Հուլիսի 13-ին լսումներ ԱՄՆ Սենատում

Արդեն մեկ ամիս է` ՀՀ-ում ԱՄՆ դեսպան Մարի Յովանովիչը, ավարտելով իր առաքելությունը, հեռացել է Հայաստանից: Երեկ այդ մասին մեզ հայտնեց ԱՄՆ դեսպանատան մամուլի հարցերով պատասխանատու Թագուհի Ջահուկյանը: ԱՄՆ Սենատի Արտաքին հարաբերությունների հանձնաժողովի պաշտոնական կայքից տեղեկանում ենք, որ հուլիսի 13-ին այդ հանձնաժողովում տեղի են ունենալու լսումներ. օրակարգում մի շարք այլ հարցերից զատ ընդգրկված է Ջոն Հեֆֆերնի թեկնածության քննարկումը ՀՀ-ում ԱՄՆ դեսպանի պաշտոնում: Մայիսի 19-ին Հեֆֆերնի թեկնածությունը Սենատին էր առաջարկել ԱՄՆ նախագահ Բարաք Օբաման: Բայց Սենատում հաստատվելուց առաջ Հեֆֆերնը դեռ պետք է ստանա Արտաքին հարաբերություների հանձնաժողովի դրական եզրակացությունը: Դեսպանի նոր թեկնածուն ներկայումս ՆԱՏՕ-ում ամերիկյան առաքելության ղեկավարի տեղակալն է: Սպասվում է, որ ԱՄՆ հայկական լոբբին առաջիկայում կփորձի Հեֆֆերնից մեկնաբանություն ստանալ 1915 թ. Ցեղասպանության վերաբերյալ: Մեծ է հավանականությունը, որ Հեֆֆերնը այդպես էլ Ցեղասպանություն բառը չի ասի: Պետք է հիշել միայն, թե ինչով ավարտվեց 2004-ին ՀՀ-ում ԱՄՆ դեսպան Ջոն Էվանսի կողմից այդ բառն արտասանելը: 2006-ին Էվանսը հետ կանչվեց: Նույն թվականի մայիսի 24-ին ԱՄՆ նախագահ Ջորջ Բուշը նրա փոխարեն ՀՀ-ում ԱՄՆ դեսպանի պաշտոնում առաջադրեց Տաջիկստանում ԱՄՆ-ի արտակարգ եւ լիազոր դեսպան Ռիչարդ Հոգլանդի թեկնածությունը: Երկարատեւ ձգձգումներից հետո Սենատը մերժեց Հոգլանդի թեկնածությունը, եւ մոտ երկու տարի ԱՄՆ-ն Հայաստանում դեսպան չուներ: Մարի Յովանովիչը ՀՀ-ում ԱՄՆ դեսպան նշանակվեց 2008-ի սեպտեմբերին: