Արխիվ

Վերը բերված գծապատկերներում ներկայացված է մի քանի լայն սպառման մթերքների գների փոփոխությունը մեկ տարվա ընթացքում` անցած տարվա հունվարի 15-ից մինչեւ այս տարվա հունվարի 15-ը: Ներկայացված են ապրանքների մեծածախ գները` այն գները, որոնցով փոքր ու միջին խանութները ստանում են այդ ապրանքները իրենց մատակարարներից: Արդյունքը, ճիշտն ասած, այնքան էլ համահունչ չէ մեր պաշտոնյաների դեմքերի երջանիկ արտահայտություններին: Գները շատ ավելի շատ են աճել, քան արտացոլված է գնաճի պաշտոնական ցուցանիշում: Գծապատկերներում բերված յուրաքանչյուր մթերքի անվանման կողքին նշված է, թե քանի տոկոսով է տվյալ մթերքը թանկացել 2010 թվականի հունվարի 15-ից մինչեւ 2011 թվականի հունվարի 15-ը:

Երեկ ՀՀ պետեկամուտների կոմիտեն արձագանքել է մեր թերթի հրապարակումներից մեկին, ըստ որի` առաջիկայում բարձրանալու են Չինաստանից Հայաստան ներկրվող ապրանքների հսկիչ գները: ՊԵԿ-ը իբր հերքել է մեր հրապարակած տեղեկությունը, հայտնելով, թե դա չի համապատասխանում իրականությանը: Մյուս կողմից, սակայն, ՊԵԿ-ը պարզաբանել է. «Պարզապես համակարգում ընթանում է մաքսային հսկողության նոր մեխանիզմների շարունակական կատարելագործում, որն ուղղված է հիմնականում այն արտաքին տնտեսական գործունեություն իրականացնող սուբյեկտներին, ովքեր փորձեր են անում, օգտվելով պարզեցված ընթացակարգերից, շրջանցել օրինական դաշտը: Մասնավորապես, այսպես կոչված, «տուրիստական բեռների» անվան տակ փորձ է արվում նաեւ բարձրարժեք բեռներ տեղափոխել` դրանք ձեւակերպելով որպես էժանագին ապրանք»: Այլ կերպ ասած, ոչ թե հսկիչ գներն են բարձրանալու, այլ «նոր մեխանիզմների շարունակական կատարելագործում է» իրականացվելու, որի արդյունքում, կարելի է չկասկածել, Չինաստանից ներկրվող ապրանքներից ավելի շատ է հարկ գանձվելու, քան մինչ այժմ: Մաքսային ծառայությունը, ի հեճուկս Հայաստանի Հանրապետության օրենսդրության պահանջների, ներկրվող ապրանքները մաքսազերծելու համար հիմնականում որպես հիմք ընդունում է ոչ թե ներկրողի ներկայացրած հաշիվ ապրանքագիրը (ինվոյսը), այլ ինքն է որոշում, թե ինչ գին սահմանի, ըստ այդմ էլ` մաքսազերծում է ապրանքը: Սա իրականացվում է հիմնականում անհատ ձեռներեցների եւ փոքր ընկերությունների ներկրած ապրանքների դեպքում: Անկախ նրանից, թե ինչ անվան տակ են բարձրացվելու հարկերը, արդյունքը լինելու է նույնը, այսինքն` տուժելու են փոքրածավալ ապրանքներ ներկրող գործարարները:

ՀՀ ոստիկանության քրեական հետախուզության նախկին պետ Հովհաննես Թամամյանին կդատի Կենտրոն եւ Նորք-Մարաշ վարչական շրջանների ընդհանուր իրավասության դատարանի երիտասարդ դատավոր Արշակ Վարդանյանը: Նշենք, որ նա Կենտրոն եւ Նորք-Մարաշ վարչական շրջանների ընդհանուր իրավասության դատարանի նախկին նախագահ Ժորա Վարդանյանի որդին է, որը դատավոր է նշանակվել անցած տարվա հոկտեմբերի 31-ին: Մինչ այդ, նա ՀՔԾ քննիչ էր: Թամամյանի գործով դատական նիստի օրը դեռեւս չի նշանակվել, դատավորը ծանոթանում է գործի նյութերին: Բացի Թամամյանից, գործով անցնում են եւս երկու անձինք: Նրանք են` ՀՀ ոստիկանության Երեւան քաղաքի վարչության Արաբկիրի բաժնի պետի օպերատիվ աշխատանքների գծով տեղակալ Արմեն Պետրոսյանը եւ ՀՀ ոստիկանության քննչական գլխավոր վարչության հատկապես կարեւոր գործերի քննության վարչությունում ՀԿԳ ավագ քննիչ Վահան Խանզադյանը: Նրանք մեղադրվում են պաշտոնեական դիրքը չարաշահելու համար: Երեքն էլ կալանավորված են:

2011 թվականի պետական բյուջեով նախատեսված էր, որ մեկ դոլարի փոխարժեքի միջինը այդ տարվա համար պետք է կազմի 358 դրամ: Գործնականում, սակայն, սա կազմել է 372 դրամ 50 լումա:

ՀՀԿ-ԲՀԿ հերթական սրացումը սկսվեց անցյալ շաբաթ, երբ «Բարգավաճը», Դաշնակցության եւ «Ժառանգության» հետ համատեղ, դիմեց ԱԺ նախագահ Սամվել Նիկոյանին` 100 տոկոս համամասնական ընտրակարգին անցնելու վերաբերյալ խորհրդարանական լսումներ անցկացնելու համար: Հենց նույն օրը ԱԺ ՀՀԿ-ական փոխնախագահ Էդուարդ Շարմազանովը հայտարարեց, թե ԲՀԿ-ն իր հայտարարություններում ազնիվ չէ. «Քաղաքականության մեջ հաջողում են այն ուժերը, ում այո-ն այո է, ոչ-ը` ոչ: Սա քաղաքական հնարք է, եւ այստեղ մենք տեսնում ենք խոսքի եւ գործի հստակ տարբերություն: Ավելի լավ բան կարող էին հորինել»:

Սրան հաջորդեց ԲՀԿ խմբակցության պատգամավոր Նաիրա Զոհրաբյանի պատասխանը: Երեկ առավոտյան նա «Լրագիր»-ով Շարմազանովին խորհուրդ տվեց ձեռնպահ մնալ խոսքի եւ գործի անհամապատասխանության մասին խոսելիս. «Այլապես խոսքի եւ գործի անհամապատասխանության, կատարյալ անգործության ու ավելին` գործունեության վնասարարության այնպիսի դասական օրինակներ կան, որ անհրաժեշտության դեպքում կարող ենք հերթով թվարկել»: Զոհրաբյանը նաեւ զգուշացրեց, որ որեւէ հոխորտանք, ոչ կոռեկտ խոսք եւ փաստի խեղաթյուրում անպատասխան չեն մնալու:

ՀՀ նախկին արտգործնախարար Վարդան Օսկանյանը երեկ փաստորեն հաստատել է, որ հնարավոր է` ԲՀԿ համամասնական ցուցակում հայտնվի: Նա հանդես է եկել հայտարարությամբ, որտեղ մասնավորապես ասված է. ««Բարգավաճ Հայաստան» կուսակցության իմ ներգրավվածության մասին խոսակցություններն անհիմն չեն: ԲՀԿ-ի հետ նման քննարկումներ ունեցել եմ, բայց այլ քաղաքական ուժերի հետ եւս ունեցել եմ քննարկումներ: Այս պահին դեռ որոշում չեմ ընդունել եւ կարծում եմ` վերջնական որոշման համար դեռ ժամանակ կա: Սակայն բացառված չէ, որ ներքաղաքական գործընթացներն ինձ ստիպեն, որ արագացնեմ որոշումս»: Մենք տեղեկացրել էինք, որ Օսկանյանը լինելու է ԲՀԿ համամասնական ցուցակի 2-րդ համարը: Նախկին ԱԳ նախարարը երեկ ասել է, որ ՀՀ-ն լրջագույն եւ խորքային բարեփոխումների կարիք ունի, որոնք հնարավոր են, եթե ԱԺ-ում ստեղծվի քաղաքական նոր հարաբերակցություն: Նշել է նաեւ, որ այսօրվա քաղաքական իրավիճակը հաշվի առնելով, ակնհայտ է, որ ընտրությունները պետք է անցկացվեն բացառապես համամասնական ընտրակարգով, եւ ցանկալի կլինի, որ այդ մոտեցումը պաշտպանող ուժերը առաջիկա ԱԺ լսումներից հետո ժամանակ չկորցնեն եւ ընդհանուր մոտեցումը վերածեն քաղաքացիական շարժման` չբացառելով անգամ այդ ուժերի առավել սերտ համագործակցությունն ընտրություններում:

Նախորդ նիստը հետաձգվել էր, քանի որ «Վարդաշեն» ՔԿՀ-ում կալանավորված Քեշիշյանին համապատասխան ծառայությունը չէր կարողացել տեղափոխել դատարան: Հիշեցնենք, որ անցած տարի նա որպես տուժող էր հանդես գալիս հայտնի բռնցքամարտիկ, Հայ ազգային կոնգրեսի ակտիվիստ Սամսոն Խաչատրյանի դեմ հարուցված քրեական գործով: Միհրան Քեշիշյանի վերաբերյալ քրեական գործը հարուցվել էր նրա կողմից 12 հազար ԱՄՆ դոլար կաշառք ստանալու փաստի առիթով: Ամբաստանյալի աթոռին է հայտնվել նաեւ ոստիկանության շտաբի նախկին ավագ տեսուչ Կարեն Խաչատրյանը: Համաձայն գործի նյութերի, Քեշիշյանը 12 հազար ԱՄՆ դոլար էր պահանջել Քնարիկ Անտոնյանից` «Նուբարաշեն» ՔԿՀ դատապարտյալներից մեկին թմրանյութ փոխանցելու փորձ անելու վերաբերյալ հարուցված քրգործով նրան մեղադրանք չառաջադրելու համար: Իսկ Խաչատրյանը մեղադրվում է նշված գործարքում որպես միջնորդ հանդես գալու եւ դրա դիմաց 1000 ԱՄՆ դոլար ստանալու համար:

2011-ի սեպտեմբերի 28-ին Հանրապետության հրապարակում թռուցիկներ բաժանող Կոնգրեսի ակտիվիստների եւ ակցիան լուսաբանող լրագրողների վրա կատարված հարձակման վերաբերյալ քրգործը դեռ կասեցված է` երեկ հայտնեցին ոստիկանության Կենտրոնի քննչական ծառայությունից: Ավելի վաղ տեղեկացրել էինք, որ գործի կասեցրել էին այն «հիմնավորմամբ», թե ոստիկանությունը «չի կարողանում» գտնել կասկածյալներին, մինչդեռ մեր թղթակցին հաջողվել էր ոչ միայն գտնել նրանց, այլեւ մեկին լուսանկարել «Գումի» շուկայի մոտ: Երեկ նա կրկին տեսել է այդ երիտասարդներից մեկին` «Ռոսիա» կ/թ-ի մոտ եւ որոշ հարցեր է ուղղել ոստիկանության Կենտրոնի բաժնի պետի օպերատիվ աշխատանքների գծով տեղակալ Արթուր Հովհաննիսյանին:

Նախ նա հանդիպեց Հայ ազգային կոնգրեսի առաջնորդ Լեւոն Տեր-Պետրոսյանի հետ, այնուհետեւ մասնակցեց Ֆրիդրիխ Նաումանի հիմնադրամի աջակցությամբ ՀՀՇ-ի կազմակերպած կոնֆերանսին, որին ներկա էին նաեւ ԵԱՀԿ-ի եւ ԵՄ հայաստանյան պատվիրակության ներկայացուցիչներ: Տեղի ունեցավ նաեւ նրա եւ Կոնգրեսի համակարգող Լեւոն Զուրաբյանի, ապա եւ` նրա ու ՀՀՇ վարչության ներկայացուցիչների հանդիպումը: Տիկին Վան դեր Լաննը զրուցեց Հայաստանի լիբերալ, երիտասարդական կառույցների ներկայացուցիչների հետ: Հայաստանյան իր այցը Վան դեր Լաննը ավարտեց ՀՀՇ վարչության ներկայացուցիչների հետ հանդիպումով: Երեկ նա վերադարձավ իր հայրենի Հոլանդիա` մինչ այդ պատասխանելով մեր հարցերին:

«Կարելի է միայն մի եզրակացություն անել: Հայաստանի Լոռու մարզի բնակչությունն այնքան է լյումպենացված, որ փողի դիմաց պատրաստ է ամեն ինչի, անգամ կարող է աչք փակել հարազատ երեխայի նկատմամբ սեռական ոտնձգությունների վրա: Եթե դա լիներ շարքային այլասերություն, մի բան է, բայց եթե այդ այլանդակությունները ծնվում են մարդկանց դեգրադացիայի եւ նյութական անկման պատճառով, այ դա արդեն ազգային անվտանգության խնդիր է»,- գրում է դերասանը, իսկ մինչ այդ հիշում ու հիշեցնում, թե ինչպես Լոռու մարզի Ախթալայում գործարար Սերոբ Տեր-Պողոսյանը, թանկ նվերների դիմաց, պեդոֆիլիայի մի «գողտրիկ» անկյուն էր ստեղծել: Հետո անցնում է Թեղուտի խնդրին եւ նկատում, որ բնակչության զգալի մասը կողմ է անտառների հաշվին գործարան կառուցելուն, որովհետեւ աշխատատեղեր են ստեղծվելու:

Արդեն 80-ն անց Ռաֆիկ Եղինյանը հոգնել է միայնակ ապրելուց եւ ուզում է գտնել մեկին, որը կընկերակցի իրեն, միասին ապրելով` կփորձեն առօրյան փոքր-ինչ հետաքրքիր դարձնել: Երկու տարի առաջ նրա կինը մահացել է, իսկ երեխաներից յուրաքանչյուրն իր կյանքն ունի ու հորից առանձին է ապրում: «Ուզում եմ` մեկը լինի ինձ ընկեր, նույնիսկ` թեկուզ տղամարդ լինի: Ճաշը մենք կեփենք` ես էլ, ինքն էլ, շորեր լվանալն էլ` մեկին փող կտանք, կլվանա: Հիմա ասում եմ` թեկուզ մի կին լինի` տարիքով կին, խելացի կին, լուրջ կին, որ ինձ ընկերություն անի, ես իրեն ոնց որ պետք է կպահեմ: Նույնիսկ կպահեմ քրոջ պես: Ինքն էլ ճաշ եփի, շորս լվանա»,- ասում էր ՀԺ-ի խմբագրություն այցելած պապիկը: Նա լոռեցի է, թեեւ ապրում է Կոտայքի մարզի Քանաքեռավան համայնքում եւ կնախընտրեր, որ իր ապագա ընկերը կամ ընկերուհին էլ լոռեցի լինի: Կարծում է` այդ դեպքում իրար ավելի լավ կհասկանան: «Շատ եմ կարդում: Մեկ էլ զարթնում եմ, տեսնեմ` ակնոցն էլ է ձեռքիցս ընկել, թերթն էլ է ձեռքիցս ընկել: Վայրկյանը ժամ է տեւում, աղջիկ ջան: Վիճակս ահավոր է»,- պատմում էր նա: Ասում էր` ընկեր ունենալու դեպքում նաեւ իր հողամասը կսկսեն մշակել, ինչը, միայնակ լինելով, գրեթե չի անում:

Վերջին տուրից առաջ Լեւոնը 1 միավորով գերազանցում էր 2-րդ տեղում ընթացող նորվեգացի Մագնուս Կառլսենին ու ադրբեջանցի Թեյմուր Ռաջաբովին: Վիճակահանության համաձայն, վերջին տուրում Արոնյանի մրցակիցը հենց Ռաջաբովն էր, սպիտակներով էլ խաղում էր հայ շախմատիստը: Արդեն 12-րդ քայլում մրցակիցները ոչ ոքի համաձայնեցին, քանի որ 3 անգամ անընդմեջ կրկնեցին նույն քայլերը. Արոնյանին այս կես միավորը բավարար էր նվաճելու համար Վեյկ ան Զեեի միանձնյա հաղթողի կոչումը: «Անկեղծ ասած, ես պայքարի էի պատրաստվել, բայց Լեւոնից էր կախված, թե ինչ ընթացք կստանա մեր պարտիան: Մրցակիցս հնարավորություն ուներ գլխավորելու վարկանիշային աղյուսակը, ու ինձ թվում էր` նա հաղթանակի համար կխաղա: Իմ կարծիքով, համաշխարհային դասակարգման աղյուսակում 1-ին տեղ դուրս գալը շատ ավելի կարեւոր է, քան ինչ-որ մրցաշարում հաղթելը: Բայց Լեւոնը նախընտրեց ոչ ոքին»,- Արոնյան-Ռաջաբով պարտիայից հետո այսպիսի ուշագրավ հայտարարություն է արել ադրբեջանցի շախմատիստը:

Կազանում անցկացված թեքվոնդոյի օլիմպիական վարկանիշային մրցաշարում փայլուն հաջողության է հասել հայաստանցի Արման Երեմյանը: Մինչեւ 80 կգ քաշայինների մրցաշարում 26-ամյա մարզիկը, տոնելով 3 հաղթանակ, դարձել է հաղթող ու նվաճել Օլիմպիական խաղերի ուղեգիր: Երեմյանը առաջին հայ թեքվոնդոյիստն է, որ կմասնակցի Օլիմպիական խաղերին, ընդ որում, Հայաստանը 18-րդ երկիրն է, որի մարզիկները նվաճում են թեքվոնդոյի Օլիմպիական մրցաշարին մասնակցելու ուղեգիր: Նշենք, որ Կորեայում ծնունդ առած այս մրցաձեւը բառացիորեն թարգմանվում է «ոտքի ու բռունցքի արվեստ», իսկ առաջին անգամ օլիմպիական մրցաձեւ է դարձել 2000 թվականին Մելբուռնում անցկացված Օլիմպիական խաղերի ժամանակ: