Ռիտա Սարգսյանի համար մեկ է

Համերգից ստացված ողջ հասույթը փոխանցվելու է «Նվիրիր կյանք» բարեգործական հիմնադրամին: Նշենք, որ երեկ հանդիսատեսին անակնկալ էր սպասում. համերգի ավարտից առաջ բեմ բարձրացավ եւ վերջին` «Արեւ ենք միասին» երգի ժամանակ փոքրիկ երգիչներին ռոյալի վրա նվագակցեց Ռիտա Սարգսյանը: Թեեւ մինչ այդ վատ հնչողության պատճառով դժվար էր հասկանալ, թե հայտարարվող երգի մասին ինչ է ասում համերգի «նավավար», հաղորդավար Ավետ Բարսեղյանը, սակայն ավելի ուշ պարզվեց, որ այդ երգի երաժշտության հեղինակը Ռիտա Սարգսյանն է: Ստորեւ ներկայացնում ենք նրա հետ զրույցը:

- Տիկին Սարգսյան, հետաքրքիր է իմանալ` դուք ձեր ամուսնու հետ քաղաքական թեմաներով զրույցներ ունենո՞ւմ եք:
- Ոչ: Երբեք: Երբեք: Չեմ սիրում քաղաքական թեմաներ:

- Բայց հաջողվո՞ւմ է խուսափել այդ թեմաներից` հաշվի առնելով` ով է ձեր ամուսինը:
- Այո, եթե չփորձես խոսել, պատասխան էլ չես ստանա: Չեմ սիրում քաղաքականություն:

- Իսկ այդուհանդերձ, քանի որ առաջիկայում խորհրդարանական ընտրություններ են (այդքանով, կարծում եմ, հետաքրքրվում եք),  ձեր կարծիքով` ինչպիսի՞ պատկեր կունենա ապագա խորհրդարանը:
- Չգիտեմ: Ազնիվ խոսք եմ ասում, չեմ հետաքրքրվում: Չեմ սիրում:

- Իսկ ինչո՞վ եք հետաքրքրվում:
- Հետաքրքրվում եմ իմ մասնագիտությամբ, այ նրանով, ինչ որ տեսաք, բարեգործությամբ: Ինձ թվաց` դու երգի մասին մի քանի հարց կտայիր, որը ծնվել է երկու շաբաթ առաջ:

- Ճիշտն ասած` շատ աղմկոտ էր, լավ էլ չհասկացա, չլսվեց` ով էր գրել երգը եւ այլն:
- Հա՜: Երգի երաժշտությունը գրել եմ ես, բառերը` Ավետ Բարսեղյանը: Այդ երգը մեր ֆոնդի, չեմ սիրում այդ բառը, բայց թող լինի` հիմնը:

- Իսկ Բելլա Քոչարյանի հետ հանդիպո՞ւմ եք: Եւ ընդհանրապես ի՞նչ հարաբերություններ ունեք:
- Բելլա Քոչարյանը, կարելի է ասել, իմ մարտական ընկերուհին է: Իհարկե` հանդիպում եմ: Մենք միասին նկուղներում, միասին պատերազմում ենք անցկացրել: Ինչպե՞ս կարելի է դրանից հետո իրար չհանդիպել:

- Իսկ ի՞նչ եք կարծում` ձեր ամուսինը հաջորդ նախագահական ընտրություններից հետո կշարունակի՞ պաշտոնավարել երկրորդ ժամկետում:
- Չգիտեմ: Ճիշտն ասած` ինձ համար մեկ է:

- Մե՞կ է: Ինչո՞ւ:
- Դե, ինձ համար մեկ է` նախագահ կլինի՞, թե չէ:

Հ.Գ. Ի դեպ, համերգի ավարտից հետո, մինչ Ռիտա Սարգսյանը կմոտենար ավտոմեքենային, Երեւանի քաղաքապետարանի կրթության վարչության պետ Գայանե Սողոմոնյանը վարորդին ինչ-որ գրություն տվեց եւ խնդրեց փոխանցել: Գ. Սողոմոնյանը, որը ՀՀ վերահսկիչ պալատի նախագահ Իշխան Զաքարյանի կինն է, նույնպես Օպերային թատրոնից էր դուրս եկել: