Արխիվ

Որեւէ երկրում դեսպանություն հիմնելու համար անհրաժեշտ է ՀՀ նախագահի հրամանագիր: ՀՀ կառավարությունը իր որոշմամբ հավանություն է տալիս այդ հրամանագրի նախագծին: Այսօրվա նիստում այդ երկու երկրներում դեսպանություն ստեղծելու մասին հրամանագրերի նախագծերը, անկասկած, հավանության կարժանանան: Ինչու են որոշել դեսպանություն ստեղծել այդ երկու երկրներում: Նիդեռլանդների թագավարությունում, այսինքն` Հոլանդիայում Հայաստանը ունի դեսպան, որի նստավայրը, սակայն, Բելգիայի մայրաքաղաք Բրյուսելում է: Այսինքն, Բելգիայում ՀՀ դեսպանը համատեղության կարգով նաեւ Հոլանդիայում ՀՀ դեսպանն է: Եւ ուրեմն ինչու են որոշել, որ Հոլանդիայում պետք է առանձին դեսպանություն լինի: Ընդ որում, դեսպանությունը պետք է լինի ոչ թե մայրաքաղաք Ամստերդամում, այլ Հաագայում, որը համարվում է այդ երկրի վարչական մայրաքաղաքը: Ինչո՞ւ:

Հայ ազգային կոնգրեսը վերջերս հայտարարեց, որ սկսում է Ազատության հրապարակի վերանվաճման եւ այն նորից ժողովրդին վերադարձնելու գործընթաց: Երեկ հրավիրված ասուլիսի ժամանակ կոալիցիայի մաս կազմող «Օրինաց երկիր» կուսակցության պատգամավոր Հովհաննես Մարգարյանին հարցրինք, թե ե՞րբ իշխանությունը Ազատության հրապարակը նորից կվերադարձնի ժողովրդին. «Քաղաքական ուժը կազմված է ժողովրդից, այսինքն միշտ էլ Ազատության հրապարակը եղել է ժողովրդինը»,- բացահայտեց ՕԵԿ պատգամավորը: Խոսելով առաջիկա խորհրդարանական ընտրությունների մասին, Մարգարյանն ասաց, որ ՕԵԿ-ը պատրաստվում է դրանց եւ խնդիր չունի միայնակ մասնակցելու ինչպես այդ, այնպես էլ նախագահական ընտրություններին, ինչպես արել է 1999-ից ի վեր եւ բարձր քվեներ ստացել: Մյուս կողմից Մարգարյանը չբացառեց նաեւ դաշինքով մասնակցությունը` նշելով, որ բոլոր հարցերը դեռ քննարկման փուլում են:

Լյուդմիլա եւ Լեւոն Տեր-Պետրոսյանները երեկ երեկոյան այցելել են աշխարհահռչակ դիրիժոր Օհան Դուրյանի տուն` շնորհավորելու դիրիժորի 88-ամյակը: ՀՀ իշխանության ներկայացուցիչներից որեւէ մեկը մաեստրոյին երեկ չի շնորհավորել 88-ամյակի առթիվ:

Ինչպես փոխանցում են հավաստի աղբյուրները, Բենյամինյանը հրաժարվել է կատարել հանձնարարությունը եւ աշխատանքից ազատվելու դիմում է գրել: Արտաշատի հարկային տեսչության պետի ընդունարանից քարտուղարուհին երեկ մեզ ասաց, թե Բենյամինյանն արդեն 2 օր է, իրենց մոտ չի աշխատում: Ինքը` Գագիկ Բենյամինյանը, հարցին, թե ինչու է դուրս եկել աշխատանքից, պատասխանեց. «Իմ դիմումի համաձայն դուրս եմ եկել, ի՞նչ կա դրա մեջ»: Երբ նշեցինք, որ ըստ մեր հավաստի տեղեկությունների, նրան հանձնարարված է եղել ստուգումներ սկսել ԱԺ նախագահին պատկանող ձեռնարկություններում, իսկ նա հրաժարվել է կատարել հանձնարարությունը եւ դիմում գրել, Բենյամինյանն ասաց. «Տենց բան չկա, ես իմ ցանկությամբ դուրս եմ եկել, տենց բան չկա, կներեք, ուրիշ բան չեմ կարող ասել»: Արտաշատի հարկայինի այլեւս նախկին պետից հետաքրքրվեցինք նաեւ, թե ինչով է հիմա զբաղվելու:

Սերժ Սարգսյանի անվտանգության հետ կապված ինչ-ինչ խնդիրներ են առաջացել: Նման եզրակացության են հանգել Երեւանի Ավան վարչական շրջանի այն քաղաքացիները, ովքեր անցյալ շաբաթ ականատես են եղել Սերժ Սարգսյանի անվտանգության պահպանմանն ուղղված մի միջոցառման: Մասնավորապես, սեպտեմբերի 1-ին Ավանի «Հարսնաքար» ռեստորանի հարեւանությամբ գտնվող ֆուտբոլի ակադեմիայի բացման արարողությունից ժամեր առաջ, իսկ բացման արարողությանը, ինչպես հայտնի է, մասնակցել է նաեւ Սերժ Սարգսյանը, մոտակա ոչ բնակելի շենքերից մեկը անակնկալ հյուր է ունեցել: Քաղաքացիական հագուստով անձը, ներկայանալով որպես ոստիկանության աշխատակից, առանց համապատասխան վկայական ցույց տալու, բարձրացել է շենքի տանիք եւ մի քանի ժամով դիրքավորվել այնտեղ: Ենթադրվում է, որ անձը, որն իր գործողությունները բացատրել է Սերժ Սարգսյանի սպասվող այցով, եղել է ԱԱԾ աշխատակից: Ըստ որոշ տեղեկությունների, այդ միջոցառումն անցկացվել է հարակից բոլոր բնակելի եւ ոչ բնակելի շենքերում: Բանն այն է, սակայն, որ Սերժ Սարգսյանը ֆուտբոլի ակադեմիայի բացումից առաջ էլ հաճախակի այցելել է Ավան, «Հարսնաքար» ռեստորան, որտեղ սովորություն ունի ճաշելու կամ ընթրելու, սակայն նախկինում շենքերի տանիքներին «քաղաքացիական հագուստով ոստիկաններ» չեն հայտնվել: ՀՀ նախագահի մամուլի ծառայությունից հրաժարվել են պատասխանել մեր թղթակցի հարցին, թե ինչով է պայմանավորված եղել սեպտեմբերի 1-ի «օպերացիան»:

ՀՀ ԱԳՆ-ից երեկ hայտնեցին, որ հաստատվել է, որ մահացած տղան ոչ թե ՀՀ, այլ ՌԴ քաղաքացի է: Բացի այդ, հայտնի  դարձավ, որ  Էդուարդ Մարգարյանի սպանության մեջ կասկածվող տղան 14-ամյա ադրբեջանցի Մամեդ Մ.-ն է, որը նույնպես  ՌԴ քաղաքացի է: Ականատեսների խոսքով, տեղի ունեցածը ոչ մի կապ չունի տղաների ազգությունների հետ: «Այն, ինչ տեղի ունեցավ Էդուարդի հետ, կարող էր պատահել ցանկացած տղայի հետ: Որեւէ նշանակություն չունի այն, որ նա հայ էր, իսկ մյուս տղան` ադրբեջանցի»,- մեզ հետ հեռախոսազրույցում հայտնեց 501 դպրոցի բարձր դասարանցի, ազգությամբ ռուս աշխատակիցներից մեկը, որը խնդրեց չնշել իր անունը:

Ադրբեջանական կողմից հրադադարի ռեժիմի խախտման հետեւանքով սեպտեմբերի 5-ին Տավուշի մարզի Մովսես գյուղի բնակիչ Լեւոն Վանեցյանը հրազենային վնասվածք է ստացել: Գյուղապետ Վլադիկ Ապերյանի խոսքով դեպքը տեղի է ունեցել երեկոյան ժամը 9-ի սահմաններում: Ադրբեջանցիները 5-6 կետից միաժամանակ կրակ են բացել գյուղի ու գյուղացիների տների վրա: Կրակոցների ընթացքում ԴՇԿ-ից (խոշոտ տրամաչափի գնդացիր.-խմբ.) արձակած փամփուշտը անցել է տներից մեկի պատուհանի միջով եւ դիպել տանտիրոջ ոտքին: Բարեբախտաբար վերջինիս ստացած վնասվածքը ծանր չի եղել: Ըստ Մովսեսի գյուղապետի, իրենց գյուղը, որ մոտ 90 տոկոսով գտնվում է ադրբեջանցիների տեսադաշտում, միշտ էլ գնդակոծվել է, բայց նախկինում վիրավորման դեպքեր չեն արձանագրվել:

«Երեւան Ջուր» ընկերությունը տեղեկացնում է իր հաճախորդներին եւ սպառողներին, որ վթարավերականգնողական աշխատանքների հետ կապված, Աջափնյակ վարչական շրջանում սեպտեմբերի 9-ին ժամը 10.00-22.00 կդադարեցվի 11 եւ 15 թաղամասերի, Շիրազ, Մարտիրոսյան, Գր. Զոհրապ, Մելիքյան, Միրաքյան, Լենինականի, Չուխաջյան, Սպորտի, Ջանիբեկյան, Մազմանյան, Բաշինջաղյան, Թերլեմեզյան փողոցների, Լենինգրադյան 31/1, 31/2, 31/3, 31/4, 52 շենքերի եւ հարակից տարածքների ջրամատակարարումը: Ավան վարչական շրջանում սեպտեմբերի 9-ին ժամը 10.00-ից մինչեւ սեպտեմբերի 10-ը ժամը 10.00 կդադարեցվի Ավան-Առինջ թաղամասի, Բաբաջանյան, Աճառյան փողոցների ու նրբանցքների եւ հարակից տարածքների ջրամատակարարումը: Իսկ շինարարական աշխատանքների հետ կապված Կենտրոն վարչական շրջանում սեպտեմբերի 10-ին ժամը 10.00-24.00 կդադարեցվի Մոսկովյան, Աղայան փողոցների, Տերյան փ. 19-71 եւ 44-62, Սայաթ-Նովա պ. 1-31, Աբովյան փ. 11-19 եւ 20-34, Նալբանդյան փ. 25-43 եւ 104-ից բարձր հասցեների ջրամատակարարումը:

Սերժ Սարգսյանը երեկ շնորհավորական ուղերձ է հղել Հայաստանի հրեական համայնքին` Ռոշ ա Շանա տոնի առթիվ: Ուղերձում մասնավորապես, ասվում է.
«Սրտանց շնորհավորում եմ ձեզ Ռոշ ա Շանայի` Նոր տարվա տոնի կապակցությամբ: Այս օրերին դուք մտովի անդրադառնում եք ձեր հոգեւոր ժառանգությանը, ամփոփում ձեռքբերումներն ու խնդիրները եւ կազմում ապագայի ծրագրեր: Դուք` որպես հինավուրց ժողովրդի ներկայացուցիչներ, ձեր աշխատասիրությամբ ու տոկունությամբ, ստեղծելու ու ստեղծագործելու ձիրքով արժանիորեն հարգանք եւ ճանաչում եք վաստակել Հայաստանում:
Վստահ եմ, որ մեր երկրի հրեաները այսուհետ էլ իրենց ավանդը կունենան մեր հասարակության զարգացման գործում եւ կնպաստեն հանդուրժողականության ու փոխադարձ հարգանքի մթնոլորտի ամրապնդմանը: Ռոշ ա Շանա տոնի առիթով ձեզ եմ հղում իմ շնորհավորանքն ու բարեմաղթանքները: Թող լույսով, սիրով ու ջերմությամբ լցվեն ձեր օջախները: Թող գալիք նոր տարին լինի նոր ձեռքբերումների եւ հաստատուն առաջընթացի տարի»:

Լեզուն ինքնին, իհարկե, չի կարող վտանգ ներկայացնել: Զուտ լեզվաբանության տեսակետից չկան առավել «հարուստ» եւ «մեծ» լեզուներ: Ամենափոքր եւ պարզունակ մշակույթի կրող ժողովրդի լեզուն կարող է քերականական այնպիսի կառուցվածքներ ունենալ, որոնք թույլ են տալիս այլ լեզուներում անհնար նրբություններ արտահայտել: Սա բավականին հայտնի փաստ է: Այնպես որ, եթե խոսում ենք որեւէ լեզվի իմացության կարեւորության կամ օգտակարության մասին, խոսքը չի կարող վերաբերվել ինքնին լեզվին: Պետք է նկատի ունենալ այն ասելիքը, որը տվյալ ժամանակահատվածում «պատմվում է» աշխարհին տվյալ լեզվի միջոցով: Այսինքն՝ լեզուների դերերը փոփոխական են, եւ որեւէ լեզու կարող է այսօր կատարել «առաջատար» ասելիք ունեցողի, իսկ վաղը՝ ասելիք չունեցողի դեր:

Նրա «ստացած» վերջին ծաղիկները եւս խղճուկ էին ու աղքատիկ` ընդամենը երկու զամբյուղ եւ ոչ մի ծաղկեպսակ: Իշխանավորներից ու մասնավորապես ՀՀ մշակույթի նախարարությունից ոչ ոք Ռազմիկ Արոյանի հոգեհանգստին եւ հուղարկավորությանը չէր եկել: Դերասան ընկերներից եւս քչերն էին անհրաժեշտ համարել նրան վերջին հրաժեշտը տալ. ժամը 14-ի սահմաններում, երբ արդեն մահացածի աճյունը պետք է դուրս բերվեր, մոտեցան Արոյանի հետ սերիալներում նկարահանված դերասաններից մի քանիսը` Արտաշես Ալեքսանյանը, Հովակ Գալոյանն ու Սարգիս Հարությունյանը: Հաջողությունը, որ դերասան Արոյանից երես էր թեքել, վերջին շրջանում սերիալներում նկարահանվելու հնարավորություն էր նրան ընձեռել:

Ռուսաստանցի երգչուհի Իրինա Պոնարովսկայան գաղթում է Նորվեգիա՝ սափրագլուխների պատճառով: Ռուսական լրատվամիջոցների փոխանցմամբ, 80-ականների ամենավառ աստղերից մեկի նախկին պրոդյուսեր Ալեքսանդր Բոգդանովիչն ասել է, որ Պոնարովսկայայի սեւամորթ որդին՝ Էնթոնին, բազմիցս է փողոցում ծեծի ենթարկվել: Նույնիսկ պատահել է, երբ տղան սափրագլուխների հարձակման հետեւանքով վերակենդանացման բաժանմունքում է հայտնվել: Երգչուհին իր թիմին պարզաբանել է, որ ցանկանում է արժանավայել ծերություն ապրել եւ բնակվել Եվրոպայում, իսկ Մոսկվա հնարավորինս հազվադեպ այցելել:

Հիշեցնեմ, որ 1-ին կեսի վերջնամասում ու խաղավարտին` մրցավարի ավելացրած րոպեներին, կողմերը գնդակներ փոխանակեցին, ընդ որում 2 դեպքում էլ առաջինը աչքի ընկան մեր ֆուտբոլիստները: Կարծում եմ` անգամ այս կարճ տեղեկատվությունը ընթերցելիս պարզ է դառնում. մեր հավաքականը ուղղակի բաց է թողել հաղթանակը, իսկ հանդիպումը տեսնողները մտովի վերհիշում են այն ամենը, ինչ տեղի ունեցով Մակեդոնիա-Հայաստան դրամատիկ խաղի վերջնամասում: Մեր հավաքականը կարող էր հաղթել անգամ խոշոր հաշվով, եթե գոնե վերջին 15-20 րոպեների ընթացքում Յուրա Մովսիսյանը օգտագործեր իր հարյուր տոկոսանոց գոլային պահերը, բայց... հանդիպման 95-րդ րոպեին, երբ հաղթում էինք 2-1 հաշվով, տեղի ունեցավ «դժբախտ պատահար»` գնդակը դիպավ մեր պաշտպան Արարատ Առաքելյանի ձեռքին, ու 11 մետրանոցից մրցակիցը հավասարեցրեց հաշիվը:

«Կարծում եմ, Ադրբեջանի ղեկավարությունը գիտակցում է այն հսկայական ռիսկերն ու սպասվող կորուստները, որ կապված են Ղարաբաղյան հակամարտությունը ռազմական ճանապարհով լուծելու փորձերի հետ»,- Reuters-ի հետ զրույցում երեկ հայտարարել է Հարավային Կովկասում Եվրամիության հատուկ ներկայացուցիչ Փիթեր Սեմնեբին: Միաժամանակ նա նշել է, որ այս ամռանը շփման գծում տեղի են ունեցել ամենալուրջ բախումները վերջին ավելի քան երկու տարվա ընթացքում: Նա զգուշացրել է, որ բախումների ուժգնացումը կարող է անվերահսկելի դարձնել դրանք: Այս առումով նա անհրաժեշտ է համարել հրադադարի ռեժիմի խստացումը` որպես հնարավոր տարբերակ նշելով ավելի շատ միջազգային դիտորդների տեղակայումը:

Չինաստանում ավարտվեց շախմատի «Մեծ սաղավարտի» ընտրական մրցաշարը: Վերջին տուրում կայացած 2 հանդիպումներն էլ ավարտվեցին ոչ-ոքի արդյունքով. նախ անցյալ տարվա «Մեծ սաղավարտի» հաղթող Լեւոն Արոնյանը ավարտեց իր հանդիպումը իսպանացի Ալեքսեյ Շիրովի հետ, որից անմիջապես հետո ռուսաստանցի Վլադիմիր Կրամնիկը ոչ-ոքի առաջարկեց չինացի Հաու Վանին: Շիրովը ի վերջո հավաքեց 11 միավոր ու վստահորեն գրավեց առաջին տեղը: Կրամնիկն ու Արոնյանը հավաքեցին 7-ական միավոր, բայց լրացուցիչ գործակիցներով 2-րդ տեղը բաժին հասավ Կրամնիկին: Շիրովն ու Կրամնիկը նվաճեցին եզրափակիչ մրցաշարի իրավունք ու հոկտեմբերի 9-15-ին աշխարհի չեմպիոն, հնդիկ Վիշվանաթհան Անանդի, ներկայումս ամենաբարձր վարկանիշ ունեցող, նորվեգացի Մագնուս Կառլսենի հետ կխաղարկեն «Մեծ սաղավարտի» այս տարվա հաղթողի կոչումը: