Արխիվ

ԱՄՀ ներկայացուցիչների «բերանը բացվում է» սովորաբար Հայաստանում իրենց գործունեության ամենավերջում, ու հրաժեշտի ասուլիսներում նրանք այնպիսի բաներ են բացահայտում ու հայտարարում, որ մարդու մազերը բիզ-բիզ են կանգնում: Հիշենք թեկուզ ԱՄՀ հայաստանյան ներկայացուցիչ Նինկե Օմեսի հրաժեշտի ասուլիսը: Այդ ժամանակ նա հայտարարեց, թե 2009-ի փետրվարին դուրս չէր գալիս ՀՀ կենտրոնական բանկի նախագահի աշխատասենյակից եւ պահանջում էր, որ ԿԲ-ն արտարժութային ինտերվենցիաներ չանի, ու ապահովվի դրամի ազատ լողը: Ի վերջո, 2009-ի մարտի 3-ին շուրջ 700 միլիոն դոլար քամուն տալուց հետո ԿԲ դադարեցրեց ինտերվենցիաները, իսկ դրամը մեկ օրվա ընթացքում արժեզրկվեց մոտ 25 տոկոսով: ԿԲ-ն ինտերվենցիաները իրականացրեց առնվազն 2 ամիս, բայց նույն Նինկե Օմեսը այդ երկու ամիսների ընթացքում ծպտուն անգամ չէր հանում: Եւ դա միայն այն պատճառով չէր, որ Օմեսի ամուսինը` Անդրեյ Շինկեւիչը այդ ժամանակ աշխատում էր «Ամերիա» բանկում եւ, մեղմ ասած, բարձր աշխատավարձ էր ստանում` 12 հազար դոլար ամսական:

Ինչպես արդեն տեղեկացրել ենք, վերջին օրերին Երեւանի տնտեսավարողները, մասնավորապես, խանութների սեփականատերերը հրավիրվում են ՀՀ պետական եկամուտների կոմիտեի հարկային տեսչության տարածքային կառույցներ, որտեղ նրանցից պահանջում են կանխավճարի տեսքով հարկեր մուծել պետբյուջե: Երեկ ՊԵԿ-ից ստացել ենք այս առնչությամբ մեր հարցման պատասխանը, որում ասվում է, թե իբր «կանխավճարների հավաքագրումների եւ գերավճարների կուտակումների բացառումը ՊԵԿ-ի գործունեության ռազմավարական առաջնահերթություններն են: Հարկային համակարգում վերացված է այդ երեւույթը»: Սակայն պատասխանի ամենաուշագրավ մասը հետեւյալ հատվածն է. «Չենք բացառում, որ որոշ հարկատուներ կարող են հրավիրվել գրանցման վայրի հարկային տեսչություններ` իրենց հարկային հաշվարկների հնարավոր անճշտություններն ուղղելու համար: Իսկ ինչ վերաբերում է Ձեր խմբագրության ստացած բողոքներին, ապա կոնկրետ դեպքեր ներկայացնելու պարագայում պատրաստ ենք դրանք քննել եւ սպառիչ պատասխան տալ խմբագրությանը»: Այլ կերպ ասած, ՊԵԿ-ը փորձում է ինչ-որ կերպ հիմնավորել տնտեսավարողներին մասսայական հարկային տեսչություններ հրավիրելու փաստը, միեւնույն ժամանակ ցանկանալով պարզել, թե ովքեր են այն հանդուգն տնտեսավարողները, որ համարձակվել են բողոքել մեզ:

Երեկ ՀՀ տնտեսական մրցակցության պաշտպանության հանձնաժողովը մի քանի խախտումների համար «Լուսակերտի տոհմային թռչնաբուծական ֆաբրիկա» ՍՊԸ-ին մի քանի որոշումներով տուգանել է ընդհանուր առմամբ 5 միլիոն դրամով: Մասնավորապես մեկ միլիոն դրամ տուգանել է հանձնաժողովի նախկին որոշումը չկատարելու, 500 հազարական դրամ` 8 տարբեր տեսակի եւ փաթեթավորմամբ ձվերը չմակնշելու համար: Հիշեցնենք, որ հուլիսի 28-ին ԼՏԹՖ-ն արդեն տուգանվել էր ձվերը չմակնշելու համար: Տպավորություն է ստեղծվում, որ հանձնաժողովը սեւեռված է այս ձեռնարկության վրա:

«Եթե ամենաաղքատ պետությունը հետխորհրդային շրջանում Ղրղըզստանն է, որի պատգամավորները ստանում են ամսական 3 հազար դոլար աշխատավարձ (ՀՀ-ում ամսական 300 հազար դրամ է), հիմա համեմատեք եւ պատկերացրեք: Մեր պատգամավորը պիտի կարկատած շալվարով գնա արտասահմանյան պատգամավորների հետ հանդիպելու կամ ինչ-որ հարցերով զբաղվելու»,- երեկ մեզ հետ զրույցում ասաց Ռաֆիկ Պետրոսյանը: Ազգային ժողովի այս քառօրյա նիստերի օրակարգում ընդգրկված է «ՀՀ օրենսդիր, գործադիր եւ դատական իշխանության մարմինների ղեկավար աշխատողների պաշտոնային դրույքաչափերի մասին» օրինագիծը: Կոալիցիան այն շրջանառության մեջ է դրել դեռ 2008-ի ամռանը. նախագծի տակ դրված են ՀՀԿ-ից Ռաֆիկ Պետրոսյանի եւ Շիրակ Թորոսյանի, ԲՀԿ-ից` Արամ Սաֆարյանի եւ Վարդան Բոստանջյանի, ՕԵԿ-ից` Հովհաննես Մարգարյանի եւ կոալիցիայի նախկին անդամ ՀՅԴ ներկայացուցիչ Արծվիկ Մինասյանի ստորագրությունները: Նախագծով նախատեսվում է կրկնապատկել օրենսդիր, գործադիր եւ դատական իշխանության մարմինների ղեկավար աշխատողների աշխատավարձը:

Ռազմական ոստիկանությունից հայտնում են, որ սույն գործով «բացահայտելու ոչինչ չի մնացել, քանի որ բոլորն արդեն ա-մեն ինչ ասել են եւ գրել»: Նշենք, սակայն, որ սույն գործի հետ կապված բազմաթիվ հարցեր դեռեւս բաց են մնում: Բացի այդ, ըստ մեր տեղեկությունների, ՊՆ եւ ՌՈ-ն նմանատիպ եւս մեկ տեսագրություն են հայտնաբերել:

Ձայնը դրվա՞ծ էր
Հայտնի տեսագրությունը, որի մեջ երեւում էր, թե ինչպես է զինվորական տաբատով մեկը` սպա, բռնության եւ ստորացումների ենթարկում երկու շարքային զինծառայողի, արվել էր մի ժամկետային զինծառայողի կողմից: Քանի որ տեսագրության ձայնը վատ որակի է եղել, դրա իսկությունը պարզելու ուղղությամբ աշխատող աշխատանքային խմբին նախ թվացել է, որ ձայնագրությունը «դրված է» տեսագրության վրա, այս-ինքն` քանի որ տեսագրության մեջ տեղի ունեցողը չի համապատասխանել հատուկ տեխնիկայի միջոցով տեսագրությունից վերծանված ձայներին, մասնագետները մի պահ կարծել են, որ տեսագրության մեջ լսվող ձայնը կապ չունի տեսագրության հետ:

Սեպտեմբերի 27-ին Սյունիքի Կապան քաղաքում սննդային թունավորումով երեք հոգի տեղափոխվել է Կապանի հիվանդանոց: Պարզվել է, որ Կապանի բնակիչներ` 42-ամյա Նունե Թեւանյանի, 19-ամյա Սաթինե եւ 16-ամյա Դավիթ Գասպարյանների մոտ թունավորում է առաջացել սեպտեմբերի 25-ին, տանը, ճաշի ժամանակ անտառային սունկ ուտելու հետեւանքով: Ըստ բժիշկների` այժմ տուժածների վիճակը բավարար է:

Վրաստանի ԱԳ նախարար Գրիգոլ Վաշաձեն հոկտեմբերի 3-4-ին կայցելի Հայաստան: Վրաստանի ԱԳՆ մամուլի ծառայության փոխանցմամբ, այցելության շրջանակներում կքննարկվեն երկկողմ հարաբերություններին վերաբերող հարցեր: Քննարկվող թեմաների շարքում կլինեն Վրաստանում հայկական դպրոցներին, հայկական եկեղեցիներին վերաբերող, ինչպես նաեւ այդ երկրում հայ համայնքի համար արդիական այլ հարցեր:

Սերժ Սարգսյանը երեկ այցելել է «Գրանդ Քենդի» ընկերություն` հանրապետության սննդի արդյունաբերության առաջատարներից մեկը համարվող այդ ընկերության հիմնադրման 10-ամյակի կապակցությամբ: Հանրապետության ղեկավարը շրջել է «Գրանդ Քենդի»-ի արտադրամասերում, ծանոթացել տեխնոլոգիական հնարավորություններին ու արտադրության պայմաններին, զրուցել աշխատակիցների հետ:

Շրջայցին հաջորդած խորհրդակցության ժամանակ ընկերության սեփականատերը Սերժ Սարգսյանին ներկայացրել է «Գրանդ Քենդի»-ի գործունեության անցած տասը տարվա ընթացքում գրանցված հիմնական ցուցանիշները եւ ընկերության առաջիկա ծրագրերը:

Սերժ Սարգսյանի սեպտեմբերի 28-ի հրամանագրով Չինաստանում Հայաստանի արտակարգ եւ լիազոր դեսպան Արմեն Սուրենի Սարգսյանին շնորհվել է ՀՀ արտակարգ եւ լիազոր դեսպանի դիվանագիտական աստիճան:

Եղբա՛յր, շատ բարդ բան ես խնդրում, «գլոբալ»-ի մասին գրե՞լ կլինի: Մեզ մոտ ամեն բան այնքան գլոբալ է, ու ես էլ այնքան լոկալ եմ, որ դա երեւի իմ ուժերից վեր է: «Գլոբալ»-ի մասին պետք է գլոբալ գրել, իսկ դրա համար մի հայոց մեծություն է պետք, որն իմաստնությամբ լցոնված լինի՝ ասես ընտրատուփը որեւէ իշխանամետ գործչի օգտին քվեարկած ընտրաթերթիկներով: Աշխարհով ման եկած, գլոբուսը տեսած տղա է պետք՝ պատգամավոր կամ, նա խուդոյ կանեց, հեռուստագլուխ քաղաքագետ, որը գիտի՝ ի՛նչ է մտածում Օբաման գարեջուր խմելիս եւ Պուտինը` սաունա գնալիս, ի՛նչ է լինելու Իրանի ճակատագիրը եւ Վենեսուելայի բախտը, նաեւ խորամուխ է Ղարաբաղյան կարգավորման հարցի մանրամասների եւ Կոսովոյի նախադեպի մեջ, նաեւ ի զորու է հօգուտ հայկական դիվանագիտության բացատրել Ադրբեջանի ցանկացած քայլ ու երկրագնդում տեղի ունեցող ցանկացած իրադարձություն:
Ինձ նման դամասեդ, տնայնագործ, բանից բեխաբար ու սաղ օրն արհեստանոցում նստած, նեղ լոկուսում տեղակայված ու հորս թվի ռոքեր լսող ուստեն ի՞նչ գործ ունի գլոբալիստիկայի հետ:

- Աշոտ, Չեխիայում ներկայացրած Ձեր «Երազանքի րոպե» լուսանկարում զինծառայող է: Եւ, ըստ Ձեզ` մեր այսօրվա բանակում գտնվող երիտասարդը ինչի՞ մասին կարող է երազել:

- Գիտե՞ք, ես ինքս ծառայել եմ բանակում, ու ծառայության ընթացքում իմ պատկերացումները բանակի մասին տրամագծորեն փոխվել են լավ առումով: Գնալուց առաջ բանակի նկատմամբ այդ կարծրատիպային վերաբերմունքն էր մոտս, դե, բոլոր բացասական առումներով: Գնալուց հետո մի շատ կարեւոր բան հետս բերեցի բանակից. դա միասնականության զգացումն է: Ոչ թե վերամբարձ իմաստով, կարգախոսներում օգտագործվող միասնականությունը, այլ ամենանեղ շրջանակում ու ռեալ ինչ-որ գործողություններ իրականացնելու առումով, ընկերության առումով միասնականության զգացումը: Դա շատ կարեւոր է: Դրա կարեւորությունը ես չէի ընկալում բանակից առաջ: Իսկ կոնկրետ իմ զորամասում ես ոչ մի բացասական երեւույթի չեմ հանդիպել:

Օգոստոսի 4-ին ԼՂՀ-ում ծնված փոքրիկը, որին Մուշեղ անունով են կնքել, Ստեփանակերտի «Արեւիկ» մանկական բուժմիավորումում բարդ վիրահատությունների է ենթարկվել, ինչի արդյունքում այսօր արդեն բժիշկները վստահաբար ասում են` նրա կյանքը փրկված է: Մանկիկի մոտ ախտորոշվել է գաստրոշիզիս, նրա ամբողջ աղեստամոքսային տրակտը` սկսած ստամոքսից մինչեւ սիգմայաձեւ աղին« գտնվել են որովայնի խոռոչից դուրս: Վիրահատության ընթացքում աղեգալարները տեղադրվել են որովայնի խոռոչում« արհեստականորեն մեծացվել է որովայնի խոռոչի ծավալը, նույն նպատակով կատարվել է նաեւ որովայնի կողմնային պատերի մեխանիկական ձգում` պահպանելով հյուսվածքների կենսունակությունը եւ այլն: Մի քանի օր անց կատարվել է վիրահատության 2-րդ փուլը` որովայնի խոռոչի ամբողջականության վերականգնման նպատակով: «Արեւիկ»-ի վիրաբուժական բաժանմունքի վարիչ Սամվել Մելքումյանը մեզ հետ զրույցում դժվարացավ միանշանակ ասել, որ երեխան կարող է լիարժեք կյանքով ապրել: «Այս պահին մենք ենթադրում ենք« որ դա կլինի 90 %-ով»,- ասաց նա` հավելելով« որ նմանատիպ երեխաների մոտ երբեմն նկատվում է մտավոր թերզարգացածություն, ինչը, փաստորեն, կերեւա ավելի ուշ: Նշենք, որ բժշկի տվյալներով, վերջին 10 տարիների ընթացքում ԼՂՀ-ում գրանցվել է գաստրոշիզիսի 3 դեպք: Առաջին 2 նորածինները մահացել են:

Հայաստանը այս մրցաշարերում ներկայացված էր 48 շախմատիստներով, որոնցից միայն 3-ին հաջողվեց մեդալներ վաստակել: Մինչեւ 18 տարեկանների պատանիների Եվրոպայի անցյալ տարվա չեմպիոն, այս մրցաշարում ամենաբարձր վարկանիշն ունեցող գրոսմայստեր Սամվել Տեր-Սահակյանը (նկարում) 9 հնարավորից վաստակեց 8 միավոր ու միայն լրացուցիչ ցուցանիշներով չեմպիոնի կոչումը զիջեց նույնքան միավոր վաստակած ադրբեջանցի շախմատիստ Վագիֆ Դուրարբեյլիին: Մինչեւ 16 տարեկան պատանիների մրցաշարում էլ գրոսմայստեր Կարեն Գրիգորյանը հայտնվեց նմանատիպ իրավիճակում. ռուսաստանցի Իվան Բուկավշինի հետ հավաքելով հավասար միավորներ, Գրիգորյանը լրացուցիչ գործակիցների հաշվարկից հետո հայտնվեց 2-րդ հորիզոնականում: Ամենակրտսեր տարիքային խմբում` մինչեւ 8 տարեկան տղաների մրցույթում, արծաթե մեդալը նվաճեց Շանթ Սարգսյանը: Նա ընդամենը կես միավորով զիջեց չեմպիոնի տիտղոսը նվաճած ադրբեջանցի Աբդուլա Գադիմբայլիին, որը վաստակեց 8 միավոր: Մեր մյուս մասնակիցներից լավագույն հնգյակում հայտնվեցին Ռաֆայել Բակունցը (մինչեւ 18 տ., 4-րդ տեղ), Արման Միքայելյանը (մինչեւ 14 տ., 5-րդ տեղ) եւ Ռոբերտ Աղասարյանը (մինչեւ 16տ. 5-րդ տեղ): Հայ շախմատիստուհիները անմասն մնացին մեդալներից: Ընդհանուր առմամբ առաջնությունում լավագույնը ադրբեջանցի շախմատիստներն էին, որոնք տարիքային 3 խմբերում նվաճեցին չեմպիոնի կոչումները: Վրաստանն ու Ռուսաստանը վաստակեցին 2-ական, իսկ Ուկրաինան, Սլովակիան, Թուրքիան, Բուլղարիան ու Լեհաստանը` 1-ական ոսկե մեդալ:

Թուրքիայի արտգործնախարար Ահմեդ Դավութօղլուն երեկ ելույթ է ունեցել ԱՄՆ-ի Հարվարդի համալսարանում, ուր 200 ուսանողների ու դասախոսների ներկայությամբ հիմնականում խոսել է հայ-թուրքական հարաբերությունների ու ղարաբաղյան հակամարտության կարգավորման շուրջ: Ընդ որում, այս երկու խնդիրների լուծումը նա ներկայացրել է փոխկապակցված: Այսպես, CNNturk-ի փոխանցմամբ, խոսելով 2009-ի հոկտեմբերի 13-ին ստորագրված հայ-թուրքական արձանագրությունների մասին` Դավութօղլուն ասել է, թե Հայաստանի եւ Թուրքիայի միջեւ հարաբերությունների կարգավորումը դեռ բավարար չէ, եւ անհրաժեշտ է, որ դրա հետ մեկտեղ կարգավորվեն նաեւ Հայաստանի ու Ադրբեջանի միջեւ հարաբերությունները: «Եթե Հայաստանը խաղաղություն է ուզում, ուրեմն պետք է հեռանա Ադրբեջանի օկուպացված տարածքներից»,-ասել է Դավութօղլուն` ակնարկելով, որ առանց ԼՂ հիմնախնդրի կարգավորման` հայ-թուրքական արձանագրությունները չեն վավերացվի Թուրքիայի Ազգային մեծ ժողովում: Թուրքիայի թիվ մեկ դիվանագետը նաեւ ակնարկել է, թե նման իրավիճակում Հայաստանը օր-օրի ավելի է աղքատանում:

Շվեյցարիայի Դաշնային դատարանը երեկ մերժել է Թուրքիայի «Աշխատանքի կուսակցության» Եվրոպայի ներկայացուցիչ Ալի Մերջանի վերաքննիչ բողոքը եւ ուժի մեջ թողել Ժնեւի քաղաքային դատարանի` մայիսին ընդունած վճիռը, որով Հայոց ցեղասպանության փաստը ժխտելու համար նա 150 օրվա տուգանքի էր դատապարտվել` պարտավորեցվելով օրական 30 ֆրանկ վճարել: 120 օրվա նույնչափ տուգանքի էին դատապարվել նաեւ Մերջանի երկու կուսակիցները:
Նշենք, որ Շվեյցարիայում Հայոց ցեղասպանության փաստի ժխտումը քրեորեն պատժելի արարք է համարվում:

Կանանց բասկետբոլի Երեւանի «Հատիս» թիմը այս օրերին Ռուսաստանի Կուրսկ քաղաքում մասնակցում էր միջազգային մրցաշարի: Մեր թիմի մրցակիցներն էին տեղի «Դինամոն», Վոլոգդայի «Չեւակատան» եւ ուկրաինական «Տիմ ՍԿՈՒՖ»-ը: Առաջին հանդիպումը «Հատիսն» անցկացրեց տանտերերի հետ ու պարտություն կրեց 59:69 հաշվով: Սակայն մյուս 2 հանդիպումներում «Հատիսը» հաղթանակներ տոնեց ու գրավեց 2-րդ հորիզոնականը:

Հայաստանի ֆուտբոլի ազգային հավաքականի մարզչական շտաբը` Վարդան Մինասյանի գլխավորությամբ, երեկ հրապարակեց մեր թիմի ընդլայնված կազմը« որը կնախապատրաստվի հոկտեմբերի 8-ին ու 12-ին կայանալիք 2012թ© Եվրոպայի առաջնության Սլովակիայի եւ Անդորրայի ընտրանիների հետ ընտրական հանդիպումներին: Ներկայացնենք Հայաստանի հավաքականի ընդլայնված կազմը:
Դարպասապահներ. Ռոման Բերեզովսկի («Խիմկի»« Ռուսաստան), Գեւորգ Կասպարով («Միկա»), Ստեփան Ղազարյան («Բանանց»): Պաշտպաններ. Սարգիս Հովսեփյան, Արտակ Եդիգարյան, Արթուր Յուսպաշյան եւ Վահագն Մինասյան (բոլորն էլ` «Փյունիկ»), Ռոբերտ Արզումանյան («Ռանդերս»« Դանիա), Արարատ Առաքելյան, Հովհաննես Համբարձումյան (երկուսն էլ` «Բանանց»), Հրայր Մկոյան, Աղվան Մկրտչյան (երկուսն էլ`«Միկա»): Կիսապաշտպաններ. Կառլեն Մկրտչյան, Դավիթ Մանոյան, Էդգար Մալաքյան (բոլորն էլ` «Փյունիկ»), Արթուր Եդիգարյան («Պաս»« Իրան), Լեւոն Պաչաջյան («Սանատ Նավթ»« Իրան), Հենրիխ Մխիթարյան («Շախտյոր»« Ուկրաինա), Արտակ Դաշյան («Մետալուրգ»« Ուկրաինա), Վալտեր Պողոսյան («Բանանց»): Հարձակվողներ. Գեւորգ Ղազարյան, Էդգար Մանուչարյան, Մարկոս Պիզելի, Հովհաննես Գոհարյան (բոլորն էլ` «Փյունիկ»), Յուրա Մովսիսյան («Ռանդերս»« Դանիա):