#2938

Մաքսայինը որոշել է վերանայել Չինաստանից ներկրվող ապրանքների հսկիչ գները եւ վերանայելու է, բնականաբար, բարձրացման ուղղությամբ: Ի՞նչ է սա նշանակում: Եթե նախկինում դուք Չինաստանից, ասենք, աթոռ էիք ներկրում, ապա դա մաքսազերծելիս մաքսավորները արձանագրում էին, որ դրա հսկիչ գինը, ասենք, 10 դոլար է: Այդ դեպքում դուք վճարում էիք 2 դոլար ավելացված արժեքի հարկ, եւս 1 դոլար մաքսատուրք, եւ աթոռը մաքսազերծված է: Ըստ մեր աղբյուրների, հավանաբար հենց փետրվարի 1-ից հսկիչ գինը կարող է բարձրանալ 10-20 տոկոսով: Այսինքն, այդ նույն աթոռի հսկիչ գինը 10 դոլարից կդառնա 11 կամ 11.5 դոլար: Իսկ դա նշանակում է, որ ձեր ներկրած աթոռը մաքսազերծելու համար, ընդհանուր առմամբ, պետք է վճարեք ոչ թե 3 դոլար, ինչպես մինչ այժմ, այլ արդեն մոտ 3.5 դոլար: Մի աթոռի մեջ մաքսազերծման ծախսի մեծացումը այնքան էլ մեծ չէ, բայց 10 կամ 100 աթոռի մեջ արդեն զգալի է: Իսկ եթե հաշվի առնենք, որ տարեկան Չինաստանից ներկրվող ապրանքների ընդհանուր ծավալը կազմում է մոտ 400 միլիոն դոլար, ապա պատկերը ավելի հստակ կդառնա: Հսկիչ գների բարձրացման արդյունքում, կոպիտ հաշվարկներով, ՀՀ պետբյուջե կմուտքագրվի մի 20 միլիոն դոլար ավելի գումար:

Ոստիկանության լրատվական ծառայության աշխատակից Արմեն Մալխասյանը երեկ հաստատեց, որ ԲՀԿ-ից եւ Արարատի փոխքաղաքապետի պաշտոնից վերջերս հեռացած Կարեն Խաչատրյանը նախօրեի երեկոյան նշանակվել է ոստիկանության Արարատ քաղաքի բաժանմունքի պետ: Երբ նախօրեի երեկոյան մեր թղթակիցը զանգահարել էր Խաչատրյանին եւ խնդրել հաստատել կամ հերքել մեր ունեցած տեղեկությունը, նա ասել էր, որ տանը նստած է, ոչ մի տեղ աշխատանքի չի գնացել, ոչ մի պաշտոնի չի նշանակվել: «Բայց ուրախ կլինեմ աշխատել այդ համակարգում, որովհետեւ ես միշտ էլ ասել եմ, որ զինվորական եմ, ուզում եմ ծառայել իմ պետությանը»,- հավելել էր Խաչատրյանը: Չնայած նրա այս հայտարարությանը, երեկ տեղեկություններ էին շրջում, որ Խաչատրյանն ինքն է դիմել ոստիկանապետ Վովա Գասպարյանին` խնդրելով իրեն այդ պաշտոնին նշանակել: Ի դեպ, այս նշանակումով նաեւ հասկանալի դարձավ, թե ինչ գնով էր Խաչատրյանը լքում ԲՀԿ-ն եւ հայտարարում, որ ուզում է լինել Սերժ Սարգսյանի կողքին: Համաձայնեք, որ ահագին հավատարիմ կադր կարող է ստացվել:

Կիրակի օրը վարչապետ Տիգրան Սարգսյանն ընտանիքի հետ այցելել է սպարապետ Վազգեն Սարգսյանի թանգարան, այնուհետեւ հյուրընկալվել է նրա հայրական տանը: Այդ մասին իր բլոգում նա գրել է հետեւյալը. «Գրետա մայրիկը զավակներիս մի չափազանց հետաքրքիր գրքույկ նվիրեց, որ կոչվում է` «Վազգենը»: Այս փոքրիկ գրքույկում Վազգենի ստորագրությամբ ավարտվող նրա մտքերը հրապարակվում էին առաջին անգամ: Գրքույկը ավարտվում է Վազգենի հետեւյալ խոսքով. «Ես դեռ համոզված չեմ, թե վերջն ինչ է լինելու. ես Հանրապետական կուսակցության համագումարում էլ ասացի` հանրապետության առաջին նախագահ Լեւոն Տեր-Պետրոսյանը մեզ բոլորիս վրա շատ մեծ պատասխանատվություն թողեց` մենք դեռ պիտի ապացուցենք, որ ճիշտը մենք էինք, այլ ոչ թե ինքը, եւ դափնիների հարցը դեռ վերջնականապես լուծված չէ»:

«Սիրելի Վազգեն, Դու, քո զինակիցները, համախոհները, ընկերները եւ եղբայրները, որ մշտապես քո կողքին էին, ապացուցեցին, որ դափնիների հարցը վերջնականապես լուծված է: Ինչպես այն օրերին, այնպես էլ այսօր` դափնիները քոնն են»,- իր բլոգում գրել է Տիգրան Սարգսյանը:

Պատճառն այն էր, որ ակումբի ղեկավարությունը Հովհաննիսյանին չէր տեղեկացրել, որ իր հետ բանավեճի է հրավիրվել «Հայ-ռուսական միավորում» հ/կ-ի նախագահ Ռոբերտ Ահարոնյանը: «Ես ձեր կազմակերպությունը չեմ ճանաչում, ես չեմ ուզում բանավիճել ձեզ հետ»,- ասաց Հովհաննիսյանը, եւ բանավեճը չկայացավ: Մենք, այնուամենայնիվ, մեր հարցերը ուղղեցինք քաղաքագետին:

- Պարոն Հովհաննիսյան, ձեր կանխատեսմամբ, առաջիկա ընտրություններում ո՞ր ուժերը կանցնեն խորհրդարան: Գրեթե հայտնի են նրանք, որոնք մասնակցելու են ընտրություններին:
- Հիմնական մրցակիցների շրջանակը հայտնի է, եւ ես դեռ ամիսներ առաջ այդ մասին խոսելով արձանագրել եմ, որ Ազգային ժողով մտնելու շանս ունեցող ուժերին պայմանականորեն կարելի է բաժանել ա եւ բ խմբերի: Ա խմբի մասնակիցները հիմնական մրցակիցներն են եւ Ազգային ժողովում հայտնվելու հիմնական հավակնորդները: Հենց նրանց միջեւ էլ սուր մրցակցություն է ընթանալու:

Երեկ հայտնի դարձավ, որ ՀՀԿ-ն որոշել է թիվ 18 ընտրատարածքում (Արարատի մարզ), որտեղ գործող պատգամավորը ՀՀԿ-ական Մանվել Ղազարյանն է, սատարել ԱԺ մեկ այլ պատգամավորի` Արայիկ Գրիգորյանին` Ավշարի Արայիկին: Ավշարի գինու գործարանի սեփականատերը 2007-ին խորհրդարան է մտել Դաշնակցության համամասնական ցուցակով եւ հիմա էլ նույն խմբակցությունից է: ՀՀԿ-ի ՀՅԴ-ական թեկնածուի դեմ էլ ԲՀԿ-ից առաջադրվելու է ոստիկանության ներքին զորքերի նախկին տխրահռչակ հրամանատար Գրիգոր Գրիգորյանը` Շերիֆը: Հիշեցնենք, նա 2008-ի Մարտի 1-ի իրադարձությունների առանցքային մասնակիցներից է, որի գործողությունների հետ կապված բազմաթիվ անպատասխան հարցեր կան: Հայտնի դարձավ նաեւ, որ ՀՀԿ-ն որոշել է, որ ԱԺ գործող պատգամավոր Խաչիկ Մանուկյանը, որը 2007-ին խորհրդարան մտավ թիվ 15 ընտրատարածքից (Արագածոտնի մարզ), այս անգամ մեծամասնականով չի առաջադրվելու: Այստեղ կառաջադրվի Թալինի գործող ՀՀԿ-ական քաղաքապետ Մնացական Մնացականյանը: Գրել էինք նաեւ, որ ապագա ԱԺ-ում, ըստ որոշ տեղեկությունների, չի լինելու նաեւ ՀՀԿ խմբակցության պատգամավոր Գրիգորի Մարգարյանը` Բելաջիոյի Գրիշը, որ ԱԺ էր մտել թիվ 11 ընտրատարածքից: Մարգարյանը մեզ հետ զրույցում պնդել էր, որ մեծամասնականով առաջադրվելու է: Մեր աղբյուրները, սակայն, հայտնում են, որ ՀՀԿ-ն որոշել է նրան այս ընտրատարածքում չսատարել, այլ փոխարենը ՀՀԿ-ից առաջադրել գործող պատգամավոր, առեւտրաարդյունաբերական պալատի նախագահ Մարտին Սարգսյանին:

Ըստ Տեր-Պողոսյանի փաստաբանից վերջերս ստացած տեղեկությունների` դատապարտյալը տառապում է աղիքային քաղցկեղով, ինչի համար նախկինում ԱՄՆ-ում բուժվել է: Տեր-Պողոսյանին քաղաքային հիվանդանոց տեղափոխելու լուրը հաստատեց առողջապահության նախարարության քրեակատարողական վարչության հասարակայնության հետ կապերի վարչության պետ Գոռ Ղլեչյանը, բայց դժվարացավ ասել, թե որ հիվանդանոց են տարել, այնտեղ որքան կպահեն եւ ընդհանրապես երբեւէ կվերադարձնե՞ն «Երեւան-Կենտրոն» ՔԿՀ, թե ոչ: Երեկոյան հիվանդանոցից մեզ տեղեկացրին, որ Տեր-Պողոսյանը գտնվում է հիվանդանոցի կոլոպրակտալոգիայի (աղիքային հիվանդությունների բուժման) բաժանմունքում եւ այսօր առավոտյան վիրահատվելու է: Հիվանդանոցի տնօրեն Արթուր Թամազյանին խնդրեցինք տեղեկացնել, թե իրենց հետազոտությամբ ինչ հիվանդություն է հայտնաբերվել Տեր-Պողոսյանի մոտ. Թամազյանն ասաց, որ այդ տեղեկությունը հեռախոսով չի կարող մեզ տրամադրել եւ առաջարկեց այսօր այցելել հիվանդանոց: 

2010 թվականի հունիսի 18-ից կոմայի մեջ գտնվող Անդրանիկ Արզումանյանի մայրը` տիկին Անժելան, երեկ մեզ հայտնեց, որ ստացել է շուրջ մեկ ամիս առաջ պաշտպանության նախարար Սեյրան Օհանյանին հասցեագրված նամակի պատասխանը: Նամակում նա խնդրել էր կազմակերպել Անդրանիկի բուժումը արտերկրում: Դեպքից հետո զինծառայողը գտնվում է ՀՀ ՊՆ կենտրոնական կլինիկական զինվորական հոսպիտալում. բժիշկները մի քանի ամիս առաջ զինծառայողի մորն ասել էին, որ արդեն արել են ամեն ինչ, ինչով կարելի էր օգնել Անդրանիկին: Տիկին Անժելան երեկ մեզ հայտնեց, որ Սեյրան Օհանյանը իր պատասխանում նշել է, որ արտերկրում Անդրանիկի բուժումը կազմակերպել հնարավոր չէ: «Բայց ես հույսս չեմ կտրում: Արդեն նամակ եմ գրել Եվրոպական մի քանի երկրների մասնագետների»,- երեկ ասաց Անդրանիկի մայրը: Անդրանիկ Արզումանյանը վիրավորվել էր ԼՂ Չայլու գյուղի պաշտպանական դիրքերում` ադրբեջանցի դիվերսիոն խմբի գործողության հետեւանքով:

Հունվարի 25-ին փոխարտգործնախարար Աշոտ Հովակիմյանն ընդունել է Հարավային Կովկասում հակամարտությունների հարցերով ԵԱՀԿ-ն նախագահող Իռլանդիայի հատուկ ներկայացուցիչ, դեսպան Փեդրեյք Մերֆիին եւ քննարկել Լեռնային Ղարաբաղի հիմնախնդրի կարգավորման բանակցային գործընթացում տեղի ունեցած վերջին զարգացումները: Քննարկվել են ԼՂ խնդրի հարցում հակամարտող կողմերի միջեւ վստահության ամրապնդման միջոցառումների իրականացման, ինչպես նաև բանակցային գործընթացին աջակցություն ցուցաբերելու եղանակները:

ՀՀ ԿԳ նախարար Արմեն Աշոտյանը երեկ ընդունել է մեր երկրում Չինաստանի դեսպան Թիան Չան Չունին: Ընդգծելով, որ ՀՀ կառավարությունը կրթությունը դիտարկում է գերակա ոլորտ` նա կարեւորել է հայ-չինական նոր կրթական նախաձեռնությունների իրականացումը: Աշոտյանը ներկայացրել է ՀՀ կրթության ոլորտի բարեփոխումները եւ պատրաստակամություն հայտնել Հայաստանում հիմնել չինարենի խորացված ուսուցմամբ ավագ դպրոց` չինարենը ներառելով պետական կրթական ծրագրերում, որպես օտար լեզու:

Հունվարի 25-26-ը Բրյուսելում տեղի է ունեցել ՀՀ-ԵՄ ասոցացման համաձայնագրի բանակցությունների 8-րդ լիագումար նիստը: Հանդիպման ընթացքում պայմանավորվածություն է ձեռք բերվել Եվրահանձնաժողովի ներքին գործերի գլխավոր տնօրինության հետ` ԵՄ երկրներ ՀՀ քաղաքացիների մուտքի վիզաների դյուրացման շուրջ բանակցությունները փետրվարի վերջին սկսելու վերաբերյալ:

Ներհայաստանյան անհեռանկար քաղաքական իրարանցման, արտագաղթի ծավալների ահագնացող աճի, ինքնասպանությունների պարբերականության,  ցածրարժեք բնազդների եւ բարքերի հրավառության մեջ Հայաստանին բաժին ընկած երկնակտորում թանձրանում է անհուսության եւ անզորության հեղձուկը, որը, աստիճանաբար դուրս մղելով մթնոլորտի թթվածինը, խորանում է` անհատներից անցնելով զանգվածներին` նրանց դատապարտելով շնչահեղձության: Տարիներ շարունակ կուտակված հասարակական բողոքը, անհամաձայնությունն իշխանության եւ ընդդիմության հետ, ելք են որոնում եւ չգտնելով այն` խեղդամահ են լինում:

Ես նայում եմ ինքնակեղեքվող այս հանրությանը եւ հրաժարվում եմ հավատալ, որ նա անհուսությունից համակերպվել է սեփական երկրում զանգվածային այս ինքնասպանության հետ: Ես խոսում եմ փոփոխություններից հույսը կտրած այս հանրության հետ եւ հրաժարվում եմ հավատալ, որ փոփոխությունների դարպասներն այլեւս կողպված են: Ես գոռում եմ փոփոխությունների հանդեպ վեհերոտ այս հասարակության ականջին, բայց նա հրաժարվում է լսել ու հավատալ, որ այդ փականների բանալիներն իր գրպանում են:

Ես հրաժարվում եմ հավատալ, որ այս անհուսության եւ անզորության հեղձուկն, ի վերջո, ինձ էլ կհասնի: 

Հայաստանում գործող մանկաբույժները շուրջ 700 են` այն դեպքում, երբ, օրինակ 1990 թվականին նրանց թիվը 2 հազարի սահմաններում էր: Մանկաբույժների սակավությունն առավել ցայտուն է արտահայտվում մարզերում, որտեղ վերջին 5 տարիների ընթացքում ուսումն ավարտելուց հետո աշխատանքի ընդունվելու համար չի դիմել ոչ մի մանկաբույժ (սա, իհարկե, ոչ միայն մանկաբույժներին հատուկ խնդիր է): Մարզերում գործող մեկ բժիշկը մինչեւ 2 հազար 400 երեխա է սպասարկում, իսկ Երեւանից դուրս ապրող բնակչության շուրջ 27 տոկոսը, որոնք երեխաներ են, կրում է բժշկական ռեսուրսների խիստ պակասի հետեւանքները: Այս պատկերը ստացվել է «Վորլդ Վիժն» կազմակերպության եւ «Արաբկիր» բժշկական կենտրոնի համատեղ ուսումնասիրությունների արդյունքում: Ու փաստորեն, Հայաստանում մանկաբույժ-հիվանդ նման հարաբերակցություն է ստեղծվել` անկախ այն բանից, որ Հայաստանում ծնելիությունը 1990 թվականի համեմատությամբ էականորեն նվազել է: Այդ տարի, պաշտոնական վիճակագրության համաձայն, ծնվել է 80 հազար երեխա, իսկ, օրինակ, 2010-ին` ընդամենը 45 հազար:

Քաղաքացիները երեկ ահազանգում էին, որ ՀՀ աշխատանքի եւ սոցիալական հարցերի նախարարության «Նորք» կենտրոնում, որը գտնվում է Երեւանի Կ. Ուլնեցու փողոցում, սոցիալական քարտ ստացողների հսկայական հերթեր են գոյանում, եւ սոցքարտ ձեռք բերելու նպատակի համար քաղաքացիները ժամեր են զոհաբերում: Նրանք հայտնում էին նաեւ իրենց իմացած պատճառը: Այն է` եթե նախկինում սոցքարտ կարելի էր ստանալ տարբեր տեղերից, ապա այժմ կենտրոնացված տարբերակն է գործում: Նախարարության հասարակայնության հետ կապերի բաժնի պետ Հասմիկ Խաչատրյանը հաստատեց մեկ կենտրոնից սոցքարտ տրամադրելու մասին տեղեկությունը եւ պարզաբանեց, որ հեշտացվել է քաղաքացիների գործը: Բաժնի պետի խոսքով, անցած տարեվերջից սոցիալական քարտերի տրամադրման էլեկտրոնային ծառայություն է գործում, եւ մարդիկ կարող են, հերթ կանգնելու փոխարեն, դիմում լրացնել «Նորք» կենտրոնի պաշտոնական կայքէջում, երկու աշխատանքային օրից գնալ եւ ստանալ սոցքարտը: Իսկ դիտարկումը, որ համակարգիչն այսօր շատերին հասանելի չէ, Հասմիկ Խաչատրյանի համար ընդունելի չէր:

ՀՀ մշակույթի նախարարությունն արդեն մի քանի օր է` ոչ հերքող, ոչ հաստատող պատասխան է տալիս մեր հարցին, թե որքանով է համապատասխանում իրականությանն այն տեղեկությունը, որ Հայաստանում այս տարի համերգ է ունենալու բրիտանացի հանրահայտ երգիչ, կոմպոզիտոր Էլթոն Ջոնը: Նշենք, որ ըստ որոշ տեղեկությունների` երաժիշտը Հայաստանում հանդես է գալու Վրաստանում կայանալիք համերգից հետո, որը նախատեսված է հունիսին:

Հունվարի 18-ին «Բարսելոնայի» գլխավոր մարզիչ Խոսեպ Գվարդիոլան դարձավ 41 տարեկան, եւ այդ օրը «Բարսան» Մադրիդի «Սանտյագո Բեռնաբեու» ստադիոնում չպարտվեց, դեռ ավելին` հաղթեց «Ռեալին» 2-1 հաշվով: Երեկ էլ արդեն «Ռեալի» գլխավոր մարզիչ Ժոզե Մոուրինյոյի ծննդյան օրն էր. պորտուգալացին դարձավ 49 տարեկան, ու նրա գլխավորած թիմը Բարսելոնի «Կամպ Նոու» ստադիոնում չպարտվեց «Բարսային»` 2-2: Երկու թիմերն էլ կարողացան ֆուտբոլային նվեր մատուցել իրենց մարզչին, բայց Մոուրինյոյի դեպքում ոչ ոքին «Բարսայի» հետ, անգամ` մրցակցի դաշտում, հավասարազոր էր պարտության. երկու խաղերի արդյունքում «Բարսելոնան» դուրս եկավ կիսաեզրափակիչ: Ամեն դեպքում, կարծում եմ, վերջին «Էլ Կլասիկոն» լավագույնն էր բոլոր այն հանդիպումներից, երբ թիմերը գլխավորում են Գվարդիոլան ու Մոուրինյոն, ընդ որում` «Ռեալը» ցույց տվեց պատկառելի ֆուտբոլ: Հարձակողական, դինամիկ, էմոցիոնալ, գեղեցիկ ֆուտբոլ ցուցադրեցին թիմերը, ու կրկին «Էլ Կլասիկոն» իր տեղը գրավեց ակումբային ֆուտբոլի բարձունքում: Վերջին շրջանում հաճախակի էին լսվում, թե «Ռեալ» - «Բարսա» հանդիպումները կորցրել են հետաքրքրությունը, բայց վերջին հանդիպումը ցույց տվեց, թե ինչու է ամբողջ ֆուտբոլային աշխարհը հետեւում այս թիմերի խաղին:

Մախաչկալայի «Անժին» բանակցություններ է սկսել բրազիլական «Ֆլամենգո» ակումբի հետ` լեգենդար ֆուտբոլիստ Ռոնալդինյոյին գնելու համար: Օգտվելով այն հանգամանքից, որ բրազիլական ակումբը արդեն հինգ ամիս չի կարողանում վճարել իր խաղացողների, այդ թվում` Ռոնալդինյոյի աշխատավարձը, «Անժին» բավական գայթակղիչ առաջարկություն է ներկայացրել, համաձայն որի` ռուսական ակումբը փակում է «Ֆլամենգոյի» պարտքը Ռոնալդինյոյին` մոտ չորս միլիոն եվրո, 31-ամյա ֆուտբոլիստի հետ կնքում է եռամյա պայմանագիր, սահմանելով տարեկան ութ միլիոն եվրո աշխատավարձ, եւ վերջապես տրանսֆերի համար վճարում կլորիկ գումար, որի քանակը առայժմ չի հրապարակվում: Ռոնալդինյոյին «Անժի» տեղափոխվելու խորհուրդ են տալիս հանրահայտ ֆուտբոլիստներ Ռոբերտո Կառլոսն ու Սամուել Էտօ՛Օ-ն, որոնք անցյալ տարի տեղափոխվեցին Մախաչկալան ներկայացնող թիմ:

Հասարակական կարծիքի ուսումնասիրության համառուսաստանյան կենտրոնը հրապարակել է օրերս Մոսկվայում եւ Սանկտ Պետերբուրգում անցկացված հարցումների արդյունքները, որոնց նպատակն է պարզել, թե այդ երկու քաղաքների բնակիչները որ ազգի ներկայացուցիչներին են ավելի շատ համակրում կամ հակակրում: Եվ այսպես, Մոսկվայում հարցվածների 3 տոկոսը նշել է, որ ամենամեծ համակրանքը տածում է հայերի հանդեպ: Սանկտ Պետերբուրգում հայերի հանդեպ համակրանք է տածում հարցվածների 2 տոկոսը: Մոսկվայում վրացիներին համակրում է հարցվածների 3, իսկ Սանկտ Պետերբուրգում` 2 տոկոսը: Ինչ վերաբերում ադրբեջանցիներին, երկու քաղաքներում էլ նրանց համակրողների թիվը 1 տոկոսից ցածր է, եւ կոնկրետ թիվ չի հիշատակվում: Մոսկվացիները ամենաշատը համակրում են հենց ռուսներին` 44 տոկոս, հետո բելոռուսներին` 17 տոկոս, ուկրաինացիներին` 15 տոկոս: Դրանից հետո մյուս ազգերի նկատմամբ համակրանքի ամենաբարձր ցուցանիշը 3 տոկոսն է:

Միաժամանակ, այն հարցին, թե որ ազգի հանդեպ են ամենամեծ հակակրանքը տածում, մոսկվացիների 6 տոկոսը նշել է հայերին: Սանկտ Պետերբուրգում հայերին հակակրում է հարցվածների 3 տոկոսը: Պետք է ընդգծել, սակայն, որ երկու քաղաքներում էլ «ամենահակակրելի ազգ» են նշվել կովկասցիները, համապատասխանաբար` 31 եւ 28 տոկոս: Մոսկվայում վրացիներին հակակրում է հարցվածների 9, Սանկտ Պետերբուրգում` 6 տոկոսը: Ադրբեջանցիներին Մոսկվայում հակակրում է 17, իսկ Սանկտ Պետերբուրգում` 11 տոկոսը: