդունման վերջին ժամկետը, ու Ադրբեջանի շախմատի ֆեդերացիան միակ կազմակերպությունն է, որ ցանկություն է հայտնել հյուրընկալելու այդ մրցաշարը: Հիշեցնենք, որ Բաքվում պետք է կայանար նաեւ հավակնորդների անցյալ տարվա մրցաշարը, բայց Լեւոն Արոնյանը կտրականապես հրաժարվեց խաղալ Բաքվում, ու ՖԻԴԵ-ն ստիպված էր մրցաշարը տեղափոխել Ռուսաստան` Կազան: Հիմա կրկին Ադրբեջանը հայտ է ներկայացրել, ու ինչպես տեղեկացնում են ադրբեջանական լրատվամիջոցները` հայ գրոսմայստերը այս անգամ դժվար թե կարողանա հրաժարվել խաղալ Բաքվում ու որպես օրինակ-ապացույց նշում են նույն Բաքվում կայանալիք «Եվրատեսիլ» երգի միջազգային մրցույթում հայ երգչի նախատեսվող մասնակցությունը:

Հունվարի 31-ին հեղինակավոր «Ինթերնեյշնլ Հերալդ Թրիբյուն» օրաթերթը «Պատմության հետ քաղաքական խաղերի ռիսկերը» վերնագրով հոդվածում անդրադարձել է վերջերս Ֆրանսիայի Սենատի կողմից հայոց ցեղասպանությունը քրեականացնող օրինագծի վավերացմանը:

Հոդվածագիր Ալան Քոուելը, Եվրոպայի ապագայի վերաբերյալ իր դատողություններում, մեկ հարթության մեջ ներառելով Ֆրանսիայի սենատի որոշումը, Շոտլանդիայի անկախության հանրաքվեին Մեծ Բրիտանիայի վարչապետ Քեմերոնի համաձայնությունը եւ վերջերս Բեռլինում Ադոլֆ Հիտլերի «Մայն Կամպֆի»-ից որոշ հատվածների տպագրությունն արգելելու կապակցությամբ ծայր առած իրավական քաշքշուկները, նշում է, որ այս բոլոր իրադարձությունները հանգեցնում են մեկ ընդհանուր եզրակացության. «...անցյալը վերհանելու եւ ներկայացնելու եղանակն է կանխորոշում ազգային ինքնության հիմնարար առասպելների եւ տաբուների ձեւավորումը, եւ այն, թե ինչպես են ապագա սերունդներն ընկալում իրենց անցյալը: