Արխիվ

Արդեն կարծես ավանդույթ է դարձել, որ ՀՀ ԱԺ պատգամավոր Գագիկ Մինասյանը ամեն ամսվա սկզբին ասուլիս է հրավիրում ու ամփոփում անցած ժամանակաշրջանի ցուցանիշները: Այս ավանդույթը, սակայն, գործում էր այնքան ժամանակ, քանի դեռ ԱՎԾ-ին հաջողվում էր լավ ցուցանիշներ ցույց տալ: Այս տարվա յոթ ամիսների համար նույնիսկ ամենակարող ԱՎԾ-ին չի հաջողվել նման ցուցանիշներ ցույց տալ` ընդամենը 4 տոկոս տնտեսական աճ: Օրերս Գագիկ Մինասյանը հպանցիկ անդրադարձել է այդ ցուցանիշներին, բայց այդ անդրադարձը ակնհայտ անկումային տրամադրություններով է պարուրված եղել: Նա ահագին տխուր դեմքով ասել է, թե տնտեսական աճը 4 տոկոս է, բայց դա մի քանի անգամ բարձր է պետական բյուջեով նախատեսված 1.2 տոկոսից: Այսինքն, եթե տարին փակենք նույնիսկ 2.5 տոկոս տնտեսական աճով, կարելի է հայտարարել խոշոր հաջողության մասին` նախատեսվածից մի քանի անգամ բարձր տնտեսական աճ է արձանագրվել: Բայց քանակական ցուցանիշներից անցնենք որակականին:

Արդեն երկու օր է ՀՀ ազգային անվտանգության ծառայությունից մեզ չի հաջողվում պարզել, թե այս գերատեսչության Երեւանի վարչության պետի պաշտոնում որեւէ մեկը նշանակվե՞լ է, թե՞ ոչ: ԱԱԾ մամուլի քարտուղար Արծվին Բաղրամյանը արձակուրդում է գտնվում, ինչի արդյունքում լրատվականի համարները չեն պատասխանում, իսկ ԱԱԾ ուրիշ հեռախոսահամարներով զանգահարելու դեպքում ուղղակի հրաժարվում են պատասխանել` առաջարկելով դիմել լրատվական: Սակայն, ուշագրավն այն է, որ ԱԱԾ Երեւանի քաղաքային վարչությունում եւս հրաժարվում են ասել, իրենց վարչության պետ նշանակվել է, թե ոչ: Հիշեցնենք, որ ԱԱԾ Երեւանի քաղաքային վարչության պետի պաշտոնը թափուր է այս տարվա հունիսի 10-ից` նախկին պետի` Արզուման Հարությունյանի ԱԱԾ տնօրենի տեղակալ նշանակվելուց հետո:

Երեկ Հայ ազգային կոնգրեսում տեղի է ունեցել մոտ 2 ու կես ժամանոց քաղխորհրդի նիստ, որի ընթացքում, ինչպես նիստից հետո տեղեկացանք ՀԱԿ համակարգող Լեւոն Զուրաբյանից, քննարկվող բոլոր հարցերը հիմնականում վերաբերել են սեպտեմբերի 17-ի հանրահավաքին: Մեր տեղեկություններով, նիստի ընթացքում քննարկվել են հանրահավաքի նախապաստրաստական աշխատանքները, իրազեկման բնույթը եւ հանրահավաքի տրամաբանությունն ու նպատակը: Կուսակցությունների ներկայացուցիչների կողմից մասնավորապես տեսակետներ են հնչել հանրահավաքի ժամանակ ժողովրդի հետ պարզ խոսել ստեղծված իրավիճակի մասին եւ լուծումներ առաջարկել:

Մինեապոլիսի ցորենի բորսա - 1 բուշելը 7.09 ԱՄՆ դոլար (+0.25) առավելագույն գինը 2010թ. 1 բուշելը 7.83 ԱՄՆ դոլար (5.08.2010թ.)
Կանադայի էքսպորտային նավահանգիստ - 1 տոննան` 326.3 դոլար (+6.9)
առավելագույն գինը 2010թ. 1 տոննան 351.4 ԱՄՆ դոլար (5.08.2010թ.)

ծանոթություն. մեկ բուշելը 27.2 կիլոգրամ է: Փակագծում նշված է գնի փոփոխությունը նախորդ օրվա համեմատ:

Ընդդիմությանն առաջարկվել է նույն օրը նույն ժամին հանրահավաք անցկացնել Մատենադարանին հարող տարածքում: Ի գիտություն է ընդունվել միայն Ազատության հրապարակից նախատեսված երթի մասին իրազեկումը: Այս ամենը երեկ հայտնեց Երեւանի քաղաքապետի լիազոր ներկայացուցիչ Գագիկ Բաղդասարյանը` Քաղաքապետարանում հրավիրված «քննարկման» ժամանակ: Բաղդասարյանը սպասեց-սպասեց, բայց ՀՀՇ ներկայացուցիչ Ավետիք Աբգարյանը չներկայացավ նիստին, իսկ ՀՀՇ վարչության նախագահ Արամ Մանուկյանը նրան հեռախոսով հայտնեց, որ Աբգարյանը վատառողջ է: Բաղդասարյանը որոշեց քննարկումն անցկացնել առանց իրազեկողների ներկայության, ինչը թույլ է տալիս «Ժողովներ, հանրահավաքներ, երթեր եւ ցույցեր անցկացնելու մասին» ՀՀ օրենքի 12 հոդվածի 3-րդ կետը: Քննարկման պահին դահլիճում էին միայն Բաղդասարյանը, նրա քարտուղարուհին եւ ես:

«Ժառանգություն» խմբակցությունը Ազգային ժողովում արտահերթության կարգով քննարկման է դնելու «Լեռնային Ղարաբաղի Հանրապետությունը ճանաչելու մասին» օրենքի նախագիծը: ԱԺ կանոնակարգ օրենքի 104.2 եւ 35 հոդվածներով, «Ժառանգությունը», որպես խորհրդարանական ընդդիմություն, կարող է սույն օրինագիծն առանց քվեարկության ներառել ԱԺ նստաշրջանի օրակարգ եւ արտահերթ կարգով դնել քննարկման, որը տեղի կունենա խորհրդարանի հոկտեմբերի 4-ին մեկնարկելիք քառօրյայի երեքշաբթի օրվա նիստում` հոկտեմբերի 5-ին: Խմբակցությունը իր որոշումը ԱԺ նախագահ Հովիկ Աբրահամյանին է ուղարկել երեկ: Հիշեցնենք, «Լեռնային Ղարաբաղի Հանրապետությունը ճանաչելու մասին» օրինագիծը «Ժառանգությունը» շրջանառության մեջ է դրել 2009-ի հոկտեմբերից, բայց նախագծի համար գլխադասային նշանակված ԱԺ արտաքին հարաբերությունների հանձնաժողովում դրա քննարկումը պարբերաբար հետաձգվում էր` մեկ 90 օրով, մեկ` 15 օրով, մեկ` 30 օրով եւ այսպես շարունակ: Ժամանակին, երբ այս օրինագիծը դրվեց շրջանառության մեջ, ԱԺ բոլոր խմբակցությունները դրան միանշանակ դեմ արտահայտվեցին:

Նռնակ չեն նետել

ԼՂՀ ՊԲ լրատվական ծառայությունը երեկ հաղորդագրություն տարածեց, ըստ որի` օգոստոսի 31-ին տեղի ունեցած միջադեպը հերթական անգամ փաստում է, որ պաշտոնական Բաքուն տրամադրված է տարածաշրջանային լարվածությունը պահպանել ոչ միայն պարբերաբար հնչեցվող ռազմատենչ հայտարարություններով ու կոչերով, այլեւ դիվերսիոն գործողություններով:

Օրերս մի շարք լրատվամիջոցներում տեղեկություն հրապարակվեց այն մասին, որ օգոստոսի 23-ին ՊՆ Կուբաթլիի N զորամասից անգիտակից վիճակում մայրաքաղաքի Մուրացանի զինվորական հոսպիտալ է տեղափոխվել զինծառայող Վարուժան Դավթյանը: Հարազատները ենթադրում են, որ զինծառայողը նման վիճակում է հայտնվել սպայական կազմի կողմից դաժան ծեծի ենթարկվելու հետեւանքով: Ի պատասխան մեր հարցի, թե արդյոք այժմ որեւէ կերպ ուսումնասիրվո՞ւմ է, թե ինչի հետեւանքով է կտրուկ վատթարացել զինծառայողի առողջական վիճակը, ՀՀ ՊՆ քննչական ծառայությանից հայտնեցին, որ իրենց մոտ Դավթյանի հետ կապված որեւէ գործ չի քննվում:

Սերժ Սարգսյանը երեկ մայրաքաղաքի Ավան վարչական շրջանում ներկա է գտնվել Հայաստանի ֆուտբոլի ակադեմիայի բացման արարողությանը: Հայաստանի հետ սպորտի բնագավառում համագործակցության ամրապնդման, ՀՀ-ում մանկապատանեկան ֆուտբոլի զարգացմանը մեծապես նպաստելու համար ՈՒԵՖԱ-ի նախագահ Միշել Ֆրանսուա Պլատինին Սարգսյանի հրամանագրով պարգեւատրվել է «Պատվո շքանշանով»: Պարգեւը ՈՒԵՖԱ-ի նախագահին է հանձնվել ֆուտբոլի ակադեմիայի բացման արարողության ընթացքում: Սերժ Սարգսյանն Ավանում մասնակցել է նաեւ Գրիգոր Նարեկացու «Մատյան ողբերգության»-ը նվիրված «Նարեկ» հուշարձանի բացման արարողությանը:

«Երեւան Ջուր» ընկերությունը տեղեկացնում է իր հաճախորդներին եւ սպառողներին, որ շինարարական աշխատանքների հետ կապված` սեպտեմբերի 3-ին ժամը 09.00-ից մինչեւ օգոստոսի 4-ը ժամը 09.00 կդադարեցվի Կենտրոն վարչական շրջանի Ամիրյան, Սարյան, Կողբացի, Փարպեցի, Վ. Սարգսյան, Զաքյան, Պուշկին փողոցների, Խորենացի փ. թիվ 1-30, Մաշտոցի պողոտայի թիվ 5-40, Տերյան փ. թիվ 1-19, Թումանյան փողոցի 25-ից բարձր հասցեների եւ հարակից տարածքների ջրամատակարարումը:

ԼՂՀ նախագահ Բակո Սահակյանը օգոստոսի 31-ին ընդունել է ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկին: Հանդիպմանը քննարկվել են Արցախի եւ Ադրբեջանի զինված ուժերի շփման գծում տիրող իրավիճակին վերաբերող հարցեր:

Ճիշտ է, ընթերցողին սովորաբար ավելի հետաքրքրիր են ներքին հարցերին առնչվող թեմաները, բայց պարզ է նաեւ, որ տարբեր պատճառներով Հայաստանի ներքին քաղաքականության կոչվածի տիրույթն ավելի ու ավելի նվազում է՝ վերածվելով արտաքինի կցորդի: Հատկապես Ռուսաստանի հետ հարաբերությունները շեշտված կապ ունեն նշված միտման հետ:

Տվյալ նյութում փորձենք մի քիչ ավելի վերացական տեսակետից հասկանալ ռուս-հայկական հարաբերությունների խնդիրը: Իրականում, կարելի է նույնիսկ ասել, որ ռուս-հայկական հարաբերություններ, որպես այդպիսիք, չկան: Կա Կայսրության եւ նրա ազդեցության կամ նրա սահմանային գոտում գտնվող նախկին գաղութի հարաբերություն: Այսինքն՝ ինչ- որ տեղ կարեւոր են ոչ թե կոնկրետ հենց Ռուսաստանի ու Հայաստանի հարաբերությունների յուրահատկությունները, որոնք, իհարկե, նույնպես որոշ նշանակություն ունեն, որքան այն ունիվերսալ մոդելը, որի շրջանակներում դրանք ստանում են կոնկրետ բովանդակություն:

«Խանութում ոստիկանը բռնացրել է մանր եւ ամենեւին ոչ վտանգավոր գողի ու տեղում գնդակահարել»։
«Չգիտեմ՝ ի՞նչ անել։ Ամուսնուցս բաժանված եմ։ Եթե աղջիկներս մնան ինձ հետ, նրանք մշտապես կապրեն աղքատության մեջ։ Նկուղում, որտեղ ապրում ենք, մութ է եւ խոնավ». լրագրողներին պատմել է երկու երեխաների երիտասարդ մայրը։
«Ոստիկանը նկատել է դասից փախած երեք տղաների, կրակ է բացել եւ սպանել նրանցից մեկին»։
«Լիգա Ֆլորենս Կրիտենդոն» բարեգործական կազմակերպությունը մարմնավաճառների շրջանում հարցում է անցկացրել, որից պարզվել է. «Նախկինում նրանցից 170-ը եղել են տնային ծառայող, 82-ն աշխատել են գործարաններում, 58-ը եղել են մատուցողուհիներ։ Նրանց շաբաթական միջին աշխատավարձը եղել է ութ դոլար։ Իսկ 33-ի շաբաթական միջինը չի գերազանցել երկուսուկես դոլարը»։

Երեկ հրապարակվեց ԱՄՆ միջազգային զարգացման գործակալության ֆինանսավորած «Հակակոռուպցիոն գործողության մոբիլիզացման ծրագրով» իրականացված ուսումնասիրության արդյունքները, որը կրում է «Կոռուպցիան Հայաստանում. տնային տնտեսությունների եւ ձեռնարկությունների 2009 թ. հետազոտություն» վերնագիրը: Զեկույցը կազմվել է 1500 քաղաքացիների եւ 400 ձեռնարկությունների շրջանում իրականացված հարցման հիման վրա: Առավել ուշագրավ են քաղաքացիների շրջանում իրականացված հարցման արդյունքները: Ըստ այդմ, Հայաստանում առկա իրավիճակով բավարարված են հարցված քաղաքացիների 2 տոկոսը` այս ցուցանիշը նախորդ` 2008-ին եւս եղել է նույնը: 2008-ին Հայաստանում առկա իրավիճակից դժգոհների ցուցանիշը կազմել էր 61, իսկ 2009-ին` 69 տոկոս: Քաղաքականությամբ հետաքրքրվածների ցուցանիշը 2008-ի համեմատ 2009-ին աճել է 1 տոկոսով եւ կազմել 43 տոկոս: 2009-ի Հայաստանի տնտեսական վիճակը լավ է գնահատել հարցվածների 6, իսկ վատ` 49 տոկոսը: Հարցվածները, գնահատելով կոնկրետ ոլորտներում կոռուպցիայի տարածվածությունը, որպես ամենակոռումպացված ոլորտ նշել են դատարանները, 65 տոկոսը կարծում է, որ այդ ոլորտում կոռուպցիան տարածված է: Դատախազությունում կոռուպցիայի տարածվածության գնահատականը մեկ տոկոսով դատարաններից փոքր է, այնուհետեւ ԿԸՀ-ն է` 56, իրավապահ մարմինները` 55, կառավարության աշխատակազմը` 51, ԱԺ-ն` 49, նախագահի աշխատակազմը` 44 տոկոս եւ այսպես շարունակ: Հարցվածների 60 տոկոսը վստահ է, որ Հայաստանում կոռուպցիայի մակարդակը նվազեցնելու համար ոչինչ չի կարող անել, 2008-ին այս ցուցանիշը եղել է 51 տոկոս: Այս ցուցանիշները եւս մեկ անգամ հաստատում են այն հանգամանքը, որ Հայաստանում ստեղծված իրավիճակը փոխելու հարցում իրենց անզոր համարող քաղաքացիների թիվը տարեցտարի աճում է:

Անցած ամառ գրանցված մեծագույն տրանսֆերի հեղինակ դարձավ իսպանական «Բարսելոնան, որը ուղիղ 40 միլիոն եվրո վճարեց «Վալենսիային» Դավիդ Վիլյայի (նկարում) տեղափոխության համար: Ընդ որում, սա ֆուտբոլի պատմության մեջ ֆուտբոլիստի համար վճարված առավելագույն գումարներից է: «Բարսելոնայի» անունը հնչում է նաեւ իր գրանցած 2-րդ մեծ տրանսֆերում, բայց այս անգամ` որպես «վաճառող»: Անգլիական «Մանչեսթեր Սիթին» «Բարսային» 30 միլին եվրո վճարեց Յայա Տուրեի համար:

Թուրքիայի ԱԳ նախարար Ահմեդ Դավութօղլուն երեկ այցելել է Հայաստանի հետ սահմանակից Կարսի, Իգդիրի եւ Աղրըի շրջաններ: Թուրքական NTV-ի փոխանցմամբ, Դավութօղլուն ծանթացել է այս շրջանների կոմունիկացիաների վիճակին եւ այդ նպատակով նույնիսկ այցելել է Իգդիրից ոչ հեռու գտվող Ալիջանի հսկիչ-անցագրային կետ, որի հարեւանությամբ Մարգարայի անցակետն է: Այստեղ Դավութօղլուն հայտարարել է, որ առանց սահմանների բացման տարածաշրջանը չի կարող լիարժեք զարգանալ, ապա հավելել, որ առանց Հայաստանի ու Ադրբեջանի միջեւ խաղաղության հաստատման` սահմանները չեն բացվի: Նա նշել է, որ Թուրքիան հետեւում է ԼՂ հիմնախնդրի կարգավորման շուրջ զարգացումներին եւ մտահոգություն հայտնել ղարաբաղա-ադրբեջանական շփման գծում նախորդ օրը տեղի ունեցած բախման կապակցությամբ: Իր հերթին, Թուրքիայի Ազգային մեծ ժողովի արտաքին հարաբերությունների հանձնաժողովի նախագահ Մուրադ Մերջանը երեկ day.az-ին տված հարցազրույցում հայտարարել է, որ սեպտեմբերի 11-17-ին Հայաստանում կայանալիք ՆԱՏՕ-ի զորավարժությունների կապակցությամբ հայ-թուրքական սահմանը չի բացվի, «քանի դեռ ղարաբաղյան հակամարտության գործում առաջընթաց չի եղել, ադրբեջանական օկուպացված տարածքները չեն վերադարձվել»: Նշենք, որ 2009 թվականի հոկտեմբերի 10-ին Ցյուրիխում ստորագրված հայ-թուրքական արձանագրությունները ներկայումս գտնվում են Թուրքիայի խորհրդարանի արտաքին հարաբերությունների հանձնաժողովում, եւ հենց վերջինիս դրական եզրակացությունից է կախված դրանց հետագա ճակատագիրը:

Վաղը Երեւանի «Հանրապետական» մարզադաշտում Հայաստանի ազգային հավաքականը Եվրոպայի 2012 թվականի առաջնության ընտրական փուլի 1-ին տուրում հյուրընկալելու է Իռլանդիայի հավաքականին: Հյուրերը արդեն ժամանել են Երեւան, ընդ որում, նրանց կազմում բացակայում են մի քանի առաջատար ֆուտբոլիստներ, մասնավորապես Հայաստանի դեմ չեն խաղա Դամիեն Դաֆը, Կեյտ Էնդրյուսը եւ այլն: Իռլանդացիների շարքում լուրջ անհանգստություն կա Երեւանում կայանալիք խաղից առաջ: Պաշտպան Շոն Լեջերը, մասնավորապես, Independent հանդեսին երեկ տված հարցազրույցում նշել է. «Առաջիկա 2 խաղերում բոլորը մեզնից 6 միավոր են պահանջում (սեպտեմբերի 7-ին Իռլանդիան հյուրընկալելու է Անդորային-հեղ.): Բայց բոլոր թիմերն էլ ունեն ուժեղ ֆուտբոլիստներ: Հայաստանի կազմում հանդես է գալիս պոտենցիալ գերաստղ Հենրիխ Մխիթարյանը, որը օրեր առաջ 6 միլին եվրոյով տեղափոխվեց Դոնեցկի «Շախտյոր»: Հիշո՞ւմ եք, անցյալ տարի մեր երիտասարդականը Երեւանում 1-4 հաշվով զիջեց հայերին, ու այդ խաղից հետո հեռացվեց մարզիչ Դոն Գիվենսը: Այն ժամանակ շատ էր խոսվում նաեւ այն մասին, որ հայ ֆուտբոլիստներից մեկն էլ հեթ-տրիկի հեղինակ էր դարձել. դա հենց Հենրիխ Մխիաթարյանն էր: Հայաստանը անհայտ մեծություն է, քանի որ նրա ֆուտբոլիստների մեծամասնությունը չի խաղում հեղինակավոր առաջնություններում: Բայց ես տեսել եմ նրանց խաղը սեփական հարկի տակ: Կարծում եմ` բավական դժվար խաղ է լինելու, ու պիտի շատ չարչարվենք, որ 3 միավոր բերենք Երեւանից»: