Արխիվ

Սա նախագծի դեռ նախնական տարբերակն է, սակայն դժվար թե մեր կառավարությունը մեծ փոփոխություններ կատարի. բյուջեի հիմնական կոնֆիգուրացիան կմնա` անկախ նրանից, թե ինչ է սպասվում մեզ եւ մեր տնտեսությանը: 2008-ի դեկտեմբերին էլ արդեն ակնհայտ էր, որ 2009-ը լինելու է ճգնաժամային, բայց կառավարությունը երկու ոտքը մտցրեց մեկ կոշիկի մեջ ու 2009-ի համար ընդունեց այն բյուջեն, որի հիմնական կոնֆիգուրացիան արդեն կազմվել էր 2008-ի սեպտեմբերին: Այսինքն, կառավարությունը ընդունեց մի բյուջե, որը ակնհայտորեն չէր կատարվելու եւ չկատարվեց:

«Կարոտ» միջազգային փառատոնի բուկլետում նշված է, որ ԱԺ նախագահ Հովիկ Աբրահամյանի մամուլի խոսնակը Արմինե Անտիկյանն է: Երեկ, երբ փորձեցինք ԱԺ հասարակայնության հետ կապերի վարչությունից ճշտել, թե երբ է Հովիկ Աբրահամյանը մամուլի խոսնակ նշանակել, մեզ պատասխանեցին, թե այդ պաշտոնը դեռ թափուր է: Արմինե Անտիկյանը, որ ժամանակին աշխատում էր «Հայլուրում», ասաց, թե բուկլետում վրիպակ է տեղի ունեցել, եւ ինքը ԱԺ հասարակայնության հետ կապերի վարչության մշակույթի հարցերով պատասխանատուն է: Նկատենք, որ ուշագրավ «վրիպակ» է տեղի ունեցել: Մեր տեղեկություններով, ԱԺ նախագահի մամուլի խոսնակի պաշտոնի համար պայքարը շարունակվում է:

Սերժ Սարգսյանի ավագ դուստրը` Անուշ Սարգսյանը, անցյալ շաբաթվա վերջին որդի է ունեցել: Հիշեցնենք, Անուշ Սարգսյանն ամուսնացած է Սերժ Սարգսյանի աշխատակազմի ղեկավարի տեղակալ Միքայել Մինասյանի հետ: Նրանց առաջնեկը աղջիկ էր:

Ընկերները եւ մտերիմները շնորհավորում են «Հայէկոնոմբանկի» խորհրդի նախագահ, ներկայումս «Սիլ Գրուպի» համակարգող Սարիբեկ Սուքիասյանին` 45-ամյակի առիթով եւ բազում բարեմաղթանքներ են հղում նրան: «ՀԺ»-ն միանում շնորհավորանքներին եւ բարեմաղթանքներին:

Առաքելության նպատակը, ըստ դիվանագիտական մեր աղբյուրների, Լեռնային Ղարաբաղի հարակից տարածքներում մոնիտորինգի իրականացումն է: Համանախագահները պատրաստվում են Միացյալ ազգերի կազմակերպության Գերագույն հանձնակատարի վարչության ներկայացուցիչներից կազմված խմբի հետ ուսումնասիրել նշված տարածքներում ենթակառուցվածքների (ավտոճանապարհներ, բնակավայրեր, հաղորդակցության այլ ուղիներ եւ այլն) վիճակը եւ իրավիճակը ընդհանրապես: Ըստ դիվանագիտական մեր աղբյուրների, դա արվում է ադրբեջանցի փախստականների վերադարձի նպատակով: Պարզելուց հետո, թե ինչ վիճակում են գտնվում ենթակառուցվածքները, ինչ զորքեր են այնտեղ տեղակայված, առաքելությունը հանդես է գալու հատուկ զեկույցով: Սույն առաքելությունը, ինչպես նշում են դիվանագիտական եւ քաղաքական շրջանակներում, խիստ վտանգավոր է Հայաստանի համար: Նախ, այդ տարածքներում ենթակառուցվածքները, ինչպես թերեւս շատերին է հայտնի, մեղմ ասած, այնքան էլ լավ վիճակում չեն գտնվում:

Հայ ազգային կոնգրեսը ներկայացնող փաստաբան Վահե Հովսեփյանը ՀՀ վարչական դատարանում բողոքարկել է Երեւանի քաղաքապետարանի որոշումը` սեպտեմբերի 17-ին Ազատության հրապարակում Հայ ազգային կոնգրեսի հանրահավաքն արգելելու մասին: Փաստաբանը դատարանից պահանջում է անվավեր ճանաչել Քաղաքապետարանի կայացրած որոշումը` պնդելով, որ կայացվել է ապօրինի որոշում, քանի որ այն պահին, երբ Հայ ազգային կոնգրեսի ներկայացուցիչները իրազեկել են հանրահավաքի մասին, Քաղաքապետարանի միջոցառումների գրանցման մատյանում նույն օրվա համար ոչինչ գրանցված չի եղել: Իսկ դա նշանակում է, որ ոչինչ այդ պահին իրազեկված չի եղել, եւ ըստ «Ժողովներ, հանրահավաքներ, երթեր եւ ցույցեր անցկացնելու մասին» ՀՀ օրենքի, առաջնությունը պետք է տրվի իրազեկված միջոցառմանը: Վարչական դատարանից երեկ Վահե Հովսեփյանին տեղեկացրել են, որ դատական նիստը տեղի է ունենալու այսօր առավոտյան ժամը 11-ին: Ինչպես տեղեկացանք Հովսեփյանից, գործը քննելու է դատավոր Արծրուն Միրզոյանը: Կոնգրեսի համակարգող Լեւոն Զուրաբյանը ավելի վաղ հայտնել էր, որ Քաղաքապետարանի ապօրինի որոշումը բողոքարկվելու է մինչեւ Եվրոպական դատարան:

ԼՂՀ ՊԲ լրատվական ծառայության ղեկավար Սենոր Հասրաթյանի խոսքով, ադրբեջանական կողմի հարձակումները հայկական դիրքերի վրա «ոչ պատերազմ, ոչ խաղաղություն» վիճակի հետեւանքն են, եւ չի բացառվում, որ առաջիկայում հայկական դիրքերի վրա նոր հարձակումներ լինեն. «Սակայն հայկական կողմը պատրաստ է, ավելի քան պատրաստ է համապատասխան կերպով արձագանքել դրանց»,- երեկ մեզ հետ զրույցում հավաստիացնում էր Հասրաթյանը:
ՊԲ լրատվական ծառայության փոխանցմամբ, սեպտեմբերի 4-ին ԼՂՀ ՊԲ առաջապահ ստորաբաժանումների գործողությունների եւ ծավալված մերձամարտի արդյունքում ադրբեջանական գրոհայինները հետ են շպրտվել` ՊԲ մարտական հենակետում թողնելով 1 դիակ:

Սեպտեմբերի 5-ին Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց կաթողիկոսը հովվապետական այցով մեկնել է Ամերիկայի Միացյալ Նահանգների Հայոց Արեւմտյան թեմ:
Սեպտեմբերի 9-ին Ամերիկայի Միացյալ Նահանգների Հայոց Արևելյան թեմում, Բոստոնում, Նորին Սրբությունը կհանդիսապետի Հայոց ցեղասպանության հիշատակին նվիրված հուշակոթողի օրհնության արարողությունը:
Այցի շրջանակներում, սեպտեմբեր 11-ին, ձեռամբ Վեհափառ Հայրապետի տեղի կունենա թեմի առաջնորդանիստ Ս. Ղեւոնդ նորակառույց եկեղեցու օծման արարողությունը (ք. Բըրբենք): Սեպտեմբերի 12-ին` Խաչվերացի տոնին, հանդիսապետությամբ Ամենայն Հայոց կաթողիկոսի նորաօծ տաճարում կմատուցվի Ս. պատարագ:

Վարչապետ Տիգրան Սարգսյանը սեպտեմբերի 5-ին մեկնել էր Վանաձոր` ներկա գտնվելու ՀՀ վարչապետի գավաթի խաղարկության հանդբոլի 2-րդ միջազգային մրցաշարին: Մրցաշարին ներկա էր նաեւ հանդբոլի միջազգային ֆեդերացիայի նախագահ, դոկտոր Հասան Մուստաֆան:
Երկրորդ անգամ մրցաշարին մասնակցել են Հայաստանի, Բելառուսի, Իրանի և Վրաստանի հանդբոլի տղամարդկանց հավաքականները: ՀՀ կառավարության ղեկավարը շնորհակալություն է հայտնել բոլոր թիմերին ցուցադրած գեղեցիկ խաղի համար: Միջազգային մրցաշարի եզրափակիչ փուլում հաղթող է ճանաչվել Բելառուսի հավաքականը, որին հանձնվել է «ՀՀ վարչապետի գավաթը»: Համապատասխանաբար երկրորդ, երրորդ եւ չորրորդ տեղերը զբաղեցրել են Հայաստանը, Իրանը և Վրաստանը:
Վանաձոր կատարած այցի շրջանակում Տիգրան Սարգսյանն այցելել է «Գլորիա» կարի ֆաբրիկա, շրջել է արտադրամասում, ծանոթացել արտադրատեսականուն: Ֆաբրիկայում ներկայումս աշխատում է 500 բանվոր: Ակնկալվում է, որ աշխատատեղերի թիվը մինչեւ տարեվերջ կհասնի 800-ի:

ՀՀ ոստիկանությունից հայտնում են, որ օգոստոսի 3-ին Երեւանի Մաշտոցի պողոտայի վրա տեղի ունեցած վրաերթի հետեւանքով մոտ 60-ամյա մի կին է մահացել: Պարզվել է, որ 51-ամյա Սամվել Մ.-ն ժամը 04.00-ին, վարելով «ՎԱԶ-2106» մակնիշի ավտոմեքենան` Մաշտոցի պողոտայի թիվ 20 շենքի մոտ վրաերթի է ենթարկել անձը չպարզված կնոջ, որը մարմնական վնասվածքներով տեղափոխվել է թիվ 1 համալսարանական հիվանդանոց, որտեղ, գիտակցության չգալով, ժամը 05.10-ին մահացել է: Մեքենայի վարորդը ձերբակալված է: Կատարվում է նախաքննություն:

Կարող է արդյո՞ք զիջել-չզիջել հակադրությունն ինքնին լինել բանական քաղաքականության եզր: Չեմ ասում ռեալ-փոլիթիքսի եզր, որովհետեւ քաղաքականությունը միայն իրապաշտությունը չէ սովորական իմաստով, այլ կարող է լինել նաեւ իդեալիստական, եթե, իհարկե, իդեալիզմը չենք նույնացնում իռացիոնալի հետ: Ասում եմ` բանական քաղաքականության եզր, այսինքն՝ հստակ սահմանված ու կոնկրետ իմաստ կրող: Զիջել-չզիջելը չի կարող լինել ինչ-որ աքսիոմ, որը կախված չլինի կոնկրետ պայմաններից կամ պայմանավորված լինի ինչ-որ գաղափարախոսությամբ: Նախ պետք է հասկանալի լինի մի քանի հարցերի պատասխանը: Զիջել կամ չզիջելն ի՛նչը, ո՛ւմ, ե՛րբ, ինչպիսի պայմաններում:

Կենտրոն եւ Նորք-Մարաշ վարչական շրջանների ընդհանուր իրավասության դատարանում` դատավոր Մնացական Մարտիրոսյանի նախագահությամբ երեկ շարունակվել է ՀՀ մաքսային կոմիտեի նախկին նախագահ Արմեն Ավետիսյանի տան վրա 2008-ին կազմակերպված ավազակային հարձակման գործով դատավարությունը: Երեկվա նիստում շարունակվել է ամբաստանյալ Սուրեն Մելքոնյանի հարցաքննությունը, որի ընթացքում վերջինս ուշագրավ բացահայտում է արել: Պարզվել է, որ գործում էական նշանակություն ունեցող եւ նախաքննության մարմինների կողմից խեղաթյուրված դրվագներից մեկը տեսագրված է: Սուրեն Մելքոնյանը այն անձն է, որը 2009-ի հունվարի 13-ին Արմեն Ավետիսյանի ծանոթներից ոմն Կարենի է հանձնել ավազակային հարձակման ժամանակ գողացված ոսկյա զարդերը: Մելքոնյանը, ինչպես ինքն է հայտարարել դատարանում, այդ զարդերը վերադարձրել է գործով ամբաստանյալ գործարար Արա Կարապետյանի հանձնարարությամբ: Այս հանգամանքը իրադարձությունների զարգացման պաշտոնական վարկածում բացակայում է. ըստ մեղադրանքի Ավետիսյանների տնից գողացված իրերը ինչ-որ Հարություն Ալեքսանյան է տարել եւ հանձնել ԱԱԾ-ին, իսկ Ալեքսանյանին ՀՀ իրավապահները չեն կարողանում հայտնաբերել, որ ներկայացնեն դատարան: Եւ ահա Սուրեն Մելքոնյանը երեկվա հարցաքննության ժամանակ հայտարարել է, որ Արմեն Ավետիսյանի տնից գողացված իրերը նրա վստահելի մարդուն` ոմն Կարենի հանձնելու պահը տեսագրվել է: Մելքոնյանը այլ մանրամասներ չի հայտնել: Փոխարենը հայտարարությամբ հանդես է եկել Արա Կարապետյանը, որը խոստացել է նշված տեսագրության մի օրինակ ներկայացնել դատարանին, եթե Արմեն Ավետիսյանը որպես տուժող հրավիրվի դատարան եւ հարցաքննվի: Արա Կարապետյանի` Արմեն Ավետիսյանին որպես տուժող դատարան հրավիրելու միջնորդությունը երեկ դատավոր Մնացական Մարտիրոսյանը մերժել է` պատճառաբանելով, որ նման միջնորդությունների ժամանակը ըստ դատաքննության հերթականության դեռ չի եկել:

Արցախցի փոքրիկ երգիչը շատ մարտական է տրամադրված եւ մտադիր է հաղթանակ տանել նաեւ Մինսկում: Վովան, որը երեկ մեզ հետ ծանոթանալիս այդպես ներկայացավ, ասում էր` հայաստանյան փուլի հաղթանակն իր համար անակնկալ չէր, քանի որ վստահ էր իր ուժերին, չնայած մասնակիցներից մի քանիսին իրեն մրցակից համարում էր: Օգոստոսի վերջին նա նաեւ Ուկրաինայում կայացած մանկական «Նոր ալիք» մրցույթին է մասնակցել եւ իր տարիքային խմբում գրավել 3-րդ տեղը: ««Նոր ալիքին» որ մասնակցեցի, դա ինձ ահագին օգնեց: Ավելի ինքնավստահ դարձա»,- իր մեջ այսպիսի փոփոխություն է զգացել Վլադիմիր Արզումանյանը: Գրեթե անմիջապես միմյանց հաջորդած մրցույթներից հետո նա մի քիչ ազատ շունչ կքաշի ու կշարունակի լարված աշխատանքը` սպասված հաղթանակին Բելառուսում տեր դառնալ փորձելու համար: Վովան, որ երգում է «Արցախի ձայներ» նախագծում, նաեւ կարատեով է զբաղվում:

Ամերիկայի Միացյալ Նահանգներում ապրող հայազգի երգիչ Ձախ Հարութի կամ Հարություն Փամբուկչյանի 60-ամյա հոբելյանին նվիրված համերգ-միջոցառումը կայանալու է Ռուսաստանի մայրաքաղաք Մոսկվայում: Հեռուստագովազդներում հայտարարվում է հայազգի ու արտասահմանյան այն երգիչների մասին, որոնք իրենց մասնակցությունն են բերելու սեպտեմբերի 19-ին կայանալիք համերգին` Իոսիֆ Կոբզոն, Մարթեն Յորգանց, Նունե Եսայան, Թաթա եւ ուրիշներ: Երգահան Ռուբեն Հախվերդյանի անունը նրանց շարքում չի հնչում, թեեւ Ձախ Հարութը հայտնի է նաեւ Հախվերդյանի բազմաթիվ երգերի կատարումներով: Հախվերդյանից երեկ հետաքրքրվեցինք` այդ համերգին մասնակցելու հրավեր Ձախ Հարութից ինքը չի՞ ստացել: Պարզվեց` չի ստացել: «Ճիշտն ասած, երեւի իմ հեռախոսահամարը կորցրել է ընկերս: Այսինքն` ես տեղափոխվել եմ, տունս փոխել եմ: Ինձ թվում է` նա ինձ չի գտել, որովհետեւ մտերիմ ենք եղել, ինքը իմ ընկերն է»,- ենթադրեց Ռուբեն Հախվերդյանը: Իսկ մեր այն հարցին, թե ինչպե՞ս է վերաբերվում, որ երգիչ Ձախ Հարութն իր հոբելյանը Մոսկվայում է նշում, ոչ թե Ամերիկայում, որտեղ բնակվում է, ոչ էլ Երեւանում, Հախվերդյանի պատասխանը շատ կարճ էր. «Ցտեսություն»:

Իսկ երեկ արդեն Երեւան-Սկոպյե չարտերային ուղերթով Հայաստանի հավաքականը մեկնեց Մակեդոնիա, ուր այսօր, Երեւանի ժամանակով 23:00-ին հանդիպելու է տեղի ընտրանու հետ: Հայաստանի ազգային հավաքականի կազմում փոփոխություններ չկան. Մակեդոնիա են մեկնել այն ֆուտբոլիստները, որոնք պատրաստվում էին Իռլանդիայի հետ խաղին: Նշեմ նաեւ, որ մեր ենթախմբում անցած ուրբաթ կայացած 1-ին տուրում Ռուսաստանը 2-0 հաշվով արտագնա հաղթանակի հասավ Անդորրայի նկատմամբ, իսկ այսօրվա մեր մրցակիցը հյուրընկալվելիս խաղավարտին ավելացրած րոպեներին գոլ բաց թողեց ու պարտվեց Սլովակիային: Փաստորեն մասնագետների կողմից ֆավորիտներ համարվող 3 հավաքականներն էլ 1-ին տուրում հաղթանակներ տոնեցին:

Միջազգային մամուլում երեկ ուշագրավ գնահատականներ են տրվել Ռուսաստանի նախագահ Դմիտրի Մեդվեդեւի` սեպտեմբերի 2-3-ին Ադրբեջան կատարած պաշտոնական այցի արդյունքներին: Այսպես. ֆրանսիական «Le Figaro»-ն «Մեդվեդեւը` Անդրկովկասի ժանդարմ» հրապարակման մեջ գրել է. «Լինելով Հայաստանի դաշնակիցը` Դմիտրի Մեդվեդեւը մերձենում է Ադրբեջանին ու վերջինիս նավթին»: «Համաձայնություն ձեռք բերելով Հայաստանում ռուսաստանյան ռազմակայանի տեղակայման ժամկետը 24 տարով երկարաձգելու շուրջ, Ռուսաստանը Հայաստանի թշնամի Ադրբեջանին զենիթահրթիռային C-300 համակարգեր մատակարարում»,-գրում է ֆրանսիական պարբերականը»:Դրա պատճառը, ըստ պարբերականի, այն է, որ «Ռուսաստանի համար Ադրբեջանը աշխարհաքաղաքական մեծ հետաքրքրություն է ներկայացնում, եւ այնպես է արվում, որ այդ երկիրը եւս Վրաստանի պես չշարժվի դեպի Արեւմուտք, եւ հենց այդ պատճառով է, որ Մոսկվան պարբերաբար փորձում է հավասարակշռել չափից դուրս սերտ հարաբերությունները Հայաստանի հետ»: Վերջում «Le Figaro»-ն եզրակացնում է, որ ԽՍՀՄ փլուզումից ի վեր առաջին անգամ Ռուսաստանը իրեն է վերապահում այդ տարածաշրջանի ժանդարմի դերը:
Ուշագրավ գնահատականներ են հնչել նաեւ ռուսաստանյան մամուլում: Օրինակ, «Կոմերսանտը» Մեդվեդեւի այցի վերաբերյալ գրել է, թե «դրա արդյունքները միտված են Ադրբեջանին փոխհատուցելու վերջինիս թշնամի Հայաստանի հետ ռազմական համագործակցության կտրուկ ամրապնդումը»: